Na iVakadinadina nei Josefa Simici na Parofita

A digitaki na Parofita o Josefa Simici mai vua na Kalou me mai tauyavutaka tale na taucoko ni kosipeli e vuravura.

Tukuni e na Bula i Joseph F. Smith

Ni se cauravou lailai o Joseph F. Smith sa tiko vua na ivakadinadina baleta na nona digitaki na Parofita o Josefa Smith me vakalesuya tale mai na kosipeli i Jisu Karisito e na veitabagauna e muri. E vica na yabaki e muri e qai nanuma o Peresitedi Smith: “Ni’u se lailai au sa kila na Parofita o Joseph Smith. Au dau rogoci koya ni dau vunautaka na kosipeli e solia vua na Kalou me qarava ka tagomaka. Ni’u se lailai talega au kila vinaka na nodratou vale, na lewe ni nona vale, me vaka na noqu kila vinaka na vale nei tamaqu. A se tiko ga vei au na Yalo au a vakatakilai kina ni’u se lailai, o koya au a vakavulici kina mai vua na tinaqu lomani, na dei ni noqu vakabauta ni o Josefa Simici e parofita ni Kalou; ni a vakauqeti me vaka ni sega tale ni dua e na tabagauna oqo se na vica na senituri e liu me a vakakina; ni a sa digitaki mai vua na Kalou me mai vakadavora na yavu ni Matanitu ni Kalou.”¹

E na gauna a Peresitedi tiko kina o Joseph F. Smith e vakadonuya kina na kena voli e so na qele se vanua e bibi e na gauna a bula tiko kina na Paropfita o Josefa Simici kei na kena a tauyavutakiglevu na Lotu, e okati kina na vanua e sucu kina na Parofita e Sharon, Vermont; na valeniveivesu mai Carthage, Illinois; kei na iteitei makawa nei Joseph Smith Sr. mai Manchester, New York.

E tukuna vakaoqo o Peresitedi Joseph F. Smith me baleta na nona cakacaka na Parofita: “Au vakadinadinataka vei kemuni, ki vuravura raraba tale ga, ni a susugi cake mai o Josefa Simici e na kaukauwa ni Kalou me mai tauyavutaka na nona cakacaka tabu edaidai, ka mai vakaraitaka na taucoko ni kosipeli i vuravura raraba e na tabagauna oqo, ka vakalesuya mai na Matabete ni Kalou e vuravura, me ra mai vakaitavi kina na tamata e na yaca i Tamana, na Luvena, kei na Yalo Tabu, e na vakadonui mai vua na Kalou; e na nona kaukauwa. Au vakadinadinataka; niu kila ni dina.”²

iVakavuvuli i Joseph F. Smith

E digitaki na Parofita o Josefa Simici mai vua na Kalou me vakalesuya tale mai na kosipeli ni veivakabulai.

O Josefa Simici e iyaya digitaki ni Kalou ka vakataubeni e na lewa me vakalesuya tale mai na itutu vaka Matabete tabu, na kaukauwa ni Kalou me vau e vuravura ka vakakina mai lomalagi,— na kaukauwa vaka Matabete era rawa ni cakacakataka kina na cakacaka vakalotu ni kosipeli i Jisu Katisito me baleta na vakabulai ni tamata. Mai vei Josefa Simici e sa vakalesuitale mai na kosipeli ni veivutuni, papitaiso e na wai me boko kina na ivalavala ca, na papitaiso e na Yalo Tabu kei na buka waqa, kei na kila ni o Jisu na Karisito, e Luvena duabau ga na Kalou, e sa vakatakilai mai e na yalodina. Na noda itavi vua na tamata dauveiqaravi ka yalo raramusumusu e digitaka na Kalou me mai vakatura na yavu ni nona cakacaka na cakacaka vakalotu ni kosipeli ni Luve ni Kalou e sega ni kilai e na gauna oya kei na gauna oqo e vuravura, ni da na mai duavata kina vakavuvale, vakaveiwekani, e na ivau ni veiyalayalati vou me tawamudu, ni gauna ka tawamudu.

