ឱបក្រសោបអំណោយទាននៃការប្រែចិត្តរបស់ព្រះអម្ចាស់
ចូរយើងកុំរង់ចាំឲ្យអ្វីៗលំបាកទើបងាកទៅរកព្រះឡើយ ។ ចូរយើងកុំរង់ចាំរហូតដល់ទីបញ្ចប់នៃជីវិតទើបប្រែចិត្តពិតប្រាកដនោះឡើយ ។
ខ្ញុំសូមថ្លែងទីបន្ទាល់អំពីព្រះវរបិតាសួគ៌ដែលពេញដោយក្តីស្រឡាញ់ ។ នៅក្នុងសន្និសីទទូទៅខែមេសា ឆ្នាំ២០១៩ កាលខ្ញុំត្រូវបានគាំទ្រក្នុងការទទួលខុសត្រូវថ្មីរបស់ខ្ញុំជាពួកចិតសិបនាក់ដែលមានសិទ្ធិអំណាចទូទៅមួយរូប នោះក្រុមចម្រៀងបានច្រៀងបទ « ខ្ញុំឆ្ងល់យ៉ាងអស្ចារ្យ » ដែលបានចាក់ដោតចូលក្នុងដួងចិត្ត និងព្រលឹងខ្ញុំ ។
នៅពេលខ្ញុំស្ដាប់ឮពាក្យទាំងឡាយ ខ្ញុំស្ងើចអស្ចារ្យខ្លាំងណាស់ ។ ខ្ញុំបានមានអារម្មណ៍ថា ទោះខ្ញុំមិនល្អគ្រប់គ្រាន់ និងមានកំហុសក្ដី ក៏ព្រះអម្ចាស់បានប្រទានពរឲ្យខ្ញុំដឹងថា « នៅក្នុងកម្លាំងរបស់ទ្រង់ ខ្ញុំអាចធ្វើគ្រប់ការណ៍ទាំងអស់ » ។
អារម្មណ៍ទូទៅនៃការខ្វះសមត្ថភាព ភាពទន់ខ្សោយ ឬសូម្បីតែភាពមិនស័ក្ដិសមគឺជាអ្វីមួយដែលយើងភាគច្រើនពេលខ្លះមានភាពស្មុគស្មាញ ។ ខ្ញុំនៅតែមានភាពស្មុគស្មាញចំពោះរឿងនេះ ។ ខ្ញុំបានមានអារម្មណ៍នេះតាំងពីថ្ងៃដែលខ្ញុំត្រូវបានហៅមកម្ល៉េះ ។ ខ្ញុំមានអារម្មណ៍នេះជាច្រើនសាច្រើនដង ហើយនៅតែមានវានៅពេលនេះ កាលខ្ញុំកំពុងនិយាយទៅកាន់បងប្អូន ។ ប៉ុន្តែ ខ្ញុំបានរៀនថា ខ្ញុំមិនមែនមានអារម្មណ៍ទាំងនេះតែម្នាក់ឯងទេ ។ ពិតណាស់ មានដំណើររឿងជាច្រើននៅក្នុងបទគម្ពីរស្ដីពីមនុស្សដែលទំនងជាមានអារម្មណ៍ស្រដៀងគ្នានេះដែរ ។ ឧទាហរណ៍ យើងចាំថានីហ្វៃជាអ្នកបម្រើស្មោះត្រង់ និងអង់អាចរបស់ព្រះអម្ចាស់ ។ ជួនកាល គាត់ក៏មានអារម្មណ៍មិនស្រួលចិត្តចំពោះភាពមិនស័ក្ដិសម ភាពទន់ខ្សោយ និងភាពមិនល្អគ្រប់គ្រាន់ផងដែរ ។
លោកបានមានប្រសាសន៍ថា « តែទោះបីសេចក្ដីល្អដ៏ធំរបស់ព្រះអម្ចាស់ដែលបានបង្ហាញដល់ខ្ញុំពីការណ៍ដ៏ធំ ហើយអស្ចារ្យក៏ដោយ គង់តែចិត្តខ្ញុំស្រែកថា ៖ ឱ ! រូបខ្ញុំអើយវេទនាអ្វីម្ល៉េះ ! មែនហើយ ចិត្តខ្ញុំសោកសៅ ព្រោះតែសាច់ឈាមរបស់ខ្ញុំ ឯព្រលឹងខ្ញុំព្រួយដោយព្រោះសេចក្ដីទុច្ចរិតទាំងឡាយរបស់ខ្ញុំ» ។
