ផ្តោតលើព្រះយេស៊ូវគ្រីស្ទ និងដំណឹងល្អរបស់ទ្រង់
នៅពេលយើងមិនអើពើនឹងការរំខាននៃពិភពលោក ហើយផ្តោតលើព្រះគ្រីស្ទ និងដំណឹងល្អរបស់ទ្រង់ នោះយើងត្រូវបានធានាថាទទួលបានជោគជ័យ ។
ក្នុងឆ្នាំ១៩៩៦ ក្រុមបាល់ទាត់ផ្នែកបុរសរបស់ប្រទេសនីហ្សេរីយ៉ា បានឈ្នះមេដាយមាសនៅព្រឹត្តិការណ៍កីឡាអូឡាំពិក ដែលបានប្រកួតនៅទីក្រុងអាត្លង់តា សហរដ្ឋអាមេរិក ។ នៅពេលវគ្គផ្តាច់ព្រ័ត្របានបញ្ចប់ ហ្វូងមនុស្សដ៏រីករាយបានប្រញាប់ប្រញាល់ទៅកាន់ដងផ្លូវនៃទីក្រុងតូចធំនីមួយៗនៅក្នុងប្រទេសនីហ្សេរីយ៉ា ។ ប្រទេសដែលមានប្រជាជន ១១០ លាននាក់ បានប្រែក្លាយទៅជាការប្រារព្ធមហាព្រឹត្តិការណ៍ដ៏ធំមួយនៅម៉ោង ២ អធ្រាត្រ ! បរិយាយកាសពោរពេញទៅដោយក្តីរីករាយ សុភមង្គល និងក្តីរំភើបនៅពេលប្រជាពលរដ្ឋបរិភោគ ច្រៀង និងរាំកំសាន្ត ។ នៅគ្រានោះដែលប្រទេសនីហ្សេរីយ៉ាបានរួបរួមគ្នា ហើយជនជាតិនីហ្សេរីយ៉ាគ្រប់រូបមានមោទនភាពក្នុងនាមជាជនជាតិ នីហ្សេរីយ៉ា ។
មុនពេលការប្រកួតកម្មវិធីអូឡាំពិក ក្រុមបាល់ទាត់នេះបានប្រឈមមុខនឹងបញ្ហាជាច្រើន ។ នៅពេលការប្រកួតចាប់ផ្តើម ជំនួយគាំទ្រផ្នែកហិរញ្ញវត្ថុរបស់ពួកគេអស់រលីង ។ ក្រុមកីឡាករបានប្រកួតដោយគ្មានសម្ភារកីឡា កន្លែងហ្វឹកហាត់ អាហារ និងសេវាកម្មបោកអ៊ុតត្រឹមត្រូវ ។
រូបថតមកពី Jerome Prevost/Getty Images
មកដល់ចំណុចមួយ ពួកគេនៅសល់ពេលប៉ុន្មាននាទីចុងក្រោយពីការប្រកួតជម្រុះ ប៉ុន្តែក្រុមនីហ្សេរីយ៉ា បានយកជ័យជម្នះទប់ទល់នឹងក្រុមទាំងអស់ ។ ជ័យជម្នះដ៏សំខាន់នេះបានធ្វើឲ្យកីឡាករទាំងអស់ផ្លាស់ប្តូរទស្សនៈវិស័យចំពោះខ្លួនឯង ។ ជាមួយនឹងជំនឿចិត្តដែលទើបរកឃើញ ក្នុងនាមជាកីឡាករម្នាក់ៗ និងជាក្រុមទាំងមូល ខិតខំយ៉ាងខ្លាំង មានសាមគ្គីភាព និងការប្តេជ្ញាចិត្តយ៉ាងមុតមាំ នោះពួកគេបានរួបរួមគ្នាមិនអើពើនឹងការរំខានជាច្រើន ហើយផ្តោតតែលើជ័យជម្នះ ។ ការផ្តោតអារម្មណ៍នេះធ្វើឲ្យពួកគេឈ្នះមេដាយមាស ហើយជនជាតិនីហ្សេរីយ៉ាបានដាក់រហ័សនាមក្រុមពួកគេថា « Dream Team » ។ ក្រុម Dream Team នៅកីឡាអូឡាំពិក ឆ្នាំ១៩៩៦ នៅតែបន្តលើកឡើងនៅក្នុងវិស័យកីឡារបស់ប្រទេសនីហ្សេរីយ៉ា ។
រូបថតមកពី David Cannon/Allsport/Getty Images
