Na Gaunisala Cala ni Veivakacacani

Me da kakua ni vakacacani ira na so ka vakaraitaka na noda yalo loloma kei na yalo ni veikauwaitaki vei ira kece na tamata vakabibibi vei ira na lewe ni noda matavuvale.

Tukuni e na Bula i Joseph F. Smith

O Peresitedi Joseph F. Smith e tamata yalololoma ka yalomalua e na nona dau vakaraitaka na nona rarawa baleta na veivakacacani. E kila vinaka o koya na ivalavala kaukaua edau muria ga na ivalavala kaukaua, na nona bula e ivakaraitaki dina ni loloma, na veivosoti, veikauwaitaki kei na kila.

E na dua na gauna e tukuna kina vakaoqo o Peresitedi Smith: “Au vakadinadinataka e dua na ka lailai e na noda soqoni tiko e na yakavi ni kua e na maliwa ni dabedabe; edabe toka e dua na gone lailai e tiki tinana e na idabedabe. E curu sara mai edua ka keveta tani na gone lailai oqo mai na nona idabedabe ka dabe sara kina ka biu tu na gone lailai oqo me tucake tu. Au via tukuna vei kemuni na taciqu kei na wekaqu, na itovo oya e lauta sara ga na yaloqu. Au na sega ni rawa ni … vakararawataka na yalona na gone lailai oqo e na vale ni Kalou, eda na rerevaka na ka e yaco oqo e na tiko ga e na nona vakasama ka na vakavuna me nanumi kina ni vale ni veiqaravi me dua na vanua e sega ni taleitaki, e na vinakata me kua ni butuka mai na kena loma ni bai, baleta ni lako mai e na mai vakacudrui kina.”¹

E dau vakasalataka o Peresitedi Smith vei ira na tacina kei na wekana me ra dau vakayacora vei ira na nodra itokani na veika vinaka sara. Na ivalavala kaukaua se na itovo e na vakalolovirataka e dua na tamata e sega ni taleitaki vua. Na tamata vakawati kei na watina me rau dau veirokorokovi ka vakavulici ira na luvedrau mai na nodrau ivakaraitaki e na nodrau vakarokorokotaki ira na nona matavuvale kei ira na wekana.

iVakavuvuli i Joseph F. Smith

Me da dau vakayacora vei ira na noda na itovo veidokai kei na vakarokoroko.

Me da vakamalumalumutaki keda, ka me da qai lako yani me da laki vakamalumalumutaka na vu ni ca era tu wavokiti keda, e na kena levu taucoko. Me vakayacori ka me kua ni vakayagataki na ivalavala kaukaua; me da vakayacora ka sega ni vakacacana na nodra digidigi na turaga kei na marama. Me da vakayacora ga e na kaukaua ni veivakauqeti, na vosota vakadede, na yalomalua, na yalovosota kei na loloma e sega ni veivakaisini, eda na rawata ki na na lomadra, na loloma kei na yalodra na luveni tamata kina dina sa vakatakila na Kalou vei keda.²

[Na Kalou] sa buli keda me da vakataki koya ka ucui koya, ikeda oqo na tagane kei na yalewa, itubutubu kei na lalai. Me da mai vakataki koya—vakataki koya e na loloma, e na loloma cecere, e na yalovosota, yalo malua, e na vosota vakadede kei na veivosoti, e na savasava ni vakasama kei na ivalavala, na vuku, kei na veirokorokovi, me rawa kina ni kilikili na noda bula vakalou e na nona iserau.³

