Plan vy’apavẽ rehegua

Presidente Boyd K. Packer rupive

Presidente Quórum Doce Apóstoles-gua

Opa Tupao rembiapo ohecha haǧua opavave kuimba’e, kuña ha imembykuéra tovy’a hógape ha tojesella ko tekove ha tekove opave’ÿvape ǧuarã.

Ojapo heta áño, Segunda Guerra Mundial rire, aharamoguare universidad-pe aikuaa Donna Smith-pe. Upéramo aleékuri mokõi mba’e oñeikotevẽha peteĩ ñemenda hi’éxitovape ǧuarã ha’éva peteĩ galleta ha peteĩ ñehetũ, ha ahechakuaa ha’eha peteĩ equilibrio porã.

Che ahava’ekue universidad-pe pyhareve, ha upéi aju jey Brigham City-pe amba’apo haǧua che ru taller-pe ka’arukue. Pe Donna clase pahaite pyhareve jave niko economía doméstica ha che ahasáva jepi imbo’eha renondépe aha mboyve. Pe okẽ oreko peteĩ ventana ividrio esmeriládova, ha che añembo’ývo pe cristal ypýpe, ha’e ikatu ohecha che ra’anga. Ha’e upe jave osẽ sapy’aite ha ome’ẽ chéve peteĩ galleta ha peteĩ ñehetũ. Ojehuva’ekue upe rire ojekuaáma. Romenda Salt Lake Templo-pe, ha péicha oñepyrũ ko ore rekove aventura guasu.

Áño ohasávo py’ỹi ambo’ékuri ko principio iñimportánteva: opa actividad Tupaogua niko ojecha peteĩ kuimba’e ha peteĩ kuña ha imembykuéra tovy’a hógape ha tojesella ko tekove ha opa eternidad-re.

Ñepyrũme:

“…umi Tupã oguejy ojapo haǧua kuimba’ekuéra ha’eichaite, ojapo haǧua chupekuéra Tupãkuéra ra’angáicha, kuimba’e ha kuñáicha.

“Ha he’i umi Tupã: Rohovasáta chupekuéra. Ha umi Tupã he’i: Jajapo tahi’a ha toñemoña, ha tomyenyhẽ ko yvy ha tosojuzga hikuái” (Abraham 4:27–28).

Ha upéicha oñepyrũ kuimba’e rekove ciclo yvy ári “Adán oikuaa hembirekópe, ha chugui heñói imembykuimba’e ha imembykuñakuéra, ha oñepyrũ oñemoña ha omyenyhẽ ko yvy.

“Ha… umi Adán ra’y ha tajyrakuéra oñepyrũ oñembyaty mokõi mokõi yvy ári… ha avei oreko ta’ýra ha tajyrakuéra” (Moisés 5:2–3).

Pe mandamiento oñemoña ha omyenyhẽ haǧua ko yvy ndopái. Iñesencial plan de redención-pe ǧuarã ha’éva opa felicidad humana fuente. Ojeipuru porãvo ko poder, ikatúta ñanemoaǧui Ñande Ru Yvagaguáre ha ñañandu peteĩ plenitud de gozo, ha pe divinidad uvei. Pe poder ñañemoña haǧua niko ndaha’éi peteĩ plan de felicidad pehẽngue mokõihánte; ha’ékatu clave vy’apavẽme ǧuarã.

Pe intimidad física jeipota niko oiko meme ha imbareteterei ñande seres humanos ryepépe. Ñande vy’apavẽ ko tekove yvy áripe, ñande vy’a ha ñande exaltación odepende mba’éichapa ñambohovái umi jeipota meme ha imbaretévape ñande rete rehegua. Pe poder ojeprocreávo hi’aju umi etapas ñepyrũ okakuaahápe kuimba’e ha kuña, upéicha heñói umi ñeñandu personales ndojoguáiva mba’eveichagua experiencia física-pe.