នៅពេលក្រុមបាល់ទាត់បានរៀនពីការមិនអើពើនឹងការរំខាននានាដែលពួកគេប្រឈមមុខ ហើយផ្តោតលើគោលដៅរបស់ពួកគេ នោះពួកគេទទួលបានជ័យជម្នះ លើសពីការរំពឹងទុក—ហើយទទួលបានបទពិសោធន៍នៃអំណរ ។ ( ដូចយើងទាំងអស់គ្នានៅក្នុងប្រទេសនីហ្សេរីយ៉ាដែរ ! )
តាមរបៀបស្រដៀងគ្នានេះដែរ នៅពេលយើងមិនអើពើនឹងការរំខាននៃពិភពលោក ហើយផ្តោតលើព្រះគ្រីស្ទ និងដំណឹងល្អរបស់ទ្រង់ នោះយើងត្រូវបានធានាថាទទួលបានជោគជ័យ លើសពីការរំពឹងទុក—ហើយអាចមានអំណរដ៏មហិមា ។ ប្រធាន រ័សុល អិម ណិលសុន បានបង្រៀនថា « ពេលជីវិតរបស់យើងផ្តោតលើ … ព្រះយេស៊ូវគ្រីស្ទ ព្រមទាំងដំណឹងល្អរបស់ទ្រង់ នោះយើងអាចមានអំណរមិនថាមានអ្វីកំពុងកើតឡើង—ឬមិនកើតឡើង—នៅក្នុងជីវិតយើងនោះទេ » ។
ខ្ញុំសូមអធិស្ឋានថា ព្រះវិញ្ញាណបរិសុទ្ធនឹងជួយយើងម្នាក់ៗឲ្យស្តាប់តាមការអញ្ជើញរបស់ប្រធាន ណិលសុន ដោយផ្តោតជីវិតរបស់យើងលើ « ព្រះយេស៊ូវគ្រីស្ទ និងដំណឹងល្អរបស់ទ្រង់ » ដើម្បីយើងអាចដកបទពិសោធន៍នៃអំណរនៅក្នុងព្រះគ្រីស្ទ « ដោយមិនគិតពីអ្វីដែលកំពុងកើតឡើង—ឬមិនកើតឡើង—នៅក្នុងជីវិតរបស់យើងនោះទេ ។
មានដំណើររឿងជាច្រើននៅក្នុងព្រះគម្ពីរមរមនពិពណ៌នាអំពីបុគ្គលទាំងឡាយដែលបានផ្លាស់ប្តូរជីវិតរបស់ពួកគេដោយផ្តោតលើព្រះយេស៊ូវគ្រីស្ទ និងដំណឹងល្អរបស់ទ្រង់ ។
សូមពិចារណាអំពីអាលម៉ាជាកូន លោកបានបះបោរ ហើយប្រយុទ្ធប្រឆាំងនឹងសាសនាចក្រ ។ អាលម៉ាជាឪពុករបស់លោក បានអធិស្ឋាន និងតមអាហារ ។ ទេវតាមួយអង្គបានបង្ហាញព្រះកាយ ហើយបានមានបន្ទូលប្រាប់ឲ្យអាលម៉ាជាកូនប្រែចិត្ត ។ ក្នុងគ្រានោះ អាលម៉ាបានចាប់ផ្តើមរងទុក្ខ « ដោយការឈឺចាប់នៃព្រលឹងដែលជាប់ទោស » នៅក្នុងគ្រាដ៏ងងឹតទាំងនេះរបស់លោក នោះលោកបានចងចាំការបង្រៀនរបស់ឪពុកលោក ថាព្រះគ្រីស្ទនឹងយាងមកដើម្បីធ្វើដង្វាយធួនសម្រាប់អំពើបាបនៃពិភពលោកនេះ ។ ពេលចិត្តរបស់លោកនឹកគិតទៅលើរឿងនេះ លោកបានទូលអង្វរដល់ព្រះសូមសេចក្តីមេត្តា ។ ជាលទ្ធផលលោកទទួលបានអំណរមកវិញ ជាអំណរដែលលោកបានពិពណ៌នាថាល្អវិសេសណាស់ ! សេចក្តីមេត្តាករុណា និងអំណរដែលអាលម៉ាបានទទួល ដោយសារលោក និងឪពុករបស់លោកបានផ្តោតលើព្រះអង្គសង្គ្រោះ ។
