Pe Evangelio perspectiva eterna
Elder Rafael E. Pino rupive
Setenta gua
Umi decisión eternidad-pe ğuarãva, tekotevẽ jaguereko pe perspectiva del Evangelio.
Peteĩ rrevelasiõ Moisés-pe oñeme’ẽva’ekue rupi ojeikuaauka ñandéve mba’épa ñande Ru Yvagagua oipota: “Ha, péina ápe, kóva ha’e che obra ha che gloria: Yvyporakuéra inmortalidad ha vida eterna”1. Pévape he’i háicha, pe Túva oipotáva ha’e ome’ẽ hağua oportunidad opavave ñandéve jareko haĝua peteĩ vy’apavẽ paha. Umi rrevelasiõ ára pahagua ohechauka ñande Ru Yvagagua ojapohague peteĩ tuicháva plan vy’apavẽ rehegua opa Ta’yrakuépe ĝuarã, peteĩ plan imba’eguasúva ikatu haĝua jahajey jaikove Hendive.
Kóva ko plan vy’apavẽ rehegua ñantendéramo ome’ẽ ñandéve peteĩ jehecha eterno ha ñanepytyvõ ñame’ẽ haĝua pe valor añetegua orekóva umi tembiapoukapy, umi ordenanza, umi konvénio, ha umi jeipy’ara’ã ha jehasa’asy jarekóvape.
Peteĩ principio guasu ou Alma-gui: “upévare, oikuaauka rire chupekuéra pe plan rredensiõ rehegua, Tupã ome’ẽ chupekuéra umi tembiapoukapy”2.
Imba’eguasu jahecha mba’éichapa oñeme’ẽ umi mbo’epy, ñande Ru Yvagagua ombo’erãe Adán ha Eva-pe upe plan rredensiõ rehegua ha upéi ome’ẽ chupekuéra umi tembiapoukapy.
Kóva ha’e peteĩ añete guasu, pe plan ñentende oipytyvõta yvyporakuérape oñongatu haĝua umi tembiapoukapy, ojapo hağua umi decisión iporãvéva ha oreko haĝua pe ñemokyre’ỹ oĩporãva.
Ára aservi aja Tupaópe che ha’ékuri testígo pe jeroviapy ha mborayhu orekóva umi tupaogua miembro opáichagua tetãme, ko’ãva apytépe oĩ orekóva conflicto político, social térã económico. Peteĩ mba’e peteĩcha orekóva ko’ã miembro ijeroviáva ha’e pe techa orekóva hikuái eternidad-gui. Pe Evangelio perspectiva eterna oikuaauka ñandéve tenda jarekóva Tupã plan-pe, ja’acepta haĝua umi mba’e hasýva ha jakakuaa haĝua umía rupive, jajapo haĝua umi desición ha ñamoĩ haĝua ñande rekove pe potencial divino jarekóvape.
Perspectiva he’ise mba’éichapa jahecha umi mba’e ñama’ẽrõ mombyry guive hese ha oheja ñandéve ñame’ẽ chupe pe valor añetehápe orekóva.
Ha’e ku ñaimerõ guáicha peteĩ yvyratýpe, peteĩ yvyrá renondépe; ñañemomombyrýramo añoite ikatúta jahechaporã mba’épa añetehápe ha’e peteĩ yvyraty. Peteĩ ára ahava’ekue selva amazónica Leticia, Colombia-pe, Brasil ha Peru frontera ypýpe; ha katu ndaikatúikuri ahecha pe ituchakue térã aveve rire hi’ári ha péicha arekókuri peteĩ perspectiva.
Ore familia michĩmba aja ohecha jepi hikuái peteĩ canal de tevisión mitãme ĝuarã ombohasáva peteĩ programa hérava: ¿Mba’épa rehecha?, ojehechaukahápe umi mba’e ağuieté guive ha umi mitã oikuaava’erã mba’épa péva pe ta’ãnga oñembotuichápe ohóvo. Ojekuaa porãmbaite rire pe ta’ãnga, ndahasyietékuri jaikuaa haĝua ha’eha peteĩ mbarakaja, peteĩ yvoty, peteĩ yva, etc.
