Pe Evangelio Purahéi

Elder Wilford W. Andersen rupive

Setenta gua

Pe evangelio purahéi ha’e pe temiandu espiritual ñanembovy’áva oúva Espíritu Santo-gui, ha oguerúva peteĩ korasõ ñemoambue.

Heta áñoma, ahendu hague peteĩ entrevista radiofónica peteĩ doctor imitãva omba’apóva hospital Tetã navajo-pe, omombe’úva jehasa orekova’ekue peteĩ pyhare avá americano ijedámava, iñakarãngue trensado pukúva, oĝuahẽrõ guare pe sala de emergencia-pe. Pe médico imitãva ojagarra pe ikuatia jokoha, oñemo’ãgui pe kuimba’ére ha he’i chupe: “ ¿Mba’épe ikatu roipytyvõ?”. Pe tujami omaña tenonde gotyo ha nde’íri mba’eve. Pe médico, ipy’aguapy’ỹmavo, oha’ãjey. “Nereñe’ẽiramo chéve, ndaikatúi roipytyvõ”, he’i chupe. “Ere chéve mba’érepa eju ko hospital-pe.”

Upémarõ pe tujami oma’ẽ hese ha he’i, “Ndépa ejeroky?” Pe médico imitãva ojepy’amongetávo pe porandu jepigua’ỹre, oñantoha chupe pe paciente ha’éne haĝua peteĩ te’ýi mogueraha, pe ymaguare te’ýi jepokuaápe, oñeha’ãva omonguera umi hasývape purahéi ha jerokýpe umi pohã recetado rãngue.

“Nahániri” he’i pe médico, “Che ndajerokýi. ¿ha nde?”. Pe tujami oñakãity ha pe médico oporandu chupe: “Ikatúpa chembo’e ojeroky haĝua?”.

Pe kuimba’e mbohovái ome’ẽva chéve py’amongetarã heta áño pukukue: “Che ikatu rombo’e ejeroky haĝua,” ombohovái, “ha katu nde rehenduva’erã pe purahéi.”

Oĩ ára, ñande rogapýpe, ñambo’e porã umi paso ojeroky haĝua, ha katu nañaipytyvõi ñane famíliape ohendu haĝua pe purahéi. Pe curandéro tujami oikuaa porã háicha, hasy jajeroky haĝua purahéi’ỹre, ndaidegústoi, nañanembovy’ái ha ñanemotĩ guei katu. ¿Peha’ãvapa peẽ péva?

Sección 8 Doctrina y Convenios-pe, Ñandejára ombo’eakue José Smith ha Oliverio Cowdery-pe, “Heẽ, péina ápe, che añe’ẽta ne’akã ha nekorasõme pe Espíritu Santo rupive ndeaho’ítava ha oikétava nekorasõme” (verso 2). Jaikuaa pe jeroky paso ñane akãme, ha katu ñahendu pe purahéi ñane korasõme. Pe Evangelio jeroky paso ha’e umi mba’e jajapóva; pe evangelio purahéi ha’e pe temiandu espiritual ñanembovy’áva oúva pe Espíritu Santo-gui, oguerúva peteĩ moambue ñane korasõme ha ha’e opa mba’ejoja jeipota ñepyrũmby. Ña’aprende haĝua umi paso jerojyrã tekotevẽ disciplina, ha katu vy’a pe jeroky oguerúva ikatu ñañanduñahendúramo añoite pe purahéi.

Oĩ umi oñembohorýva Tupaogua miembro rehe pe mba’e jajapóva rupi, ha péva ñantende. Umi ojerokýva heta ára ha’ete ku iñextrañova, oĩvaíva térã, jaiporúramo escritura inglés-pegua ñe’ẽ “ijepigua’ỹva” (1 Pedro 2:9) umi nohendúiva peĝuarã pe purahéi. Pepytáva peẽ ambue auto ykére chofer oñemongu’e ha opurahéiva hína ipy’aite guive, ha katu ndaikatúi pehendu pe purahéi pene ventána oñembotýgui? ¿Ndaha’éipa péva ijepigua’ỹva? Ñane mitãnguéra oikuaáramo pe jeroky paso oikuaa’ỹre mba’éichapa ohendu ni oñandúta pe Evangelio purahéi porãite, ára ohasávo noñanduporãmo’ãi hikuái upe jeroky ha ndojerokymo’ãvéima térã, ivaínteva avei, ojerokýtante ohóvo hikuái pe jejopy oñandúva rupi umi ijerérekuéra ojerokývagui.