សម្រាប់ឪពុកម្តាយដែលមានកូនៗ ដែលបានដើរវង្វេង សូមយកចិត្តទុកដាក់ ! ជំនួសឲ្យការងឿងឆ្ងល់ថា ហេតុអ្វីបានជាទេវតាមិនមកជួយកូនរបស់បងប្អូនឲ្យប្រែចិត្ត សូមជ្រាបថាព្រះអម្ចាស់បានដាក់ទេវតានៅលើផ្លូវរបស់គាត់ក្នុងជីវិតរមែងស្លាប់នេះ ៖ មានដូចជាប៊ីស្សព អ្នកដឹកនាំក្នុងព្រះវិហារ ឬបងប្អូនប្រុសស្រីដែលធ្វើការងារបម្រើផ្សេងទៀត ។ ប្រសិនបើបងប្អូនបន្តតមអាហារ ហើយអធិស្ឋាន ។ ប្រសិនបើបងប្អូនមិនព្យាយាមកំណត់ពេលវេលា ឬដាក់កាលបរិច្ឆេទសម្រាប់ព្រះ ហើយប្រសិនបើបងប្អូនជឿជាក់ថា ព្រះអម្ចាស់កំពុងលាតព្រះហស្តរបស់ទ្រង់ដើម្បីជួយដល់កូនរបស់បងប្អូន នោះ—មិនយូរមិនឆាប់—បងប្អូននឹងមើលឃើញឥទ្ធិពលរបស់ព្រះប៉ះដួងចិត្តកូនរបស់បងប្អូនមិនខានឡើយ នៅពេលកូនរបស់បងប្អូនជ្រើសរើសស្តាប់តាម ។ ការផ្លាស់ប្តូរក្នុងដួងចិត្តនេះដោយសារតែព្រះគ្រីស្ទគឺជាសេចក្តីអំណរ—ព្រះគ្រីស្ទគឺជាទីសង្ឃឹម ទ្រង់ជាសេចក្តីសន្យា « ខាងឯសេចក្តីល្អដែលត្រូវមក » ដូច្នេះ សូមទុកចិត្តលើព្រះយេស៊ូវគ្រីស្ទចំពោះកូនរបស់បងប្អូន ព្រោះទ្រង់ជាកម្លាំងសម្រាប់ឪពុកម្ដាយគ្រប់រូប និងកូនគ្រប់រូប ។
នៅពេលលោកបានដកពិសោធន៍នូវអំណរក្នុងព្រះគ្រីស្ទ អាលម៉ាជាកូនបានរស់នៅក្នុងអំណរនោះ ។ ប៉ុន្តែតើលោករក្សាសេចក្តីអំណរនេះដោយរបៀបណាដើម្បីឆ្លងកាត់ការលំបាក និងការសាកល្បង ? លោកមានប្រសាសន៍ ៖
« មែនហើយ ចាប់តាំងពីពេលនោះ មកដល់ពេលឥឡូវនេះ ឪពុកបានធ្វើការមិនឈប់ឈរ [ ដើម្បី ]ឪពុកអាចនាំមនុស្សឲ្យប្រែចិត្ត ដើម្បីឪពុកអាចនាំគេឲ្យភ្លក់នូវសេចក្ដីអំណរដ៏លើសលប់ ដូចដែលឪពុកធ្លាប់បានភ្លក់ ។ …
…មែនហើយ … ព្រះអម្ចាស់ទ្រង់បានប្រទានឲ្យឪពុកនូវសេចក្ដីអំណរដ៏ធំលើសលប់ ដែលជាលទ្ធផលនៃការងារទាំងឡាយរបស់ឪពុក ។ …
ហើយឪពុកបានទទួលការគាំទ្រ នៅក្នុងគ្រប់ការសាកល្បង និងវិបត្តិគ្រប់ប្រការ » ។
សេចក្តីអំណរក្នុងព្រះគ្រីស្ទរបស់អាលម៉ាបានចាប់ផ្តើម នៅពេលដែលលោកបានអនុវត្តសេចក្តីជំនឿលើទ្រង់ និងបានអំពាវនាវសូមសេចក្តីមេត្តា ។ បន្ទាប់មក អាលម៉ាបានអនុវត្តសេចក្តីជំនឿរបស់លោកលើព្រះគ្រីស្ទដោយខំធ្វើការ ដើម្បីជួយអ្នកដទៃភ្លក់រសជាតិនៃអំណរនោះដូចគ្នា ។ ការខំធ្វើការឥតឈប់ឈរទាំងនេះ បានធ្វើឲ្យអាលម៉ាមានសេចក្តីអំណរដ៏មហិមា សូម្បីតែនៅក្នុងគ្រប់ការសាកល្បង និងវិបត្តិគ្រប់ប្រការ ។ បងប្អូនឃើញទេ « ព្រះអម្ចាស់សព្វព្រះទ័យនឹងការខិតខំ » ហើយការខិតខំដែលបានផ្តោតលើទ្រង់នាំមកនូវពរជ័យ ។ សូម្បីតែការសាកល្បងធ្ងន់ធ្ងរក៏ « ត្រូវបានលេបទៅក្នុងសេចក្ដីអំណរនៃព្រះគ្រីស្ទ » ដែរ
