Na Vakabauta: Na Yavu ni Bula Dodonu.

Vakabauta na Kalou na Tamana kei na Luvena, O Jisu Karisito, na imatai ni ivakavuvuli ni noda Lotu kei na yavu ni bula dodonu.

Tukuni e na Bula i Joseph F. Smith

E vakanuinuitaka na nona vakabauta o Joseph F. Smith vua na Tamana mai Lomalagi, na Turaga o Jisu Karisito, na rawarawa kei na dina vakaoti ni kosipeli. E na gauna a se cauravou kina o Joseph F. Smith, e vaqaqacotaka na nona vakabauta na nona yalodina kei na bula dodonu nei tinana.

E a tukuna: “Se matata tu ga vei au e na noqu vakasama na veika e yaco vei au e na gauna au se lailai kina. E sa dawai tu o tinaqu, keitou lewe levu sara na leweni vuvale me ra qaravi. E na dua na vulai tubutubu [ena maliwa ni 1849 ki na 1852] e na gauna keitou kelia oti kina e dua na qara ni pateta, e ratou tawana o tinaqu kei na so na nona ilala cauravou e dua na taga pateta lelevu ka kauta kina valenivolavola ni katini; e na yabaki oya e sega so sara ni levu na pateta. Au se cauravou lailai talega e na gauna oya kau dau draivataka tiko e dua na qiqi dre. Ni keitou draiva cake yani ki na valenivolavola ni katini, me keitou vakasobura na taga pateta keitou kauta tiko yani, e lako sara mai e dua na vunivola ka tukuna vei tinaqu, ‘Dawai Smith, e dua na ka vakamadua mo sauma tiko na nomu ikatini.’ … e vosataki tinaqu o koya ni sauma tiko na nona ikatini, lewa na cava o na kacivi koya kina, ni vuku se lialia; e tukuna talega ni so era se uabula ka ra se rawa ni cakacaka e se vakararavi tikoga e na valenivolavola ni katini. E qai vuki o tinaqu ka kaya vua: ‘ … O na tarova vei au na veivakalougataki? Kevaka au na sega ni sauma na noqu ikatini, au sa namaka na Turaga me tarova vei au na nona veivakalougatataki. Au sauma tiko na noqu ikatini sega walega ni baleta ni lawa ni Kalou, e baleta tiko niu na namaka kina na veivakalougataki.’ “

E vakamacalataka o Peresitedi Smith: “E sautu o koya baleta ni vakamuria na lawa ni Kalou. … E na volai na yaca ni dawai oya e na ivola ni lawa ni Turaga. Na dawai oya e sa vakadonui kina veika kece e na vale ni Kalou. E sega tale ni dua na cakacaka tabu ni kosipeli e na vakabekataka, ni dau talairawarawa o koya kina lawa ni Kalou, e na sega ni leqa o koya me baleta na nona cakacaka.”¹

iVakavuvuli i Joseph F. Smith

E dodonu me tiko na noda vakabauta na Kalou kei na Luvena o Jisu Karisito.

Eda vakabauta na Kalou, na Tamana na noda Turaga kei na iVakabula o Jisu Karisito, o koya e bulia na lomalagi kei na vuravura, na Tama ni yaloda. E da vakabauti koya ka sega ni vakabekataka, e da ciqomi koya e yaloda, e na noda vakabauta na lotu, e yaloda taucoko. E da kila ni lomani keda, ka da vakadonuya me Tama ni yaloda ka Tamana talega na noda Turaga ka iVakabula o Jisu Karisito.²

iMatai … e dodonu me da vakabauta na Kalou, na vakabauta e imatai tiko ni ivakavuvuli ni lotu vakatakilai, ka yavu talega ni bula dodonu taucoko.

Vakabauta na Kalou oya me da vakabauta, ni “o koya e Kovana cecere duadua ka Tamata e lewai Koya vakataki Koya, e taka mai vua na veika taucoko e uasivi, isolisoli vinaka kei na ivakavuvuli,” vei ira talega na vakabauta me baleta na tamata vakayalo me lomadonu ni bula kei na vakabulai; ka Dauniveibuli levu ni veika kece, ni kaukauwa duadua ga o koya, e kila na veika kece ga, e na nona cakacaka kei na kaukauwa ni nona Yalo Tabu e na vei vanua kece ga [raica Joseph Smith, comp., Lectures on Faith (1985), 10].

