« មេរៀនទី ១ ឯកសាររៀបចំសម្រាប់ថ្នាក់ ៖ ការសិក្សាពីគោលលទ្ធិនៃគ្រួសារដ៏នៅអស់កល្បជានិច្ច » ឯកសារគ្រូបង្រៀន គ្រួសារដ៏នៅអស់កល្បជានិច្ច ( ឆ្នាំ ២០២២ )
« មេរៀនទី ១ ឯកសាររៀបចំសម្រាប់ថ្នាក់ » ឯកសារគ្រូបង្រៀន គ្រួសារដ៏នៅអស់កល្បជានិច្ច
មេរៀនទី ១ ឯកសាររៀបចំសម្រាប់ថ្នាក់
ការសិក្សាពីគោលលទ្ធិនៃគ្រួសារដ៏នៅអស់កល្បជានិច្ច
សូមស្វាគមន៍មកកាន់វគ្គសិក្សាស្ដីពីគ្រួសារដ៏នៅអស់កល្បជានិច្ច ! សេចក្ដីពិតដែលអ្នកនឹងរៀនពេញមួយវគ្គសិក្សានេះ បូកផ្សំជាមួយនឹងការធ្វើសកម្មភាពតាមការបំផុសគំនិតដែលអ្នកទទួលបាន ដែលអាចជួយអ្នក និងគ្រួសាររបស់អ្នកឲ្យខិតកាន់តែជិតព្រះ ហើយទទួលបានពរជ័យទាំងអស់ដែលទ្រង់សព្វព្រះទ័យចង់ប្រទានដល់អ្នក ។ អ្នកក៏នឹងអាចជួយមនុស្សដទៃទៀតឲ្យធ្វើដូចគ្នានេះបានកាន់តែប្រសើរផងដែរ ។
នៅពេលអ្នកសិក្សាឯកសាររៀបចំខាងក្រោមសម្រាប់មេរៀនទី ១ សូមពិចារណាពីពរជ័យ និងអំណរដែលព្រះវរបិតាសួគ៌សព្វព្រះទ័យឲ្យបុត្រាបុត្រីរបស់ទ្រង់ទាំងអស់ទទួលបាន និងរបៀបដែលការណ៍នោះទាក់ទងនឹងក្រុមគ្រួសារ ។
កំណត់ចំណាំ ៖ ឯកសាររៀបចំនេះនឹងផ្ដល់ដល់អ្នកនូវមូលដ្ឋានគ្រឹះមួយ សម្រាប់បទពិសោធន៍នៅក្នុងថ្នាក់របស់អ្នក ។ ការសិក្សាមេរៀននីមួយៗនៅក្នុងឯកសាររៀបចំ មុនពេលមកថ្នាក់រៀន នឹងជួយអ្នកឲ្យទទួលបានបទពិសោធន៍រៀនសូត្រកាន់តែស៊ីជម្រៅ និងមានអត្ថន័យជាងមុន នៅអំឡុងពេលអ្នករៀននៅក្នុងថ្នាក់ ។
ផ្នែកទី ១
តើការទុកចិត្តលើសេចក្ដីស្រឡាញ់ និងព្រះប្រាជ្ញាញាណដ៏ល្អឥតខ្ចោះរបស់ព្រះវរបិតាសួគ៌ និងព្រះយេស៊ូវគ្រីស្ទ អាចធ្វើឲ្យមានភាពខុសគ្នាអ្វីខ្លះ នៅក្នុងជីវិតផ្ទាល់ខ្លួន និងជីវិតគ្រួសាររបស់ខ្ញុំ ?