មនុស្សមួយក្រុមទៀតនៅក្នុងព្រះគម្ពីរមរមន ដែលបានផ្តោតលើព្រះយេស៊ូវគ្រីស្ទ និងដំណឹងល្អរបស់ទ្រង់នៅក្នុងជីវិតរបស់ពួកគេ និងបានរកឃើញសេចក្តីអំណរ គឺជាអ្នកដែលបានបង្កើតទីក្រុងហេឡាម—ជាកន្លែងដែលពួកគេអាចចិញ្ចឹមបីបាច់កូនៗរបស់ពួកគេ ហើយរីករាយនឹងសេរីភាពក្នុងការអនុវត្តតាមសាសនារបស់ពួកគេ ។ ប៉ុន្តែមនុស្សសុចរិតដែលរស់នៅក្នុងជីវិតល្អនេះ ត្រូវបានចាប់ធ្វើជាទាសករដោយពួកក្រុមដែលបោកប្រាស់ ហើយបានដកហូតមូលដ្ឋានគ្រឹះ នៃសិទ្ធិសេរីភាពក្នុងការអនុវត្តតាមសាសនា ។ ជួនកាល រឿងអាក្រក់កើតឡើងចំពោះមនុស្សល្អ ។
« ព្រះអម្ចាស់ទ្រង់យល់ឃើញថាល្មមប្រដៅរាស្ត្រទ្រង់ មែនហើយ ទ្រង់បានសាកល្បងសេចក្ដីអត់ធន់ និងសេចក្ដីជំនឿរបស់ពួកគេ ។
« ក៏ប៉ុន្តែ—អស់អ្នកណាដែលដាក់ទីទុកចិត្តរបស់ខ្លួនទៅលើទ្រង់ អ្នកនោះហើយដែលនឹងត្រូវបានលើកឡើងនៅថ្ងៃចុងក្រោយបង្អស់ ។ មែនហើយ ចំពោះរាស្ត្រនេះ គឺដូច្នោះឯង ។
តើប្រជាជននេះស៊ូទ្រាំឆ្លងកាត់ការសាកល្បង និងការរងទុក្ខរបស់ពួកគេដោយរបៀបណា ? ដោយតាមរយៈការផ្តោតលើព្រះគ្រីស្ទ និងដំណឹងល្អរបស់ទ្រង់ ។ បញ្ហារបស់ពួកគេមិនបានរារាំងពួកគេទេ ផ្ទុយទៅវិញ ពួកគេបែរទៅរកព្រះ ដោយទំនងជាពួកគេបានស្គាល់ខ្លួនពួកគេថា ជាបុត្ររបស់ព្រះ គឺជាបុត្រនៃសេចក្តីសញ្ញា និងជាសិស្សរបស់ព្រះយេស៊ូវគ្រីស្ទ ។ នៅពេលពួកគេចងចាំថាពួកគេជានរណា ហើយបានអំពាវនាវទូលសូមព្រះ នោះពួកគេបានទទួលភាពសុខសាន្ត កម្លាំង និងអំណរដ៏គ្មានទីបញ្ចប់នៅក្នុងព្រះគ្រីស្ទ ៖
« អាលម៉ា និងប្រជាជនរបស់លោក … បានថ្វាយដួងចិត្តគេដល់[ ព្រះ ]វិញ ហើយទ្រង់បានជ្រាបនូវគំនិតដែលនៅក្នុងចិត្តគេ ។
«ហើយហេតុការណ៍បានកើតឡើងថា សំឡេងនៃព្រះអម្ចាស់បន្លឺមកគេ ក្នុងសេចក្តីវេទនារបស់គេថា ៖ ចូរងើបក្បាលឡើង ហើយចូរក្សាន្តចិត្តចុះ ព្រោះយើងដឹងនូវសេចក្ដីសញ្ញា ដែលអ្នករាល់គ្នាបានធ្វើជាមួយនឹងយើង ហើយយើងនឹងធ្វើសេចក្ដីសញ្ញាជាមួយនឹងរាស្ត្រយើង ហើយនឹងដោះពួកគេឲ្យរួចផុតពីសេវកភាព » ។
