Na Tomani Tiko ni iVakatakila me Yaga ki na Lotu

Me da mai duavata e na tomani tiko ni ivakatakila e lako mai vua na Kalou ki na Nona Lotu e na sala sa digitaka o Koya.

Tukuni e na Bula i Joseph F. Smith

Me vakataki iratou na Peresitedi e lima ni Lotu ka ratou liu vei Joseph F. Smith e taura talega na veidusimaki vakalou me qarava kina na Lotu kei ira na lewena. Ia e na iotioti ni vica na vula ni nona bula, na iubi e tawasei koya mai vua na Kalou sa laki mamare sara. E levu ga na nona gauna e dau vakamamasu voli ga kina ka vakanananu vakatitobu. E na 4 ni Okotova 1918, ni sa vo wale tiko ga e vica na macawa me mate kina, E qai kaya e na dua na lotuvakayabaki: “Au na sega, Au na sega ni douvaka, me’u tukuna yani e levu sara na veika e tiko e na noqu vakasama e na mataka vinaka edaidai, au na biuta toka mada vakawawa me dua tale na gauna mai imuri, e na gauna e na vakadonuya kina na Turaga, na noqu vinakata me’u tukuna yani vei kemuni na veika e tiko e na noqu vakasama, kei na veika e tiko e lomaqu. Au sega ni tiko walega e na lima na vula sa oti oqo. Au a masumasu tiko e na yalo ga ni masu, kere veivosoti tiko, e na vakabauta kei na noqu igu taucoko; Kau sa mai veitaratara sara tiko kei na Yalo Tabu ni Turaga vakawasoma.”¹ E na gauna vata sara tiko ga oya, e taura kina na ivakatakila me baleta na nodra sorovaki na mate, ka sa mai wase 138 tiko ni Vunau kei na Veiyalayalati.

E vakaraitaka o Peresitedi Smith na vinaka ni Kalou e na nona vakaraitaka tiko vua na veika e dodonu me kila e na nona veiliutaki tiko e na Lotu: “Au vakabauta ni sa vakaraitaka vei au na Kalou e na noqu mai taura tiko oqo na itutu vakaveiliutaki, e vuqa sara na veika lagilagi, e vuqa sara na ivakavuvuli, kei na levu ni vuku mai na veika au sa kila rawa tu; kau vakabauta e na tomana tiko ga mai ke vaka au na vakarorogo tiko ga, se dau vakarogoca na veika e dau tukuna, meu dau vakarorogo ni dau kacivi au, ka taura na veika e na gauna e via solia kina vei au.”²

iVakavuvuli i Joseph F. Smith

Eda vakabauta na ivakatakilai e solia vakadodonu mai na Kalou ki vua na tamata.

E da vakabauta … na ivakavuvuli ni kena soli mai vakadodonu na ivakatakilai mai vua na Kalou kivei ira na tamata.

Oqo e tiki tiko ni kosipeli, e sega soti sara ni duatani mai na kena e na itabagauna oqo. Oqo e dau kena ivalavala e na veigauna kece kei na tabagauna talega ni kosipeli. E na sega ni rawa ni cicivaki se me qaravi, na Lotu ni Kalou ke sega kina. E liutaka tiko na Lotu oqo na Karisito e sega ni o ira na tamata, e na rawa tiko ga oqori mai na ivakavuvuli ni kena tomani tiko na ivakatakila e soli mai vakadodonu. Na ivakavuvuli oqo e sega ni vakatau tiko e na veisolisoli vakawa, se me solia mai na tama vua na luvena tagane, se mai na dua na kawa tamata kina dua tale, io na ivakavuvuli oqo e bula tiko, e na rawa talega ni marautaki se me da kila na kena yaga, me vaka— na noda vakabauta taumada na Kalou kei na noda talairawarawa kina nona lawa kei na ivakaro. E na gauna e sa tamusuki kina na ivakavuvuli oqo, e na gauna vata talega oya e na ciri kina na Lotu, ka tawasei sara mai na kena iliuliu bula. E na ituvaki oya e sa na sega ni rawa ni tomani tiko, ka sa na sega talega kina ni Lotu ni Kalou, me vaka na waqa e na loma ni wasabula ka sega tu na kena kavetani, kabasi se na kena ivocevoce, ka sa mai veiciriyaki tu ga ka vakatau sara tuga e na loloma ni cava kei na ua ni veika e taleitaka na tamata, na veika vakavuravura era vinakata, na dokadoka kei na ivalavala lialia, na kena itinitini ga ni sa qai laki tao e na vakatevoro kei na rere.³

