Na Cakacaka Lagilagi ni Veivutuni kei na Papitaiso

E vinakati na veivutuni kei na papitaiso kevaka me da na mai tiko e na matanitu vaka silesitieli.

Tukuni e na Bula i Joseph F. Smith

E papitaiso o Joseph F. Smith e na 21 Me 1852 mai City Creek voleka toka kina vua-i-cake ni Rara ni Valetabu e Salt Lake City. Na kena cakacaka vakalotu e vakayacora o Peresitedi Heber C. Kimball, e lewe tiko ni Mataveiliutaki Taumada ka dua na itau voleka sara nei tamai Joseph o koya e vakaleqai me baleta na nona vakabauta. Ni vakamacalataka tiko na siga oya, e kaya o Joseph F. Smith: “E vakasaraga niu vakila e yaloqu kevaka au ivalavala ca e vaka e dina sara tu na noqu ivalavala ca—ni sa vosoti au; e sa sava dina na noqu ivalavala ca; e tara na yaloqu, e vaka ni’u vakila e yaloqu niu sega ni rawa ni vakamavoataka e dua na manumanu lailai taudua e na noqu butuka. Au vakila me vaka au vinakata meu vakayacora na veika vinaka e veivanua vei ira na ka kece. Au vakila na bula vou, e vou taucoko na veika au vinakata ka dodonu. E sega tale ni dua na ca e vo tiko e yaloqu. Au se gone lailai sara, e dina, e na gauna au a papitaiso kina; oqo na yalo e yaco mai vei au, au kila ni vu mai vua na Kalou, ka mai ivakadinadina bula e na veigauna vei au e na noqu ciqoma na Turaga.”¹

E na nona bula taucoko, e vakasaqara o Peresitedi Smith me doka na veiyalayalati e yalataka e na gauna ni nona papitaiso. E vakavulica na veivutuni mai na ivalavala ca, e taumada na kena qaravi na veiyalayalati oqo: “Au vakabauta na ivakavuvuli ni veivutuni, baleta au sa tovolea kau kila kina ni vinaka. Ke dua na gauna ca au a tukuna kina se vakayacora kina e dua na ka e vakacudrui kina na taciqu, au na sega ni yalovinaka kina se vakila na galala mai na ivakatagedegede ni veivakabobulataki, me yaniu lesu tale vua na taciqu oya ka veivutunitaka na noqu ivalavala ca ka vakadodonutaki au vua. E na vakamamadataki kina na noqu icolacola, ka vakakila talega kina na veika vinaka ni veivutuni ni valavala ca.”²

iVakavuvuli i Joseph F. Smith

Na Veivutuni kei na papitaiso e ivakavuvuli dina ni kosipeli.

Au via tukuna yani vei iko ni ivakavuvuli ni kosipeli e dina tiko ga—na ivakavuvuli ni vakabauta na Kalou, na veivutuni mai na ivalavala ca, na papitaiso me bokoci na ivalavala ca mai na kaukauwa ni Kalou, kei na kena tabaki me isolisoli ni Yalo Tabu; na ivakavuvuli oqo e dina ka vinakati sara ga e na nodra vakabulai na luve ni tamata, veitalia o cei o ira se na vanua era tiko kina.… E na sega ni dua na tamata e na curu rawa ki na matanitu vakalomalagi vakavo kena sucu tale e na wai kei na Yalo Tabu. Na ivakavuvuli oqo e dredre sara me biu ni sa vakaraitaka na Kalou. E sega walega ni vakaraitaka na Karisito, kei ira na nona tisaipeli mai na veitabagauna, e na gauna makawa, ia e na gauna edaidai, era vakayagataka tale tikoga na ivakadinadina oya ka vakaraitaka na veika oqo e vuravura. E dina tiko e na gauna oqo me vaka e na gauna oya, me da vakamuria na veika oqo.³

Me da dau vakamuria na lomai Tamada. Au dau rogoci ira vakawasoma na tamata ni ra dau kaya, “Na ka ga e gadrevi mai vua na tamata e na vuravura oqo me ra dodonu ka yalodei,” o ira na tamata oqo era na rawata na bulavakalou kei na lagilagi. Io, o ira era kaya oqo era sega ni nanuma na vosa ni Turaga, ka kaya, “Kevaka sa sega ni sucu tale na tamata, e na sega ni raica rawa na matanitu ni Kalou.” [Raica Joni 3:5.]… Veitalia se vinaka vakacava, se dokai vakacava, se mani yalodina vakacava, me curu e na katuba ka namata yani kina matanitu ni Kalou. E vinakata na Turaga. Io, ke sega ni vakadonuya se bese ni curu e na katuba ni qele ni sipi, e na sega ni rawa ni mai luveni ni Kalou ka veitacini kei Jisu Karisito.⁴