Eda vakavinavinaka vua na Parofita o Josefa Simici, ni sa mai yaga sara e na liga ni Turaga, me baleta na veika eda sa mai kila tu oqo e na yaga ke me vakayacori e na vale ni Kalou, e baleta na nodra vakabulai na bula tiko kei na nodra sorovaki na mate, kei na ivau tawamudu ni yaloda e na bula oqo mai na kaukauwa ni Kalou, e na ivau ni veiyalayalati tawamudu. Eda sa mai dinau tu, se me da na sauma tale vua na Parofita o Josefa Simici, ni a mai yaga e na liga ni Kalou, na kila e da sa mai taukena tu oqo, ni da kila ni tamata e na sega ni rawa ni vakabulai e na iserau ni Kalou kei na marautaki taucoko ni nona lagilagi, walega. E sega ni nakiti me tiko duadua na tamata, na tagane e sega ni vakawati se na yalewa e sega ni vakawati, e na iserau ni Turaga.³

E bula na Kalou, o Jisu na Karisito na iVakabula ni vuravura. O Josefa Simici e parofita ni Kalou—bula, e sega ni mate; ka na sega ni vakarusai rawa na yacana. Na agilosi e sikovi koya sa tukuna na itukutuku ni Kalou vua, e tukuni talega vua na yacana e na ivakaraitaki ni veika vinaka kei na ka ca e vuravura raraba [raica Josefa Simici—Ai Tukutuku 1:33]. E tukuni vua na itukutuku oqo ni se caurovou lailai sara, ni se bera ni tauyavutaki na Lotu, ni se bera ni yaco na veika sa qai vakayacori. E sa vakaroti raraba, mai na siga e tekivu vakayagataki kina na yacana me yacova mai oqo, ka tekivu oqo me yacova yani na ivakataotioti, na yaca i Josefa simici na parofita ka sega ni vorati rawa e na gauna koya me vaka e sega ni rawa dina; ia na siga e tukuni me yacova mai na gauna oqo, ka tekivu oqo me yacovai yani na ivakataotioti na yaca i Josefa Simici, na parofita ni tinikaciwa ni senituri, e na kacivaki kina veimatanitu e vuravura, e na rokovi se na beci vei ira na kai vuravura… ; ni sa vakayacora tiko o koya na cakacaka ni iVakavuvuli. E mai vakadavora o koya na yavu e na itabagauna oqo me baleta na kena vakalesuitale mai na ivakavuvuli e vakavulica na Luveni Kalou, o koya e bulataka na ivakavuvuli oqo, ni na mate e na tucake tale mai na mate.⁴

E na vanua e vosataki kina na yaca i Josefa Simici me baleta na nona vinaka, mai vei ira na sa rogoca oti na kosipeli e vakau mai lomalagi e na vukuna, o koya e sa yalo dina ka yalo malumalumu e na taura talega o koya. Ni ra veitalanoataki koya, e tiko vei ira na kila na isolisoli ni veivakauqeti ni Yalo Tabu, kei na nodra talairawarawa kina ivakavuvuli e vakavulica, ni a parofita ka tamata dauveivakauqeti. Era vosa vakacaucautaki koya, e na nona vakarokorokotaki, ka ra laveta cake na yacana me dokai na kena ivakananumi. Era vakarokorokotaki koya, ka lomani koya, me vaka ni sega tale ni dua era lomana, baleta ni ra kila ni o koya a digitaki me liga i koya sa Cecere sara e na kena vakalesui tale mai na kosipeli ni bula kei na veivakabulai vei ira, ni dolava na nodra vakasama me baleta na gauna mai liu, ni kena cereki cake na iubi tawamudu, me vaka sara ga mai matadra. O ira na sa ciqoma na ivakavuvuli e sa tabaki ka me na qai vakayagataki, era kila tiko e sega ni baleta tiko na nodra dui bula, marau kei na sautu, vakayago kei na vakayalo, ia, e na vuku ni nodra qaravi, marau, na nodra vakabulai kei na bula vakalou na wekadra era se sega ni kila na dina e na gauna era mate kina.