Chemandu’a peteĩ ára ohecha jave hikuái ko programa ha oñemo’aĝuiete peteĩ mba’e ha’etévaicha ivaité ha ombopy’ajeréva jepe chupekuéra, ha katu oñembotuichavévo pe ta’ãnga ohecha hikuái ha’eha peteĩ pizza hetereíva, upémavo he’i chéve hikuái: ¡Papi, ejogua oréve peteĩ peichagua! Ontende rire hikuái mba’épa ra’e upéva, pe iñepyrũmbýpe ivaietévaicha, amo ipahápe oipotaite hikuái.
Pehejami chéve tamombe’u ambue experiencia: Ore rógape ore mitãnguéra ojaposémi pe rompecabezas; ikatu oime opavave jareko raka’e oportunidad jajapo hağua peteĩ. Oĩ umi hetaiterei parte’i orekóva. Chemandu’a peteĩva ore mitã (nda’emo’ãi héra ani haĝua ojekuaa mávapa) omañámi peteĩ teĩ umi parte’i rehe, ha ko’ãva nda’ijáiramo pe tenda ha’e opensáva ohoha, ipochými ha he’i péva ndoikoiha ha omombose. Ipahápe oikuaákuri mba’éichapa omohendava’erã ontende rire opaite umi parte’i orekoha henda pe cuadro final ryepýpe, jepe heta ára ndoikuaáikuri moõpa ija.
Péicha jahecha pe Ñandejára plan. Nañapenaiva’erã opaite umi iparte rehe sa’i sa’i, ha katu ñañeha’ãva’erã jehecha pe ituchakue, ñanemandu’ávo mba’éichata pe ipahápe. Ñandejára ningo oikuaa moõpa ija opiatéva umi parte’i oike porã haĝua pe plan ryepýpe. Opaite umi tembiapoukapy oreko importancia eterna upe plan guasu vy’apavẽ rehegua ryepýpe.
Imba’eguasueterei ani jajapo desición orekóva valor eterno peteĩ vida mortal perspectiva guive. Umi desición ikatúva o’afecta pe eternidad-peĝuarã, tekotevẽ jareko pe Evangelio perspectiva.
Elder Neal A. Maxwell ombo’ékuri: “Ñaiméramo jepe pe tuicha ñeha’arõ eterno-pe, ikatu noñekumplíri umi ñane ñeha’arõ michĩvéva. Ikatu oime ñaha’arõ hína jahupyty peteĩ sueldo jehupi, jaikuaa peteĩ máva especial-va, ñagana peteĩ elección térã jaiko peteĩ óga tuichavévape, mba’e ikatúva oiko térã nahániri; ha katu pe jerovia jarekóva Túva plan rehe ñanepytyvõ jaropu’aka haĝua umi ñeha’arõ ndajahupitýiva. Ha avei, upe ñeha’arõ ñande reko ‘anhelosamente consagrados’ umi mba’e iporãvape, jepe ko’áğaite, ndajahechái pe éxito” (tojehecha D. y C. 58:27)3.
Ndajarekói peteĩ jehecha eterno térã ñahundíramo, ikatu ñande reraha jareko pe jehecha yvy’arigua ha’erõguáicha umi ñane norma ha jajapo umi desición noĩporãiva Tupã rembipota ndive.
Mormón Kuatiañe’ẽme oje’e pe actitud orekova’ekue Nefi, ha pe Lamán ha Lemuel actitud. Mayma ha’ekuéra ohasava’ekue jehasa’asy ha heta mba’evai, upevére pe actitud orekóva hikuái umi mba’e rehe tuicha ojuavy. Nefi he’iakue: “Ha tuichaiterei umi Ñandejára jehovasa ore ári, ha roikóramo jepe so’o pýrare pe tave’ỹre, ore kuñanguéra heta ikamby ho’uka hağua imembykuérape, ha imbarete hikuái, heẽ, kuimba’éicha; ha oñepyrũ ogueropu’aka hikuái iguata okaguai’ỹre”. 4.
