ខ្យល់បក់មិនឈប់ឈរ
យើងអាចជួយមនុស្សដទៃរីកចម្រើនក្នុងដំណើរ ជីវិតរបស់ពួកគេដើម្បី ទទួលបានពរជ័យពីព្រះ ។
ក្នុងឆ្នាំ២០១៥ នៅរដ្ឋពើរណាមបូកូ ប្រទេសប្រេស៊ីល មានសមាជិក ៦២ នាក់នៃ J. Reuben Clark Law Society [ សហគមន៍ច្បាប់ ជេ រ៉ូប៊ីន ក្លាក ]បានសហការជាមួយការិយាល័យរដ្ឋព្រះរាជអាជ្ញា ក្នុងការស៊ើបអង្កេតបញ្ហាផ្លូវច្បាប់របស់អ្នករស់នៅក្នុងមណ្ឌលថែទាំចំនួនបួនផ្សេងគ្នា ។ នៅថ្ងៃសៅរ៍មួយ ក្រុមមេធាវីទាំងនេះបានចំណាយពេលប្រាំម៉ោងសម្ភាសន៍អ្នកស្រុកជាង ២០០ នាក់ ម្នាក់ម្តងៗជាអ្នកដែលសង្គមមិនបានយកចិត្តទុកដាក់ឡើយ ។
នៅក្នុងការសម្ភាសន៍របស់ពួកគេ ពួកគេបានរកឃើញបទឧក្រិដ្ឋមួយចំនួនដែលបានកើតឡើងដល់មនុស្សវ័យចំណាស់ៗដែលរស់ក្នុងមណ្ឌលនោះ ដូចជា ការបោះបង់ចោល ការធ្វើបាប និងការកិបកេងថវិកាជាដើម ។ ចំនុចចំបងនៃច្បាប់សហគមន៍នេះគឺការយកចិត្តទុកដាក់យ៉ាងសំខាន់ដល់អ្នកក្រីក្រ និងខ្វះខាត ។ តែពីរខែក្រោយប៉ុណ្ណោះ ព្រះរាជអាជ្ញាបានដាក់ពាក្យបណ្ដឹងភាគីដែលទទួលខុសត្រូវបានដោយជោគជ័យ ។
ជំនួយរបស់ពួកគេគឺជាគំរូដ៏ល្អឥតខ្ចោះមួយនៃការបង្រៀនរបស់ស្តេចបេនយ៉ាមីន « ថា កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នា គ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ » ។
មានស្ត្រីម្នាក់ដែលខ្ញុំបានសម្ភាសដោយផ្ទាល់ក្នុងគម្រោងដោយឥតគិតថ្លៃ គឺជាស្រ្តីវ័យ៩៣ឆ្នាំដែលមានចិត្តល្អម្នាក់ ឈ្មោះថា លូសៀ ។ ដោយក្តីអំណរជាមួយការបម្រើរបស់យើង គាត់បាននិយាយលេងសើចថា « រៀបការជាមួយខ្ញុំ ! »
ដោយភ្ញាក់ផ្អើល ខ្ញុំបានតបវិញថា ៖ « សូមមើលស្ត្រីវ័យក្មេងដ៏ស្រស់ស្អាតម្នាក់នោះ » នាងជាភរិយារបស់ខ្ញុំ ហើយជាព្រះរាជអាជ្ញា » ។
គាត់ក៏ឆ្លើយតបភ្លាមៗវិញថា ៖ « ខ្ញុំអត់ខ្វល់ទេ ? នាងនៅក្មេង ស្អាត ហើយអាចរៀបការម្តងទៀតបានយ៉ាងងាយស្រួល ។ ខ្ញុំគ្មានអ្វីក្រៅពីអ្នកនោះទេ ! »
បញ្ហារបស់អ្នកស្រុកដ៏អស្ចារ្យទាំងនោះមិនបានដោះស្រាយអស់ទេនៅថ្ងៃនោះ ។ ពួកគេបានបន្តជួបការលំបាកពីមួយគ្រាទៅមួយគ្រា ដូចជាពួកសាសន៍យ៉ារេឌ ធ្វើដំណើរតាមទូករបស់ពួកគេដ៏លំបាកទៅកាន់ដែនដីសន្យា « ត្រូវកប់នៅក្នុងជម្រៅសមុទ្រជាច្រើនគ្រាច្រើនដង ពីព្រោះមកពីរលកទាំងឡាយ ដូចជាភ្នំ ដែលបានបោកមកលើពួកគេ » ។
