Sacerdocio ha ñembo’e ñanemba’énteva
Presidente Henry B. Eyring rupive
Primer consejero Primera Presidencia-pegua
Tupã ikatu ome’ẽ poder sacerdocio-pe oimeraẽva circunstancia ñaimévape ǧuarã; oñeikotevẽnte tajajerure humildad reheve.
A’agradese pejeroviáre cherehe añe’ẽ haǧua umi orekóvape Tupã sacerdocio ko mundo-pe. Añandu ko oportunidad ipohyiha aikuaa’imígui pe jerovia Ñandejára omoĩvare pende ári. Pe’aseptávo pe sacerdocio, oñeme’ẽ avei peẽme derécho peñe’ẽ ha pemba’apóvo Tupã rérape.
Upe derécho oñemoañete oǧuahẽvo Tupãgui inspiración añoite . Upérõ ae ikatúta peñe’ẽ Hérape ha pemba’apo Hérape. Ikatu pejavy peimo’ãrõkuri: “Péa niko ndahasyiete. Ojejerurévo chéve añe’ẽ térã ame’ẽva’erãrõ peteĩ sacerdocio-pegua bendición ikatúta arresivi inspiración”. Ikatu avei, pe diácono mitãite térã pe maestro oñekonsola oimo’ãvo: “Akakuaavévo térã añehenóivo misionero-rã, upépe aikuaáta mba’épa he’íne térã ojapóne Tupã”.
Pepensami pe ára peikuaava’erãháme mba’épa Tupã he’íne térã mba’épa Ha’e ojapóne. Pe ára niko oǧuahẽma opavavépe, noñeimportái mba’e llamamiento oreko sacerdocio-pe. Akakuaa campo misional-pe Segunda Guerra Mundial aja. Miembro-kuéra mombyry oiko ojuehegui ha sa’i oñeme’ẽ chupekuéra gasolina. Che añoite diácono che rrámape. Miembrokuéra ome’ẽ iñofrénda de ayuno presidente-pe oúvo reunión de ayuno ha testimoniohápe ojejapóva ore rógape.
Arekópe 13 áño, rova Utah-pe ha pe barrio tuicha. Chemandu’a che asignación peteĩha aha ogaháre ambyaty ofrenda de ayuno. Ahecha peteĩva umi téra oĩva umi sobre-re ha ahecha pe ijapellído ojoguaha peteĩva umi mbohapy testigo Libro de Mormón-guápe. Ahenói okẽme jeroviáre. Peteĩ kuimba’e oipe’a pe okẽ, omaña pochy cherehe ha sapukáipe he’i chéve aha haǧua. Che añakãity ahávo.
Upéva ojehúkuri haimete 70 áñoma, ha chemandu’a gueteri añanduhague oĩveha ajapo ha ha’eva’erã. Añembo’énterõkuri fe reheve asẽvo upe árape, ikatúnekuri oñeme’ẽ chéve inspiración apytavévo pe okẽme, apukavy ha ha’évo péicha nunga: “Avy’aite roikuaávo. Gracia mante nde ha ne familia-kuéra pejapova’ekuére yma, aha’arÕta rohecha mes oikévape”.
Ha’e térã ajapo rire upéicha, oiméne niko ipochyvéta ha oñe’ofende, ha katu aikuaa mba’éichapa añeñanduva’erãmo’ã che. Aharãngue ñembyasy reheve, ikatu’arãmo’ã añandu che akã ha che korasõme pe ñemomorã he’ẽ’asýva: “Oĩporã, siervo porã”.
Opavave ñañe’ẽ ha ñamba’apova’erã Tupã rérape umi ára pe discernimiento ñeipytyvÕ’ỹre ndojehupytymo’ãiha inspiración’ỹre. Umi ára ikatu oǧuahẽ ndaipóri jave tiempo ñañembosako’ívo. Ojehu py’ỹi chéve. Ojehu chéve ojapo heta áño peteĩ hospital-pe peteĩ túva he’i jave chéve ha che irũme umi médico he’ihague chupe itajýra mbohapy áño orekóva hasyetéva, omanombotaiteha. Amoĩvo che po peteĩ ivenda’ỹhápe iñakã ári, che aikuaava’erã, Tupã siervo ramo, mba’épa Ha’e he’íne ha ojapóne.
Ou che akã ha che jurúpe ha’e oikovetaha. Pe pohãnohára oĩva hína ipochyeterei ha he’i chéve ajei haǧua upégui. Asẽ pe hospital kotýgui añandúvo py’aguapy ha mborayhu. Pe mitãkuña’i oikove ha oike pe reunión sacramental-hápe último ára aime jave de visita upe távape. Chemandu’a gueteri pe vy’a ha satisfacción añandúva ha ajapóvare Ñandejára ha pe familia servicio-pe.