Iporãvéva niko, pe intimidad hapóramo romance-pe. Jepokuaa iñambuéramo jepe, kóva ipoty opa umi emoción ha anticipación rehegua ñeñandu reheve, ha avei sapy’ánte irrechásova, umi mombe’ugua’úpe he’iháicha. Peteĩ mitãkuimba’e ha mitãkuña apytépe niko oĩ ñasaindy, rrósa poty, kuatiañe’ẽ ha purahéi mborayhu rehegua, ñe’ẽpoty, ojopógui ojojapyhy ha hetave mborayhu jehechauka. Pe mundo umi mokõi jerére ojeipa, ha oñandu hikuái vy’apavẽ.

Ha peẽ peimo’ãrõ opa imitãva mborayhu romántico vy’apavẽ ijatyha umi posibilidades osẽhápente tekove fuente, ndapeikóinte gueteri pehecha haǧuáicha pe devoción ha comodidad oĩva pe ñemenda mborayhu hi’arévape. Umi omendáva niko ojeprova tentación rehe, umi malentendido, problemas económicos, krísi ogapegua, mba’asy, ha umíva ojehasávo mborayhu imbareteve. Pe mborayhu hi’ajúmava oreko peteĩ vy’apavẽ umi omenda ramóva ikatu’ỹva oimo’ã.

Mborayhu añete oikotevẽ toñeñongatu ñemenda rire ǧuarã peve upe mborayhu jehechauka omosãsóva umi tekove fuente poderes sagrados. He’ise ñamombia umi situación pe ñande rete potapy orahahápe control. Pe mborayhu potĩme oñeha’ãrõ oñepromete rire fidelidad eterna ha ojejapo rire peteĩ ceremonia legal ha legítima ha, ikatúramo, ojerresibi rire pe ordenanza sellamiento rehegua templo-pe, upe rire ae, Tupã resa renondépe, isãsova’erã umi poder ñemoñarã ojehechauka porãvetahápe mborayhu. Oñekompartiva’erã avei pe ha’évandi iñirũ akoiete ǧuarã añóndinte.

Ojeparticipárõ ipype tekopotĩme, upe proceso ombojoaju umi temiandu físico, emocional ha espiritual iporãvéva ha ijyvatevéva ohóva pe ñe’ẽ mborayhúndi. Pe tekove pehẽ ndaijojahái, ndaipóri peichagua, opa experiencia humana-pe. Pejapóvo ha peñongatúvo convenio-kuéra, hi’aréta eternidad pukukue aja, “…chupe oñeme’ẽgui umi llave santo sacerdocio rehegua, ikatu haǧuáicha pehupyty honra ha gloria” (D. y C. 124:34), “…ha pe gloria ha’éta pe plenitud ha upe rire iñemoñarépe akoiete ǧuarã” (D. y C. 132:19).

Ha katu pe mborayhu romántico ndaha’epái; peteĩ ñepyrũnte. Pe mborayhu niko okakuaa umi mitã ñeǧuahẽre, osẽva pe tekove fuente oñeme’ẽvagui umi omendávape. Pe concepción oiko peteĩ añuã oikóva ména ha tembireko apytépe. Peteĩ rete’imi oñepyrũ okakuaa peteĩ modelo ikomplejidad neporãvape. Pe nacimiento milagro-pe oiko peteĩ mitã, ojoguáva isy ha itúva ko yvy áriguápe. Hete yvygua ryepýpe oĩ peteĩ espíritu ikatúva oñandu ha opercibi ijespirituálva, ha ipype avei oke upe poder ojapo haǧua mitã ijoguaha.

“…Pe espíritu ha pe hete ha’e pe kuimba’e ánga” (D. y C. 88:15), ha oĩ léi espiritual ha física jajapova’erã ikatu haǧuáicha jahupyty vy’apavẽ. Oĩ léi eterna, umíva apytépe oĩ umi léi ohóva ko poder ome’ẽkuaáva tekove ndive, “irrevocablemente [ojedecretava’ekue] yvágape ko mundo fundación mboyve, umíva [ári] opa tovasapy oguapy” (D. y C. 130:20). Umíva niko léi espiritualva ohechaukáva pe norma moral humanidad-pe ǧuarã (tojehecha de José Smith traducción-pe, Romanos 7:14–15; 2 Nefi 2:5; D. y C. 29:34; 134:6). Oĩ convenios ombojoajúva, osella, omo’ãva ha ome’ẽ promesa opa’ỹva’erã tovasapy rehegua.

