ព្រះស្រឡាញ់បុត្រាបុត្រីទាំងអស់របស់ទ្រង់
ព្រះយេស៊ូវគ្រីស្ទតែងតែហៅយើង ហើយទ្រង់ប្រើយើង ដែលជាអ្នកបម្រើដ៏សាមញ្ញរបស់ទ្រង់ដើម្បីជួយនាំបុត្រាបុត្រីរបស់ទ្រង់ទៅរកទ្រង់វិញ ។
តើព្រះវរបិតាសួគ៌របស់យើងសព្វព្រះទ័យចង់បានអ្វីពីបងប្អូន ? តើបងប្អូនដឹងទេថា កាលពីពេលដែលបងប្អូននៅក្នុងជីវិតមុនផែនដីរបស់បងប្អូន ព្រះវរបិតាសួគ៌បានរៀបចំបងប្អូនសម្រាប់ជីវិតរបស់បងប្អូននៅលើផែនដីនេះ ? ប្រធាន ណិលសុន បានមានប្រសាសន៍ទៅកាន់យុវវ័យថា « ព្រះវរបិតាសួគ៌របស់យើងបានរក្សាទុកវិញ្ញាណដ៏អស្ចារ្យៗបំផុតជាច្រើន … ប្រហែលជាខ្ញុំអាចនិយាយថាជាក្រុមដ៏ល្អបំផុតរបស់ទ្រង់—សម្រាប់ដំណាក់កាលចុងក្រោយនេះ ។ ពីព្រោះថាយើងត្រូវបានបម្រុងទុកសម្រាប់ថ្ងៃចុងក្រោយនេះ នោះវាជាការសំខាន់សម្រាប់យើងក្នុងការរៀនធ្វើជាសិស្សរបស់ព្រះយេស៊ូវគ្រីស្ទ ។
ព្រះអម្ចាស់ព្រះយេស៊ូវគ្រីស្ទគឺជាអ្នកគង្វាលល្អ និងស្គាល់ចៀមរបស់ទ្រង់ ហើយចៀមនោះស្គាល់អ្នកគង្វាលរបស់ខ្លួនដោយសារតែ « ទ្រង់បានហៅចៀមរបស់ទ្រង់តាមឈ្មោះវានីមួយៗ » ។ ទ្រង់តែងតែហៅយើង ហើយទ្រង់ប្រើយើង ដែលជាអ្នកបម្រើដ៏សាមញ្ញរបស់ទ្រង់ដើម្បីជួយនាំបុត្រាបុត្រីរបស់ទ្រង់ទៅរកទ្រង់វិញ ។
មួយរយៈកន្លងទៅ ប្រធានស្តេក និងខ្ញុំបានទៅសួរសុខទុក្ខសមាជិកនៃសាសនាចក្រនៅក្នុងតំបន់មួយក្នុងមួលដ្ឋាន ។ បន្ទាប់ពីយើងបានបញ្ចប់ដំណើរទស្សនកិច្ចដែលបានគ្រោងទុករបស់យើង នោះប្រធានស្តេកបានសួរខ្ញុំថា តើយើងអាចទៅជួបគ្រួសារមួយទៀតបានទេ ។ គាត់បានមានការបំផុសគំនិតថា ពួកយើងគួរតែទៅសួរសុខទុក្ខគ្រួសារនោះ ។
យើងបានគោះទ្វារ ហើយប្អូនស្រីម្នាក់បានបើកទ្វារ ។ នាងបានសម្លឹងមើលខ្ញុំ ប៉ុន្តែនាងមិនដឹងថាខ្ញុំជានរណានោះទេ ម៉្លោះហើយនាងមិនបាននិយាយអ្វីច្រើនទេ ។ ខ្ញុំបានចង្អុលទៅកាន់ប្រធានស្តេកដែលបាននិយាយស្វាគមន៍ដោយហៅឈ្មោះនាង ។ គ្រាន់តែនាងបានឮ និងឃើញគាត់ភ្លាម នោះនាងមានចិត្តសប្បាយរីករាយជាខ្លាំង ។ ពួកគេទាំងពីរបានឱបគ្នា និងយំជាមួយគ្នា ខណៈកំពុងឈរក្បែរទ្វារនៅទីនោះ ។ ការណ៍នេះបានបង្កើតបរិយាកាសដ៏កក់ក្តៅសម្រាប់ដំណើរទស្សនកិច្ចរបស់យើង ។ យើងមិនបានដឹងឡើយថា ប្អូនស្រីនោះបានទទួលការព្យាបាលដោយប្រើគីមីកាលពីមួយថ្ងៃមុននោះទេ ។ នាងមានសភាពទន់ខ្សោយណាស់ក្នុងការថែទាំកូនប្រុសពេញវ័យរបស់នាង ។ ដូច្នេះ ខ្ញុំបានជួយប្រធានស្តេកស្លៀកពាក់ឲ្យកូនប្រុសរបស់នាង ហើយយើងបានដាក់គាត់អង្គុយនៅលើរទេះរុញរបស់គាត់ ។ យើងបានបញ្ចុកអាហារដល់គាត់ ជាអាហារដែលប្អូនស្រីដ៏ល្អម្នាក់មកពីវួដបានយកមកឲ្យមុននេះ ហើយយើងបានជួយកិច្ចការផ្សេងទៀតផងដែរ ។ មុនពេលយើងចាកចេញពីផ្ទះរបស់ពួកគេ យើងបានប្រទានពរបព្វជិតភាពដល់ពួកគេ ។
អ្វីទាំងអស់ដែលបានមានក្នុងគំនិតរបស់ខ្ញុំអំឡុងពេលទស្សនកិច្ចនេះ គឺជាការបញ្ជាក់ថាព្រះយេស៊ូវគ្រីស្ទសព្វព្រះទ័យពួកគេយ៉ាងជ្រាលជ្រៅ ។ ទ្រង់យល់ពីពួកគេ និងដឹងដោយផ្ទាល់ពីការឈឺចាប់នៃស្ថានភាពដ៏ពិសេសរបស់ពួកគេ ។ ដំណើរទស្សនកិច្ចស្ទើរតែទាំងមូលបានធ្វើឡើងនៅក្នុងភាពស្ងប់ស្ងាត់ ។ ក្នុងឱកាសនេះ យើងមិនបានធ្វើទេសនកថាធំ ឬចែកចាយបទគម្ពីរដែលយើងចូលចិត្តទេ ប៉ុន្តែព្រះអម្ចាស់បានប្រទានពរដល់យើងដោយព្រះវិញ្ញាណរបស់ទ្រង់ដ៏បរិបូរណ៍ ។
ហេតុផលដ៏អស្ចារ្យបំផុតមួយដែលព្រះវរបិតាសួគ៌របស់បងប្អូនបានបញ្ជូនបងប្អូនមកទីនេះនៅពេលនេះ គឺដើម្បីឲ្យបងប្អូនអាចដឹងពីសក្តានុពលដ៏ពេញលេញរបស់បងប្អូន ។ នៅក្នុងសៀវភៅ ប្រកាសដំណឹងល្អរបស់យើង បង្រៀនយើងថា ក្នុងនាមជាសិស្សរបស់ព្រះគ្រីស្ទ យើងគប្បីចៀសវាងការប្រៀបធៀបខ្លួនរបស់យើងទៅនឹងអ្នកដទៃទៀត ។ សមត្ថភាពខាងវិញ្ញាណរបស់បងប្អូនគឺពិសេស ផ្ទាល់ខ្លួន និងមានពីកំណើត ហើយព្រះវរបិតាសួគ៌របស់បងប្អូនចង់ជួយបងប្អូនអភិវឌ្ឍចំណុចទាំងនោះ ។ វាតែងតែមាននរណាម្នាក់ដែលបងប្អូនអាចជួយធ្វើឲ្យមានអារម្មណ៍នៃសេចក្តីស្រឡាញ់របស់ព្រះវរបិតាសួគ៌របស់បងប្អូន ។ សក្តានុពលរបស់បងប្អូនគឺទេវភាព ។ ខណៈពេលដែលវាពិតជាមានសារៈសំខាន់ណាស់ក្នុងការរៀបចំខ្លួន ដើម្បីទទួលបានជោគជ័យនៅក្នុងពិភពលោកដែលមានការប្រកួតប្រជែងដ៏ខ្លាំងក្លា បេសកកម្មដ៏សំខាន់មួយពេញមួយជីវិតរបស់បងប្អូន