យើងត្រូវបានឡោមព័ទ្ធដោយយោបល់ និងព័ត៌មានខុសៗគ្នាជាច្រើនអំពីប្រធានបទគ្រួសារ ។ ពេលខ្លះ ទស្សនវិស័យអំពីគ្រួសារដែលសង្គមទទួលយក គឺជាការផ្ទុយស្រឡះពីផែនការរបស់ព្រះវរបិតាសួគ៌ ។ កាលណាយើងដឹង និងយល់ពីព្រះវរបិតាសួគ៌ និងព្រះយេស៊ូវគ្រីស្ទ និងបុគ្គលិកលក្ខណៈរបស់ទ្រង់ទាំងទ្វេកាន់តែច្បាស់ នោះយើងកាន់តែអាចទុកចិត្តលើការបង្រៀន និងការប្រឹក្សារបស់ពួកទ្រង់បានកាន់តែខ្លាំង រួមទាំងបញ្ហាគ្រួសារផងដែរ ។ នៅពេលយើងធ្វើដូច្នោះ នោះយើងអាចរៀនមើលឃើញអ្វីៗ ដូចដែលទ្រង់ទតឃើញដែរ—គឺចេញពីទស្សនវិស័យដ៏អស់កល្បមួយ ។
ការសិក្សានៅក្នុងការរៀបចំសម្រាប់ថ្នាក់រៀន
សូមអាន នីហ្វៃទី២ ២៦:២៤; ម៉ូសាយ ៤:៩; និង អេសាយ ៥៥:៨–៩ ហើយស្វែងរកសេចក្ដីពិតអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអាចជួយអ្នកឲ្យទុកចិត្តលើទ្រង់ទាំងទ្វេបាន ។ សូមគិតដល់ការគូសចំណាំអ្វីដែលអ្នករកឃើញ ។
សូមគិតអំពីរបៀបដែលការពិពណ៌នាអំពីព្រះវរបិតាសួគ៌ និងព្រះយេស៊ូវគ្រីស្ទនៅក្នុងវគ្គបទគម្ពីរទាំងនេះ អាចមានឥទ្ធិពលលើរបៀបដែលអ្នកជ្រើសរើសដើម្បីមើលទៅបញ្ហា និងសំណួរដែលពិបាកនានា ទាក់ទងនឹងប្រធានបទគ្រួសារ ។ អែលឌើរ រីឆាត ជី ស្កត ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ក្នុងនាមជាព្រះវរបិតារបស់អ្នក ព្រះរាជបំណងរបស់ទ្រង់គឺដើម្បីសុភមង្គលដ៏អស់កល្បរបស់អ្នក ការអភិវឌ្ឍដ៏ខ្ជាប់ខ្ជួនរបស់អ្នក និងការបង្កើនសមត្ថភាពរបស់អ្នក ។ ព្រះរាជបំណងរបស់ទ្រង់គឺដើម្បីចែកចាយអ្វីៗទាំងអស់ ដែលទ្រង់មានជាមួយនឹងអ្នក ។ ( « Obtaining Help from the Lord » Ensign ខែ វិច្ឆិកា ឆ្នាំ ១៩៩១ ទំព័រ ៨៦ )
ការសិក្សានៅក្នុងការរៀបចំសម្រាប់ថ្នាក់រៀន
នៅក្នុងកិច្ចខិតខំរបស់ព្យាការីដើម្បី « ព្រមាន និងព្រមានទុកជាមុន » ប្រឆាំងនឹងការបោកបញ្ឆោតនៃពិភពលោកនេះ នោះគណៈប្រធានទីមួយ និងកូរ៉ុមនៃពួកសាវកដប់ពីរនាក់ បានចេញការប្រកាសអំពីក្រុមគ្រួសារនៅឆ្នាំ ១៩៩៥ ( សូមមើល ហ្គរដុន ប៊ី ហ៊ិងគ្លី « Stand Strong against the Wiles of the World » Ensign ខែ វិច្ឆិកា ឆ្នាំ ១៩៩៥ ទំព័រ ១០០ ) ។ សូមអាន « ក្រុមគ្រួសារ ៖ ការប្រកាសដល់ពិភពលោក » ( នៅលើគេហទំព័រ ChurchofJesusChrist.org ) ហើយសូមពិចារណាពីអ្វីដែលវាបង្រៀនអំពីពរជ័យ និងអំណរដែលព្រះវរបិតាសួគ៌សព្វព្រះទ័យឲ្យអ្នក និងក្រុមគ្រួសាររបស់អ្នកទទួលបាន ។ អ្នកអាចគូសចំណាំភស្ដុតាងនៃសេចក្ដីស្រឡាញ់ និងព្រះរាជបំណងរបស់ទ្រង់សម្រាប់សុភមង្គលរបស់អ្នក ។
សញ្ជឹងគិតនៅក្នុងការរៀបចំសម្រាប់ថ្នាក់រៀន
សូមគិតអំពីបញ្ហា ឬសំណួរក្នុងសង្គមនាពេលថ្មីៗនេះមួយចំនួន ដែលបានឆ្លើយដោយសេចក្ដីពិត ដែលបានប្រកាសនៅក្នុងការប្រកាសអំពីក្រុមគ្រួសារ ។ តើមានគុណតម្លៃអ្វីទៅ ក្នុងការទុកចិត្តលើព្រះប្រាជ្ញាញាណ និងទស្សនវិស័យដ៏អស់កល្បរបស់ព្រះវរបិតាសួគ៌ និងព្រះយេស៊ូវគ្រីស្ទ ជាជាងទុកចិត្តលើប្រាជ្ញា និងទស្សនវិស័យរបស់ពិភពលោកនេះស្ដីពីប្រធានបទទាំងនេះ ?
