Veiqaravi e na Lotu

Meda veiqaravi e na yalo vakabauta e na noda ilesilesi mai na nodra veiliutaki o ira na iliuliu vakamatabete.

Tukuni e na Bula i Joseph F. Smith

Ena gauna e a veiqaravi tiko kina o Peresitedi Joseph F. Smith e na nona ilesilesi vaka iApositolo me 44 na yabaki ka Peresitedi ni Lotu me rauta e 9 na yabaki, e a vosa kina e na lotuvakayabaki ni vula o Okotova, 1910 ka kaya kina, “e sa marau dina na yaloqu e na mataka ni kua, ka soli talega vei au na galala e na gauna oqo me’u tukuna yani vei keimuni mai na gauna au se lailai kina me yacova mai na noqu cauravou, au yalataka kina vua na Kalou kei ira na nona tamata ni’u na dina tiko ga vei ira.” e vakamacalataka mai na gauna oya, e veiqaravi kina o koya e na yalodina e na veilesilesi taucoko e kacivi kina:

“Ni’u taleva lesu tale na veika au sotava e na noqu bula, Au sega ni raica rawa oqo, se vakasamataka e dua na gauna, mai na ivakatekivu ni veika au sotava e vuravura, me’u vakila kina, e na dua na gauna lekaleka walega, me’u vakamalua se vakacegu e na noqu vinakata se yalataka vua na Kalou kei ira talega na Yalododonu Edaidai, ni’u se cauravou tiko.… E na noqu itutu vaka italatala qase ni Isireli au tovolea e na noqu igu taucoko me’u dina e na noqu ilesilesi; Au na tovolea talega me vakayacori, dokai ka vakarabailevutaka na ilesilesi au kacivi kina. Ni’u sa mai lewe ni kuoramu kina ni Le Vitusagavulu, au vakila e yaloqu me’u dina e na ilesilesi oya, au sa qai tovolea, e na noqu vuku kei na igu taucoko me’u dina kina. Au sega ni kila se namuna e dua na gauna na ka au vakayacora e na ituvaki ni noqu bula au sega ni yalodina se dodonu e na veikacivi e na noqu ilesilesi vakamatabete se e na Matabete ni Luveni Kalou. Ni oti e dua na gauna, au a kacivi kina me’u lewe ni iapositolo, tabaki me’u iapositolo ka vakatikori me’u lewe ni iapositolo Le Tinikarua, au tovolea me’u doka na veikacivi oya, me’u dina kina, kei ira na taciqu, o ira na veitokani e na vakabauta, ki na veiyalayalati kei na itavi me baleta na ciqomi ni nona Matabete Tabu me vaka na i lesilesi ni Luve ni Kalou. Au sega ni kila ke’u sa bau vorata e dua na noqu itavi se na ka au a vakayacora e na ilesilesi oqo au kacivi kina. Au dau tovolea me’u yalodina e na veika kece.”¹

E vakauqeti ira na Yalododonu o Peresitedi Smith me ra dau solia na nodra gugumatua e na cakacaka ni Turaga ka qaravi koya e na yalodra taucoko—e na ilesilesi vakamatabete, e na veitabana e na Lotu, kei na veiilesilesi tale eso—ka nanuma tiko e na veigauna me ra dokai o ira na veiliutaki vakamatabete era kacivi ka veiliutaki.

iVakavuvuli i Joseph F. Smith

E soli mai na Matabete me qarava na lotu.

E sega ni soli mai na Matabete me dokai se me vakacerecerei kina na kaukaua ni tamata, me baleti ira ga na veiqaravi e na lotu, o ira na sa taura tiko na itutu vakamatabete era sa kacivi me ra cakacaka. Meda nanuma kece tiko na noda Turaga ka iVakavuvuli talega, ni oti na nona lolo balavu tiko mai, e mai malumalumu vakayago mai na ocaoca ni lolo ka tomana na sega ni kana, ka sega ni vinakata me vakamuria na veika e vinakata o Setani me vakayagataka o koya na nona lewa kei na kaukaua vakaMesaia me vakarautaka na veika e gadreva.