ជារឿយៗ ព្យាការី យ៉ូសែប ស្ម៊ីធ ថ្លែងពីអារម្មណ៍ថា « មានទោស » នៅក្នុងយុវវ័យរបស់លោក « ព្រោះតែភាពទន់ខ្សោយ និងភាពមិនល្អឥតខ្ចោះរបស់ [ លោក ] » ។ ប៉ុន្តែអារម្មណ៍របស់ យ៉ូសែប ស្ម៊ីធ អំពីការខ្វះសមត្ថភាព និងការព្រួយបារម្ភគឺជាផ្នែកមួយនៃអ្វីដែលបានដឹកនាំលោកឲ្យពិចារណា សិក្សា រៀនសូត្រ និងអធិស្ឋាន ។ ដូចជាបងប្អូននៅចាំថា លោកបានចេញទៅអធិស្ឋាននៅក្នុងព្រៃក្បែរផ្ទះរបស់លោក ដើម្បីស្វែងរកសេចក្ដីពិត សេចក្ដីសុខសាន្ត និងការអភ័យទោស ។ លោកបានឮព្រះអម្ចាស់មានបន្ទូលថា « យ៉ូសែប បុត្រាយើងអើយ អំពើបាបរបស់បុត្របានអត់ទោសឲ្យបុត្រហើយ ។ ចូរដើរទៅតាមផ្លូវបុត្រ ដើរតាមច្បាប់របស់យើង និងកាន់តាមបទបញ្ញត្តិរបស់យើងចុះ ។ មើលចុះ យើងគឺជាព្រះអម្ចាស់នៃសីរីរុងរឿង ។ យើងត្រូវគេឆ្កាងដើម្បីលោកិយ ដើម្បីមនុស្សទាំងអស់ដែលជឿលើព្រះនាមយើងអាចមានជីវិតដ៏អស់កល្បជានិច្ច » ។
បំណងប្រាថ្នាដ៏ស្មោះរបស់យ៉ូសែបដើម្បីប្រែចិត្ត និងស្វែងរកសេចក្ដីសង្គ្រោះដល់ព្រលឹងរបស់លោកបានជួយលោកឲ្យមករកព្រះយេស៊ូវគ្រីស្ទ ហើយទទួលបានការអភ័យទោសពីអំពើបាបរបស់លោក ។ ការខិតខំជាបន្ដបន្ទាប់នេះបានបើកទ្វារទៅកាន់ការបន្ដស្ដារដំណឹងល្អនៃព្រះយេស៊ូវគ្រីស្ទឡើងវិញ ។
បទពិសោធន៍ដ៏អស្ចារ្យនេះរបស់ព្យាការី យ៉ូសែប ស្ម៊ីធ បង្ហាញថាតើអារម្មណ៍នៃភាពទន់ខ្សោយ និងការខ្វះសមត្ថភាពអាចជួយយើងឲ្យស្គាល់និស្ស័យពីធម្មជាតិរបស់យើងដោយរបៀបណា ។ បើយើងរាបសា អារម្មណ៍នេះនឹងជួយយើងឲ្យស្គាល់ពីការពឹងផ្អែករបស់យើងទៅលើព្រះយេស៊ូវគ្រីស្ទ ហើយធ្វើឲ្យដួងចិត្តយើងរំជួលនូវបំណងប្រាថ្នាដ៏ស្មោះដើម្បីងាកទៅរកព្រះអង្គសង្គ្រោះ ហើយប្រែចិត្តពីអំពើបាបយើង ។