Na cakacaka e vakaitavi tiko kina o Josefa Simici e sega ni baleta tiko na nona bula walega, e baleta tale tiko ga na bula sa bera mai, kei na bula sa oti. E dua tale na kena ivakamacala qo, e baleti ira tiko na sa bula oti e vuravura, vei ira na sa bula tiko kei ira na bula muri keda mai. E sega ni baleti ira ga na tagane walega ni ra na bula tiko vakayago, e baleti ira kece na matavuvale vakatamata mai na tawacava kina tawacava.… E na sega walega ni vunitaki na koro, matanitu, se vanua, o ira talega na veivanua, veimataqali, duivosavosa kei na tamata kecega.⁵

Vei au mada ga, sa dua dina na ka vakurabui ni a levu sara na yalo ca e vakaraitaki vei Josefa Simici mai vei ira na kai vuravura. E sega ni cala o koya vua e dua na tamata. Au rawa ni vakadinadinataka oya ni’u kila vinaka na nona bula. Au sa raici koya oti vaka yago, au sa wilika talega na veika e tukuna . Au sa wilika talega na raivotu e vakaraitaka vua na Turaga. Au kila vinaka na nona cakacaka, kau kila talega ni sega ni cala vua e dua na tamata. E sega ni vakamavoataki ira na nona itokani, e a tovolea me ra bula vakalou. Ia e, duatani tale na tikina ni o ira na tamata era sega sara ga ni kilai koya era vakaraitaka na nodra yaloca, vei sausaumi e na ca kei na yalo sesewataki koya e dau dredre sara vei ira na tamata me ra vakila. Au dau vakatarogi au, Na cava na kena ibalebale oqo? E sega ni dau vakaoqo na yalo ni tagane, na kena lawa, me baleti ira na dau vakalecaleca, se o ira na vakaraitaka tiko na lotu e bulia na tamata. Io, e na duatani eda kaya, ni ra dau rarawa sara vakalevu e na gauna e dau kau cake mai kina na yacana na Parofita o Josefa Simici! E dina oqo e duatani sara mai na kena ivalavala dodonu, e baleta tiko ga ni a vakamuria tiko na veiyalayalati a soli mai vua e dua na dau kau itukutuku vakalomalagi mai na ivakatekivu me mai vakasalataki koya.…

… Na yavu ni cakacaka e vakadavora na Parofita o Josefa Simici e a vakadavori e na dina tawamudu. E na sega ni rawa ni vukica. E vaka na vale e tara e na veivatu. E na liwava na cava, e na tauva na uca, e na liwava na cagilaba, e na vakauqeti na yalo ni tamata me ra cudru ka vakacacana; ia, e na kaukauwa me vaka na ulunivanua tawamudu, ni baleta ga ni a tara tiko e na dina [raica na Maciu 7:24–25]. Na dina, na bula dodonu, na bula savasava, vakabauta na Turaga o Jisu Karisito kei na nona tucaketale, talairawarawa kina ivakaro ni Kalou, e so na ivakavuvuli bibi ni noda vakabauta. Eda kila ni dina na ivakavuvuli.⁶

Na iMatai ni Raivotu i Josefa Simici e dua na ka bibi e yaco ni oti na nona Tucake tale mai na Mate na iVakabula.

E dua na ka levu e a yaco e vuravura, mai na gauna e tucake tale mai kina e na mate na Luveni Kalou mai na ibulubulu kei na nona sa lako cake yani i lomalagi, oya na nona veisiko mai na Tamada kei na Luvena vua na cauravou lailai o Josefa Simici me mai vakarautaka na sala ni kena vakadavori na yavu ni nona matanitu—E sega ni matanitu ni tamata—e na sega ni tarovi rawa se vakatobuicutaki. Ni sa vakadonui na dina, au qai raica ni vakarawarawataki na kena ciqomi na vei dina tale e so e tauyavutaka se vakatusa.… E sega ni bau vakavulica e dua na ivakavuvuli e sega ni dina. E se sega talega ni vakavulica e dua na ivakavuvuli e sega ni vakaroti vua me vunauca. E sega ni tokona o koya na cala. E sega ni lasu. E raica; rogoca; ka vakayacora na veika e vakaroti vua; ia, o koya gona, ni vu mai vua na Kalou na cakacaka e rawata o Josefa Simici—e sega ni o Josefa Simici. E nona itavi na Turaga e sega ni ka vakatamata.⁷