Pe diferencia añandúva upe jave ha ñembyasy añandúva aharamoguare pe okẽgui diácono ramo, ou umi a’aprende’akuégui ñembo’e ha poder del sacerdocio ojoajuha. Diácono-rõguare, ndaikuaái gueteri upéramo jareko haǧua upe poder ñañe’ẽvo ha ja’actua Tupã rérape ñaikotevẽha revelación, ha péva jareko haǧua tekotevẽha ñañembo’e ha ja’obra fe reheve ikatu haǧuáicha Espíritu Santo ñanemoirũ.
Upe pyhare aha mboyve upe ógape ambyaty ofrenda de ayuno niko añembo’ékuri añeno mboyve. Ha katu, ahendu mboyve pe ñehenói hospital-gui, semanas ha mése aja añeha’ãkuri asegui pe modelo he’íva presidente Joseph F. Smith ombo’évo Tupã ome’ẽha ñandéve inspiración ñaikotevẽva sacerdocio poder jaipuru haǧua. Omoĩkuri péicha:
“Nañaheñointeva’erã Chupe ñe’ẽitáre; nañambyajúiva’erã Chupe ñembo’e puku reheve. Ñaikotevẽva katu, ha jajapova’erã ñande Santos de los Últimos Días háicha, ñanemba’erãite, jaha py’ỹi Hendápe, jatestifika ñanemandu’aha hese ha ñaimeha dispuesto jajapyhývo Héra ñande ári, jajapóvo Imandamientokuéra, ja’actuávo tekojojáre, ha jarekoseha Ijespíritu ñanepytyvÕ haǧua”1.
Upéi he’i oréve presidente Smith mba’érepa roñembo’eva’erã, siervo oñekomprometévaicha oñe’ẽ ha ojapóvo Tupã rérape. Ha’e he’i: “¿Mba’e pejerure pene ñembo’épe? Pejerure Tupã tapenderechakuaa, tohendu peñembo’évo ha tapenderovasa Ijespíritu reheve ”2.
Ndaha’éi umi ñe’ẽ jaipurúvarente, ha katu ikatu oñeikotevẽ paciencia. Péva peteĩ mba’éichapa ñañemoaǧui Ñande Ru Yvagaguáre Ha’e ñanderechakuaa haǧua personalmente. Ha’e niko Tupã opa mba’e ári, opavavéva Ru ha upéichavérÕ jepe oĩ dispuesto ome’ẽvo Ijesareko peteĩva Ita’ýrape. Oimeva’erã upévare Ñandejára oipuru ko’ã ñe’ẽ: “Ñande Ru yvágape reiméva, toñesantifikákena nde réra”3.
Hasy’ỹve ñañandu porã reverencia ñañesũvo térã ñañakãity, ikatúramo jepe ñañemoaǧui ñande Ru Yvagaguáre peteĩ ñembo’e iformal’ivéva ha ikirirĩvare, py’ỹi pejapova’erãháicha. Oĩne tyapu ha hentekuéra umi jerére opa ára. Tupã ohendu umi ñembo’e jajapóva kirirĩhápe, ha katu jaikuaava’erã mba’éichapa ñamboykéta umi distracción, ikatúre peikotevẽ peteĩ conexión Tupã ndive ha ikatúva ndoúi kirirĩ jave.
Presidente Smith niko he’i ñañembo’eva’erãha ikatu haǧuáicha Tupã orrekonose ñane llamamiento jaservívo Chupe. Ha’e oikuaa porãma umi ñane llamamiento-kuéra. Ha’e ñanerenóikuri ha ñañembo’évo Chupe ñane llamamiento-re, Ha’e he’ivéta ñandéve hese4.
Ame’ẽta peẽme peteĩ ejemplo ikatúvagui ojapo peteĩ maestro orientador oñembo’évo. Oiméne peikuaáma ojapova’erã:
“Toho opavave miembro-kuéra rógape, omokyre’ỹvo chupekuéra oñembo’e haǧua ñe’ẽ rupive, ñemihameháicha avei, ha ojapóvo hikuái opa ojapova’erã hógape …
“… toñangareko akoiete umi tupaogua miembro-kuérare, ha toime hendive ha tomombarete;
“ha toñangareko ani oĩ tembiapovai tupaópe, ni ñorairõ peteĩva ambuéndi, ni japu, ni terakuãvai, ni ñe’ẽrei;
“ha tojehecha opavave miembro tupaogua toñembyaty py’ỹi, ha avei tojehecha opavave tojapo ojapova’erã”5.