E sega walega ni da vakabauta na Kalou, o Jisu Karisito na Luvena, na iVakabula ni tamata taucoko, na Daunivosa ni Veiyalayalati Vou kei na Yalo Tabu, o koya e vola itukutuku ni Tamana kei na Luvena, “e tautauvata e na veitabagauna ka tawamudu.” ³

Na noda vakabauti Jisu Karisito e yavu tiko ni noda lotu, ka yavu talega ni noda vakanuinui kina kena bokoci na ivalavala ca, na bula vakalou ni da sa mate oti, kei na vakabulai mai na mate kei na bula tawamudu. Na noda vakabauta na ivakavuvuli sa vakalesui tale mai e na sasaga ni parofita o Josefa Simici, e vakadeitaka ka vakaukauwataki keda, ka tauyavutaki me sivia na vakatataro se vakatitiqa ni noda yalododonu kei na vakabauta e na cakacaka tabu vakalotu ni Luveni Kalou.⁴

Na vakabauta e kaya o Paula vei keda, sa vaka ni sa vakayacori na veika sa vakanuinuitaki, e vaka ni sa vakaraitaki na veika sa tawa kune [raica na Iperiu 11:1]. Vakabauta na Kalou [oya] me da vakabauta ni o Koya, ka isolisoli vei ira na vakasaqarai Koya ka lomani Koya. Na vakabauta na Kalou e na liutaki ira na tamata ki na kila ka, na veika sa taucoko kei na vakarokoroko mai liu sara. …

Eda se gone sara e na ivakavuvuli oqo ni kosipeli. Eda se qai tekivu tiko, e levu vei keda, era via kila e so na veika me baleta na ivakavuvuli ni bula kei na veivakabulai, na ivakavuvuli ni kaukauwa. E na noda vakabauta, e tukuni vei keda, ni buli kina na vuravura. O cei vei keda e tiko vua na vakabauta me vakayacora na veika? Na noda vakabauta e yalani walega ka vakayadua sara na noda bulataka na ivakavuvuli ni kosipeli e vakaraitaka na Kalou e nakiti me gadrevi e na bula sautu kei na marau. E lailai sara ga vei keda na vakabauta me da vakayacora kina na ivakavuvuli lalai oqo e vakaraitaki vei keda me matanitu ni noda bula e na veisiga. Me vosoti keda na Turaga ka yalomalua me vakavulici keda talega vakalailai ike, ka vakalailai ikeya, na vunau e na vunau kei na vosa e na vosa me keimami rawata na vakabauta e sa vakau oti vei ira na Yalododonu, e na gusu ni laione a tarovi kina, na katakata ni bukawaqa e na vakamalumalumutaki. … Na noda qasenivuli vinaka o Jisu Karisito, … e tovolea me vakavulici keda e na ivakavuvuli ni bula, na veivakabulai kei na ivakavuvuli ni kaukauwa, me vakavulici ira kina na tamata me ra vueti mai na ivau ni rarawa kei na kedra maliwa na tamata kina itutu cecere ka dokai e na vuku ni Kalou.⁵

Na dina oqo, oya me tiko taumada vei ira yadua na luvena tagane kei na luvena yalewa na vakabauta na Kalou—na vakabauta ni o Koya vakataki Koya, e kilikili, o Koya e qaqa, e lewa na veika kece o Koya, mai vei Koya talega era bula kina na veika vinaka. E na rairai ni sega ni tiko vei iko na kila ni veika oqo, io, me tikoga vei iko na vakabauta ni dina na veika oqo. Oqo talega na imatai ni vakavuvuli ni lotu vakatakilai. Ni sa volai ke sega tiko na vakabauta e na dredre sara na vakayalovinakataka na Kalou. E volai talega me da bula e na vakabauta. O koya gona au tukuna kina e dodonu me tiko vei ira na tamata na vakabauta na Kalou, o koya e Cakava ka Bulia na veika kece, o koya talega e Lewa na lomalagi kei na vuravura. Ke a sega na vakabauta ke sega ni buli rawa na vuravura; e na sega talega ni rawa ni tiko e na kena idabedabe dodonu; io, e na vakabauta na veika kece e na rawa mai vua na Kalou kei ira na tamata.⁶