E na vulaitubutubu 1820, e taura kina o [Josefa Simici] na imatai ni ivakaraitaki vakalomalagi se va-Kalou. A se qai yabaki tinikava kina. E da sega soti ni dau namaka e levu na ka mai vua e dua na cauravou lailai yabaki tinikava, e dau sega talega ni dau nanuma me na rerevaki se tawakilikili e dua na gone lailai vakaoya, vakabibi saraga ni a sucu ka susugi mai e na dua na itikotiko ni teitei, me vaka na veitemaki se na veivakacacani e tu e na veikoro lelevu, ka vakagalalataki mai e na veimaliwai ca. E sega ni vaka me a vakayagataka e levu na gauna galala na gauna ni cakacaka e na nona bula, me yacova ni sa yabaki tinikava; ni o tamana e dau cakacakataka na qele me rawa ni bula kina, ni a tamata dravudravua ka vakamatavuvale levu.⁸

Me baleta na nona rairai vakayalo, e da rawa kina ni siqema ni a nakiti me lasutaka na gonetagane oqo na nona itukutuku me baleta na veika a raica ka rogoca? Se na isau ni taro e solia vua o koya e talai mai lomalagi, e bulia ga na gone oqo e na nona vakasama vakagone. Na ivakadinadina nei Josefa Simici me baleta na ivakaraitaki vakalomalagi, e da qai raica e muri, ni rawarawa, dodonu, savasava, e makare ka qai dina, me vaka ga ni kaya ni a se cauravou lailai kina; e na yalodina, yaloqaqa, na loloma e bucini e loma ni itovo ni nona bula ni se cauravou lailai a sega ni bau dua me qaqa se veisau ni sa matua cake. Na nona vuku e solia mai vua na Kalou e na ivakatakila.⁹

Era tukuna na dauvakalelewa ni a raica na Parofita o Josefa na yalo, ia, a sega ni tukuna o koya. E tukuna o koya ni tamata e a raica e tamata dina.… A sa yaco mai vei keda na itukutuku ni nona sucu, nona bula kei na nona cakacaka na Karisito, e sega tale ga ni dua na ka e tiko e na kena itukutuku me da vakabauta kina vakarawarawa me vaka na italanoa ni Parofita o Josefa Simici. E taubale, vosa ka vakasala vei ira na nona itokani na Karisito e na gauna a lako kina mai lomalagi e na 1900 na yabaki sa oti. E dua beka na inaki ni nona sega ni lesu tale mai kina e vuravura ka veivosaki kei ira na tamata edaidai? Ke dua tiko au na marau sara kevaka au rogoca. E dua na ka au vinakata meu vakaraitaka vei iko ni dina na Kalou, e vakayago ka vakasui talega, me vakataki iko kei au. E tautauvata tiko ga na Karisito, ia, na Yalo Tabu e tamata vakayalo.¹⁰

E vakadewataka na Parofita o Josefa Simici na iVola i Momani e na isolisoli kei na kaukauwa ni Kalou.