នៅក្នុងការឆ្លើយតប ព្រះអម្ចាស់បាន « សម្រាលបន្ទុក …ទាំងឡាយដែលដាក់នៅលើស្មា[ របស់ពួកគេ ]ផង ។… មែនហើយ ព្រះអម្ចាស់ទ្រង់បានចម្រើនកម្លាំងឲ្យគេ ដើម្បីឲ្យគេអាចទ្របន្ទុកទាំងឡាយរបស់គេបានដោយងាយ ហើយពួកគេបានធ្វើតាម អស់ទាំងព្រះហឫទ័យនៃព្រះអម្ចាស់ ដោយការរីករាយ និងដោយការអត់ធន់ ។ សូមកត់ចំណាំថា ពួកបរិសុទ្ធទាំងនេះទុកឲ្យទុក្ខលំបាក ការរងទុក្ខ និងការសាកល្បងរបស់ពួកគេត្រូវបានលេបបាត់នៅក្នុងសេចក្តីអំណរនៃព្រះគ្រីស្ទ ! បន្ទាប់មក នៅពេលកំណត់មកដល់ទ្រង់បានបង្ហាញអាលម៉ា នូវវិធីដើម្បីគេចចេញ ហើយអាលម៉ា—ដែលជាព្យាការីនៃព្រះ—បានដឹកនាំពួកគេទៅទីសុវត្ថិភាព ។
នៅពេលយើងផ្តោតលើព្រះគ្រីស្ទ និងធ្វើតាមព្យាការីរបស់ទ្រង់ នោះយើងក៏ត្រូវបានដឹកនាំទៅរកព្រះគ្រីស្ទ និងទៅរកអំណរនៃដំណឹងល្អរបស់ទ្រង់ផងដែរ ។ ប្រធាន រ័សុល អិម ណិលសុន បានបង្រៀនថា « អំណរគឺជាអំណាច ហើយការផ្តោតលើអំណរនោះនាំព្រះចេស្តារបស់ព្រះចូលមកក្នុងជីវិតយើង ។ ដូចនៅក្នុងគ្រប់រឿងទាំងអស់ដែរ ព្រះយេស៊ូវគ្រីស្ទគឺជាគំរូដ៏អស្ចារ្យបំផុត ‹ ដែលទ្រង់បានរងទ្រាំនៅឈើឆ្កាង › [ ហេព្រើរ ១២:២ ] »
ម្តាយរបស់ខ្ញុំទើបតែបានទទួលមរណភាព នាពេលថ្មីៗនេះវាជាការតក់ស្លុតណាស់ ។ ខ្ញុំស្រលាញ់ម្តាយរបស់ខ្ញុំ ហើយមិនរំពឹងថាបាត់បង់គាត់ទាំងនៅក្មេងដូច្នេះទេ ។ ប៉ុន្តែតាមរយៈមរណៈភាពរបស់គាត់ គ្រួសាររបស់ខ្ញុំ និងខ្ញុំទទួលបានបទពិសោធន៍ទាំងទុក្ខសោក និងអំណរផង ។ ខ្ញុំដឹងថា ដោយសារព្រះគ្រីស្ទ នោះគាត់មិនបានស្លាប់ទេ—គាត់នៅរស់ ! ហើយខ្ញុំដឹងថា ដោយសារព្រះគ្រីស្ទ និងកូនសោបព្វជិតភាពដែលបានស្តារឡើងវិញតាមរយៈព្យាការី យ៉ូសែប ស្ម៊ីធ នោះខ្ញុំនឹងអាចនៅជាមួយគាត់ម្តងទៀត ។ ទុក្ខសោកនៃការបាត់បង់ម្តាយរបស់ខ្ញុំត្រូវបានលេបបាត់ទៅក្នុងសេចក្តីអំណរនៃព្រះគ្រីស្ទ ! ខ្ញុំកំពុងរៀនថា ដើម្បី « គិតដល់សេឡេស្ទាល » និងដើម្បី « ទុកឲ្យព្រះឈ្នះ » មានរួមបញ្ចូលទាំងការផ្តោតលើអំណរដែលមាននៅក្នុងព្រះគ្រីស្ទផងដែរ ។
ទ្រង់អញ្ជើញដោយក្តីស្រលាញ់ « អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក » ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។