Sa Noda iTavi na Vakabulai ni Tamata

E dua na noda itavi bibi me da cakacakataka na nodra vakabulai na bula tiko kei ira na sa mate.

Tukuni e na Bula i Joseph F. Smith

E na nona bula taucoko e cakacaka ka veiqaravi o Joseph F. Smith ki na matanitu ni Kalou, “e dau gugumatua me tosoi tiko na cakacaka ni Turaga.”¹ E na dua na lotuvakayabaki ka tokoni kina o koya me Peresitedi ni Lotu, e vakauqeti ira kina na Yalododonu: “Sa noda itavi me da taura matua na cakacaka oqo e na yalo qacoya kei na inaki dina e yaloda me da vakayacora, e na veivuke ni Turaga, kei na veivakauqeti ni Nona Yalo Tabu, me vaka e dau vakayacori.”²

E vakauqeti ira na Yalododonu e na vei tabana lelevu kei na tabana e na vuravura taucoko me ra veiqaravi ka veivakalougatataki vei ira na so e na sala cava ga era rawata. E na gauna a veiliutaki tiko kina e na cakacaka vakaulotu mai Igiladi, e dua na lewenilotu e Sheffield o William Fowler, e vakaraitaka na veika sa vakayacora me tosoi kina na cakacaka ni matanitu ni Kalou. E vuqa sara na veika dredre e sa sotava oti mai o Baraca Fowler, ni se bera ni lewenilotu, e vola e dua na sere me ivakaraitaki ni nona vakabauta na kosipeli ka vakavinavinakataka kina na veika sa taura oti. E a tiko o Peresitedi Joseph F. Smith e na dua na soqo ka a laga kina vakadua na sere oya. Na itekitekivu ni sere e na dua na yatuvosa e dau rogo wasoma vei ira na Yalododonu Edaidai e na veiyasai vuravura taucoko: “Keitou Vuabale” (Sere, no. 19).

E dau vakavinavinakataka o Joseph F. Smith na veitokoni yadua ni Yalododonu kei na yalovakabauta ki na cakacaka ni Turaga ka vinakata talega o koya me solia kece na nona bula e na nodra qaravi na tamata kece, o ira na bula tiko kei ira na mate. E taleitaka na nona cakacaka e na valetabu, e na gauna a cakacaka tiko kina vakadautauritukutuku e na valetabu; e a qarava ka raica talega na cakacaka ni valetabu me baleta na Edaumeni; e muri a mai peresitedi kina ni Valetabu e Salt Lake. Na tabana ni Soqosoqo ni veika me baleta na Tuvakawa e Utah (The Genealogical Society of Utah), e tauyavutaki e na 1894, e sa yaco tiko e na gauna ni nona veiliutaki. E bula nei Joseph F. Smith na cakacaka me baleta na welfea kei na vakabulai ni tamata kece, na cakacaka e tataunaka kina vei ira na Yalododonu: “e sega tale ni dua na ka e cecere sara se lagilagi e na vuravura oqo, o ya na noda cakacakataka na nodra vakabulai na bula tiko kei na nodra sorovaki na mate.”³

iVakavuvuli i Joseph F. Smith

Eda sa tiko oqo e vuravura meda vakayacora na cakacaka ni Kalou.

O koya sa tala mai na Luvena e Duabauga me vakayacora na itavi sa vakayacora oti, ka me talai ira kece na rogoca na nona vosa kei ira kece na tagane kei na yalewa e vuravura me ra vakaotia na nona cakacaka se itavi ka na sega ni rawa kevaka eda sega ni kauwaitaki; se ke da sega ni veiyaloni; se e na rawa ke da sega ni kila. Me da vulica na noda itavi; me da vulica na veika e vinakati ka sa solia vei keda na Turaga me da vakayacora, ka kila vinaka talega na itavi e sa solia mai vei keda. Eda kila deivaki talega na veiyalayalati eda sa vauci yadua kina vua na Kalou, ka nanuma talega na veika me baleti Saioni, ni sa vakalesui tale mai i vuravura edaidai.⁴