Tembiaporã jarekóva umi ñañeha’ãvã ñambo’e pe Evangelio ha’e ñambo’eve haĝua umi paso ojejeroky haĝua guinte. Ñane mitãnguéra vy’apavẽ odepende katupyry orekóvare hikuái ohendu ha ahayhu haĝua pe Evangelio purahéi porãite. ¿Mba’éichapa ojejapo péva?

Primero, pe ñande rekove oĩva’erã sitonizado pe frecuencia espiritual oĩporãvape. Ymavé, pe era digital mboyve, jajuhu haĝua pe ñane emisora de radio jahayhu véva ñamongu’e mbeguekatumi jepi pe dial ñasintonisa porã peve pe emisora frecuencia. Ñañemo’ãguĩvo pe número-re, estáticante ñahendu jepi, ha katu ñasintonisa porã vove, pe purahéi jahayhu véva oñahendu porã. Ko jeikovépe ñasintonisava’erã pe frecuencia oĩporãva ikatu haĝua ñahendu pe Espíritu purahéi.

Oñeme’ẽ rire ñandéve pe don del Espíritu Santo ñandekarai rire, ñanerenyhẽ pe purahéi celestial-gui oúva pe konversiõ ndive. Pe ñane korasõ iñambue ha “ndorojaposevéima mba’e vai, ha katu rojapo meméntema pe iporãva” (Mosíah 5:2). Ha katu pe Espíritu ndaikatúi oiko oĩháme py’aporã’ỹ, orgullo ni pe envidia. Ojeíramo ñande rekovégui upe mba’eandu mbeguemi, umi evangelio pu porãite py’énte ipuvaíta ha, amó ipahápe, ndaipumo’ãvéima. Alma ojapova’ekue porando hechapyrãva: “…peñandúramokuri pepuraheiseha pe mborayhu purahéi orredimíva, che aporanduse peẽme: ¿Ikatu piko peñandu upéva ko’áğaite?” (Alma 5:26).

Tuakuéra, pe ñande rekovépe nañahendu porãiramo pe Evangelio purahéi, tekotevẽ ñasintonisa. Presidente Thomas S. Monson ñanembo’e haguéicha pe octubre pasado, ñahesa’ỹijova’erã ñande py guataha (tojehecha “Examina la senda de tus pies”, Liahona, noviembre de 2014, págs. 86–88). Jaikuaa ningo mba’éichapa jajapokuaa. Jaguatava’erã pe tape jaguata hague ñanhendu ypýramo guare pe Evangelio purahéi pu. Ñamomba’apo jerovia Cristo-re, ñañe arrepenti ha ja’u pe Santa Cena, ñañandu mbareteve pe Espíritu Santo pu’aka, ha pe Evangelio purahéi oñepyrũjey ipu ñande rekovépe.

Segundo, ikatu vove ñahendu pe purahéi ñande jehegui, ñañeha’ãmbaiteva’erã ñambopu haĝua ñande rogapýpe. Ndaha’éi peteĩ mba’e ikatúa ojeforsa ni oñemoĩ mbaretépe. “Mba’evéichagua pu’aka térã influencia ikatu ni noñemanteneiva’erã pe sacerdocio ojereko haguére” —ni ha’e haguére pe túva, pe sy, pe tuicha véva térã pe oñe’ẽ hatã véva—“ha katu persuasión, longanimidad, benignidad, mansedumbre… mborayhu añete; [ha] bondad rupive” (D&C 121:41–42).