មិត្តខ្ញុំអើយ ការប្រែចិត្តគឺជាអំណរ ! ការប្រែចិត្តដ៏ផ្អែមល្ហែមគឺជាផ្នែកមួយនៃដំណើរការជាប្រចាំ ដែលព្រះអម្ចាស់បង្រៀនយើងឲ្យរស់នៅក្នុងជីវិតមួយដែលផ្ដោតលើការបង្រៀនរបស់ទ្រង់ « មួយបន្ទាត់ម្ដងមួយបន្ទាប់ម្ដង មួយសិក្ខាបទម្ដងមួយសិក្ខាបទម្ដង » ។ ក៏ដូចជាយ៉ូសែប និងនីហ្វៃដែរ យើងអាច « អំពាវនាវដល់សេចក្ដីមេត្តាករុណារបស់ [ ព្រះ ] ព្រោះទ្រង់មានឫទ្ធិនឹងសង្គ្រោះ » ។ ទ្រង់អាចបំពេញបំណងប្រាថ្នា ឬការចង់បានដ៏សុចរិតណាមួយ ហើយអាចព្យាបាលរបួសណាមួយនៅក្នុងជីវិតរបស់យើង ។
នៅក្នុងព្រះគម្ពីរមរមន ៖ សក្ខីបទមួយទៀតរបស់ព្រះយេស៊ូវគ្រីស្ទ បងប្អូន និងខ្ញុំអាចរកឃើញមានដំណើររឿងរបស់បុគ្គលម្នាក់ៗដែលរៀនអំពីរបៀបមករកព្រះគ្រីស្ទតាមរយៈការប្រែចិត្តដោយស្មោះរាប់មិនអស់ ។
ខ្ញុំចង់ចែកចាយជាមួយបងប្អូននូវគំរូនៃសេចក្ដីមេត្តាករុណាដ៏ទន់ភ្លន់របស់ព្រះអម្ចាស់ តាមរយៈការប្រែចិត្តដែលកើតមាននៅក្នុងកោះផ្ទះកំណើតជាទីស្រឡាញ់របស់ខ្ញុំនៅ ប៉ូតូរីកូ ។
នៅស្រុកកំណើតខ្ញុំ ទីក្រុងផនស៍ បងស្រីនៅក្នុងព្រះវិហារឈ្មោះ សេលីយ៉ា គ្រូស អាយ៉ាឡា បានសម្រេចចិត្តថាគាត់នឹងជូនព្រះគម្ពីរមរមនទៅមិត្តម្នាក់ ។ គាត់បាននិយាយថា គាត់បានរុំវាជាកាដូដ៏មានតម្លៃជាងពេជ្រ ឬត្បូងទទឹមទៅទៀត ហើយយកវាទៅឲ្យមិត្តគាត់ ។ ពេលកំពុងធ្វើដំណើរ នោះមានចោរម្នាក់បានមក ឆក់យកកាបូបគាត់ដែលមានអំណោយដ៏ពិសេសនោះហើយរត់ចេញទៅ ។
នៅពេលគាត់បានប្រាប់ពីរឿងនេះនៅព្រះវិហារ មិត្តគាត់បាននិយាយថា « នរណាទៅដឹង ? ប្រហែលជានេះគឺជាឱកាសរបស់ឯងដើម្បីចែកចាយដំណឹងល្អហើយ ! »
មែនហើយ ពីរបីថ្ងៃក្រោយមក តើបងប្អូនដឹងថាមានរឿងអ្វីកើតឡើងទេ ? សេលីយ៉ា បានទទួលសំបុត្រមួយ ។ សំបុត្រនោះនៅនឹងដៃខ្ញុំនាថ្ងៃនេះ ជាសំបុត្រដែល សេលីយ៉ា បានចែកចាយជាមួយខ្ញុំ ។ សំបុត្រនេះសរសេរថា ៖
« បងស្រី គ្រូស ៖