Me da nanuma tiko ni da sa vakayacora tiko na cakacaka ni Kalou—ni’u tukuna tiko na cakacaka ni Kalou, na kena ibalebale eda sa vakayacora tiko na cakacaka e sa vakarautaka o koya sa Cecere sara e vuravura me baleta tiko na noda vakabulai yadua. E dodonu me ra cakacaka tiko na tamata yadua me baleti ira kei na nodra vinaka na so. E sega ni dua na ka mai na inaki ni bula me dua me cakava taucoko na veika me baleti koya. E sega ni noda inaki me da tiko duadua e na gauna oqo se me tawamudu. Na tamata yadua me duavata e na veitokoni kei na vakabauta, o keda me da dui vakayacora ga na noda itavi ka vakanuinui vakatabakidua kina. Me ra gugumatua kina na tamata yadua me ra vakayacora na nodra itavi. Ni sa vakayacora na veika oqo ka qarauni koya tiko me savasava ka sega ni vakadukai mai na veika vakavuravura, ka vukei ira tale tiko na so me ra savasava ka sega ni vakadukai⁵

[Na kosipeli i Karisito] e bula tiko, na lotu e na veisiga, na lotu e na veiaua. E vinakati keda me da vakayacora na veika dodonu edaidai, e na aua oqo, e na macawa oqo, e na vula oqo kei na yabaki oqo; kei na veiyabaki yadua, me da bulataka kina na noda lotu—na lotu i Jisu Karisito—ni kilikili, ni dina, ni veivueti, ni loloma, ni veivosoti, ni yalo vinaka, veivauci ni sa nona na Kalou na vakarokoroko e na veiyasana e cake sara. Oqo na noda itavi.⁶

E sa tiko e dua na ilesilesi lagilagi e matada, eda sa vakaitavi tale ga e na nona cakacaka lagilagi. E yaga kina na noda vakarorogo, e yaga kina na noda bula kei na veika kece e sa solia me noda na Turaga, me vakatininaudolutaki. E dina e sega ni rawa me vakatautauvatataki, e na sega ni rawa ni vakatautauvatani e na veika kece. Sa i koya sara ga oya ka kena levu. Na kosipeli e veivakabulai ke sega na bula e sega ni dua na kena yaga.⁷

Sa noda itavi yadua meda vakayacora na veika kece me da rawata kina na noda vakabulai.

Me da cakacakataka na noda vakabulai e na rere kei na sautaninini e na iserau i Tamada ka yalo vakabauta tiko ga me yacova na ivakataotioti. Nanuma tiko ni sa volai tu na yacamu e na cakacaka ni gauna oqo ka tawamudu. O na sega nirawa ni vakasuka mai e na veiyalayalati oqo, se mo lututani mai kina, vakavo sara ga ni o sa ivalavala ca, ka qai tarava mai na itotogi ni valavala ca. Io kevaka o namaka tiko mo vakabulai; o namaki ira tiko na tama kei ira na tina, na tuakamu kei na ganemu, kai vata kei ira na nomu itokani; ka namaka tiko na lagilalgi, na vuku kei na bula tawamudu, o na rawata ga e na cakacaka ni Kalou; ni na sega talega ni dua na vanua o na rawata mai kina. O koya gona me vakadeitaki tiko na veika kece me vaka na loloma kei na inaki e na sala oqo. Mo solia kece na nomu loloma me baleta na veika oqo. Mo biuta tani na veika vakavuravura.⁸

Na kosipeli i Jisu Karisito sa i koya na kaukaua ni Kalou me vakabulai kina na tamata, e dodonu kina vei ira na turaga kei na marama e na Lotu i Karisito me ra cakacaka e na kilikili, me ra vakamuria na lawa ni Kalou, ka vakamuria talega na ivakaro sa solia, me rawa ni yaga vei ira na kaukaua ni Kalou me veivakabulai e na bula oqo.⁹

Eda vakabauta ni dodonu vei ira na tamata e na gauna oqo me ra bulataka ka vakayacora na cakacaka ni veitaratara kei na Kalou, na Tamada kei na Luvena, ka me ra kilai rau talega, na noda kilai rau oya na bula tawamudu. Eda vakabauta talega kevaka me da na bula tiko ka kilai rau e dodonu e na itabagauna oqo me da bulataka tiko na nodra bula na Yalododonu e na gauna makawa, me da marautaka talega na veivakalougatataki a soli talega vei ira, ka vuli mai Vua e na veisiga, mai na vosa e na vosa na vunau e na vunau, vakalailai e ke ka vakalailai e kea, me yacova ni da sa kila na Tamada ka kilai Koya vakataki keda. E na sega sara ni rawa vei au me’u kila e na vukumu, se me dua na tamata me kila mai e na vukuqu. Na Yalo Tabu ni Kalou e sega ni vakaraitaka vei iko na Kosipeli, se me vakadinadinataka vei iko na Tamada. Au na sega ni vakabulai iko rawa; o na sega ni vakabulai au rawa. E na sega ni rawa vua e dua na tamata e na vakasama oqo me vakabula e dua tale na tamata. Io na tamata e tiko vua na ivakadiandina ni Yalo Tabu e yalona ka tiko talega vua na kila na imatai ni ivakavuvuli ni Kosipeli e na rawa ni tukuna vua e dua tale, na nona tukuna na tamata e tukuni vua e na rairai kila na dina, e muri e na rairai na ciqoma kina. Ia, mai na nona talairawarawa e na Kosipeli kei na nona cakacaka kilikili e na vakabulai koya, ka sega ni o ira na tamata ka ra soli vakadinadina vua. E na sala ga oqo era rawa ni vakabulai kina na tamata.¹⁰