Na Kalou e na nona ivakaraitaki vei ira na tamata, e dau vakarawarawataka na nona vosa me ra marautaka kina na nodra vakabauta o ira na tamata yaloraramusumusu kei ira talega na sega tu ni vuli vinaka me ra kila na ivakavuvuli ni kosipeli ka marautaka talega na dei ni nodra vakabauta vakalotu.⁷

E sega ni vakabauta ni tamata, e sega ni lotu ni tamata, sega ni dua na isoqosoqo vakalotu e vuravura, e na rawa ni cecere mai na dina. Na dina me tiko e na yavu ni lotu, ke sega e na tawayaga e na sega ni rawata talega na kena inaki. Au tukuna tiko na dina e tiko e na kena yavu, e botona kei na delana, ka vakacara sala ni nona cakacaka levu na Turaga ka tauyavutaki mai na ligana o Josefa Simici na parofita.⁸

Na Vakabauta, na isolisoli ni Kalou, e rawa mai e na noda talairawarawa.

Na Vakabauta e dau isolisoli ni Kalou vei ira na tamata, e na rawa ga mai e na talairawarawa, me vaka na veivakalougatataki tale e so. O ira na marama kei na turaga e na Lotu oqo e yalodra me ra vakabulabulataka na nodra vakabauta e na ivakatagedegede cecere era rawata era na vinakata me ra vakamuria vakamatailalai na kena ituvatuva kei na cakacaka tabu ni Lotu me lakovata tiko kei na lawa ni talairawarawa kina yalo ni Kalou. E na veika oqo kivei ira talega, era na taura kina na tamata e vuqa na vakasama vinaka me baleta na inaki ni Kalou e na vuravura oqo. Na vakabauta e vakabulabulataki na kena ibalebale oya na vakalevutaki ni kaukauwa, e dina ni na rairai sega vei ira na tamata e na bula oqo na gauna me ra na vakayagataka kina na nodra kaukauwa taucoko era taura mai na kena vakabulabulataki na vakabauta, e na rairai na vakayagataki na taucoko ni kaukauwa oya e na vuravura tawamudu, ke sega ni yaco yani e na kena gauna.⁹

E dau tukuni tu ni vakabauta e isolisoli ni Kalou, e dina sara na vakabauta e na sega ni lako mai ke sega ni cakacakataki; e na sega talega ni lako mai kevaka eda na sega ni talairawarawa kina ivakaro ni Kalou.¹⁰

Na inaki taumada ni Lotu oya na kena vakavulici na kosiplei i Karisito e vuravura. E itukutuku bibi me vakauti, e sega walega ni okati kina na vakabulai vakayalo ni tamata, e baleta tale tiko ga na nodra cakacaka vakavuravura. E sega walega ni vakavulica na yaga ni vakabauta vei keda, e vinakati talega kina na kena cakacakataki. Na vakabauti Jisu e rawa ni dei ka vinaka, io, me ka bula me vakaraitaka vua o koya e vakabauta me cakava vakataki koya na veika me baleta na nona vakabulai ka me vukei ira tale na so me ra cakava vakakina.¹¹

E da vakabauta me da bulataka na noda lotu e na veisiga e na loma ni macawa, e veiaua e na veisiga, e na veigauna talega. Ni da sa vakabauta tiko ka vakayacora tiko, e na mai vakaukauwataka na noda vakabauta, e na kaukauwa na Yalo Tabu ni Kalou e lomada, e na vakatorocaketaka na noda kila ka, e na rawarawa talega na sabaya na cakacaka eda vakayacora tiko.¹²

Au vakamasuti kemuni na taciqu kei na wekaqu e tiko na luvedra i Saioni, vei ira na cola tiko na itavi lelevu, me vakavulici vei ira na ivakavuvuli ni kosipeli, vakavulici ira me ra vakabauta na Turaga o Jisu Karisito, kei na papitaiso me bokoci kina na ivalavala ca e na gauna era yacova yani kina na yabaki walu.¹³

Na Vakabauta na Kalou e dau tokoni keda e na gauna dredre.