គឺដើម្បីក្លាយជាសិស្សរបស់ព្រះយេស៊ូវគ្រីស្ទ និងគោរពតាមការបំផុសគំនិតរបស់ព្រះវិញ្ញាណ ។ នៅពេលបងប្អូនធ្វើដូចនេះ ព្រះនឹងប្រទានពរដល់ជីវិតរបស់បងប្អូន ទ្រង់នឹងប្រទានពរដល់គ្រួសារបច្ចុប្បន្ន ឬអនាគតរបស់បងប្អូន ហើយទ្រង់នឹងប្រទានពរដល់ជីវិតបុត្រាបុត្រីរបស់ទ្រង់ដែលបងប្អូនជួបផងដែរ ។
យើងរស់នៅក្នុងគ្រាមួយដែលប្រកបដោយឱកាសដ៏ច្រើន ។ ទោះបីជាយើងប្រឈមមុខនឹងការលំបាកជាច្រើនក្តី ក៏ខ្ញុំដឹងថាការលំបាកទាំងនោះគឺជាផ្នែកមួយដើម្បីអនុញ្ញាតឲ្យយើងជួយអ្នកដទៃ ឲ្យមានអារម្មណ៍នៃសេចក្តីស្រឡាញ់របស់ព្រះវរបិតាសួគ៌របស់យើង ។ ប្រធាន ណិលសុន បានបង្រៀនថា ៖ « នៅពេលដ៏ខ្លីខាងមុខនេះ យើងនឹងឃើញការបើកសម្តែង ដ៏មហិមា អំពីព្រះចេស្តារបស់ព្រះអង្គសង្គ្រោះ ដែលលោកិយនេះមិន ធ្លាប់ បានឃើញពីមុនមក » ។ យើងមាននូវអភ័យឯកសិទ្ធិក្នុងការមើលថែមនុស្សដែលត្រូវការជំនួយ ការឱបក្រសោប អារម្មណ៍នៃការលួងលោម ឬគ្រាន់តែយើងនៅជាមួយនឹងពួកគេក្នុងភាពស្ងប់ស្ងាត់ ។ ប្រសិនបើយើងអាចជួយសម្រាលបន្ទុករបស់ពួកគេបាន ទោះបីជាមានតែមួយភ្លែតក៏ដោយ នោះយើងនឹងអាចមើលឃើញការបើកសម្តែងដ៏អស្ចារ្យនៃព្រះចេស្តារបស់ព្រះអង្គសង្គ្រោះនៅក្នុងជីវិតរបស់ពួកគេបានដែរ ។
ក្នុងនាមជាសិស្សរបស់ព្រះយេស៊ូវគ្រីស្ទ ពួកបរិសុទ្ធថ្ងៃចុងក្រោយអាចធ្វើឲ្យមានភាពខុសគ្នាជាវិជ្ជមាននៅក្នុងពិភពលោកនេះ ។ យើងអាចផ្តល់នូវអារម្មណ៍នៃសេចក្តីអំណរដែលបង្ហាញឡើងនៅលើទឹកមុខរបស់យើង ជាសេចក្តីអំណរដែលយើងចែកចាយជាមួយនឹងពាក្យសម្តីនៃសេចក្តីស្រឡាញ់ និងទង្វើនៃសេចក្តីសប្បុរស ។ ចូរយើងធ្វើជាអ្នកជិតខាងល្អ និយោជកល្អ និងនិយោជិតល្អ ។ សូមឲ្យយើងខិតខំព្យាយាមធ្វើជាគ្រិស្តបរិស័ទដ៏ល្អគ្រប់ពេលវេលា ។