សូមអត់ទោសឲ្យខ្ញុំផង អត់ទោសឲ្យខ្ញុំផងណា ។ អ្នកនឹងមិនដឹងទេថា ខ្ញុំសោកស្ដាយប៉ុនណាដែលទៅលួចរបស់ពីអ្នកនេះ ។ ប៉ុន្តែដោយសារតែរបស់នេះ ជីវិតខ្ញុំបានផ្លាស់ប្តូរ ហើយនឹងបន្តផ្លាស់ប្តូរ ។
គម្ពីរនោះ [ ព្រះគម្ពីរមរមន ] បានជួយខ្ញុំនៅក្នុងជីវិតខ្ញុំ ។ សុបិនអំពីព្រះដែលបុរសម្នាក់នោះបានឃើញធ្វើឲ្យខ្ញុំញាប់ញ័រ ។… ខ្ញុំសូមប្រគល់លុយប្រាំ[ ដុល្លារ ]ឲ្យអ្នកវិញ ព្រោះខ្ញុំមិនអាចយកវាបានទេ ។ ខ្ញុំចង់ឲ្យអ្នកដឹងថា អ្នកហាក់មានពន្លឺភ្លឺខ្លាំងណាស់ ។ ពន្លឺនោះហាក់ដូចជាបញ្ឈប់ខ្ញុំ [ ពីការបង្កគ្រោះថ្នាក់ដល់អ្នក ដូច្នេះ ] ខ្ញុំក៏បានរត់គេចចេញវិញ ។
« ខ្ញុំចង់ឲ្យអ្នកដឹងថា អ្នកនឹងបានជួបខ្ញុំម្តងទៀត ប៉ុន្តែពេលអ្នកបានជួបខ្ញុំ នោះអ្នកនឹងមើលមិនស្គាល់ខ្ញុំឡើយ ដ្បិតខ្ញុំនឹងក្លាយជាប្អូនប្រុសរបស់អ្នក ។ … នេះជាកន្លែងដែលខ្ញុំរស់នៅ ខ្ញុំត្រូវតែស្វែងរកព្រះអម្ចាស់ ហើយទៅព្រះវិហារដែលអ្នកទៅ ។
« សារដែលអ្នកសរសេរនៅក្នុងព្រះគម្ពីរនេះបានធ្វើឲ្យខ្ញុំស្រក់ទឹកភ្នែក ។ ចាប់តាំងពីយប់ថ្ងៃពុធនោះមក ខ្ញុំមិនអាចឈប់អានវាឡើយ ។ ខ្ញុំបានអធិស្ឋាន ហើយទូលសូមព្រះឲ្យអភ័យទោសខ្ញុំ [ ហើយ ] ខ្ញុំសូមឲ្យអ្នកអភ័យទោសឲ្យខ្ញុំផង ។ … ខ្ញុំបានគិតថា កាដូដែលអ្នករុំនោះគឺជាអ្វីមួយដែលខ្ញុំអាចលក់បាន។ [ ផ្ទុយទៅវិញ ] វាបានធ្វើឲ្យខ្ញុំចង់[ ផ្លាស់ប្តូរ ]ជីវិតឲ្យប្រសើរជាងមុន ។ សូមអត់ទោសឲ្យខ្ញុំផង អត់ទោសឲ្យខ្ញុំផងណា ខ្ញុំសូមអង្វរ ។
« ពីមិត្តដែលនៅទីឆ្ងាយរបស់អ្នក » ។
បងប្អូនប្រុសស្រី ពន្លឺនៃព្រះអង្គសង្គ្រោះអាចចាំងដល់យើងទាំងអស់គ្នា មិនថាយើងស្ថិតក្នុងស្ថានភាពណានោះទេ ។ ប្រធាន ជែហ្វ្រី អ័រ ហូឡិន បានថ្លែងថា « បងប្អូនមិនអាចលិចទៅជ្រៅជាងពន្លឺនៃដង្វាយធួនរបស់ព្រះគ្រីស្ទ ដែលចែងចាំងដ៏និរន្ដរ៍បានទេ » ។