Me rawa ni da vueti mai na veilecayaki me baleta na kena saumi na veitaro ka dau taura na gauna me kune na kena wali, e na yaga sara na vakabauta dina kei na yalodei vua na Kalou kei na vakayacori ni nona cakacaka.¹⁴

E bibi sara na kena yaga me tiko vua e dua na kila na dina. E vakatalega kina o ira kece na Yalododonu Edaidai me dei sara tiko ga na nodra veivakadeitaki kina lewa ni Kalou, na dei ni yalodra kei na vakabauta ni nona bula tiko kei na loloma. E gadrevi vakalevu me da kila vakavinaka na kosipeli ka rawa ni da talairawarawa e na noda vakamuria na nona ivakaro. Laivi ira na tamata yadua me ra dui tarogi ira ke vaka e sa dei e yalodra na veika oqo. Ke dua na ka e yaco vei iko … veisautaka na nonu vakabauta e na inaki oya, kina lewa dodonu sara kei na loloma ni Turaga, se mai na kaukauwa mareqeti ni nona kosipeli, na itukutuku ni nona veivakabulai? Ke vakakina, e sega ni dei na nomu vakabauta, e na vinakati kina vakaukauwa e na nomu mai vakaraitaka na kena dina.

Na ivolanikalou e levu tu kina na ivakaraitaki ni tamata era vakararawataki baleta na nodra vakabauta na Kalou. E vinakati kina o ira na cauravou me ra vakararavi kina duru ni veivakayaloqaqataki.

E sega ni yavalati vakadua na nona vakabauta o Jope me baleta na Tamada sa Cecere sara mai na kena yali kece na nona iyau vakavuravura vakauasivi na rarawa levu, e na nodratou mate kece na luvena. …

E na Eparaama e tiko talega kina e dua na kena ivakaraitaki ni gugumatua kina vosa ni Kalou, kei na vakabauta ni kena wasei na nona vinaka. … E na nona yalorawarawa o Eparaama me vakabauta na Kalou e na dua na veivakatovolei e vakayacori vua e dua na tama—oya na nona vakacoboisorotaki na luvena—e da vakadikeva na titobu ni vakabauta ka vakamuria na dei ni yalo vei koya sa Cecere sara ka rawa kina me rawata na iyalayala, veitalia ke sega ni vinaka na kena basika e na gauna ni veivakatovolei. … E na vakayacora vei ira na vakabauti koya, na veiyalayalati me noda kece.

Na vuku, vakabauta kei na yalodei e vakaraitaka e so na vei tiki bibi ni lotu . … E vulica o Eparaama na dina levu, me da na vakaraitaka e yaloda, ni yalododonu na Kalou, e na vakayacora na nona yalayala e na nona vinaka taucoko. E mani vakalougatataki kina o koya, o keda talega e na veigauna dredre, baleta na noda vakabauta na Turaga ka vakamuria na nona ivakasala.e tukuni talega vua, Ni tukuna na Turaga: “au na vakalougatataki iko vakalevu, ka vakavuqataka vakalevu na nomu kawa me ra vaka na kalokalo ni lomalagi, kei na nuku mai matasawa; ia e na taukena na matamata-ni-koro ni noda meca ko ira na nomu.” [Nai iVakatekivu 22:17–18.]