Me kilai tiko na tamata ni Kalou e tiko vei ira na dodonu e na nodra veiliutaki tiko me ra ciqoma na veidusimaki vakalou, io mai na nodra vakabauta era na vakayagataka na vuku vakalou me dusimaka tiko na veika e na nodra cakacaka, e na gauna sa vakayacori kina oya e na solia na kaukaua vei ira na tamata e na cakacaka era vakayacora tiko e na nodra itavi vua na Kalou.⁴

Au kila ni ivakavuvuli kece ni Kosipeli i Jisu Karisito, ka vakaraitaki kece vua na Parofita o Josefa Simici, e na veisiga e muri e vu taucoko mai vua na Kalou ka dina talega, e na tu me tawamudu—, kei na kena dina; e na sega ni rawa ni vukici. Au kila oqo e na yaloqu taucoko. E sa vakadeitaka taumada vei au na Kalou, mai na ivakaraitaki ni Nona Yalo Tabu, kei na veivakauqeti e vakayadrata na yaloqu, meu dau lomana na veika e vinaka, kei na yalo e vinakata me biu laivi na veika e ca.⁵

E sa dau vakaraitaka na Kalou na Yalona vei ira na tamata e na gauna oqo me vaka e na veigauna kece mai liu.

O ira na Yalododonu Edaidai … era vakadiandinataka i vuravura raraba ni Bula tiko na Kalou, ka vakaraitaka na lomana vei ira na tamata era vakabauti koya ka talairawarawa kina nona ivakaro, gauna oqo me vaka ga e na gauna makawa. Na yaca kece ni ivolanikalou e sebera ni se koya taucoko. E sebera talega ni vakaraitaka na Kalou e na dua na gauna ni na sega tale ni vosa tale vei ira na tamata. Ke vakadonui meda vakabauta ni sa vosa oti, me da vakabauta ga ni na vosa tikoga, baleta ni o koya e sega ni veisau rawa. …

Na cava na ivakatakila, na ivakaraitaki ga ni dina vou, mai vei koya ga na yavu ni dina? Ni da kaya ni sa sega ni yaga na ivakatakila vou, e tautauvata sara ga ni da kaya ni da sa sega ni vinakata na dina vovou—oqo e dua na itukutuku lialia. E da na rawa talega ni kaya, na ivakatakila e taura o Eparaama e sa rauti ira ga na parofita; me vaka na ivakatakilai e soli vei Inosi e sa rauti Noa ga, e a nona ilesielsi me taya edua na waqa ka me vunautaka talega na veivutuni; se na ivakatakila se na vosa e tukuni vei Mosese e sa rauta na gauna taucoko; se o koya e a soli vei Eparaama sa rauti ira na luvena e na vei gauna kece. Io e na sega ni vakaoya. Veitalia ga na nona a taleitaki o Eparaama ka soli vua na veiyalayalati lelevu, ia na vosa ni Kalou a sega tarovi me soli vei luvena o Aisake, se na makubuna o Jekope. Baleta na cava? Baleta o ira oqo era sega ni rawa ni vakayacora na nodra ilesilesi e na vosa walega ni Turaga vei tamadra kei na so tale. Io e na rawa vakacava vua na Tama ni Vakabauta me qarava na nona itavi mai na ivakamacala e taura o Noa? E na yaga vakacava na ivakatakila e soli vei ira na peteriaki se na parofita vei Pelami se o Paula? E dina, ni a vakayagataki me itukutuku makawa dina se me lesoni, io e sega ni yaga vei ira yadudua.

Io o keda e na gauna edaidai eda se wawa tu ga ka vinakata sara vakalevu! na kena soli tiko mai na ivakatakila, me da rawata yadua kina na noda ilesilesi e na rawa ni vakadonuya na Tamada, me da rawa ni cakacakataka ka vakayacora vakadodonu kina na noda vakabulai; me da kila talega na loma ni Kalou me baleta na nona Lotu, o ira na nona tamata, kei na nona inaki me baleta na vanua. Oqo e vica ga mai na udolu na veika e tiko me baleta na ivakatakila.⁶

E dau vakaraitaki Koya na Kalou e vuravura e na sala dodonu vakamatabete.