ដូចជាអ្នកទទួលអំណោយជាព្រះគម្ពីរមរមនរបស់សេលីយ៉ាដោយអចេតនានេះក្តី បងប្រុសនោះបានបន្ដធ្វើជាសាក្សីបន្ថែមអំពីសេចក្ដីមេត្តាករុណារបស់ព្រះអម្ចាស់ ។ ទោះជាបងប្រុសនោះត្រូវការពេលដើម្បីអត់ទោសឲ្យខ្លួនគាត់ក្ដី ក៏គាត់មានអំណរពេលប្រែចិត្តដែរ ។ ឱ ! អព្ភូតហេតុអស្ចារ្យអ្វីម៉្លេះ ! ស្ត្រីស្មោះត្រង់រូបនេះ ព្រះគម្ពីរមរមន ការប្រែចិត្តដោយស្មោះ និងព្រះចេស្ដានៃព្រះអង្គសង្គ្រោះដឹកនាំទៅរកអំណរចំពោះភាពពេញលេញនៃពរជ័យនៃដំណឹងល្អ និងសេចក្ដីសញ្ញាដ៏ពិសិដ្ឋនៅក្នុងដំណាក់នៃព្រះអម្ចាស់ ។ សមាជិកគ្រួសារផ្សេងទៀតបានធ្វើតាម ហើយបានទទួលយកទំនួលខុសត្រូវពិសិដ្ឋនៅក្នុងចម្ការរបស់ព្រះអម្ចាស់ រួមទាំងការបម្រើជាអ្នកផ្សព្វផ្សាយសាសនាពេញម៉ោង ។
នៅពេលយើងមករកព្រះយេស៊ូវគ្រីស្ទ ផ្លូវនៃការប្រែចិត្តដ៏ស្មោះរបស់យើងនឹងនាំយើងទៅកាន់ព្រះវិហារបរិសុទ្ធរបស់ព្រះអង្គសង្គ្រោះនៅទីបំផុត ។
ឱ! នេះជាបុព្វហេតុដ៏សុចរិតមួយដើម្បីឲ្យបានស្អាតស្អំ—ដើម្បីមានភាពស័ក្ដិសមចំពោះភាពពេញលេញនៃពរជ័យដែលព្រះវរបិតាសួគ៌ និងព្រះរាជបុត្រាទ្រង់មានសម្រាប់យើង តាមរយៈសេចក្ដីសញ្ញានៃព្រះវិហារបរិសុទ្ធដ៏ពិសិដ្ឋ ! ការបម្រើនៅក្នុងព្រះដំណាក់របស់ព្រះអម្ចាស់ជាទៀងទាត់ និងការព្យាយាមរក្សាសេចក្ដីសញ្ញាដ៏ពិសិដ្ឋដែលយើងបានធ្វើនៅទីនោះ នឹងបង្កើនបំណងប្រាថ្នា និងសមត្ថភាពរបស់យើង ដើម្បីទទួលបទពិសោធន៍នៃការផ្លាស់ប្តូរនៃដួងចិត្ត ពលំ គំនិត និងព្រលឹងដែលចាំបាច់ ដើម្បីយើងប្រែក្លាយដូចជាព្រះអង្គសង្គ្រោះរបស់យើង ។ ប្រធាន រ័សុល អិម ណិលសុន បានថ្លែងទីបន្ទាល់ថា « គ្មានអ្វីដែលនឹងបើកស្ថានសួគ៌ ខ្លាំងជាង [ ការថ្វាយបង្គំនៅក្នុងព្រះវិហារបរិសុទ្ធនោះទេ ] ។ គ្មានសោះ ! »
មិត្តជាទីស្រឡាញ់ តើបងប្អូនមានអារម្មណ៍ថាមិនល្អគ្រប់គ្រាន់ឬ ? តើបងប្អូនមានអារម្មណ៍មិនស្អាតស្អំឬ ? តើបងប្អូនកំពុងសង្ស័យខ្លួនឯងឬ ? ប្រហែលជាបងប្អូនបារម្ភ ហើយសួរថាតើខ្ញុំល្អគ្រប់គ្រាន់ដែរឬទេ ? តើវាយឺតពេលឬទេសម្រាប់ខ្ញុំ ? ហេតុអ្វីខ្ញុំនៅតែបរាជ័យ កាលដែលខ្ញុំខំអស់ពីសមត្ថភាពហើយនោះ ?