Na kena ituvaki e tautauvata edaidai; vakavo ke ra sa kila na na Yalododonu ni sala era muria tiko e veivorati kei na yalo ni Kalou, era na wawale mai e na vakatovolei ka matabuto e na levu ni veivakacacani. … Io, vakatalega kina, e na nona vakabauta na Kalou o ira e dei na yalodra veitalia na veika e yaco, era na marau ni ra vakayacora tiko na veika e vinakata, e na nona kila tiko vakavinaka ni otioti ni veiyalayalati e na nodra. E sa na rawata rawa na vuravura, kei na isala lagilagi e na rawati ni sa biuta tani na Kalou me baleti ira na daulomana, vakarokorokotaka ka talairawarawa vua. …

E sega ni rawa ni dua me kila na taucoko ni veikalougataki ni Kalou, vakavo sara ga ke rawa ni yacova yani, e dua na ivakatagedegede ni vakabauta na lewa dodonu ni Kalou, e tukuni tiko e na kena ivakaraitaki. E rairai sa kunea o koya vakataki koya na vakabauta e yalona ka yalodei e na lewa kei na loloma ni Kalou. Me vakayacori yadudua, e na sega ni rawa ni dua me vukea tale e dua. Me vakavulici na lesoni ni kalasi oqo me vukei ira kina na gone ni Saioni, me usumaki e na nodra dui vakasama na dina e na vakagalalataki ira ka me ra rawa kina ni tudei kei na nodra vakabauta. Biuti ira, ni ra sa kacivi vata e na dua na soqo, me ra vakaraitaki ira kina vua na Kalou, ka tukuni tale vei ira na nona veika talei, e na kena kau mai na iVola i Momani, mai na vanua o Kirtland, mai Saioni [Jackson County, Missouri], mai Nauvoo, e na gauna ni veivakacacani ni nodra lakoyani, kina lekutu. Me ra wilika kina na loloma ni Kalou e na nona yalayala, kei na veileqa sa oti kei na veileqa tale eda sotava e sa mai vuki me itovo vinaka ni nona tamata; ka vakavoutaka na nodra veiyalayalati, sinai e na dei ni yalo e qacoya na vinaka kei na loloma ni Turaga. Me da dui vulica na noda dui lesoni, me tiko dei e yalodra, me titobu ka yavutaki vakavinaka mai na loloma ni Kalou, e dina e na takosova na mate kei eli na nona sala. …

E vinaka na Kalou; e na sega ni leqa na nona vosa ni yalayala; e dodonu me da vakabauta ga na nona vinaka kei na nona loloma. Me da dau vakabauti Koya.¹⁵

E tu o ira na tamata era dau taleitaka na kaya ni ra malumalumu. Au sega ni vakabauta oya. Vakayago, e na rairai beka; oi, vakayalo, vakavuravura, vakalotu kei na vakabauta, na tagane cava e rawa ni tautauvata kei na marama e dei tiko na yalona? E tiko vei Taniela na vakabauta me tauri koya tiko e na qara ni laione, ia, o ira na marama era sa raici ira na luvedra ni basuraki na yagodra, ka ra vosota talega na veivakararawataki ni yaloca nei setani e na kune baleta na nodra vakabauta. Era na vinakata me ra soli bula, ka tokoni ira na tagane me ra dei, vakalou, bula dodonu kei na vakabauta.¹⁶

Me dei na noda tucake e na mata ni lewe vuqa era veicoqacoqa tiko mai, ni o sa vakayacora na nomu itavi e sa ivakaraitaki ni kaukauwa ni vakabauta. Na qaqa ni vakabauta e qaqa talega ni toso iliu. Na tamata e tiko vua na yalo vakalou oya e na toso iliu; era na sega ni vakadonui me ra tucake vakadua kevaka era vinakata. Era sega ni manumanu ni nodra dui kaukauwa se vuku; era iyaya ni lawa cecere kei na inaki vakalou.¹⁷

E na vakabauta e da rawa ni curu kina ki na nona ivakavakacegu na Kalou.

Era dau kaya na parofita e na gauna makawa “na curu kina ivakacegu ni Kalou” [raica Alma 12:34;V&V 84:23–24]; na cava na kena ibalebale? E na noqu vakasama, oya na curu kina vuku kei na loloma ni Kalou, e na noda vakabauta na nona inaki kei na nona vakatulewa, me kilai kina vakamatata ni da dina tiko, ka da sega ni vakaqara tale tiko e dua na ka e sega tale ni yavalati ni liwa e dua na cagi ni vakavuvuli, se mai vei ira na tamata qaseqase se daulawaki era wawa tu me ra vakayacora na nodra cakacaka ca. Eda kila ni lako mai vua na Kalou na ivakavuvuli, ka da sega talega ni taroga e dua; era duilewa na nodra dui nanuma, na veika era vakasamataka kei na nodra vakanananu, na veika era vakasamataka kei na nodra itovo tawa kilikili. Ni sa yacova yani e dua na ivakatagedegede ni vakabauta na Kalou ka sa yali kina na vakatitiqa kei na rere “e sa curuma yani na nona “ivakavakacegu na Kalou.”¹⁸