E na gauna e yabaki 17 se 18 kina o [Josefa Simici], e taura tale kina e dua na ivakaraitaki vakalomalagi ka vakaraitaki talega vua e levu na veika lagilagi, e na va na yabaki e tarava e veisiko mai kina vua e dua na italai mai lomalagi.… E kaya ni tamata oqo e vakaraitaka vua na vuku kei na yalo ni Turaga, ka vakaraitaka talega vua na itovo ni cakacaka, ni o koya e na liga ni Kalou e na kena tauyavutaki e vuravura ni yaco mai na kena gauna. Oqo na cakacaka e mai vakayacora na agilosi o Moronai, e na loma ni va na yabaki mai na 1823 kina 1827. E na 1827 e qai taura mai kina e na liga ni agilosi o Moronai, na peleti koula a vakadewataki mai kina na ivola oqo (Ai Vola i Momani) e vakadewataka o koya mai na veivakauqeti nei koya sa Cecere sara, e na isolisoli kei na kaukauwa ni Kalou vei koya.…

E na loma ni tolu na yabaki e na 1827 ki na 1830, e cakacaka tiko ka vunitaki ira tale tiko ga na tamata era vinakata me ra vakamatei koya, o Josefa Simici me kua ni vakaotia rawa kina na nona cakacaka, ka sautamoqemoqe tiko e na vuku ni veika dredre e sotava tiko vakabibi na nona tovolea me vakaotia na vakavakadewa ni iVola i Momani ka levu tale ga na gauna e na rawa ni valavala ca se vakacacani kina ? Au na sega ni vakabauta rawa. Ni sa oti na nona vakadewataka na iVola i Momani se cauravou kina, io, ni tabaki na ivola oqo e vuqa na itukutuku makawa, na parofisai, raivotu, ivakadinadina kei na ivakavuvuli, na vosa kei na ivakavuvuli e tabaki tu kina e sivia sara na nodra vuku na daunivuku ni vuravura me ra vakamurimuria se me ra coqa. A sega so ni vuli vinaka o Josefa Simici ni se lailai, vakabibi na veika vakavuravura. E vakavulici koya na agilosi o Moronai. E vakavulici o koya mai cake, na Kalou Cecere, ka sega mai na koronivuli era veivakavulici kina na tamata; io, ke da kaya ni lialia e na sega soti ni taleitaki baleta ni lasu; ni a sega tale ni dua na tamata se me ra lewe vica na tamata era vuku sara mai vei koya, se me rawa ni soqoni vata na vuku kei na qaseqase ni gauna oya e rawa ni vakatautauvatataki kei na veika sa vakayacora. E sega ni lialia o koya, ni a vuli mai vei Koya na vu ni vuku taucoko. E tiko vua na vuku ni Kalou kei na nona lawa, me tawamudu.¹¹

Na iVola i Momani e a vakadewataki mai na isolisoli kei na kaukauwa ni Kalou, ka vakayagataki kina e dua na cauravou; a sega ni dua na tamata vuli, se tamata vakaivola, ia, mai vua e dua e sega ni vakaivola, bula rawarawa, ka gone savasava! Na gone e sega ni vakaivola, bula rawarawa, ka savasava oqori o Josefa Simici. A sega ni tamata vuli, me kila ka, se me tu vua na maqosa me vakadewataka kina e na vosa vakaperitania na veika e volai tu e na peleti, era a laki vunitaka tu na itaukei ni vanua oqo. E sega ni kaya o koya ni a vakadewataka na mata ni vola makawa oya mai na nona vuku duadua. E a kaya talega ni a vakavakadewa e na isolisoli kei na kaukauwa ni Kalou ka soli vua.¹²

E levu sara na ka e vakayacora na Parofita o Josefa Simici me baleta na vakabulai ni tamata me kua ni wili kina o Jisu.