បងប្អូនប្រុសស្រី ប្រាកដណាស់ថាយើងនឹងធ្វើខុសនៅលើមាគ៌ាជីវិតរបស់យើង ។ ប៉ុន្តែសូមចាំថា ដូចជាអែលឌើរ ហ្គើរីត ដបុលយូ ហ្គង បានបង្រៀន « ដង្វាយធួនរបស់ព្រះអង្គសង្គ្រោះយើងគឺមានជានិរន្ដរ៍ និងអស់កល្បជានិច្ច ។ យើងម្នាក់ៗវង្វេង និងធ្លាក់ចុះ ។ ជួនកាលយើងអាចវង្វេងផ្លូវ ។ ព្រះអះអាងដោយក្ដីស្រឡាញ់ដល់យើង [ ថា ] ទោះជាយើងនៅទីណា ឬយើងបានធ្វើអ្វីក្ដី ក៏យើងអាចត្រឡប់មកវិញបានជានិច្ច ។ ទ្រង់រង់ចាំឱបក្រសោបយើងជាស្រេច » ។
ដូចភរិយាជាទីស្រឡាញ់របស់ខ្ញុំ ខារី លូ ក៏បានបង្រៀនខ្ញុំផងដែរថា យើងទាំងអស់គ្នាចាំបាច់ត្រូវប្រែចិត្ត បកក្រោយ ឬកំណត់ពេលឲ្យទៅ « ម៉ោងសូន្យ »វិញ ជារៀងរាល់ថ្ងៃ ។
ឧបសគ្គនឹងមាន ។ ចូរយើងកុំរង់ចាំឲ្យអ្វីៗលំបាកទើបងាកទៅរកព្រះឡើយ ។ ចូរយើងកុំរង់ចាំរហូតដល់ទីបញ្ចប់នៃជីវិតទើបប្រែចិត្តពិតប្រាកដនោះឡើយ ។ ផ្ទុយទៅវិញ មិនថាឥឡូវនេះ យើងកំពុងតែដើរនៅត្រង់ណាលើផ្លូវនៃសេចក្តីសញ្ញាទេ សូមផ្តោតទៅលើព្រះចេស្ដានៃសេចក្តីប្រោសលោះរបស់ព្រះយេស៊ូវគ្រីស្ទ និងបំណងព្រះទ័យរបស់ព្រះវរបិតាសួគ៌ដែលចង់ឲ្យយើងត្រឡប់ទៅរកទ្រង់វិញ ។
ដំណាក់របស់ព្រះអម្ចាស់ ព្រះគម្ពីរបរិសុទ្ធរបស់ទ្រង់ ពួកព្យាការី និងពួកសាវករបស់ទ្រង់បំផុសគំនិតយើងឲ្យព្យាយាមឆ្ពោះទៅកាន់បរិសុទ្ធភាពផ្ទាល់ខ្លួនតាមរយៈគោលលទ្ធិនៃ ព្រះគ្រីស្ទ ។
ហើយនីហ្វៃបានថ្លែងថា ៖ « ហើយឥឡូវនេះ មើលចុះ ឱបងប្អូនជាទីស្រឡាញ់របស់ខ្ញុំអើយ នេះគឺជាផ្លូវ ហើយគ្មានផ្លូវឯណាទៀតទេ ឬក៏ឈ្មោះណាទៀតនៅក្រោមមេឃនេះ ដែលមនុស្ស [ប្រុសស្រី] អាចបានសង្គ្រោះនៅក្នុងនគរនៃព្រះឡើយ។ ។ ហើយឥឡូវនេះ មើលចុះ នេះគឺជាគោលលទ្ធិនៃព្រះគ្រីស្ទ ហើយគឺជាគោលលទ្ធិតែមួយ ហើយពិតនៃព្រះវរបិតា និងព្រះរាជបុត្រា ហើយនឹងព្រះវិញ្ញាណបរិសុទ្ធ » ។