Avei maestro orientador iñexperienciavape ǧuarã ha iñirũ ipahaguévape, péva ndaikatuiete ojejapo Espíritu Santo pytyvõ’ỹ rehe. Pepensa umi familia térã umi peñehenoiva’ekuére peservi haǧua. Pe criterio humano ha jejapo porãsénte, ndohupytymo’ãi.
Peñembo’eva’erã peikuaa haǧua umi hentekuéra korasõ, peikuaa haǧua mba’e oĩ vaíva tekovépe ha umi peikuaaporã’ỹva korasõ ha noĩrĩva ansioso peikuaávo chupekuéra . Tekotevẽ peikuaa Tupã oipotáva pejapo, peipytyvõ haǧua ikatuháicha ojejapo, ikatúrõ peñanduhápe avei mborayhu Tupã oñandúva hesekuéra.
Umi iñimportánte ha hasýva llamamientos sacerdocio rehegua rupi presidente Smith he’í ñandéve ñañembo’eva’erãha, akoiete pejerure’asyva’erã Tupãme tapenderovasa Ijespíriture. Peikotevẽta Espíritu Santo-re, ndaha’éi peteĩ jeýnte, ha katu Tupã he’i jave ñanemoirũva’erãha. Upévare ñañembo’e tapiava’erã Tupãme tañandegueraha pe servicio ñame’ẽvape Ita’yrakuérape.
Ndaikatúire jahupyty pe sacerdocio potencial Espírituñemoirũ’ỹre, peẽ ha’éta opa vy’a enemigo blanco. Ha’e ikatúrõ penetenta pepeka haǧua, ha’e ikatu avei omomichĩve pe poder pejeguerahávo Espíritu-re ha upéicha omomichĩ avei pe sacerdocio poder. Upévare presidente Smith he’i akoiete ñañembo’eva’erãha Tupã ñande’adverti ha ñanemo’ã haǧua mba’evaígui6.
Ha’éniko ñande’advertí heta jeýicha. Umi amonestaciones oĩ pe Plan de Salvación ryepýpe. Profetas, apóstoles, presidentes de estaca, obispos ha misionero-kuéra ohupi iñe’ẽ amonestación rehegua jajehekýi haǧua calamidades ñande fe rupi Jesucristo-re, arrepentimiento ha umi convenio sagrado jejapo ha ñeñongatu.
Poseedores del sacerdocio ramo peẽ peime umi Ñandejára ñe’ẽ de amonestación ryepýpe. Ha katu, pehenduva’erã pe amonestación pendejehegui, ndaikatumo’ãi pesobrevivi espiritualmente Espíritu Santo pytyvõ’ỹre pende rekove ára ha árape.
Peñembo’e ha peñeha’ãva’erã pereko haǧua. Upéicharõ mante ikatúta pejuhu upe gía pehasa haǧua pe tape po’i hatatĩ ipytũva rupive. Pe Espíritu Santo ha’éta pe gía omombe’úvo ohóvo añetegua peñehekombo’évo profeta-kuéra ñe’ẽre.
Ou haǧua peẽme upe gía oñeikotevẽvéta pe ñehendu ha moñe’ẽ’ímiguinte. Peñembo’e ha peñeha’ãva’erã fe reheve umi ñe’ẽ añetegua rehegua toǧuahẽ pene ikorasõme. Peñembo’eva’erã Tupã penderovasa haǧua Ijespíritu reheve, pendeguerahávo opa añetegua gotyo ha ohechauka peẽme tape porã. Upéicha omombe’úta peẽme ha penderaháta tape porãre pende rekovépe ha pe servicio peme’ẽvape sacerdocio ryepýpe.
Conferencia general niko ome’ẽ tuicha oportunidad jaheja haǧua Ñandejára tome’ẽve poder jaservi haǧua Tupã sacerdocio-pe. Ikatu peñembosako’i ñembo’e reheve. Ikatu pembojoaju pende fe umi oñembo’étavandi. Ha’ekuéra oñembo’éta hetápe oǧuahẽ haǧua tovasapy.
Peñembo’éta Espíritu ou haǧua profeta-pe Ñandejára portavoz háicha. Peñembo’éta umi Apóstoles-re ha opa umi Tupã siervo-re. Umíva apytépe peẽ peime, diácono guie sumo sacerdote con experiencia peve, ha oĩne kakuaa ha imitãva ikatúva oho pya’e mundo de los espíritu-pe, oje’etahápe chupekuéra: “Oĩporã, siervo porã ha ifielva”7.