E sa dolava na nona veitaratara i lomalagi o [Josefa Simici] ni se cauravou lailai . E kauta mai na iVola i Momani, ka lewena tiko mai na ivakavuvuli taucoko ni kosipeli; kei na raivotu e volai tu e na Vunau kei na Veiyalayalati; vakalesuitale mai na Matabete tabu vua na tamata; e tauyavutaka ka vakarautaka na Lotu i Jisu Karisito ni Yalododonu Edaidai, na isoqosoqo e sega ni tautauvata tale kei na dua e vuravura taucoko, era sega ni raica se kunea rawa na tamata lawaki ca kei ira na vuku ni sa vica na yabaki oqo era se sega ni kunea se vakarautaka. E tauyavutaka e so na itokotiko e na vanua o New York, Ohio, Missouri kei Illinois, ka dusimaka talega na sala ni nodra soqoni na Yalododonu e na Rocky Mountains; me kau na kosipeli i Iurope kei na yanuyanu e na veiwasawasa; tauyavutaki na koro o Kirtland, Ohio, ka tara kina e dua na valetabu ka vicasagavulu na udolu na dola na kena isau; e kunea talega na koro o Nauvoo e na gauna ni veivakacacani; vakasoqoni ira kece yani i Nauvoo kei na veiyasana e lewe 20,000 na tamata, ka tekivu tara sara e dua na valetabu mai kea, e na gauna sa tara oti kina e voleka ni dua na milioni na dola na kena isau; ni sa vakayacora tiko na veika oqo sa veicoqacoqa tale tiko ga kei na veivakasewasewani e na gauna oya, na veivakacacani e sega ni tini rawa, na ilala dau vakatubu ca, na vosa vakasisila kei na kakase, e tauci vua mai na veibure ka sega ni yalani rawa. Vakavosa, e vakayacora o koya e levu sara na ka mai na maliwa ni gauna ni nona yabaki tinikava ki na ruasagavulu me baleta na nodra vakabulai na tamata, a ka oqo sa taravi Jisu walega kina, [raica na V&V 135:3], io, se beitaki ga o koya mai vei ira na nona meca ni tamata vucesa ka sega ni dua na kena yaga!

E vei na vanua me da lako kina me kunei e dua tale na tamata e sa rawata oti e dua na ika dua na udolu ni tikini ka vinaka e sa vakayacora oti o Josefa Simici? . . e se bera ni dua na tamata e na loma tini ka ciwa na senituri, e vakavo ga o Josefa Simici, e sa kunea e vuravura e dua na rarama ni cina e na dela ni lesilesi kei na kaukauwa ni Matabete tabu se na cakacaka vakalotu ni kosipeli, vei ira na bula se o ira na mate. Mai vei Josefa Simici, e sa vakaraitaka vua na Kalou e vuqa na ka a vunitaki tu mai na ivakatekivu ni vuravura me yacova mai oqo ka sa vakaraitaki vei ira na parofita.… E dodonu sara na kena maroroi vata kei na kena inaki kei na yalo me baleta na cakacaka levu edaidai, e lesi me vakavinataka na inaki cecere kei na cakacaka ni Kalou me baleta na icavacava ni gauna.¹³

O Josefa na Parofita … e mai vakavuna, e na veiqaravi ni Kalou, me tauyavutaki tale kina na dina makawa ni kosipeli tawamudu i Jisu Karisito, na yavu ni veivakabulai, e qase sara mai vei ira na kawa tamata. E dina, talega, ni vou na nona ivakavuvuli vei ira na tamata e na nona gauna baleta ni ra a vukitani mai na dina—io, na ivakavuvuli ni kosipeli e dina mailiu ka se dina tiko ga oqo. E dua na ka vou vei ira na itabagauna i Josefa. Ka vaka talega kina e so na tikina vei keda, baleta na nodra sa lako sese na tamata, viritaki tani, ka ciri mai ike ka vakakina i kea e na cagi vou ni nodrqa ivakavuvuli na tamata daulawaki—o ira na kilai me ra toso iliu—era sa toso iliu. E vakavuna kina me dau ni veivakalesuitale mai na Parofita o Josefa, ka sega ni dauveivakarusai, ni dina makawa. Oqo e sega ni vakadonui keda me da biuta tani kina na veika rawarawa, na yavu ni vakavuvuli ni kosipeli ka laki salavata kei na ivakavuvuli taurivaki vou kei na vakasama.¹⁴