Ke sega na veivuke ni Yalo Tabu e na sega ni dua na tamata e na kila na inaki ni Kalou se i Jisu na Karisito - na Dauveisorovaki ni vuravura, se na gaunisala e muria, na cakacaka e vakayacora se na nona vakabauta, e vakadonuya na Kalou ka na vakadeitaki talega vua na isolisoli ni bula tawamudu, na isolisoli cecere duadua.¹⁹

E na sega ni dua na tamata e na rawata na bula tawamudu kevaka e vinakata me soli bula kina veika vakavuravura me rawata kina. Eda na sega ni rawata na veika oqo kevaka se yaloda tiko ga na veika vakavuravura.

… Io, kevaka eda vakadavora cake na noda iyau i lomalagi ke da na vakagolea tani na yaloda mai na veika vakavuravura, ka kaya vua na Turaga na noda Kalou, “Tamaqu, me kakua ni yaco na noqu lewa, me yaco ga na nomuni lewa,” [raica Luke 22:42] me yaco ga na loma ni Kalou e vuravura, me vaka mai lomalagi kei na matanitu ni Kalou kei na kena kaukauwa kei na lagilagi e na tauyavutaki e vuravura. Na iValavala ca kei Setani e rau na vesu ka cemuri mai vuravura, me yacova sara ni da sa yacova na ituvaki ni vakasama oqo kei na vakabauta e na vakayacori rawa na veika oqo.²⁰

Me iUlutaga ni Vuli

Na cava na vakabauta? Baleta na cava e “yavu kina ni noda vakabauta”? Na vakabauta na Kalou kei Jisu Karisito?
Na cava eda kila me baleta na Kalou kei Jisu Karisito me na vukea na noda vakabauti rau? Na cava e yavu tiko kina ni vakabauta na dina? (Raica Alama 32:21.)
Eda na rawata vakacava na vakabauta? Eda na vakabulabulataka vakacava ka vakaukauwataka vakacava na noda vakabauta? Na cava e rau duavata kina na vakabauta kei na cakacaka?
Me da vukei ira vakacava na luveda me ra vakarabailevutaka na nodra vakabauti Jisu Karisito?
Ni da vosota na rarawa, na cava me dei kina na nodra vakabauta na Yalododonu Edaidai e na “lewa taumada kei na loloma”ni Turaga e na “kaukauwa ni veivakabulai ni kosipeli”?
Na cava eda rawa ni vulica mai na vakabauta e na ivakaraitaki i Eparaama, Jope, o ira na iliuliu kei ira na lewenilotu e na itabagauna oqo? E na kedra maliwa na veika e da sotava, e vakaukauwataki iko ka vakalougatataki talega vakacava na nomu vakabauta na Turaga?
Na cava e bibi kina vei keda meda kila ni sala eda sa muria tiko e “veiganiti kei na yalo ni Kalou”? Eda na kila vakacava na veika oqo?
Na cava na “yalodei ni vakabauta,” e na yaga vakacava e na nomu bula e na veisiga?
Na cava e da soli bula kina, ki na veika vakavuravura me rawa kina na bula tawamudu?
Na cava na kena ibalebale me da curu kina ivakavakacegu ni Kalou? Eda na curu vakacava ki na nona ivakacegu e na gauna oqo?

He Is Risen — *El sepulcro vacío,* por Del Parson. El presidente Joseph F. Smith enseñó que “es necesario tener fe en Dios… en Jesucristo, Su Hijo, el Salvador del género humano y el Mediador del nuevo convenio; y en el Espíritu Santo” (*Gospel Doctrine,* pág. 100).