Mba’érepa umi atributo oguerúne tuichave pu’aka ha infuencia pe ogapýpe? Ko’ãva ha’égui umi atributo o’invitáva pe Espíritu Santo; ha’e umi atributo osintonisáva ñane korasõ pe Evangelio purahéi ndive; umía oĩramo, mayma umi ojerokýva upe familia-pe ojapóta umi jeroky paso hekoite ha vy’ápe, tekotevẽ’ỹre oñemonguyhyje, oñemondýi ni ojejapouka chupe.

Ñane mitãnguéra michĩmba aja, ikatu japurahéi chupekuéra pe purahéi de cuna mborayhu añete rehegua, ha katu hova’atã ha ndokeséi jave, tekotevẽne japurahéi chupekuéra pe purahéi de cuna py’aguapy rehegua. Ha imitãkusúpe, ikatu ñadesintonisa pe joavy ha ñe’ẽjapi ipuvaietéva, ha hendaguépe, ñambopu pe purahéi porãite py’aporã rehegua, ha japurahéi mba’e pe cuna-pegua purahéi py’aguapy rehegua. Umi túa ha sy ikatu ombopuporãmba pe benignidad ha mansedumbre oñomoirũ porãitéva. Ikatu ña’invita ñane mitãnguérape topurahéi joja ñanendive hikuái jañensaja aja py’aporã peteĩ vecino oikotevẽvandi.

Ndoumo’ãi ojojapa. Oimerãe músico vale oikuaa háicha, pe practica katupyry meme tekotevẽ oñembopu haĝua purahéi porã. Umi ñeha’ã ojejapo ypýva oñembopu haĝua purahéi oĩvaipa ha ipuvaíramo, pemandu’áke pe oĩvaíva ndaikatuiha oñemyatyrõ ñe’ẽapípe. Pe ogapýpe, pe ipuvaíva ha’e peteĩ ypytũ kotýpeicha: mba’eve nañanohéi pe ypytũme jeja’ógui; jaipe’ava’erã pe ypytũ tesapépe.

Umi bajo pende rogagua coro-pe ipu hatã ha ndohejáiramo pehendu mba’eve, térã umi instrumento a cuerda pende familia orquesta-pe ipu’atã’imi térã ipuvai’imíramo, térã umi flautín ryapu oĩramo opuvai térã osẽvaipáramo, peguerekóke py’aguapy. Napehendúiramo pe Evangelio purahéi pende rogapýpe, nemandu’áke ko’ã mokõi ñe’ẽ rehe: pe practica-ve pehóvo Tupã pytyvõ rehe, oĝuahẽta ára pe Evangelio purahéi omyenyhẽta pende rogapy peteĩ vy’apavẽ oje’ekuaa’ỹvape.

Oñembopu porãramo jepe, pe purahéi nomyatyrõmo’ãi opa mba’evai. Ñande rekove oguerekóta gueteri umi crescendo ha descendo, umi staccato ha ligato, péicha ha’égui pe naturaleza de la vida ko Yvy’ári.

Ha katu ñamoĩramo purahéi umi jeroky pásope, umi ritmo de la vida matrimonial y familiar sapy’a py’a ou ha hasýva, oñepyrũ ojuhu peteĩ equilibrio armónico; umi prueba hasy véva jepe omoĩta tonalidad porã ha motivo ñanemokyre’ỹva. Umi sacerdocio doctrina oñepyrũta oguejy ñane ángare ysapy ivagaguáicha; pe Espíritu Santo ha’éta opa áragua nane’irũ ha ñande cetro—peteĩ hesakãva poder ha influencia rechaukaha—ha’éta peteĩ cetro oku’e’ỹva justicia ha verdad rehegua; ñane dominio ha’éta peteĩ dominio eterno, ojejopy’ỹre, oútava ñaimeha gotyo akóinte ha tapiaite peve. (tojehecha D&C 121:45–46).

Ajerure tapéicha opaite ñande rekove ha ñande rogapýpe. Jesucristo rérape, Amén.