Au vakaraitaka vei kemuni e na dina taucoko ni yaloqu, ni’u vakabauta e na yaloqu taucoko na ilesilesi tabu vakalou i Josefa Simici, na Parofita, niu sa vakaraitaka e na kena dina mai na veigacagaca kece ni yagoqu ni a susugi koya cake mai na Kalou me vakalesuya tale mai i vuravura na kopsipeli i Karisito, ni kaukauwa dina ni Kalou. Au vakadinadinataka vei kemuni ni o Josefa Simici e a yaga sara e na liga ni Turaga e na kena vakalesui tale mai na dina ni Kalou e vuravura, ka vakakina na Matabete tabu, na nona lewa e lesia vei ira na tamata. Au kila ni dina oqo, au vakadinadinataka tiko vei kemuni. Vei au e kovuti taucoko; oqo na noqu bula, na noqu cina; na noqu vakanuinui, kei na noqu marau; e vakadeitaka vei au na noqu bula vakalou, na noqu tucake tale mai na mate, kei ira au dau lomana ka taleitaka e na bula oqo, kei ira talega keimami sa umani vata e na vuravura oqo—tamata dokai, savasava, tamata yalo malumalumu, o ira na talairawarawa vua na Kalou kei na nona ivakaro, o ira era sega ni maduataka na kosipeli i Karisito, se na nodra vakabauta se na nodra kila na dina ni kopsipeli; na tamata era buli e na veika era buli kina o ira na vakamatei e na vuku ni nodra vakabauta, ni sa lomadra na solia na nodra bula e na kena gauna e na vuku i Karisito, kei na kosipeli, ke me nakiti, na veika era sa taura kei na ivakadinadina ni Yalo Tabu e yalodra. Au vinakata me keimami sota kei ira na tamata oqo e na gauna e na oti kina na noqu akacaka eke. E na gauna sa oti kina na noqu ilesilesi eke, au diva meu lako sivia yani na vuravura ni yalo era tiko kina, ka laki tiko vata tale kei ira. Na kosipeli oqo ni Luveni Kalou e solia vei au na vakanuinui ni tiko vei au na kena vakataucokotaki, kei na noqu mai tugana e yaloqu na nona sala. Au sa lakova oti taucoko na nona kosipeli, au sega ni vakayacora e na vuku ni noqu viavialevu. Au kila se o cei au na vakararavi vua. Au kila ni bula tiko na noqu Dauveisorovaki, e na qai tucake tale e vuravura e na gauna mai imuri.¹⁵

Me iUlutaga ni Vuli

Na sala cava e yaga kina na Parofita o Josefa Simici e na liga ni Kalou? Na sala cava soti o sa vakalougataki kina mai na veika e vakaraitaka na Turaga vua na Parofita o Josefa Simici?
Na cava e bibi kina me tiko vei keda na ivakadinadina ni o Josefa Simici e parofita ni Kalou e na itabagauna oqo?
Na ivakaraitaki ni dina cava a vulica mai o Josefa Simici mai na imatai ni nona Raivotu? Na dina bibi cava o sa vulica mai na iMatai ni Raivotu? E mai yavutaki vakacava na ivakadinadina ni iMatai ni Raivotu e na kena ciqomi na dina tale e so ni kosipeli?
Na cava e bibi kina meda kila ni a vakadewataki na iVola i Momani mai na isolisoli kei na kaukauwa ni Kalou?
Na gaunisala cava e vakayacora kina na Parofita o Josefa Simici e vuqa na ka me baleta na “vakabulai ni tamata mai na dua tale na tamata, e vaka vo ga o Jisu”?
Na cava e bibi kina me da kila ni o Josefa Simici na Parofita e “vakalesuya tale mai, ka sega ni vakarusa, na dina makawa”?
O vakaukauwataki vakacava e na nomu tovata kei ira na tagane, yalewa, se gone lalai e dei vinaka tiko na nodra ivakadinadina “ka sega ni maduataka na kosipeli i Karisito”? E da na vakaukauwataki ira na so e na noda ivakadinadina?
Na cava o kurabui kina me baleta na ivakadinadina nei Peresitedi Joseph F. Smith me baleta na Parofita? Na cava na nomu ivakadinadina me baleta na ilesilesi tabu ni Parofita o Josefa Simici?