ប៉ុន្តែនៅថ្ងៃសៅរ៍នោះ អ្នករស់នៅក្នុងមណ្ឌលថែទាំនោះបានដឹងថា ទោះបីសង្គមបានបំភ្លេចពួកគេក្តី ក៏ពួកគេដឹងដោយខ្លួនឯងថា ព្រះវរបិតាសួគ៌ដែលពេញដោយក្ដីស្រឡាញ់ស្គាល់ពួកគេម្នាក់ៗ ទ្រង់ជាអង្គដែលឆ្លើយតបការអធិស្ឋានដ៏សាមញ្ញបំផុត ។
ព្រះអម្ចាស់ដ៏ជាព្រះបណ្តាលឲ្យ « មានខ្យល់ដ៏ខ្លាំង » ដើម្បីបក់ពួកយ៉ារេឌឆ្ពោះទៅកាន់ពរជ័យដែលបានសន្យា ។ ស្រដៀងគ្នានេះដែរ យើងអាចសម្រចចិត្តដើម្បីបម្រើជាខ្យល់ដ៏រាបទាបនៅក្នុងព្រះហស្តនៃព្រះអម្ចាស់ ។ ដូចគ្នាទៅនឹង « ខ្យល់បក់មិនឈប់ឈរ » ដែលបានបក់ពួកយ៉ារេឌទៅកាន់ដែនដីសន្យា យើងក៏អាចជួយអ្នកដទៃរីកចម្រើននៅក្នុងដំណើររបស់ពួកគេដើម្បីទទួលបានព្រះពររបស់ព្រះផងដែរ ។
ជាច្រើនឆ្នាំកន្លងទៅ នៅពេលភរិយាខ្ញុំ គ្រីស្ទ និងខ្ញុំត្រូវបានសម្ភាសសម្រាប់ការហៅរបស់ខ្ញុំជា ប៊ីស្សព ប្រធានស្តេករបស់យើងបានសុំឲ្យយើងពិចារណាប្រកបដោយការអធិស្ឋានដើម្បីគិតអំពីឈ្មោះអ្នកដែលត្រូវធ្វើជាទីប្រឹក្សា ។ បន្ទាប់ពីបានឮឈ្មោះដែលខ្ញុំបានណែនាំ គាត់បាននិយាយថា ខ្ញុំគួរដឹងរឿងមួយចំនួនអំពីម្នាក់ក្នុងចំណោមពួកគេ ។
ទីមួយ បងប្រុសម្នាក់នេះមិនអាចអានបានទេ ។ ទីពីរ គាត់មិនមានឡាន ដែលគាត់អាចប្រើប្រាស់ដើម្បីទៅសួរសុខទុក្ខសមាជិកទេ ។ ទីបី គាត់តែងតែពាក់វ៉ែនតាខ្មៅនៅព្រះវិហាររហូត ។ ទោះបីជាមានការព្រួយបារម្ភយ៉ាងស្មោះត្រង់របស់ប្រធានក៏ដោយ ខ្ញុំមានអារម្មណ៍យ៉ាងមុតមាំថា ខ្ញុំនៅតែចង់បានគាត់ជាទីប្រឹក្សារបស់ខ្ញុំ ហើយប្រធានស្តេកបានគាំទ្រខ្ញុំ ។
នៅថ្ងៃអាទិត្យ ទីប្រឹក្សារបស់ខ្ញុំ និងខ្ញុំត្រូវបានគាំទ្រក្នុងការប្រជុំសាក្រាម៉ង់ សមាជិកបានមានទឹកមុខភ្ញាក់ផ្អើល ។ បងប្រុសជាទីស្រឡាញ់នេះបានដើរយឺតៗទៅកាន់កន្លែងអង្គុយនៅលើវេទកា ដែលពន្លឺនៅពីខាងលើបានចាំងចំកញ្ចក់វ៉ែនតាខ្មៅរបស់គាត់យ៉ាងឆ្វាច ។
នៅពេលគាត់បានអង្គុយក្បែរខ្ញុំ ខ្ញុំបានសួរគាត់ថា « បងប្រុស តើបងមានបញ្ហាភ្នែកមែនទេ » ?