Na veivutunitaki ni ivalavala ca e ivakavuvuli tawamudu, e dodonu e na kena itikotiko, e tiki tale tiko ga ni kosipeli i JisuKarisito, me vaka na : “Me da kakua ni veivakamatei,” se, “me kua tale ni dua na Kalou mo ni qarava .”

Na Papitaiso me bokoci kina na ivalavala ca, mai vei koya e tiko vua na kaukauwa, e ivakavuvuli tawamudu, e tauyavutaka na Kalou, ka vakarota, na Karisito me vakamuria talega; e dodonu me vakamuri me rawati kina na lawa ni bula kilikili.⁵

E veivakavulici o Josefa Simici e na kaukauwa e solia vua na Turaga; na veivutuni ni valavala ca, qai papitaiso e na tabadromuci kei na Karisito, e rau bulu vata kei Koya e na wai, e na ibulubulu wai ka cabe tale mai e tautauvata e na Nona tucake tale mai na mate kina bula, na papitaiso e na tabadromuci, kei na papitaiso e naYalo Tabu, ni tabaki; e na veitabaki ni liga e vinakati oqo me baleta na nodra vakabulai na luveni tamata.⁶

Na veivutuni dina e na ciqoma na Kalou.

E na vakabulai ga na tamata ka bula rawa vakalou e na matanitu ni Kalou e na yalododonu, io, me da veivutunitaka na noda ivalavala ca, ka lako e na rarama me vakataka na Karisito ni tiko kina o koya, me na vakasavasavataki keda e na nona dra mai na noda ivalavala ca taucoko, ka me da rawa ni sikova kina na Kalou ka taura na nona lagilagi ka bula vakalou.⁷

Na veivutuni e tiko kina na rarawa ni da sa ivalavala ca? Io, na kena levu ga oqo? E sega walega. Na veivutuni dina duadua ga e ciqoma na Kalou, e na sega tale ni dua na ka e na vakadonui kina. Oya na veivutuni dina? Na veivutuni dina e sega wale ga ni rarawa me baleta na ivalavala ca, na veivutuni e na yalo raramusumusu kei na yalo bibivoro e na iserau ni Kalou, io, e okati kina me da vukitani mai kina, me tamusuki na ivalavala ca taucoko na kena vakayagataki kei na kena vakayacori, na taucoko ni kena veisau na bula, na veisau e gadrevi mai na ca kina vinaka, mai na itovo ca kina vinaka, mai na butobuto kina rarama. E sega walega ni koya oya, me da sosomitaka talega na veika e da vakacacana, e na kena levu taucoko, e na veika cala taucoko e da vakayacora, me da sauma kina na noda dinau, ka vakalesuya tale vua na Kalou kei na tamata na veika sa nodrau—na veika e dodonu me nodra ka tu vei keda. Oqo na veivutuni dina, kei na kena vakayagataki na yalo kei na kaukauwa vakayago kei na vakasama e vakaukauwataki, me rawa ni vakacavari kina na cakacaka lagilagi ni veivutuni; e na vakadonuya kina na Kalou.⁸

E na sega ni vakadonuya na Kalou kevaka me cavuti ga mai gusu na veivutuni vakavo sara ga kevaka me cakacakataki. Me tiko vei keda na cakacaka ka vakatalega kina na vakabauta; me da vakayacora ka sega ni veidabui walega.⁹

O cei e rawa ni tukuna e yalona, e na mata ni Kalou kei na tamata, “au sa veivutunitaka dina na noqu ivalavala ca.” … E levu na noqu malumalumu kei na ivalavala tawa kilikili. E levu talega na noqu malumalumu me vakataka e lewe levu vei kemuni, au sega ni kila io, e levu sara na noqu mai vei kemuni.… Kau se sega ni rawa ni bulataka tiko se rokova na ikarua ni ivakavuvuli ni kosipeli i Jisu Karisito; kau vinakata meu raica na tamata e sa vakayacora. Au vinakata talega na tamata dauvunau e sa vakayacora oti. Io, au na tovolea tiko ga, ka vinakata mo kila na taciqu kei na wekaqu, niu na tovolea tiko ga.¹⁰