Na itutu dokai e solia na Kalou e cecere cake e na vuku vakatamata, ka vauci tiko kina e vica tale na itutu vakaMatabete Tabu, me kua ni vakayagataki se nanumi ni a vu mai vei ira na tamata; era a sega ni nakiti me isaluwaki se me ivakaraitaki ni dua na ka e caka sara vakamaqosa, io na kena inaki ga me ilesilesi ki na veiqaravi e na yalomalua ki na cakacaka ni iVakavuvuli eda vinakata meda qarava.²

Au sa raica e so na italatala qase ni nodra bula taucoko era sa dau “tu vakarau tu;” me ra lesi e na vanua ga era kacivi kina, ka sega mada ga ni vakasamataka e na dua na gauna lekaleka me taroga na veikacivi se na ilesilesi sa soli vei ira, era sega mada ga ni via tu me ra raica lesu na veika e yalodra tu vakavuravura, era sa soli ira mai e na nodra veilesi na tacidra e na cakacaka ka ni veiqaravi vei ira na tamata kei na Turaga.… Era sa tu vakawawa me vakaiira na dau yadra e na bogi, e lailai sara na gauna me ra vakasamataki ira kina.… Na veika e vakayacori oqo, era vakayacora sara tikoga mai lomadra, kei na nodra cakaca edau laurai ka cavuti tu me dredre; io me kena veibasai sara ga, e kauta mai vei ira na marau, na reki kei na yalo vakacegu e na veigauna kecega.… Era se tu ga vakawawa me ra vakavakarau tu ka yalodra dina me ra lako se mera tiko se na veika ga e gadrevi vei ira, me baleta e na veigauna kece, na nodra itavi vaka Matabete e bibi ka uasivi sara mai na nodra gagadre vakataki ira.³

Na bose e na veimacawa ni kuoramu vakamatabete … e na sega walega ni vakatoroicaketaki kina vakavinaka na kena kilai na veika vakamatabete baleta se na veika vakavuli, io mai na nodra soqoni ga na veitacini vakamatebete e na vei macawa era na vulica mai kina na itovo ni soqoni e na veigauna ni ra tamata ni Turaga.⁴

Oi kemuni na Kalou, ni vakakalougataka na Matabete Tabu, o ira na tamata vakaturaga, na tamata savasava, na tamata dina, tamata dokai, tamata yalodina, kei ira na tamata era sa soqoni ka levu sara vei ira mai na vei matanitu e vuravura baleta na nodra lomana na kosipeli; ka levu talega vei ira na sucu e na veiyalayalati ni Matabete Tabu, au masulaka vua na Kalou me vakalougatataki kemuni na taciqu, mai na levu ni Nona vinaka, ni Nona loloma cecere kei na loloma dina sara, mo ni rawa ni sautu e na vanua, ka mo ni Nona tamata vakaidina.⁵

Na Veisoqosoqo kece ni Lotu e katuba vei keda meda veiqaravi e na nodra veiliutaki na vakaitutu vakabete.

E veiliutaki na Matabete. E vakatulewa e na veika kece e na lotu. Sa nodra itavi na taura tiko na itutu vakaMatabete me ra qarauna ka raica tiko na isoqosoqo kece ni Lotu; e sega walega ni isoqosoqo vakamatabete, na isoqosoqo kece sara e cicivaki me baleti ira na tamata kece—na noda iSoqosoqo ni Veivukei, na nodra isoqososoqo na Cauravou kei na Goneyalewa, na isoqosoqo ni Lalai,… kei na veiisoqosoqo tale eso sa vakarautaki se tauyavutaki me baleta na nodra vakatoroicaketaki na tamata ni Kalou, me baleta na sautu ni dina kei na kilikili ni vanua. Na veisoqosoqo kece oqo e dodonu me ra taura na veiliutaki kei na veikawaitaki vakatama, na veiqaravi, veitokoni kei na nodra veikawaitaki titobu na iliuliu ni Lotu, me baleta na tabana levu se o iratou na mataveiliutaki taumada, baleta ni kawaitaka na Matabete na ituvaki ni veika e baleta na nodra tiko vinaka na tamata ni Kalou kei na kena tarai cake ka yavutaki o Saioni e vuravura. O ira kece na vei soqosoqo e sa tauyavutaki ka tabaki mai vua na Kalou me ra raici ira yani na dauveiliutaki me ra veiyaloni ka duavata e na nodra cakacaka, ka rokovi ira e na nodra itutu.⁶