Mai vei Josefa [Simici], … E vakaraitaki koya mai kina na Turaga ivuravura, mai vei koya talega e digitaki ira kina na imatai ni qase ni Lotu—o ira na tamata yalodina; na tamata e kila o koya e rawa ni ciqoma na nona vosa, ka rawa talega ni cakacaka vata kei Josefa e na cakacaka levu ka bibi oqo, kei ira era sa tabaki ki na Matabete, kei ira kece talega era lesi ki na veitutu e na Lotu, era a ciqoma na kena veivakadonui e na sala vata tikoga oqo, e digitaki koya na Kalou ka tiko o Joseph me kena iliuliu. Oqo me kena ituvatuva, me kua tale ni dua. E na sega tale ni susuga cake mai na Kalou e dua tale na parofita se so tale na tamata me mai vakayacora na cakacaka e da sa lesi tu kina se digitaki kina me da vakayacora. E na sega ni guilecavi ira na tudei tu ka dina tu mai na ivakatekivu, ma vaka na nona cakacaka, kei ira na se dei tiko ga e na vakabauta, vakabibi sara ga na nodra tomana tiko mai na nodra vakabauta, kei na dina. E sega tale ni dua na taro e tiko e lomaqu era na lutu se era na sega ni na yalodina, vakaisoqosoqo, ke me dua e qai mai sega ni kilikili e na nona iserau, e na vakagalalataki ira o koya mai na nodra itutu ka kacivi ira tale mai na so me ra mai dabeca na idabebade oya.⁷

Na gauna e na tukuna kina e dua na tamata ni na sega ni vakarorogo kina lewa sa vakaturi tu e na Lotu, ke qasenivuli, matabisopi, lewe ni matabete e cake, ni nona kuoramu, se mai vei iratou na Mataveiliutaki Taumada, ni sa vakadeitaka e lomana ka vakayacora, e na gauna vata talega oya e sa na tawase mai kina mai na veika e na rawata se na veivakalougatataki ni Matabete kei na Lotu, ka na lutu talega mai na tamata ni Kalou, ni sa sega ni via kila na lewa sa tauca tu na Turaga e na nona Lotu. Oqo o ira na tamata ka sega ni dei tu na nodra vakasama, ka ra taura na veivakauqeti mai vei Setani, ka vinakata me liutaka na Lotu, ka dabe me vakatulewa e na matabete. Na sala vinaka duaduaga vei keda me da muria, yadua na tamata, me da bula ka yalomalua, ka kilikili ka yalodina vua na Kalou me da rawata kina, ka tiko talega veikeda na Yalo Tabu me da rawa kina ni lewa vakavinaka na veika kilikili, ka kila talega na duidui ni dina kei na lasu, na dodonu kei na cala.⁸

E na so na gauna e dau ka ni rarawa na noda dau raici ira na lewe ni Lotu qoroi, o ira e dodonu me ra sa kila vinaka, me ra soli ira me ra mai yaragi ni yalo ni veirawai. … E rairai dau dredre vei ira na tamata me ra ciqoma na cakacaka vakamatabete, na kena lewa dodonu, na veika e okati kina kei na kena kaukaua; io mai na rarama ga ni Yalo Tabu e na rawa ni da kila rawa kina, io ni da sega tiko ni kila, e na rawarawa sara vei ira na tamata me ra temaki e na yalo ni dauveirawai ka levu tu e vuravura. Era dau vakaliuci talega me ra vakabauta ni leqa tiko e dua na ka, e na qai yaco tale e dua na ka, e sa raici ira ka vakabauta talega ni ra a digitaki vakatabakidua me ra vakadodonutaka na veika kece. E dua na ka vakaloloma vei ira na tamata me ra coko e na veika oqo; me ra kila tiko na Yalododonu Edaidai, e na veigauna kece ga era bulataka tiko kina na tamata ni Kalou na bula savasava, ka doka tiko na itutu vakamatabete e sa vakatikori vei ira ka bulataka tiko e na vinaka taucoko ni nodra kila, me ra vakayacora vakavinaka na nodra ilesilesi, era sa digitaki kina mai na domodra na tamata kei na matabete, kei na veivakadonui ni Kalou, ka na tiko ga na sala ni veitaratara ni Turaga vei ira na luveni tamata, se me dua na itukutuku me vakaraitaki ki na nona Lotu, e na vakayacora ga o koya e na sala sa tuvani tu se dodonu vakamatabete; e na sega tale ni dua na sala e na vakamuria se, e na veigauna kecega e se tiko ga, se cicivaki tiko ga e na sala dodonu e vuravura na Lotu i Jisu Karisito ni Yalododonu Edaidai.