O na sega ni rawa ni taura e dua na daulaba, … se dau yalewa, na daulasu, se e dua e vakasisila tu na nona ituvaki ni bula e na vurauvura oqo, me vakabulai e na kena vakayacori vua na cakacaka vakalotu ni kosipeli, me vakasavasavataki na nona ivalavala ca ka vakaliuci kina iserau ni Kalou. E se sega ni vakayacora na Kalou e dua na inaki vakaoya, e na sega ni rawa ni vakayacori. E tukuna o koya mo veivutunitaka na nomu ivalavala ca. O ira na tamata ivalavala ca me ra veivutunitaka na nodra ivalavala ca. O ira na sa mate ni se bera ni ra kila na kosipeli era na kila, o ira na sa kila na dina ka se vakayacora tiko ga na ivalavala ca era na sauma vakamatailalai na nodra cala kei na nodra vakagalalataki mai na kosipeli, ni bera ni ra lesu tale kina. Kua ni guilecava oya. Ni kua talega ni guilecava oi kemuni na qase ni Isireli, se o kemuni, na tina ni Isireli, se o cei; ni o ni tovolea me ra vakabulai o ira na bula se o ira na mate, mo taura dei tiko e na nomu vakasama ni o rawa walega ni vakayacora e na ivakavuvuli ni nodra veivutuni kei na veivakadonui ni inaki ni bula.¹¹

Sa yaco mai na gauna ni veibulubuluti… e da na… vakamamasu vua na Turaga me baleta na yalo tabu ni veivutuni, ni da sa taura rawa me, vakamuri sara na kena veivakauqeti; oya me da vakamalumalumutaki keda Vua ka vakasaqara na veivosoti vei kemudrau ruarua, me da na vakalesuya na loloma cecere kei na lomasoli vei ira era vinakata dina na noda veivosoti, eda dau kerea tiko ka namaka mai Lomalagi.¹²

Ni tiko na bula e tiko talega na vakanuinui, ke tiko talega na veivutuni e na rawa talega na veivosoti; ke sa tiko na veivosoti, e na rawa talega ni vakatuburi ka vakarabailevutaki me yacova ni sa rawati na taucoko ni kila na ivakavuvuli ni na veivakabulai ka taqomaki keda ka vakarautaki keda talega me da curu yani e na iserau ni Kalou na Tamada.¹³

Ni da papitaiso eda na curu yani e na Lotu kei na matanitu ni Kalou.

Ni da sa veivutuni, e na tarava na noda papitaiso, na ivakavuvuli ni kosipeli e yaga—e na sega ni rawa ni dua na tamata me curu kina veiyalayalati ni kosipeli ke sega vua. Na katuba ni Lotu i Jisu, e na sega tale ni dua na gaunisala eda na curu rawa kina, ni sa tukuna oti na Karisito, “vakaturuma,” se na “sova,” e sega ni papitaiso. Na ibalebale ni Papitaiso oya me tabadromuci e na wai, ka me qarava e dua e tiko vua na kena kaukauwa, e na yaca ni Tamada, kei na Luvena, kei na Yalo Tabu. Na Papitaiso e vakayacori ka sega ni tiko kina na kaukauwa vakalou e na sega ni dodonu. E ivakatakarakara ni nona bulu kei na tucake tale i Jisu Karisito, me vakayacori me vaka sa vakaraitaki, mai vei koya e sa vakadonuya na Kalou, e na kena ivalavala sa volai tu, ke sega e na sega ni vakadonuya o Koya, se e na bokoca laivi na ivalavala ca, na kena inaki sa volai tu, io o koya e tiko vua na vakabauta, ka veivutuni dina e na “bulu vata kei na Karisito e na papitaiso,” mai vei koya e tiko vua na kaukauwa vakalou, e na bokoci na nodra ivalavala ca, e na soli vua na isolisoli ni Yalo Tabu e na gauna e tabaki kina e na liga.¹⁴