E sega ni dua na veiliutaki e na Lotu i Jisu Karisito e tawasei, dui tikotiko, tiko icake se e na taudaku ni Matabete tabu se mai na kena lewa. E tiko na noda isoqosoqo ni Veivukei, isoqosoqo ni Cauravou kei na Goneyalewa, Lalai kei na isoqosoqo ni Matawilivola e na Sigatabu,… io o ira kece na isoqosoqo oqo era sega ni kuoramu se matabose vaka Matabete, era isoqosoqo ga ka tauyavutaki; mai na kaukaua ni Matabete tabu. Era sega ni tiko e tautuba, se icake se mani sega sara ga ni yacova yani. Era kila talega na ivakavuvuli vaka Matabete. E na veivanua ga era tiko kina era na tovolea tiko ga me ra vakayacora na veika vinaka, na vakabulai ni tamata vakayago se vakayalo.⁷

Au via tukuna na veika e gadrevi mai vei ira na iSoqosqo ni Veivukei, vakabibi na itutu ni veiliutaki e na isoqosoqo levu oqo, ni nodra itavi me ra raica ka qarava na veika me baleta na isoqosoqo kece ni marama e Saioni. Na nodra itavi se cakacaka me ra veiliutaki e na veisoqosoqo kece ni marama, e dodonu me ra vakayacora na veika oqo, ka tu taumada ka me rawa kina ni ra vakairabailevutaka na nodra ilesilesi.⁸

Mai na tauyavutaki ni soqosoqo ni veitabana e na Lotu e rawa kina me ra veivuke ka vakaraitaka talega e na nodra cakacaka na nodra yalovinaka ni veiqaravi ka solia eso na ivakaraitaki vinaka vei ira na cauravou kei na goneyalewa e dredre ni ra tarai e na isoqosoqo vaka Matabete. Me yacova mai na gauna oqo na isoqosoqo oqo e sa vakadavora ka rawata e so na veika vinaka sara me baleta na nodra cakacaka na lalai.⁹

Au masulaka vua na Kalou me vakalougatataka na veiisoqosoqo kece vakalotu mai na imatai ki na iotioti, me ra dau vakayacora na nodra cakacaka e na veigauna ka sega ni dabe wale tikoga me sega ni dua na ka e caka se guilecava me ra vakayacora na nodra itavi.… Eda na marau ka galala e na gauna ga eda vakayacora tiko kina na noda itavi se cakacaka e na kena vanua, ni da sa yalodina ka vakayacora tiko na noda cakacaka, e na gauna eda sa vakayacora tiko kina na veika oqo eda sa galala kina, ni da sa tiko e na liga ni Kalou ka sega e ligadra na noda meca.¹⁰

Meda cakacaka me baleta na nodra sautu se tiko vinaka kei na nodra vakabulai na tamata.

Keda sa vakayacora tiko na noda cakacaka, eda sa vakaitavi tiko e na dua na cakacaka lagilagi levu. E na gadrevi e na noda dui sautu yadudua, ni o ira na tagane kei na yalewa kece era solia na nodra veiyalayalati ni kosipeli, ni ra veivutuni ka papitaiso, me ra vakila o ira yadua ni sa nodra itavi me ra vakayagataka yadua na nodra kila ka, kei na galala sa solia vei ira na Turaga me vakatorocaketaki kina na veika vinaka me baleti Saioni kei na tauyavutaki ni nodra inaki e vuravura.¹¹

E dodonu meda na vinakata na vakayacora na cakacaka me baleta na sautu kei na vakabulai ni tamata—ka solibula ki na veika eda vinakata kei na veika eda vakila me ra vinaka kina na tamata kece, ka vinakata taumada mo vakayacora na veika e vakarota o koya sa Cecere Sara, e sega ni veika e lomada, meda qarava ga na inaki ni Turaga.… eda sa cakacaka tiko me baleta na vakabulai ni Yalo, ka da vakila ni oqo e dua na cakacaka levu e soli mai vei keda. Io e dodonu meda vakila ka soli bula e na veika kece, ke gadrevi me baleta na loloma ni Kalou, na vakabulai ni tamata, kei na qaqa ni matanitu ni Kalou e vuravura.¹²