Alma omokyre’ỹ ita’ýra Shiblón-pe: “…eñeha’ã… ejejoko opa ne rembipotápe, nerenyhẽ haǧua mborayhúgui” (Alma 38:12). Pe kavaju fréno ojepuru ojegueraha, ojedirihi ha ojejoko haǧua. Upéicha avei, ñande ikatu jajoko ñane rembipota. Kóva ojepuru porãvo, pe procreación rehegua poder ohovasáta ha osantifikáta (tojehecha Joseph F. Smith, Doctrina del Evangelio, 1978, pág. 302).

Umi tentación niko katuete oĩ. Pe adversario ndaikatúigui ome’ẽ tekove, iselóso umi orekóvagui upe poder celestial. Ha’e ha umi ohóva hapykuéri oñemosẽ’akue ha orrenuncia orekóvo derecho tete yvy árigua . “…ha’e ohekágui opa yvypórakuéra taheko’asy ha’éicha” (2 Nefi 2:27). Ñanetentáta, ikatúrõ, ikatu haǧua ñandereity, ñanembyai ha, ikatu ramo, ñahundi upe don, ñanderekovepotĩ ramo, jarekotahápe progenie eterna (véase D. y C. 132:28–31).

Ñamongy’áramo tekove fuente, térã jaraháramo ambuépe totransgredi, oĩta castigos “imbaretevéva” ha “hasýva ña’aguanta” (tojehecha D. y C. 19:15) ndovaléiva mba’evéichagua placeres físicos.

Alma he’i ita’ýra Coriantón-pe: “¿Ndereikuaái piko nde, che ra’y, ko’ã mba’e ha’eha peteĩ tekoveky’a Ñandejára resa renondépe; heẽ, ijeja’e’ỹvéva opa angaipágui ndaha’éiramo tuguy ipotĩva ñeñohẽ térã Espíritu Santo ñenega?” (Alma 39:5). Jatransgredívo, ndaikatúi jajei ikonsekuénsiagui.

Umi poderes de la procreación jehechauka ovaléva ha oje’autorisáva niko oĩ ména ha tembireko omenda añetéva mbytépente. Oimeraẽva ambue mba’e ha’e peteĩ Tupã apoukapykuéra violación. Aníke pe’a umi adversario tentación vaípe, háke opa transgresión ojepagamanteva’erã “epaga peve pe último cuadrante” (Mateo 5:26).

Mba’evéicharamo noñemanifiestaporãvéi pe generosidad ha pe Tupã misericordia ndaha’éirõ arrepentimiento rupive.

Ñande rete físico orresivívo peteĩ erída, ikatu oñemonguera ha’eño, sapy’ánte pohãnohára ñepytyvõme. Ha katu, tuichaiterei ramo, heta jey ikatu opyta peteĩ cicatriz ñanemomandu’áva pe erídare.

Ñande rete espiritual katu iñambue. Ñande espíritu oñelesiona jajavy ramo ha jajapo angaipa, ha katu iñambue ñande rete yvyariguágui, pe arrepentimiento-gua proceso oikopárõ, ndaipóri cicatriz opytáva, Jesucristo expiación rupive. Pe promesa niko: “Péina ápe, oñearrepentíva hi’angaipágui oñeñyrõta; ha che, Ñandejára, nachemandu’amo’ãvéima” (D. y C. 58:42).

Ñañe’ẽvo ñemenda ha tekove ogaguáre, katuete ou ñane akãme “¿Mba’e oiko umi excepciones-gui?”. Oĩ oúva limitaciones reheve ha ndaikatúi oreko mitã. Oĩ umi inocente ñemenda oñembyaíva ikónyuge infidelidad rupi. Oĩ katu nomendáiva ha oraháva peteĩ teko ñemenda’ỹ ipotĩva.