Na itubutubu … me ra dau veilomani ka veirokorokovi, ka kitaka na veika vinaka e na yalo ni veidokai e na veigauna. Na tama e dodonu me vakayacora vei watina na veika e na yalo vinaka kei na veirokorokovi e uasivi sara. Me kua ni vosacataki se vakayacora na itovo ca na tama vei watina; me kua talega ni dau vosabeci watina, io me dau vosa vakavinaka ka dau vakacerecerei watina e na nona vale e matadratou na luvedrau.… Na watina e dodonu talega me dau qarava na watina tagane e na vakarokoroko kei na loloma. Na nona vosa vua me kua ni dau kaukaua, veivakalolovirataki se me veivakalialiai. Na watina yalewa me kua sara ni vosacataka se me beitaki koya. Me kua ni dau veisagai se me tagicaka vua e dua na ka. Me kua sara ni laveta cake na ligana (me vosa dusidusi) se me vakacacana na bula e vale. Na watina yalewa e dodonu me dua ka marautaki vei watina tagane, e dodonu me bula ka vakaitovotaki koya kina e vale me rau marau kina, na vanua ni veivakalougataki levu vua na watina tagane. Oqo e dodonu me ivakavuvuli me rau bulataka na vakawati (na yalewa vakawati kei na watina tagane) na tama kei na tina, e na loma ni bai tabu, na noda veivale.

E na qai rawarawa kina vei rau na itubutubu me rau vakadeitaka kina e na lomadra na luvedrau na nodra lomana na tamadra kei na tinadra, ka sega walega ni vakarokoroko se veidokai vei rau na nona itubutubu vei ira talega na gone e vale. Era na veidokai na tagane lalai kei iratou na yalewa lalai. E na veirokorokovi na cauravou lalai. O ira talega na gone yalewa lalai era na veirokovi ka vakatalega kina o ira na cauravou lalai kei ira na yalewa, ka veimaliwai e na loloma, kei na veidokadokai e rawa ni vakaycori e vale e na vukudra na gone. E sa qai … mai tauyavutaki na ivakavuvuli dina ni vuli e lomadra kei na nodra vakasama na gone e vale.⁴

Me ra dau lomani ira na watidra na tagane vakawati.

Au nanuma na ibalebale ni kena ciqomi na ki ni lewa—ke me dau vakayagataki e na vuku kei na kilikili—e na dau dokai mai vua na Tamada, na Luvena kei na Yalo Tabu! O doka na Matabete oqo? … E na vakakina, ni o elda (se qase) e na Lotu i Jisu Karisito o na sega ni doka na watimu se o iratou na luvemu? O na drotani mai vua na tinai luvemu, na wati ni loma saremu, na isolisoli ni Kalou vei iko, e uasivi sara mai na bula? Ke sega na yalewa vua na tagane e na sega ni vinaka sara vua na Turaga, me vakatalega kina na yalewa e na sega ni vinaka sara ke sega na tagane.⁵

Au sega ni kila me ra dau yalo ca vakacava na tagane vua e dua na marama, vakabibi sara ga ni wati ni loma serena, ka tinadra talega na luvena, e a dau tukuni vei au e na so na gauna ni tiko tale eso era ca sara, ia o ira oqo e sega ni dodonu me ra vakatokai me ra tagane.⁶

E na gauna au dau nanumi ira kina na tina, na tinadra na luveda, ka kila talega mai na veivakauqeti ni Kosipeliera bulataka tiko na bula sa dodonu, savasava, bula vakarokoroko, dina vua na watidra, dina talega vei ira na luvedra kei na nodra qarava na Kosipeli, io sa salavata na yaloqu na loloma savasava vei ira, sa dua na ka vakaturaga ka isolisoli ni Kalou, na ka talei, ka yaga sara oya m wa kina na inaki ni Kalou ka rawa talega kina na nona ivakaro! O kemuni na taciqu, e rawa ni o sega ni qarauna vinaka na watimu, na tinadra na luvemu? E rawa ni o qaravi ira e na loloma kei na yalovinaka? O na rawa ni vakavinakataka na nodra bula me rawa ni ra marau kina, ka vakamamadataka na nodra icolacola e na kena levu o rawata, me ra marautaka kina na nodra bula kei na luvedra e na nodra vale? O na veivuke rawa vakacava? E na rawa vakacava me tiko vei keda na yalo kaukaua ni veikauwaitaki me baleta na tinadra na luvena? Ke sa tiko vei keda na Yalo Tabu ni Kalou, e na rawa ni vakayacori na veika oqo. E na gauna ga e na tawasei mai kina na tamata mai na yalododonu, e na malumalumu ni vakayacora na nona itavi, era na sega ni kauwaitaka se sega ni doka na yalo e dodonu me qarava. E dodonu me ra dokai ira na watina kei ira na luvena.⁷