ផ្នែកទី ២
តើយើងអាចបង្កើតបរិយាកាសមួយដែលមានសុវត្ថិភាព ដើម្បីពិភាក្សាពីបញ្ហារសើបដោយរបៀបណា ?
សូមគិតអំពីស្ថានភាព សក្តានុពល និងឧបសគ្គនានានៅក្នុងគ្រួសាររបស់អ្នក ។ តើគ្រួសាររបស់អ្នកខុសពីក្រុមគ្រួសារដទៃទៀត ដែលអ្នកស្គាល់យ៉ាងដូចម្ដេចខ្លះ ? អារម្មណ៍មួយចំនួនដែលដក់ក្នុងចិត្តយើងយ៉ាងខ្លាំង ទាក់ទងទៅនឹងក្រុមគ្រួសាររបស់យើង ។ នៅពេលយើងពិភាក្សាពីគោលលទ្ធិនៃគ្រួសារ យើងត្រូវតែចងចាំថា ស្ថានភាព និងបទពិសោធន៍គ្រួសាររបស់មនុស្សដទៃទៀត អាចខុសពីស្ថានភាព និងបទពិសោធន៍របស់យើងផ្ទាល់ ។ ការចងចាំពីកាណ៍នេះអាចជួយយើងឲ្យកាន់តែមានសេចក្ដីស្រឡាញ់ ការប្រុងប្រយ័ត្ន និងការគោរពកាន់តែខ្លាំងឡើង នៅពេលយើងពិភាក្សាពីគោលលទ្ធិស្ដីពីគ្រួសារ ។ តាមរយៈការធ្វើដូច្នេះ នោះយើងរៀបចំខ្លួនបានកាន់តែប្រសើរឡើង ដើម្បីឲ្យព្រះវិញ្ញាណបរិសុទ្ធបង្រៀនយើងបានកាន់តែជ្រៅជ្រះអំពីក្រុមគ្រួសារ និងព្រះរាជបំណងរបស់ព្រះវរបិតាសួគ៌នៃយើង ។
ការសិក្សានៅក្នុងការរៀបចំសម្រាប់ថ្នាក់រៀន
ព្រះយេស៊ូវគ្រីស្ទគឺជាគំរូដ៏ល្អឥតខ្ចោះរបស់យើង ក្នុងការមានចិត្តសប្បុរសដល់បុគ្គលទាំងឡាយនៅគ្រប់កាលៈទេសៈទាំងអស់ ។ សូមអាន មរ៉ូណៃ ៧:៤៥–៤៨ ។ សូមគិតអំពីគ្រាទាំងឡាយនៅក្នុងជីវិតរបស់អ្នក នៅពេលដែលព្រះអង្គសង្គ្រោះបានបង្ហាញព្រះទ័យសប្បុរសដល់អ្នក ហើយសូមពិចារណាពីភាពខុសគ្នា ដែលវាធ្វើឲ្យកើតមាននៅក្នុងជីវិតអ្នក ។
ក្នុងនាមជាសិស្សរបស់ព្រះយេស៊ូវគ្រីស្ទ នោះយើងព្យាយាមដើម្បីក្លាយដូចជាទ្រង់កាន់តែខ្លាំង តាមគ្រប់របៀបដែលយើងនិយាយ និងធ្វើ ។ វាត្រូវការការអនុវត្តដើម្បីរៀនស្ដាប់មនុស្សដទៃ ហើយរៀន និងចែកចាយសេចក្ដីពិតតាមរបៀបដែលពេញដោយសេចក្ដីស្រឡាញ់ ការប្រុងប្រយ័ត្ន និងការគោរព ។ នៅពេលយើងនិយាយដល់ចំណុចរសើប ស្ដីពីប្រធានបទដែលទាក់ទងទៅនឹងគ្រួសារ ប្រកបដោយចិត្តសប្បុរស នោះយើងកំពុងធ្វើដូចជាព្រះអង្គសង្គ្រោះ ។ ប្រសិនបើយើងស្ម័គ្រចិត្ត នោះព្រះវិញ្ញាណបរិសុទ្ធអាចជួយយើងឲ្យដឹងពីផ្នែករបស់យើង ក្នុងការស្ថាបនា និងការរក្សាបរិយាកាសក្នុងថ្នាក់រៀនឲ្យមានសេចក្ដីស្រឡាញ់ ការគោរព និងការរាប់អានដើម្បីរៀនសូត្រពីសេចក្ដីពិត ។