Eda papitaiso e na yaca ni Tamada na Luvena kei na Yalo Tabu. Eda sa qai curu rawa ki na Lotu kei na Matanitu ni Kalou e na yaca ni Tamada na Luvena kei na Yalo Tabu, ka me da qarava na Tamada. Eda na tovolea me da talairawarawa vua na Luvena ka vakamuria na mawe ni yavana.¹⁵

E sa nodra itavi na Yalododonu Edaidai me ra vakavulica na luvedra e na dina, me ra tuberi e na sala dodonu me ra muria, ka me vakavulici vei ira na imatai ni ivakavuvuli ni kosipeli, na yaga ni papitaiso me bokoci kina na ivalavala ca ka me da lewena na Lotu i Karisito.¹⁶

Na Papitaiso me da tabadromuci me bokoci kina na ivalavala ca, mai vei koya e tiko vua na kaukauwa, e ivakavuvuli dina, baleta ni vakavulica na Karisito; e vakamuria na Karisito, e na sega ni leqa, ke dua na ka, me vakayacori—e sega ni baleta ni valavala ca e vinakati kina me papitaiso me bokoci kina na ivalavala ca io, e vakayacora o Koya me vakayacori na veika kilikili taucoko, oya me vakamuria talega kina na lawa.¹⁷

E tiko talega o Jisu e na cakacaka vakalotu ni papitaiso; e vakatura talega o koya na sakaramede ni vakayakavi ni Turaga, ka tabaka na kena qaravi; ka vakayacora talega na kena gacagaca ni veiqaravi tale e so e nakiti me baleta na kena vakabulai na tamata. Na ka me baleti Nikotimo, e vakadeitaka kina o koya ni papitaiso e yaco kina na sucu e na wai kei na Yalo Tabu e yaga e na vakabulai ni tamata [raica Joni 3:1–5].¹⁸

Au raica tiko e na kedra maliwa na kai noda, na vakasama e sega ni rauta sara vakavinaka na vakatabui ni tiko e na so na cakacaka vakalotu ni Matabete Tabu. E dina, ni veiqaravi mai vei ira e tiko vei ira na kaukauwa e na keda maliwa e na sega ni ukutaki e na … danisi se na soqo vakavuravura … , io na dina ni Lotu i Jisu Karisito ni Yalododonu Edaidai e tiko vei ira na itutu vaka Matabete me ra vakayacora kina na cakacaka vakalotu taucoko e na kaukauwa mai na loma ni Lotu na cakacaka bibi ka cecere. E na vakayacora tiko na cakacaka tabu o koya, e na gusu ni vosa ka sega e na vukuna kei na nona kaukauwa ga vakataki koya, io mai na dodonu ka vakatikori vua e na gauna e buli kina, ki na matabete me matata e na kaukauwa vakalomalagi. E da sega… ni vakayacora na cakacaka tabu ni veipapitaisotaki me ivakaraitaki levu ka totoka; io, me rawarawa me vaka na kena ituvatuva sa vakarautaki tu e na Lotu i Karisito me kua tale ni tomani tale kina e so tale na lewe ni cakacaka tabu.¹⁹

E na vakabulai ira na veivutuni, na papitaiso kei ira era yalododonu tiko na Kalou.

E tiko na veikalougatataki me baleta na kosipeli i Jisu Karisito i vuravura mai muri, e na sega ni rawati e na noda kaukauwa yadua, se me voli e na ilavo, e na sega talega ni dua na tamata e na nona kila ka se vuku e na rawata vakavo sara ga ke na vakamuria na kena cakacaka tabu, na kena lawa, na ivakaro sa soli oti. E vinaka talega, e na noqu lewa, vei ira na Yalododonu Edaidai me ra nanuma tiko e na nodra vakasama na veivakalogatataki levu sara ni kosipeli e sa vakatikori vei ira me baleta na nodra vakabauta, ni sa rawa ni bokoci na ivalavala ca mai na papitaiso kei na veivutuni, e na noda tomana tiko na noda vakabauta e da na rawata tiko kina na isolisoli kei na veivakalougatataki me baleta na bula tawamudu.²⁰