O ira na tamata vuku, na daunibisinisi, na tamata e dau qarava na veika, na tagane dau cakacaka vakalevu ka levu na gauna e dau qarava kina na nona cakacaka, ka solia kina na nona gauna, na vakasama kei na nona igu taucoko, e na rairai na sega ni marautaka na vakacegu mai na nona vuvale, me vaka e vinakata, io ke tiko vua na YaloTabu ni Turaga e na nona vakayacora tiko na cakacaka vakavuravura era na sega ni guilecava na tinadra na luvena kei ira na luvena.⁸

Kemuni na Tama kei na tina ni kua ni cemuri ira tani na gone.

Oi kemuni na taciqu!, mo ni dina vei ira na nomuni matavuvale, mo dina vua na watimu kei ira na luvemu. Vakavulica vei ira na sala ni bula. Kakua ni vakadonui ira me ra vakayawayawa mai vei iko de o na guilecavi ira, se yawa mai na ivakavuvuli ni veidokai, na savasava se dina.… Kevaka mo tuberi ira tiko na luvemu voleka e yalomu, mo rawa ni tauri ira tiko, kevaka o na vakaraitaka talega vei ira ni o lomani ira tiko, ni o iko na nodra itubutubu, o ira na nomu isolisoli, ka ra tiko voleka vei iko, era na sega ni lako vakayawa mai vei iko, ka ra na sega talega ni vakayacora na ivalavala ca lelevu. Ia e gauna o na cemuri ira tani kina mai vale, ka sega ni solia se vakaraitaka na nomu loloma vei ira—era na muria yani na sala butobuto ni bogi kivei ira na dravudravua kei na lolovira; e na gauna era na mai vakaocai iko kina, se na oca baleta na levu ni nodra dau vakasausa e vale, o qai kaya, “Lako tani ki na dua na vanua,” oqo e so na itovo e dau vakayacori vei ira na luvemu era dau drotani mai vei iko.⁹

O ira na luveda era vakataki keda; eda na sega ni rawa ni vakatalai ira, ka da sega ni rawa ni vakatalai ira e na gauna oqo. Eda vakataka e so na manumanu eda kila ni bula tiko e vuravura. O rawa ni raici ira; vakaliuci ira, e na nomu solia tiko vei ira na ka era vinakata kei na nomu dau vosa vakamalua vei ira, io o na sega ni rawa ni vakaukauataki ira; era na sega ni vakaukauataki. Eda na sega ni vakaukauataki rawa. E na sega ni rawa se me nodra itovo me ra vakaukauataki na tamata; era sega ni buli mai vakaoya.…

O na sega ni rawa ni vakasaurarataka na nomu cauravou se goneyalewa i lomalagi. E rawa ni o vakasaurarataki iratou i eli, ni o vakayagataka e so na veika kaukaua e na nomu tovolea me ra vinaka kina, ni o iko vakataki iko o sega tiko ni vinaka me vaka na kena dodonu. Na tamata e cudruva na luvena tagane ka tovolea me vakadodonutaki koya ni se cudru tiko, e cala sara tiko vakalevu, o koya sara ga e na vakaloloma ka na vakarusai mai na gone e cala ka tovolea tiko oya me vakavulica. O na rawa ga ni vakadodonutaka na gone e na loloma dodonu, na veivakauqeti kei na ivakasala.¹⁰