Mo kakua ni vakabauta walega, mo talairawarawa talega ka cakava na veika e vakarota na Kalou. Oya e sega walega ni ka mo cakava, ia mo solia talega na nomu vakasama, na veika o vinakata kei na yalomu taucoko e na lomasoli vua na Kalou. Mo solia kece na yalomu vua naTamada, ka vakayacora kece na veika e vinakata mai vei iko, ke o vinakata na vakabulai kei na bula vakalou e na Nona iserau.¹¹

Me da cakacaka me da vakabulai kina.

Oi! Kemuni na Kalou, me’u kua ni vakayalia na veika au sa taukena. E na dredre sara vei au ke’u na vakayalia na veika sa noqu, sa solia vei au ka sa vakaitavitaki au kina na Kalou, ka sa vakanuinui tiko vei au me baleta na veidusimaki, ni veituberi, kei na ivakaraitaki vinaka. Tamaqu, kakua ni laivi au me’u malumalumu e na noqu tovolea me’u vakabulai ira na so. Na loloma cecere e tekivu e vale. Na bula tawamudu e dodonu me tekivu e vale. Au na rarawa sara kevaka me vakaraitaki vei au me’u kila e na gauna mai muri, baleta na noqu sega ni kauwaitaka e vale, na noqu tovolea tiko me’u vakabulai ira tale na so, au sa vakayalia kina na noqu. Au sega ni vinakata oya me yaco ni gauna oqo eda rawa ni vukea kina e so. Au kila ni’u sega ni rawa ni vakabulai ira kece na tamata, io au rawa ni vakavulici ira me ra vakabulai. Au rawa ni solia eso na ivakaraitaki vei iratou na luvequ e na gauna oqo me ratou rawa ni vakabulai kina, e sa noqu itavi me vakayacori taumada oya. E noqu itavi taumada vei iratou mai vei ira tale eso e vuravura. Niu sa vakaotia na noqu cakacaka e dodonu meu vakayacora e vale, au na vakatetea talega na noqu kaukaua kei na vinaka vei ira tale na so e na noqu igu taucoko.¹²

Na noda itavi e na vuravura oqo me da vakayacora na veika vinaka, me da butuka sobu e yavada na veika ca, me da vakacerecerea na kilikili, na savasava, kei na yalo savasava ni tamata, ka me tauyavutaki e na nodra vakasama na luveda, mai na veika kece, na loloma ni Kalou kei na nona vosa, e na tiko vata kei ira me ivurevure ni rarama, kaukaua, kei na vakabauta ka liutaki ira tiko mai na gauna ni nodra gone ka yacova ni ra sa tamata qase, ni ra sa vakarautaki tu me dei na nodra vakabauta ki na vosa ni Turaga, e na kosipeli e sa vakalesui tale mai kei na Matabete, kei na kena tauyavutaki o Saioni, e na sega tale ni dua na ka e na viritaki sobu se me soli vei ira na tamata. Kevaka me dua na ka au vinakata me cecere mai na dua tale e na vuravura oqo, na ka ga me baleti iratou na luvequ, oya me ratou yavutaki se kila ka vakabauta, me ratou kua ni vuki tani mai kina.¹³

Na yalo sa vakabulai e vuravura e taleitaki e na iserau ni Kalou me vaka na yalo sa vakabulai e vale. Sa tiko na cakacaka me vakayacori vakadodonu e vale, e na noda mata ni katuba; e na sega ni yaga vei keda kevaka eda na sega ni vakayacora na cakacaka e dodonu me caka e na noda loma ni vale kei iratou na lewenivuvale ka qai lako yani i vuravura mo qai laki cakava yani kina na cakacaka e sa sega tu ni dua na kena yaga. Meda vakayacora ga na noda itavi e na veivanua kece.¹⁴

Me da cakacaka me baleta na nodra vakabulai na bula tiko kei na mate.