Ni keimami tukuna yani vei kemuni o cei sa veivutunitaka na nona ivalavala ca, o cei e rau sa bulu vata kei na Karisito ni papitaiso, o cei sa tucake tale mai na ibulubulu wai kina bula vou, sucu mai e na wai kei na Yalo Tabu, kei koya e sa okati me luveni Tamada, me itaukei imuri ni Kalou ka cokovata kei ira na itaukei kei Jisu Karisito—keimami tukuna vei kemuni, ke o na vakamuria na ivakaro ni Kalou, ka muduka na ivalavala ca, … ka vakabauta talega na Kalou, vakabauta na dina ka ciqoma, ka yalodina vua na Kalou kei ira na tamata, o na vakatikori sara icake, e na vakatikori iko na Kalou icake, me vaka na nomu vakamuria na nona ivakaro. O cei e na muria na ivakaro ni Kalou, ke o iko se dua tale na tamata e na vakabulai ka sega ni lutu, era na liu ka sega ni vakaliuci, era na lako cake ka sega ni lako sobu. E na vakabulai ira na Kalou ka vakarabailevutaka na matadra na veimatanitu e vuravura, e vakarautaka na drega ni nona veivakadonui vei ira, ka vakayacani ira me nona duadua. Oqo na noqu ivakadinadina vei kemuni.²¹

Oqo na kosipeli i Jisu Karisito, me da kila na dina duadua ni Kalou bula kei na Luvena e solia mai e vuravura, ni vurevure ni nona vuku e vu mai na nona talairawarawa kina ivakaro, na vakabauta, veivutunitaki ni valavala ca, na papitaiso me bokoci na ivalavala ca, na isolisoli na Yalo Tabu e na veitabaki mai na ligadra e tiko vei ira na kaukauwa vakalou ka sega mai na yalo ni tamata. Oqo gona na kosipeli i Jisu Karisito na kaukauwa ni Kalou ni veivakabulai: talairawarawa kina dina, yalo malumalumu kina ituvatuva sa vakarautaka tu na Kalou e na nona vale, na vale ni Kalou e vale vakaivakarau ka sega ni vale veilecayaki.²²

E da vakadinadinataka na lalaga e lati ira na tamata mai vua na Kalou e sa mai rawai, ni mai veitaratara tale na yalo ni Turaga vei ira na tamata. “Io,” e dua e tukuna, “Me da na mai veikilai vakacava kei na veika oqo? Eda na kila vakacava ni o na sega ni vakaisini?” Eda tukuna kece vei ira, veivutunitaka na nomu ivalavala ca e lomamu dina, ka lako yani mo lai papitaiso, ka tabaki e na liga mo taura kina na isolisoli na Yalo Tabu, e na vakaraitaka vei iko na yalo tabu na dina ni nomu ivakadinadina, o na mai dua talega na ivakadinadina me vakataki keimami, mo rawa ni tucake yani vakaukauwa mo vakadinadinataka yani e vuravura me vakataki keimami.²³

Me iUlutaga ni Vuli

Na cava na “veivutuni dina”? Na cava e rau veitarataravi kina na veivutuni kei na papitaiso?
E na tarai keda vakacava ke da sega ni vakamuria na lawa ni Kalou? Na cava e vinaka kina na vakamuria na lawa ni Kalou mai na vakayacora na ivalavala ca ka qai nanuma me qai veivutunitaki e muri?
E na solia vakacava vei keda na ivakavuvuli ni veivutuni na vakanuinui? (Raica talega na Moronai 7:41.) E laurai vakacava na veivutuni me”gauna vinaka ni veituberi kei na veivakatorocaketaki”?
E na tarai iko vakacava na nomu kila ni dua sa vakadonui mai vei Jisu Karisito me papitaisotaki keda e na yaca ni Tamada kei na Luvena kei na Yalo Tabu? (Raica talega naV&V 20:73.) Na cava o vakila e na gauna o papitaiso kina se na nomu tiko e na nodra papitaiso e so tale na tamata?
Na cava e bibi kina na kaukauwa vakamatabete ni veipapitaisotaki kei na cakacaka tabu ni papitaiso mai na “soqo ni marau kei na soqo vakavuravura”? E na maroroi ka dokai vakacava na cakacaka tabu ni veipapitaisotaki?
Na kila se veivakalougataki cava o sa taura mai na veivutuni kei na papitaiso? E na tiko ga vakacava vei iko na veivakalougatataki oqo?
Na veiyalayalati cava eda na vakayacora e na gauna eda veivutuni ka papitaiso kina? (Raica talega na Mosaia 18:8–10; V&V 20:37.) E na gauna o papitaiso kina, o vakarokorokotaka tiko vakacava na nomu veiyalayalati vua na iVakabula?