Lamán ha Lemuel katu ochi’õ asyetékuri: “Ha péichakuri Lamán ha Lemuel, ha’éva ijypykue, okaguai itúva rehe; ha okaguai hikuái ndoikuaáigui mba’éichapa omba’apo pe Tupã omoingoveva’ekue chupekuéra”5. Pe ndajaikuaái térã jaikuaa’ỹ “mba’éichapa… Tupã omba’apo” ha’e peteĩ forma ikatuha ndajerekói pe jehecha eterno, ha pe kaguai ha’e peteĩ heda péva oñepyrũha. Jepeve Lamán ha Lemuel ohecha heta milagro Nefi ndive, ko’ãva tasẽme he’íkuri: “Ha roikorei tave’ỹre ko’ã heta ary aja; ha ore kuñanguéra omba’apo, hyeguasu aja jepeve; ha oguereko imembykuéra tave’ỹme, ha ohasa opa mba’evai ha ñemanónte ndohasái; ha iporãveva’erãmo’ã chupekuéra omano osẽ mboyve Jerusalén-gui, ohasarãngue ko’ã jeiko’asy” 6.
Mokõi actitud ojuavyetéva jepeve umi mba’evai ha jehasa’asy ombohovakéva hikuái ojojogua; ha katu pe jehecha orekóva hikuái idistinto.
Presidente Spencer W. Kimball ohaiva’ekue péicha: “Jahecháramo pe mortalidad opaite mba’eha ñande rekovépe, péicharõ umi vy’a’ỹ, jehasa’asy, mba’ejevy ha pe muerte prematura ha’étakuri peteĩ mba’evaite. Ha, peicha’ỹramo katu, jahecha pe jeikove ha’eha peteĩ mba’e eterno ojepysóva pe pasado premortal mboypýri ha oñembopukúva pe futuro eterno posmortal peve, péicharõ ñamoĩva’erã opa mba’e oikóva pe ipropia perspectiva-pe”7.
Elder David B. Haight omombe’uakue peteĩ relato pe escultor Miguel Ángel rehegua ohechauka haĝua imba’eguasuha jahecha opa mba’e peteĩ jehecha porã guive: “Opa ára, pe escultor omba’apo aja peteĩ bloque de mármol-re, peteĩ mitã oñemo’ãgui ha oma’ẽ tĩndýva hese. Osẽvo David ra’ãnga pe itágui, oĩmavo opa yvy’arigua orohory haĝua, pe mitã oporandu Miguel Ángel-pe: ¿Mba’éicha nde reikuaa ha’e oĩhague upépe?”8.
Pe jehecha oma’ẽha hague pe escultor upe mármol pedazo-re tuicha ojuavy pe mitã oma’ẽvagui hese omba’apo aja. Pe visiõ orekóva rupi pe artista umi posibilidad oĩva pe itágui oheja chupe ojapo peteĩ obra de arte.
Ñandejára oikuaa mba’épa ojapose ñande heguikuéra, oikuaa mba’éichagua ñemyatyrõpa ojapose ñande rekovépe ha ndajarekói derecho ñañemoñe’ẽvo chupe. Umi ipensamiento ijyvateve ñane pensamiento-gui9.
Atestifika jarekoha peteĩ Túva Yvagagua ñande rayhúva, hekojojáva, iporiahuverekóva, ombosako’iva’ekue peteĩ plan ñande vy’apavẽrã. Atestifika Jesucristo ha’eha Ta’ýra ha Salvador del mundo. Che aikuaa presidente Thomas S. Monson ha’eha peteĩ Tupã profeta. Ko’ã mba’e ha’e Jesucristo rérape. Amén