Me da tokona na Karisito kei ira na nona tamata e na nona cakacaka kilikili kei na veisorovaki; me da veitokoni e na veika dodonu ka veivukei e na veika sa sega ni dodonu, me da na veitokani ka ivakabula e na Ulunivanua o Saioni, dua e na vukuna e dua me da vukei ira talega na malumalumu ka vakaukauataki ira, vakauqeti ira na vakatitiqa tiko ka vakararamataka na nodra vakasama me ra kila na veika dodonu, me da mai iyaya e na liga ni Kalou ni da sa ivakabula vei ira na tamata. E sega ni baleta ni tiko vei keda na kaukaua me da vakabulai ira na tamata. E sega vei keda; io e tiko ga vei keda na kaukaua me da vakaraitaka vei ira ni ra na rawa ni vakabulai kevaka era na talairawarawa kina lawa ni Kalou. Eda rawa ni vakaraitaka vei ira na nodra ilakolako me ra rawa ni vakabulai kina, ni tiko vei keda na dodonu me da vakayacora na veika oqo, e tiko talega vei keda na kila kei na vakasama e rawa ni vakayacori kina, e na dua talega na ka taleitaki vei keda meda vakavulica … e na ivakaraitaki se na ivunau vei ira na noda ilawalawa e na veiyasai vuravura.¹⁵

Na noda itavi me da vakabulai ira na tamata. Eda sa cakacaka tiko … me ra kau mai na tamata se na nodra vakasama me ra kila na kosipeli i Jisu Karisito, me ra kau mai me ra mai veivutuni, me ra mai talairawarawa ki na veika e vinakati e na lawa ni Kalou. Sa tovolei tiko me da vakabulai ira na tamata mai na nodra cala, ka vakauqeti ira talega me ra vukitani mai na nodra cakacaka ca ka vulica me ra vakayacora na veika vinaka.¹⁶

Na noda itavi me da veivakabulai, me da veitaqomaki mai na ca, vakabulai ira na tamata, me da kauta mai na rarama kei na dina i vuravura, ka vakagumatuataki ira na tamata e vuravura me ra lako kilikili vua na Kalou ka me ra dokai koya talega e na nodra dui bula.¹⁷

Na veivakatovolei … na kaukaua ni yaloda … me da vakasaqara na noda rawa ni solia na vakacegu kei na veiqaravi, na noda rawa ni vukei ira na so, mai na noda rawa ni vukei keda ga vakataki keda ka biuti ira sobu i ra na tamata tale e so ni ra tovolea tiko me ra bula.¹⁸

Me da dau namaka me ra vukei o ira na so, me ra rawa ni qaqa kina—me da kua ni vakadrukai ira! E da namaka tiko na bula tawamudu—na noda inaki me ra tuberi cake mai na tamata—me da kua ni vakalolovirataki ira.¹⁹

Na noda bisinisi meda vakabula na vuravura, me ra vakabulai na tamata kece ga; me ra mai tiko duavata kei na lawa ni Kalou kei na ivakavuvuli ni kilikili, na lewai kei na dina me ra na vakabulai e na matanitu ni noda Kalou, e na dua na gauna e na nodra talairawarawa tiko kina cakacaka vakalotu ni kosipeli, era na mai veiwekani kei na Kalou ka veitacini kei Jisu Karisito. Oqo na noda itavi.²⁰

E na sega ni oti rawa na noda cakacaka me yacova ni da sa vakabulai keda vakataki keda, ka vakabulai ira talega na vakanuinui tiko vei keda eda mai rawa kina ni ivakabula e na Ulunivanua o Saioni, me vakatalega kina na Karisito. Eda sa kacivi e na itavi oqo. O ira na mate era na sega ni rawa ni vakavinakataki ke sega o keda. E tiko na noda itavi me da vakayacora me baleti ira; e tiko na cakacaka me vakayacori me ra rawa ni vakabulai kina o ira na, sega ni kila kei ira na ca tu na nodra ituvaki ni bula e na nodra mai tiko qo ka sega ni ra vakavakarau kina bula tawamudu; me da dolava na katuba vei ira, e na noda vakayacora na cakacaka era sega ni rawa ni vakayacora vakataki ira, ni veika oqo e nuitaki e na nodra sa sereki mai na “vale ni veivakabobulataki,” me ra lako mai iliu ka mai bula me vaka e vinakata na Kalou vakayalo ka qai lewai me vaka na tamata vakayago.²¹