Ko’áǧa rupi, ame’ẽ ko consuelo: ¡Tupã ñande Ru! Opa mborayhu ha generosidad ojehecháva peteĩ túva yvy árigua ideal-pe oñemagnifica Ipype, ha’éva ñande Ru ha ñande Tupã, oho mombyryvéva umi kapacida ikatúvagui oreko ñane ménte yvy árigua ñamyesakã haǧua. Ihuisiokuéra niko ijoja; Imisericordia nahu’ãi; Ipoder okompensa haǧua ohóve peteĩ comparación yvy ariguágui. “Ko tekovépente jarekóramo esperanza Cristo-re, upéicharõ ha’éta ñande umi ojeiporiahuverekovéva’erã opa kuimba’e apytépe” (1 Corintios 15:19).

Reverencia reheve ko’áǧa ha’e ñe’ẽ: templo. Aimo’ãvaicha peteĩ sellamiento koty ha peteĩ altar peteĩ paréha imitãva upépe oñesũva reheve. Upe ordenanza sagrada templo-pegua ndaha’éi peteĩ ñemendánte, upe ñemenda ikatúre ojesella Santo Espíritu de la Promesa-re, ha umi Escritura-pe he’i “[ja’eredáta] trono, rréino, principado, potestades ha dominio-kuéra” (D&C 132:19). Ikatu ahecha pe vy’apavẽ oha’arõva umi o’aceptávape upe don divino ha oipurupotĩvape.

Ermána Donna Smith Packer ha che roĩ ojoykére ko ñemendápe haimete 70 áño pukukue. Umi che rembireko reheguávare, ore mitãnguéra sy, apyta cheñe’ẽngu. Pe ñeñandu ipypuku ha aguyje imbareteterei apyta peve ndaikatuvéi añe’ẽ. Pe recompensa tuichavéva oñeme’ẽva’ekue ore rekovépe, ha tekove oúvape, ha’e ore familia ha ore nieto-kuéra. Oreaǧuivo rohóvo ore rekove pahápe ko yvy ári, a’agradese káda momento arekova’ekue ijykére ha upe promesa Ñandejára ome’ẽva’ekuére ndopamo’ãiha.

Atestifika Jesús ha’eha Cristo, Tupã oikovéva Ra’y. Ha’e oĩ ko Tupao akãme. Iñexpiasiõ rupi ha sacerdocio poder, umi familias orekóva principio tekove yvy ariguápe ikatúta ojoaju eternidad peve. Pe Expiasiö ikatúva orreskata peteĩteĩme, ndohejái cicatriz. Upéva nde’iséi noñeimportaiha jajapo’akue ni moõpa ñaĩ ni mba’éichapa oikóraka’e, ñañearrepentíramo. Ha’e opromete o’expiataha; ha ojapokuévo, ojerresolvéma. oĩ heta ñandeapytépe ojehaviránteva, ja’e porãsérõ, kúlpare, ndajaikuaáivo mba’éichapa ñakañýta.Ñakañy ja’aseptávo Cristo expiasiõ, ha opa umi hasýva ikatu iñambue mba’e porã, mborayhu ha opave’ỹvape.

Aime agradesido umi Ñandejára Jesucristo rovasapýre, procreación poder rehe, redención poder rehe, Expiación-re, ikatúva omopotĩ opáichagua máncha, oñeimporta’ỹre mba’éichaitépa hasýra’e ni mboýpa hi’are, ni mboy jeýpa oiko. Pe Expiasiõ ikatu ñanemosãso jey jaha haǧua tenonde, ñañemopotĩvo ha jaguatávo pe tape jaiporavo’akuére

Ame’ẽ testimonio Tupã oikoveha Jesús ha’eha pe Cristo, pe Expiasiö ndaha’eiha peteĩ mba’e general opa tupaópe ǧuara, Expiasiõ niko peteĩ mba’e personal, ha perekórõ pende py’apýva, ndaikatúiva sapy’ánte penemandu’a hi’aretereímagui, peipuru pe Expiasiõ. Upéva orresolvéta peẽme, ha Ha’éicha, napenemandu’amo’ãvéita umi pekádore. Jesucristo rérape. Amén.