ព្រះអម្ចាស់បានស្តារដំណឹងល្អរបស់ទ្រង់ឡើងវិញជាមួយនឹងពិធីបរិសុទ្ធចាំបាច់នានា ដើម្បីឲ្យបុត្រាបុត្រីរបស់ព្រះវរបិតាសួគ៌អាចទទួលបាននូវរាល់ការសន្យាទាំងអស់ដែលចងភ្ជាប់យើងទៅនឹងទ្រង់ ។ តាមរយៈការជួយដល់បងប្អូនប្រុសស្រីរបស់យើងនៅក្នុងបញ្ហាប្រឈមមុខប្រចាំថ្ងៃរបស់ពួកគេ ចូរយើងចងចាំផងដែរក្នុងការជួយពួកគេឲ្យធ្វើ និងរក្សាការសន្យាដ៏ពិសិដ្ឋទាំងនេះជាមួយនឹងព្រះវរបិតាសួគ៌របស់ពួកគេ ដើម្បីទ្រង់អាចសន្យាដល់ពួកគេនូវពរជ័យដ៏សម្បូរបែបបំផុតសម្រាប់ជីវិតនេះ និងសម្រាប់ភាពអស់កល្បជានិច្ច ។ ការសន្យាទាំងនេះត្រូវបានធ្វើឡើងតែតាមរយៈការស្តារឡើងវិញនៃដំណឹងល្អរបស់ព្រះយេស៊ូវគ្រីស្ទ និងកូនសោបព្វជិតភាពរបស់ទ្រង់ប៉ុណ្ណោះ ។
នៅក្នុងន័យម្យ៉ាងទៀតថា យើងអាចជួយអ្នកដទៃឲ្យដើរនៅលើផ្លូវនៃសេចក្តីសញ្ញា ។ ពួកយើងមួយចំនួនងាកចេញពីផ្លូវនៃសេចក្តីសញ្ញានេះម្ដងម្កាល ហេតុដូច្នេះយើងត្រូវចងចាំថា សម្រាប់ព្រះវរបិតាសួគ៌ នោះយើងតែងតែមានលទ្ធភាពត្រឡប់ទៅវិញជានិច្ច ។ ទោះបីជាផ្លួវដើររបស់យើងមិនល្អឥតខ្ចោះបំផុតក៏ដោយ ក៏ព្រះអង្គសង្គ្រោះតែងតែរំឭកយើងថា « ដរាបណា [ យើងប្រែចិត្ត ] ហើយ [ ស្វែងរក ] ការអត់ទោសដោយស្មោះអស់ពីចិត្ត នោះ [ យើងតែងតែនឹងបាន ] អត់ទោសឲ្យ » ។
ឧបាយកលមួយក្នុងចំណោមឧបាយកលមួយចំនួនរបស់មាសត្រូវសព្វថ្ងៃនេះ គឺដើម្បីធ្វើឲ្យយើងគិត និងជឿថាមិនមានផ្លូវសម្រាប់យើងដើម្បីកែប្រែ ឬថាយើងមិនមានក្តីសង្ឃឹមទៀតទេ ។ ការគិតដ៏បំផ្លិចបំផ្លាញនេះបណ្តាលឲ្យយើងជាច្រើននាក់ឈប់ធ្វើការព្យាយាម ។ ហើយឥឡូវនេះគឺជាពេលដែលសេចក្តីស្រឡាញ់របស់យើង ពាក្យលើកទឹកចិត្ត និងការគាំទ្ររបស់យើង ពេលវេលារបស់យើង និងជំនួយរបស់យើងអាចធ្វើឲ្យនរណាម្នាក់មានក្តីសង្ឃឹមគ្រប់គ្រាន់ដើម្បីព្យាយាមម្តងទៀតបាន ។
ប្រហែលជាបងប្អូនកំពុងគិតថា « អ៊ីចឹង តើនរណាធ្វើការងារបម្រើដល់ខ្ញុំទៅ ? » តាមរយៈការទៅ និងការប្រសិទ្ធពរដល់ជីវិតរបស់បងប្អូនប្រុសស្រីរបស់យើង យើងនឹងប្រមូលទីបន្ទាល់ទាំងឡាយដែលនឹងបំពេញជីវិតរបស់យើងដោយសេចក្ដីជំនឿលើព្រះអម្ចាស់ព្រះយេស៊ូវគ្រីស្ទ ។ ទីបន្ទាល់ទាំងនេះនឹងធ្វើឲ្យយើងសកម្មឡើងវិញ ដើម្បីព្យាយាមម្តងទៀតដោយខ្លួនឯង ។ ព្រះវិញ្ញាណបរិសុទ្ធនឹងធ្វើឲ្យយើងសកម្មឡើងវិញ និងជួយយើងជាមួយនឹងទីបន្ទាល់ថ្មី ដើម្បីបន្តជាមួយនឹងការលំបាក និងការសាកល្បងផ្ទាល់ខ្លួនរបស់យើងផ្ទាល់ ។ នៅពេលណាដែលយើងស្វែងរកដើម្បីប្រទានពរដល់ជីវិតរបស់អ្នកដទៃ នោះព្រះអម្ចាស់យកសេចក្តីមេត្តាករុណាមកដាក់លើយើងកាន់តែច្រើនឡើង ។