E sega ni nona itavi e dua na tamata me ra dauvakatakila, parofita, me daurairai, se me tamata dauveivakauqeti, me soli vakatakila se veidusimaki e na Lotu, se me tukuna tiko vei iratou na iliuliu ni Lotu e na veiyasai vuravura kece ga, me kua sara e na kedra maliwa mai Saioni, ni sa tiko vinaka kina na isoqosoqo vakamatabete, ka sa taucoko sara tu kina na isoqosoqo ni tabana levu.⁹

E na veika vakavuravura kei na veika vakayalo talega, Era na dau taura kina na Yalododonu na veidusimaki Vakalou kei na ivakatakilai me baleti ira duadua ga, io oqo e sega ni solia vei ira na kaukaua me ra vakatulewa se veiliutaki kina, ka me kua ni vakadonui ke sega ni veiganiti kei na veiyalayalati ni Lotu, ivakavuvuli se ivakarau, se na kena kilai na dina, na dina e vakaraitaki, se na vakasama vinaka ga. E sega ni dua na tamata e tiko vua na kaukaua me bacani ira na lewenilotu me ra vakaitavi e na cakacaka vakailavo se me ra vakaitavi talega e na vakanuinui, se volivoli me kena inaki na vutuniyau mai muri, so tale na sala ni veivakaisini ka tukuna ni oqo e ivakatakila mai vua na Kalou, e na raivotu se tadra, vakabibi ni sa saqati tiko na domodratou na iliuilu kilai vakalotu raraba. Na Lotu ni Turaga “e vanua ni muri lewa” [V&V 132:8]. E sega ni lewai mai na isolisoli yadua ni tamata na vakaraitaki mai, io mai na ituvatuva kei na kaukaua ni Matabete Tabu ka tokoni e na laveliga kei na domo ni Lotu e na kena gauna dodonu ni lotuvakayabaki.¹⁰

Na yalo ni ivakatakila e rawa ni vakaduavatataka na tamata e na matanitu ni Kalou.

E sa tukuna vei keda na Turaga e na ivakatakilai mai vua na Parofita o Josefa Simici, kevaka dou sa sega ni duavata, dou sa sega ni Noqu [raica V&V 38:27]. E tukuna o koya meda duavata. Me da duabau.¹¹

Ke da vakamuria ka vakayacora na veika e vinakata na Yalo Tabu e na veigauna kece, e da na duavata sara, na veiqati, na vosa kudrukudru kei na kocokoco e na sega, eda na qaravi ira vagumatua na kai noda, me da vinaka kina. Io e da se raica tiko ga e na keda maliwa na veiba, na duidui ni vakasama kei na rai, e dua e yalo vinaka ka yalo ca tale e dua, kei na veika era raica na tamata, e duidui kina na nodra vakasama. Baleta beka na cava oqo? Baleta ni kosipeli e sa kumuni ira kece mai na veimataqali tamata, e da lalai e na koronivuli; eda se tekivu vulica na dina se na ivakavuvuli mai na kena itekivu, me vaka, na inaki levu ni Kosipeli ka sega so ni vinaka sara. E dua na vuna e a duidui kina na vakasama kei na vakanananu, baleta e so era sa sotava oti ka kila vakalevu cake na dina mai vei ira tale na so. Ia e na vakadeitaki beka na veika oqo ni kosipeli e da sa ciqoma e sega ni tiko kina na kosipeli e dodonu mera duavata kina na tamata e na dina? Sega. Na cava soti na ivakavuvuli e tukuni tiko me vakaduavatataka na vuvale vakatamata, ka vakavuna me da qarava kina e dua ga na Kalou vata ga, mo vakarorogo kina ivakasala ka lewai vata ga e na dua na domo? O ira oqo na ivakavuvuli ni ivakatakila, na kaukaua ni Kalou e vakaraitaki vei ira na Nona tamata, na nodra vakabauta e yalodra na tamata ni Kalou e tiko vua na kaukaua me vakatulewa ka veidusimaki, ka sega ni nodra dodonu na tamata me ra kaya ni sa vakakina; se gadrevi me ra vakamuria vakamataboko na tamata na ivakavuvuli oqo—ni sega ni kila kina e dua na ka.¹²