Ko ñembo’e oǧuahẽta heta umi oñesorprendétavape. Ha’ekuéra ikatu ndorekóikuri peteĩ cargo irresponsabilidáva Tupã rréino yvy áripe; oĩta he’íva sa’i ohechaha pene ñeha’ã térã araka’eve noñeme’ẽiha chupekuéra oportunidad oporoservívo. Oĩta oñandúva pe servicio ára ko tekovépe sa’iveha pe oha’arõvagui hikuái.
Ñandejárape ǧuarã umi factores determinantes ndaha’emo’ãi umi cargo ojerekova’ekue ni pe ára jaservi’akue pukukue. Upéva jaikuaa Ñandejára parábola umi obreros de la viña rupi ojepaga jojahápe oñeimporta’ỹre mboy árapa ni moõpa ojeservi. Oñerrecompensáta oserviháicha hikuái.8.
Aikuaa peteĩ kuimba’e, oǧuahẽma hi’ára paha ko viña-pe peteĩ pyhare 23:00 aravo jave. Heta áño oñeme’ẽ chepe tratamiento cáncer-pe ǧuarã. Umi áño aja hasy ha dificultad apytépe, o’asepta llamamiento ojapóvo aty semanal miembro-kuéra ibarrioguándi, umi ifamiliakuéra ohómava’ekue hógagui ha ojejapo hesekuéra responsable; umíva apytépe oĩ viuda. Oñehenói oipytyvõ haǧua chupekuéra ojuhúvo consuelo socialidad ha Evangelio ñehekombo’épe.
Oǧuahẽvo chupe pe solemne pronóstico final sa’ímaha hi’ára hekovépe, ijovispo oĩ mombyry. Mokõi ára rire, orahauka ijovíspope peteĩ momarandu ilíder de los sumos sacerdote rupi. Kóicha he’i iñasignaciónre: “Aikuaa obispo oĩha mombyry, ha katu areko planes. Ajaposékuri peteĩ actividad ñande atýpe ǧuarã lunes oúvape. Mokõi miembro ikatu ñandegueraha jajapo peteĩ recorrido Centro de Conferencias-rupi. Oĩne miembro-kuéra ikatúva ñanepytyvõ japororaha haǧua ha heta oĩ scouts ikatu omyaña silla de rueda. Umi oñe’anotáva rupi, ikatu avei ñaime heta jajevalekuaáva ñandejehe, ha iporãne jaikuaa jarekoha refuerzo, oñeikotevẽtarõ. Avei peteĩ actividad familiar porãne umi oporoipytyvõvápe ǧuarã. Pecheavísamína a’anunsia mboyve upe plan… Grásia”.
Upéi osorprende obispo-pe peteĩ telefóno ñehenói rupi. He’i’ỹre isituación ni pe ñeha’ã py’aguasúpe ojapóva iñasignaciónpe, oporandu: “Obispo, ¿oĩ piko ikatúva ajapo nderehe?”. Espíritu Santo-nte ikatúkuri opermiti chupe oñandu obispo carga pe kárga e imba’éva tuichaitérõ kuri; ha Espíritu rupi añónte ikatu ojapo peteĩ plan oservi haǧua iñermano ha iñermanakuéra pe precisión oplanifikaháicha tembiapo escultismo-pe yma imitarõ guare.
Peteĩ ñembo’e fe reheve, Tupã ome’ẽkuaa ñandéve poder sacerdocio-pe opa circunstancia jajejuhúvape; ñaikotevẽvante niko tajajerure humildad reheve pe Espíritu tohechauka ñandéve mba’épa ja’éta ha jajapóta, ha tañanderekopotĩnte jahávo jarresivi haǧua upe don.
Atestifika peẽme ñande Ru oikoveha, ñanderayhu ha ohenduha ñane ñembo’e. Atestifika Jesús ha’eha pe Cristo oikovéva Iñexpiación rupi ikatúva ñañemopotĩ ha upéicha ñanderekopotĩ Espíritu Santo ñanemoirũ haǧua. Atestifika fe ha diligencia reheve peteĩ ára ikatutaha ñahendu iñe’ẽ ome’ẽtava ñandéve gozo tuichavéva: “Iporã, siervo porã ha ifielva”9. Ajerure’asy tajareko koichagua tovasapy pe Maestro jaservívagui. Jesucristo rérape. Amén.