សូមចងចាំថា ព្រះយេស៊ូវគ្រីស្ទគឺជាព្រះអង្គសង្គ្រោះរបស់បងប្អូន និងយល់ពីបងប្អូនដោយផ្ទាល់ ។ ទ្រង់ដឹងពីអ្វីដែលត្រូវការដើម្បីបំពេញការហៅមួយ ហើយទុកអ្វីៗមួយឡែកសិនដើម្បីជួយបុត្រាបុត្រីរបស់ព្រះ ។ ទ្រង់មានព្រះចេស្តាដើម្បីប្រទានពរដល់បងប្អូននៅក្នុងអ្វីៗគ្រប់យ៉ាង ប្រសិនបើបងប្អូនជឿលើទ្រង់ និងពុំសង្ស័យទេនោះ ។
បងប្អូនជាទីស្រឡាញ់របស់ខ្ញុំ នៅថ្ងៃនោះនៅពេលដែលអ្នកដឹកនាំបព្វជិតភាពម្នាក់ទទួលអារម្មណ៍ឲ្យយើងទៅសួរសុខទុក្ខម្តាយម្នាក់ និងកូនប្រុសដែលយើងមិនមាននៅក្នុងរបៀបវារៈរបស់យើង ខ្ញុំសូមប្រកាសថា ព្រះទ្រង់បានជ្រាបថាពួកគេត្រូវការពួកយើង ។ ហើយនៅទីបំផុត ខ្ញុំគឺអ្នកដែលទទួលបានការបម្រើ ។ នៅថ្ងៃនោះ ខ្ញុំបានទទួលមេរៀនដ៏អស្ចារ្យបំផុតមួយនៃសេចក្តីស្រឡាញ់របស់ព្រះអង្គសង្គ្រោះចំពោះពួកយើង ។
ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះអង្គសង្គ្រោះនៃពិភពលោក ថាទ្រង់មានព្រះជន្មរស់ ថាទ្រង់បានរស់នៅ និងបានសុគតសម្រាប់បងប្អូន និងខ្ញុំ ហើយថា ទ្រង់បានមានព្រះជន្មរស់ឡើងវិញសម្រាប់បងប្អូន និងខ្ញុំ ដើម្បីយើងអាចប្រាថ្នាចង់ជួបជុំជាមួយនឹងអស់អ្នកដែលនៅម្ខាងទៀតនៃវាំងនននៅឯសេឡេស្ទាលដែលពោរពេញដោយភាពរីករាយ ។ ខ្ញុំដឹងថា ទ្រង់ញាណដឹងពីបងប្អូន និងខ្ញុំយ៉ាងឥតខ្ចោះ ។ ទ្រង់ញាណដឹងពីពេលវេលាលំបាករបស់យើងម្នាក់ៗ ហើយទ្រង់មានអំណាចដើម្បីជួយយើងក្នុងគ្រាដែលយើងមានអារម្មណ៍ងាយរងគ្រោះបំផុត ។ ខ្ញុំដឹងថា ព្រះយេស៊ូវគ្រីស្ទ និងព្រះវរបិតាសួគ៌របស់យើងបានបង្ហាញព្រះកាយដល់ យ៉ូសែប ស៊្មីធ ដើម្បីស្តារដំណឹងល្អឡើងវិញនៅក្នុងសម័យនោះ ។ ខ្ញុំដឹងថា ព្យាការីជាទីស្រឡាញ់របស់យើង រ័សុល អិម ណិលសុន គឺជាព្យាការីរបស់ព្រះអម្ចាស់ ហើយខ្ញុំសូមធ្វើទីបន្ទាល់អំពីរឿងនេះនៅក្នុងព្រះនាមរបស់ព្រះយេស៊ូវគ្រីស្ទ អាម៉ែន ។