Laivi ira na Yalododonu me ra duavata; laivi ira talega me ra rogoca na domodra na tamata ni Kalou na veika e tukuni vei ira e daligadra ka vakarorogo kina ivakasala ka me rogoca na dina.¹³

Vakasaqara mo rawa ni veimaliwai ka duavata kei na Yalo Tabu. Me ra vakasaqara na yalo tabu oqo ka me taleitaki vinaka e na loma ni vuvale lailai ka yalo raramusumusu me vaka ga e na isoqosoqo cecere duadua kei na kuoramu. Laiva me vakarawarawataka na yalodra na tacida kei na ganeda, na itubutubu kei ira na gone lewe ni vuvale, kei na yalodratou talega na Mataveiliutaki Taumada kei iratou na Le Tinikarua. Laiva me vakameautaka ka vakamalumalumutaka na duidui e tiko e na kedratou maliwa na Mataveiliutaki e na iTeki kei na lewe ni matabose ecake, e na kedra maliwa talega na itokani e ra vakaitikotiko vata e na tabana levu. Me ra duavata kina na gone kei ira na qase, tagane kei na yalewa, na sipi kei ira na kena ivakatawa, na tamata kei na Matabete e na ivau ni vakavinavinaka, na veivosoti kei na veilomani, ka me rawa kina ni vakakila o Isireli na veivakadonui ni Turaga, me da na lako kece yani kina nona iserau e na yalo savasava ka sega kina na cala vei ira na tamata kece. Ka na sega kina na rarawa me baleta na veivakalougatataki e yalataki vei ira na qaravi Koya dina. E na soli vei ira na rogo lailai ni vosa ni Yalo Tabukei na yavu Vakalomalagi, na veimaliwai kei na agilosi, e na tomani tiko e na veigauna, ni sa lako oti na nona iyalayala ka na sega ni rawa me lutu!¹⁴

Me iUlutaga ni Vuli

Na cava na ivakatakila? Na cava na kena ibalebale e na noda dau kaya, na ivakatakila e “bula tiko ka ivakavuvuli bibi”?
Na cava e na yaco e na Lotu ke sega na ivakatakila, ke lako mai vakadodonu se na kena tomani tiko?
Na cava e vakaraitaka vei keda, ni se bera ni se taucoko na ivolanikalou? Eda na vakarautaka vakacava na yaloda me vakadonuya tale kina e so na ivakatakila mai na sala sa vakadonui ni matabete?
Na cava e bibi kina na kena tomani tiko mai na ivakatakila mai na nodrau gauna na parofita o Noa kei Mosese? Na veivakalogatataki cava e na soli vei keda ni tiko e dua na nona parofita bula e na gauna edaidai? E na vukei keda vakacava na parofita bula me da rawata kina na veika dredre e na veisiga.?
Na cava e dau lako ga mai kina na ivakatakila e na Lotu e na sala digitaki vakamatabete? Dina era na rawa ni taura yadua na tamata na veidusimaki Vakalou kei na ivakatakila me baleti ira, na cava e sega kina ni solia na kaukaua me dusimaki ira tale na so? (Raica V&V 42:11.)
E na sala cava soti era dau lasutaki kina o ira na lewenilotu e na nodra kila na kaukaua kei na lewa vakamatabete? Era dau qarauna vakacava na lewenilotu me ra kakua ni lasutaki vakaoqo?
E na rawa vakacava vei ira na lewenilotu e vuravura raraba me ra duavata kece e na inaki kei na dina? E da cokovata vakacava mai na kaukaua ni Yalo Tabu? Na cava e bibi kina me da duavata? (Raica V&V 38:27.)

Taba vata eke o Peresitedi Joseph F. Smith kei ira na liganicakacaka ni Turaga, o iratou na daukaulotu kei na lewe ni *Swiss German Mission,* e na vula o Okosita 1910. Vunauci ira kina na Yalododonu o Peresitedi Smith me ra duavata ka dau vakarorogo vei ira na italai ni Kalou, era sa dau vosa vakavulici ira (*Gospel Doctrine,* 261).