Kemuni na tama, ke o ni vinakata me ra vakavulici na luvemuni e na ivakavuvuli ni kosipeli, kevaka o vinakata me ra vulica na loloma kei na dina ka taura matua, ke o vinakata talega me ra talairawarawa ka dua vata kei iko, mo lomani ira! ka qai vakaraitaka vei ira na nomu loloma dina mai na malumu ni nomu vosa kei na nomui itovo o vakaraitaka vei ira. E na vukumu duadua, mai na loloma e dodonu me tiko ruarua vei kemudrau, o iko kei ira na luvemu tagane—e mani vakacava sara na ituvaki ni nodra vakasama e na gauna o vosa kina vei ira se vunauci ira kina mo vakayacora e na yalo vinaka me kua e na yalo cudrucudru se vakaukaua me veivakacacani. Vosa vei ira e na vosa malumalumu; vakadaberi ira sobu ka drautagi vata ke tarai iko talega na bibi ni nomu vakavuvuli. Vosa ka vakamalumalumutaka na yalodra; cakava sara mera yalo malumalumu vei iko. Kakua ni vakayagataka na beleti se ivalavala kaukaua, ia … mo vosa vei ira baleta na veika dodonu ka yaga, ka veivakadreti e na loloma e sega ni veivakaisini.¹¹

Me ra bula vinaka tiko na tama mai Isireli me vaka na kena dodonu; me ra dau vakayacora vei ira na watidra na veika era vinakata me vakayacori vei ira; me ra vakarautaka na nodra vale me rawa kina na vakacegu e na nodra igu taucoko; me ra vakamamadataka na nodra icolacola na lewenivale, ka solia na ivakaraitaki vinaka vei ira na luvedra; vakavulici ira mera sota kei koya e na masu, e na mataka kei na bogi, kei na gauna talega ni kana, me ra vakavinavinakataka na loloma cecere ni Kalou e na nomu vakarautaka na kakana me ra vakayagataka kei na isulu era vakaisulutaki tiko kina, ka dau namuna na liga ni Kalou e na veika kece.¹²

Me iUlutaga ni Vuli

Na cava na kena ibalebale meda “vakamalumalumutaki keda”? Eda na “rawata kina vakacava na lomadra” na luveda kei ira talega na so e na dina?
E na rawa vakacava me rau kitaka na tagane vakawati kei na watina e na vukudrau na “itovo vakarokoroko” kei na”veidokadokai”? Na cava na kena yaga ni vakayacori na veika oqo? Ni rau sa veirokorokovi ka veidokai na itubutubu e na laki yaga vakacava vei ira na gone na itovo oqo?
Na gaunisala vinaka cava eda rawa ni vakauqeti ira kina na tamata me ra bula kilikili? (Raica V&V 121:41–44.) Na itovo ni veivakacacani cava e veicoqacoqa kei na ivakasala ni Turaga?
Eda dau cemuri ira vakacava na luveda e na so na gauna mai vei keda? Na cava e na yaco vei keda kei ira na luveda kevaka eda cemuri ira?
Na cava e levu kina na cala nei koya na itubutubu ke vakadodonutaka tiko na cala nei luvena ni cudru tiko? Na cava e na cakava na itubutubu e na gauna e cudruva tiko kina na luvena?
Edau qarauni ira vakacava na gone lalai na iVakabula? (Raica Maciu 19:13–15; 3 Nifai 17:11–24.) Na cava na Nona ivakasala vei ira e ra vosa vakacacataki ira na gone lalai? (Raica Maciu 18:1–6.)
Eda rawa vakacava ni tauri ira tiko vakavoleka vei keda na luveda, kina ivakavuvuli talega ni kosipeli? Na veivakalougatataki cava e na yaco vei ira na itubutubu e na nodra maroroi ira tiko na luvedra “voleka e lomadra”?

*Christ with the Children,* by Harry Anderson. E lomani ira na gone lalai o Jisu Karisto ka vakavulica “Ia ko koya yadua e na vakacala e dua vei ira na lalai oqo era sa vakabauti au, sa vinaka cake vua kevaka sa vakarubeci e domona e dua na vatu iqaqi, ka qai biu ki loma ni wasaliwa” (Marika 9:42).