Хэсэг 70
1831 оны арван нэгдүгээр сарын 12-нд Охайогийн Хайрамд бошиглогч Иосеф Смитээр дамжуулан өгөгдсөн илчлэл оршвой. Бошиглогчийн түүх нь арван нэгдүгээр сарын 1–12-ныг дуустал дөрвөн тусгай чуулган болсныг өгүүлдэг. Эдгээр цугларалтын сүүлчийнхэд нь, хожим нь Сургаал ба Гэрээнүүд хэмээн нэрлэгдэх, Book of Commandments (Зарлигуудын ном) болгон хэвлэгдэх илчлэлүүдийн агуу ач холбогдлыг авч үзжээ. Чуулган эдгээр илчлэл нь “Сүмд бүхэл Дэлхийн баялаг адил үнэ цэнэтэй” хэмээн санал өгсний дараа энэ илчлэл өгөгдсөн юм. Иосеф Смитийн түүхэнд уг илчлэлүүдийг “эдгээр эцсийн өдрүүдэд Сүмийн суурь, мөн дэлхийд ашиг тус болохоор, бидний Аврагчийн хаант улсын нууцуудын түлхүүрүүд хүмүүнд дахин итгэл хүлээлгэн өгөгдсөнийг харуулсан” хэмээн өгүүлжээ.
1–5, Илчлэлүүдийг нийтлэхээр даамлууд томилогдов; 6–13, Сүнслэг зүйлсэд хөдөлмөрлөх тэд хөлс шангаа хүртэх нь зүй ёсны юм; 14–18, Гэгээнтнүүд эд зүйлсэд тэгш байх ёстой.
1 Болгоогтун, мөн анхаарагтун, ай Сионы оршин суугчид та нар, мөн алс хол байгаа миний сүмийн хүмүүс та нар бүгд, мөн бибээр өөрийн үйлчлэгч Бага Иосеф Смитэд, мөн бас өөрийн үйлчлэгч Мартин Харрист, мөн тэрчлэн өөрийн үйлчлэгч Оливер Каудерид, мөн тэрчлэн өөрийн үйлчлэгч Жон Витмерт, мөн бас өөрийн үйлчлэгч Сидней Ригдонд мөн өөрийн үйлчлэгч Виллям В.Фелпст, тэдэнд зарлигийн замаар өгсөн Их Эзэний үгийг сонсогтун.
2 Учир нь бибээр тэдэнд зарлиг өгч байгаа билээ; иймийн тул, анхаарагтун, мөн сонс, учир нь Их Эзэн тэдэнд ийн хэлж байна—
3 Их Эзэн бибээр тэднийг томилсон бөлгөө, мөн тэдэнд миний өгсөн мөн үүнээс хойш тэдэнд миний өгөх илчлэлүүд болон зарлигуудын даамлууд байхаар тэднийг томилсон болой;
4 Мөн шүүлтийн өдөр би энэ ажил үүргийн тайланг тэднээс шаардах болно.
5 Иймийн тул, тэдгээрийг мөн тэдгээрийн асуудлуудыг, тийм ээ, тэдгээрийн ашгийг зохицуулахын тулд бибээр тэднийг томилсон билээ, мөн энэ нь Бурханы сүм дэх тэдний ажил юм.
6 Иймийн тул, тэд эдгээр зүйлийг сүмд ч, мөн дэлхийд ч өгөх ёсгүй хэмээх зарлигийг би тэдэнд өгч байна;
7 Гэсэн хэдий ч, тэд өөрсдийн хэрэгцээ болон өөрсдийн хүсэлд шаардлагатайгаас илүүг хүлээн авахын хэрээр, энэ нь миний агуулахад өгөгдөх ёстой;
8 Мөн хаант улсын хуулиудын дагуу тэд өв залгамжлагчид болохын хэрээр, ашиг тус нь Сионы оршин суугчдад мөн тэдний үеийнхэнд ариулан адислагдах ёстой.
9 Болгоогтун, энэ бол өөрийнх нь ажилд байдаг хүн болгоноос Их Эзэний шаардах тэр зүйл бөлгөө, бүр Их Эзэн бибээр томилсон эсвэл хожим томилох аль ч хүнээс шаардахын адил буюу.
10 Мөн болгоогтун, амьд Бурханы сүмд харьяалагдах хэн боловч энэ хуулиас ангид байх нь үгүй;
11 Тийм ээ, бишоп ч, Их Эзэний агуулахыг хянах төлөөний хүн ч, эд зүйлсийн ажил үүрэгт томилогдсон тэрээр ч үгүй бөлгөө.
12 Сүнслэг зүйлсийг эрхлэхээр томилогдсон тэрээр, мөнхүү тэрээр бүр эд зүйлсийг эрхлэх ажил үүрэгт томилогдсон тэдний адилаар хөлс шангаа хүртэх нь зүй ёсны юм;
13 Тийм ээ, илүү элбэг дэлбэгээр, Сүнсний үзүүлэлтүүдээр дамжин тэдэнд үржин өсөх тийм элбэг дэлбэгээр буюу.
14 Гэсэн хэдий ч, эд зүйлсдээ та нар тэгш байх ёстой, мөн үүнийг та нар шуналгүйгээр үйлдэх хэрэгтэй, эс тэгвээс Сүнсний үзүүлэлтүүдийн элбэг дэлбэг байдал үл өгөгдөх болно.
15 Эдүгээ, би энэ зарлигийг өөрийн үйлчлэгчдэд өгч байна, тэднийг амьд байх үед тэдний ашиг тусын төлөө, тэдний тэргүүн дээрх миний адислалуудын илэрхийллийн төлөө мөн тэдний хичээл зүтгэлийн шагналын төлөө мөн тэдний аюулгүй байдлын төлөө буюу;
16 Хоол хүнс болон хувцас хунарын тулд; өвийн тулд; орон байрнууд болон газруудын тулд Их Эзэн бибээр тэднийг ямар ч нөхцөлд орууллаа гэсэн, мөн Их Эзэн бибээр тэднийг хааш нь ч болов илгээлээ гэсэн буюу.
17 Учир нь тэд олон зүйлд үнэнч байгаа билээ, мөн тэд нүгэл үйлдээгүйн хэрээр сайныг үйлдсэн билээ.
18 Болгоогтун, Их Эзэн бибээр нигүүлсэнгүй болой мөн тэднийг адислах болно, мөн эдгээр зүйлийн баяр хөөрт тэд орох болно. Бүр тийм буюу. Амен.