Eda gadreva meda na raica na siga … na gauna era na vinakata kina me ra kila na nodra itavi na veimatabose kece vakaMatabete e na Lotu i Jisu Karasito ni Yalododonu Edaidai; e na vakayacora na nona itavi, e na vakairabailevutaka na nona veikacivi, ka vakayacora na nona itavi e na Lotu, e na kena vinaka taudua, me vaka na kila ka kei na veika e rawa ni vakayacora.… e vola na Turaga ka kila tiko mai na ivakatekivu, ka solia na galala e na Lotu me rawa ni wali taucoko kina na veika e gadrevi ka vakacegui talega mai na isoqosoqo ni Matabete. E dina ni dau tukuni tu na kena dau cicivaki vinaka na veika me baleta na Lotu. E dua ga na leqa ni o ira kece na veisoqosoqo oqo era se sega sara ni se toso vinaka se cici vinaka e na inaki se itavi e gadrevi kina. E na gauna era sa na taura vinaka kina na veika e vinakati me ra rawata, era na vakayacora kina vakavinaka kei na yalodina na nodra itavi, e na kaukaua kina na cakacaka ni Turaga ka kilai talega e vuravura.¹³

Na tamata yadua me ra vakila e yalodra na yaga ni nodra vakayacora na nodra itavi e na cakacaka levu edaidai. Meda vakasaqara yadua ka vakaitavi e na ke na vakaqiqici yani iliu. E taumada ka bibi taudua na nodra itavi yadua na vakaitutu ka tiko vei ira na lewa ni Matabete tabu me ra vakarabailevutaka ka doka na ilesilesi era sa vakatikori kina, e sega tale ni dua na vanua meda tekivu kina me vakayacori vakavinaka me vaka saraga e ke, vei keda yadua e na gauna eda sa vakasavasavataki keda kina vakayalo, savata na yaloda, vakadodonu taka na noda bula, vakadeitaka na nomu vakasama e na noda sa na vakayacora kece na noda itavi vua na Kalou kei ira na tamata, ka da sa vakarau talega ni veiliutaki e na veika vinaka e na noda matavuvale, e na noda itokotiko, kivei ira talega na veimataqali tamata kece.¹⁴

Na tagane kei na yalewa era yalodina vua na Kalou, o ira na yalomalua ka gu tiko ga vakaukaua me toso iliu, e na nodra vakayacora tiko na nodra cakacaka, sauma tiko na nodra ikatini, ka vakamuria tiko na lotu savasava ka sega ni cala e na iserau ni Kalou kei na Tamada, dau raici ira na luveniyali kei ira na yada, ni ra sa rarawa, me sa qarauni koya talega me kakua ni tauvi koya na duka ni ka vakavuravura [raica Jemesa 1:27], ka veivuke e na nodra qaravi na dravudravua; dau doka na Matabete tabu, e sega ni dau vakasabusabu, edau masu kei ira na lewe ni vuvale, o koya e ciqoma na Turaga e yalona, era na tara cake e dua na yavu e na sega ni rawata na matamata ni koro o etesi.; ni sa coka mai na dobui ka liwa na cagi, ka tabaka na vale koya, e na sega ni bale, ni sa tauyavutaki e na vatu ni dina tawamudu [raica Maciu 7:24–27].¹⁵

Me iUlutaga ni Vuli

Na ivakaraitaki cava i Jisu Karisito e vakavulica vei keda na vakayagataki ni lewa vakaMatabete?
Na noda tabaki kina Matabete e “lesilesi vakacava ki na noda veiqaravi malumalumu”?
Na cava na inaki ni mataisoqosoqo ni veitabana e na Lotu? E vakalougataki ira vakacava e na lewenilotu? Na cava e bibi kina na noda kila na veiliutaki vakabete e na veimataisoqosoqo?
Na cava na yaga ni veitokoni kei na dokai e na noda itavi kei na ilesilesi e na Lotu?
Na cava e dodonu meda vakila me baleta na “cakacaka ni kena vakabulai na yalo”? Na solibula cava soti era sa vakayacora e so na tamata me ra cakacakataka na noda vakabulai? Na cava o rawa ni solibulataka me baleti ira na so?
Na cava na ibalebale meda “qarauna vakavinaka” na noda itavi? Na cava e na yaco e muri ke yaco na veika oqo?
Na cava na kena ibalebale meda “gumatua e na noda toso iliu”? Na veivakalougatataki cava e na yaco vei ira na vakayacora?