Na cakacaka me baleti ira na mate, na itavi e solia vei keda na Parofita o Josefa me da vakayacora e sega ni ivakaro walega, e dusimaka tiko vei keda me da dau qarauni ira na wekada kei ira na tubuda era sa mate ka se bera ni rogoca na kosipeli, me ra kua ni guilecavi. Me da vakarawarawataki keda e na cakacaka tabu vaka kosipeli ni sa vakaraitaki ni na yaga e na noda marau, na nodra vakabulai kei na nodra vueti o ira na bula tu e vuravura ka sega ni vulica na kosipeli ni ra sa mate se mate ka sega ni kila, era sa waraki keda tu, na luvedra era se bula tiko e na gauna eda rawa ni vakayacora kina na cakacaka vakalotu oqo, me ra vakayacora na cakacaka e dodonu me caka me ra sereki mai na vale ni veivakabobulataki. E na noda gumatuataka na cakacaka oqo e na vukudra, e na lutu mai vei ira na sinucodo ni veivakabobulataki, na butobuto e vauci ira tu e na seyavu yani, e na cilavi ira na rarama ni ra na rogoca talega e na vuravura ni yalo na cakacaka era sa vakayacora na luvedra e ke me baleti ira, era na marau kei iko e na nomu sa vakayacora na nomu itavi oqo.²²

E na sega ni yaco mai na gauna vei ira na vakaitutu vakaMatabete e na Lotu i Jisu Karisito ni Yalododonu Edaidai, me ra tukuna kina ni sa vuqa na ka era sa vakayacora. Mai na balavu ni noda bula tiko kei na noda rawa ni vakayacora tiko na veika vinaka e na noda cakacaka me tarai cake kina o Saioni, me baleta na nodra vakabulai na vuvale ni tamata, e dodonu, e na lomasoli, me da vakayacora vakavinaka e na yalo mamarau na itavi e soli vei keda meda vakayacora, ke lailai se levu.²³

Me iUlutaga ni Vuli

Na cava e bibi kina meda kila ni tamata kece e lako mai e vuravura “me ra mai vakayacora na nodra itavi”? Na cava e dredre kina se sega ni rawa vei keda meda rawata na noda itavi e na “noda cakacaka tiko vakalevu” me baleti keda ga?
Eda rawa ni cakava na cakacaka ni Kalou me noda cakacaka? Na cava e vinakati kina na noda igu taucoko e na cakacaka ni Turaga? E na yaga vakacava na noda digidigi e na noda vinakata me da vakayacora na cakacaka ni Turaga?
Na cava e dodonu me da vakayacora ka uasivi sara mai na noda vakabauta kei na talairawarawa me da rawa kina ni taqomaki ka vakabulai e na iserau ni Kalou? Na cava na kena ibalebale vei iko mo solia na “yalomu, na lomamu, na yalomu taucoko kei na veiciqomi ni vakasama vua na Kalou”? Mai na veika kece o sa vakayacora eda na vakabulai vakacava? (Raica 2 Nifai 25:23.)
Na veika cava e dodonu me da vakasaqara me vakadeitaki kina e na nodra vakasama na noda matavuvale “mai na veika kece eso”?
Eda na tovolea vakacava me da vakabulai keda vakataki keda ka rawata talega na noda itavi ni veiqaravi? E na rawa vakacava na noda qaravi ira na so e na Lotu e na vakalougatataki kina na noda matavuvale?
Eda na vakasaqarai “ka vakabulai ira vakacava na tamata”? Na cava eda rawa ni cakava me da vukei ira kina na tamata me ra yalo dodonu ka vakabauta na lawa ni Kalou?
Na cava me da vakayacora me taluva kina na “sinucodo ni veivakabobulataki” mai vei ira na sa mate ka ra sega ni kila na kosipeli? Na cava o na vakila ni na vukei iko mo kila, ni tamata kece o vukei ira “era na marau kei iko e na kena sa vakayacori na itavi oqo”?
Na cava na “ivakatovolei … na kaukaua ni yaloda”e kune e na noda”rawa ni vukei ira na so”? Na cava o kila kina ni rawa oqo? E vakacava se na gauna cava o sa bau solibula kina me ra vinaka kina na so? Na cava e yacovi iko e na nomu vakayacora na veika oqo?

Na valenivolavola ni Genealogical Society of Utah e Salt Lake City, ni bera na 1917 e qai tarava mai na Family History Library. Mai na imawi ki na imatau: O Lillian Cameron, O Joseph Christensen, O Joseph Fielding Smith, kei Bertha Emery.