អែលឌើរ នែល អិល អាន់ឌើរសិន នៃកូរ៉ុមនៃពួកសាវកដប់ពីរនាក់បានបង្រៀន ៖
ការអង្វរកររបស់ខ្ញុំនៅថ្ងៃនេះ គឺសម្រាប់កុមារ យុវវ័យ និងយុវមជ្ឈិមវ័យរាប់រយពាន់នាក់ ដែលមិនបានកើតមកក្នុងគ្រួសារបែបនេះ ដែលខ្វះនូវពាក្យថាក្រុមគ្រួសារ « ដ៏ល្អឥតខ្ចោះ » ។ ខ្ញុំមិនគ្រាន់តែនិយាយចំពោះយុវវ័យ ដែលមានបទពិសោធន៍ដូចជា ម្តាយឪពុកស្លាប់ លែងលះគ្នា ឬចុះអន់ថយសេចក្តីជំនឿនោះទេ ប៉ុន្តែខ្ញុំក៏និយាយទៅកាន់យុវជន និងយុវនារីរាប់ម៉ឺននាក់នៅជុំវិញពិភពលោក ដែលទទួលយកដំណឹងល្អ ដោយគ្មានម្តាយ ឬឪពុកមកព្រះវិហារជាមួយពួកគេ ផងដែរ ។
យុវវ័យថ្ងៃចុងក្រោយទាំងនេះ ចូលរួមសាសនាចក្រដោយមានសេចក្ដីជំនឿយ៉ាងខ្លាំងក្លា ។ ពួកគេសង្ឃឹមថា នឹងបង្កើតគ្រួសារដ៏ល្អឥតខ្ចោះនៅក្នុងជីវិតរបស់ពួកគេផ្ទាល់នាថ្ងៃអនាគត ។ ក្នុងរយៈពេលនេះ ពួកគេក្លាយជាផ្នែកមួយដ៏សំខាន់នៅក្នុងក្រុមអ្នកផ្សព្វផ្សាយសាសនា យុវមជ្ឈិមវ័យដ៏សុចរិតរបស់យើង និងអស់អ្នកដែលបានលុតជង្គង់នៅឯទីអាសនាដើម្បីចាប់ផ្តើមគ្រួសារផ្ទាល់ខ្លួនរបស់ពួកគេ ។
យើងនឹងបន្តបង្រៀនគំរូរបស់ព្រះអម្ចាស់សម្រាប់ក្រុមគ្រួសារ ប៉ុន្តែឥឡូវនេះជាមួយនឹងសមាជិកជាច្រើនលាននាក់ និងភាពខុសគ្នាជាច្រើនដែលយើងមាន … នោះយើងត្រូវតែគិតគូរ និងប្រុងប្រយ័ត្នឲ្យកាន់តែខ្លាំងឡើង ។ …
… ចូរឲ្យយើងគិតពីពួកគេ ស្វាគមន៍ពួកគេ ឱបក្រសោបពួកគេ ហើយធ្វើអ្វីៗគ្រប់យ៉ាងដែលយើងអាចធ្វើបាន ដើម្បីពង្រឹងសេចក្តីស្រឡាញ់របស់ពួកគេចំពោះព្រះអង្គសង្គ្រោះ ។ ( « Whoso Receiveth Them, Receiveth Me » Liahona ខែ ឧសភា ឆ្នាំ ២០១៦ ទំព័រ ៤៩–៥០, ៥២ )
កត់ត្រាគំនិតរបស់អ្នក
សូមពិចារណាពីបទពិសោធន៍ផ្ទាល់ខ្លួនរបស់អ្នក និងភាពខុសគ្នាដែលអ្នកអាចធ្វើបាន តាមរយៈការពិភាក្សាពីប្រធានបទដែលរសើបអំពីគ្រួសារដោយចិត្តសប្បុរស ។ សូមកត់ត្រាអ្វីដែលអ្នកអាចធ្វើបាន ដើម្បីជួយមនុស្សដទៃទៀតឲ្យមានអារម្មណ៍ពីសេចក្ដីស្រឡាញ់ និងការគោរព ខណៈកំពុងពិភាក្សាពីប្រធានបទបែបនេះ ចេញពីទស្សនវិស័យនៃសេចក្ដីពិតដ៏អស់កល្បមួយ ។