ដំណើរការរបស់យើងដើម្បី « ក្លាយតែមួយ » ជាមួយព្រះអាចនឹងមិនស្រួលនោះទេ។ ប៉ុន្តែបងប្អូន និងខ្ញុំអាចផ្អាក នៅស្ងៀម មើលទៅព្រះអង្គសង្គ្រោះ ហើយខិតខំស្វែងរក និងធ្វើតាមអ្វីដែលទ្រង់ចង់ឲ្យយើងផ្លាស់ប្តូរ ។ បើយើងធ្វើដូច្នោះដោយចេតនាពិត នោះយើងនឹងធ្វើជាសាក្សីអំពីការព្យាបាលរបស់ទ្រង់ ។ ហើយគិតពីរបៀបដែលកូនចៅរបស់យើងនឹងត្រូវបានប្រទានពរ នៅពេលយើងឱបក្រសោបអំណោយទាននៃការប្រែចិត្តរបស់ព្រះអម្ចាស់ !
ឪពុករបស់ខ្ញុំបានបង្រៀនថា ជាងស្មូននឹងសូន្យ ហើយបន្សុទ្ធយើងដែលវាអាចនឹងពិបាកចំពោះយើង ។ យ៉ាងណាក៏ដោយ លោកគ្រូនៃការព្យាបាលក៏នឹងសម្អាតយើងផងដែរ ។ ខ្ញុំមានបទពិសោធន៍ផ្ទាល់ខ្លួន និងបន្តទទួលបទពិសោធន៍នៃអំណាចការព្យាបាលនោះ ។ ខ្ញុំសូមថ្លែងទីបន្ទាល់ថា ការណ៍នោះមកមានតាមរយៈសេចក្តីជំនឿទៅលើព្រះយេស៊ូវគ្រីស្ទ និងការប្រែចិត្តជាប្រចាំថ្ងៃ ។
ខ្ញុំសូមថ្លែងទីបន្ទាល់ពីសេចក្តីស្រឡាញ់របស់ព្រះ និងព្រះចេស្ដាដ៏គ្មានទីបញ្ចប់នៃដង្វាយធួនរបស់ព្រះរាជបុត្រាទ្រង់ ។ យើងអាចទទួលអារម្មណ៍ពីវាយ៉ាងជ្រាលជ្រៅ នៅពេលយើងប្រែចិត្តដោយស្មោះអស់ពីចិត្ត ។
មិត្តខ្ញុំអើយ ខ្ញុំជាសាក្សីនៃការស្ដារឡើងវិញដ៏រុងរឿងនៃដំណឹងល្អតាមរយៈព្យាការី យ៉ូសែប ស៊្មីធ និងការណែនាំដ៏ទេវភាពរបស់ព្រះអង្គសង្គ្រោះ តាមរយៈព្យាការី និងអ្នកនាំព្រះបន្ទូលរបស់ទ្រង់បច្ចុប្បន្ននេះ គឺប្រធាន រ័សុល អិម ណិលសុន ។ ខ្ញុំដឹងថា ព្រះយេស៊ូវគ្រីស្ទមានព្រះជន្មរស់ ហើយថាទ្រង់គឺជាលោកគ្រូនៃការព្យាបាលដល់ព្រលឹងយើង ។ ខ្ញុំដឹង ហើយខ្ញុំថ្លែងទីបន្ទាល់ថា ការណ៍ទាំងនេះពិត នៅក្នុងព្រះនាមព្រះយេស៊ូវគ្រីស្ទ អាម៉ែន ៕