គាត់បាននិយាយថា « អត់ទេ » ។
ខ្ញុំបានសួរថា « ចុះហេតុអ្វីបងពាក់វ៉ែនតាខ្មៅនៅព្រះវិហារបែបនេះ ? » « បងប្រុស សមាជិកចង់ឃើញភ្នែករបស់បង ហើយបងអាចមើលឃើញពួកគេច្បាស់ជាងផងដែរ » ។
រំពេចនោះ គាត់បានដោះវ៉ែនតាខ្មៅរបស់គាត់ចេញ ហើយគាត់មិនដែលប្រើវ៉ែនតានោះនៅព្រះវិហារទៀតទេ ។
បងប្រុសម្នាក់នេះបានបម្រើជាមួយខ្ញុំរហូតដល់ខ្ញុំត្រូវបានដោះលែងពីប៊ីស្សព ។ សព្វថ្ងៃនេះ គាត់នៅបន្តបម្រើដោយស្មោះត្រង់នៅក្នុងសាសនាចក្រ ហើយជាគំរូមួយនៃការលះបង់ និងការតាំងចិត្តចំពោះព្រះអម្ចាស់ព្រះយេស៊ូវគ្រីស្ទ ។ កាលពីប៉ុន្មានឆ្នាំមុន គាត់គឺជាបុរសពាក់វ៉ែនតាខ្មៅដែលគេមិនស្គាល់មុខ អង្គុយនៅកៅអីរោងថ្វាយបង្គំដោយគ្មាននរណាចាប់អារម្មណ៍ឡើយ ។ ជារឿយៗ ខ្ញុំងឿងឆ្ងល់ថា តើមានបងប្អូនប្រុសស្រីដ៏ស្មោះត្រង់ប៉ុន្មាននាក់ ដែលគេមិនចាប់អារម្មណ៍ អង្គុយនៅក្នុងចំណោមពួកយើង ?
មិនថាយើងល្បីល្បាញ ឬត្រូវបានបំភ្លេចចោលទេ ការសាកល្បងនឹងកើតមានចំពោះយើងម្នាក់ៗដោយជៀសមិនរួច ។ នៅពេលយើងងាកទៅរកព្រះអង្គសង្គ្រោះ ទ្រង់អាច « ផ្លាស់ប្ដូរសេចក្តីវេទនាទាំងឡាយ[ របស់យើង ]ឲ្យក្លាយទៅ ជាផលប្រយោជន៍ដល់[ យើង ]វិញ » ហើយជួយយើងឆ្លើយតបនឹងការសាកល្បងរបស់យើង តាមរបៀបដែលជួយសម្រួលដល់ការរីកចម្រើនខាងវិញ្ញាណរបស់យើង ។ មិនថាអ្នករស់នៅក្នុងមណ្ឌលថែទាំ សមាជិកសាសនាចក្រដែលត្រូវបានគេវិនិច្ឆ័យខុស ឬនរណាផ្សេងទៀតនោះទេ យើងអាចធ្វើជា « ខ្យល់ [ ដែល ] បក់មិនឈប់ឈរ » ដើម្បីនាំមកនូវក្តីសង្ឃឹម និងការណែនាំដល់អ្នកដទៃទៀតឲ្យដើរនៅលើផ្លូវនៃសេចក្តីសញ្ញា ។
ព្យាការីជាទីស្រឡាញ់របស់យើង ប្រធាន រ័សុល អិម ណិលសុន បានផ្តល់នូវការអញ្ជើញដោយរីករាយ និងបំផុសគំនិតទៅកាន់យុវវ័យថា « ថ្ងៃនេះ ខ្ញុំសូមបញ្ជាក់សារជាថ្មីដោយមោះមុតថា ព្រះអម្ចាស់សព្វព្រះទ័យឲ្យយុវជន គ្រប់រូប ដែលមានភាពស័ក្ដិសម ជាយុវជនដែលមានសមត្ថភាព ឲ្យរៀបចំខ្លួនដើម្បីបម្រើបេសកកម្ម ។ សម្រាប់យុវជនពួកបរិសុទ្ធថ្ងៃចុងក្រោយ ការបម្រើជា អ្នកផ្សព្វផ្សាយសាសនា គឺជាការទទួលខុសត្រូវមួយនៃបព្វជិតភាព ។ … សម្រាប់យុវនារីដែលមានលទ្ធភាព បេសកកម្មគឺជាឱកាសដ៏មានអានុភាពមួយផងដែរ តែវាជា ជម្រើសរបស់អ្នក » ។
រៀងរាល់ថ្ងៃ យុវជន និងយុវនារីរាប់ពាន់នាក់ឆ្លើយតបការហៅពីព្យាការីរបស់ព្រះអម្ចាស់ តាមរយៈការបម្រើជាអ្នកផ្សព្វផ្សាយសាសនា ។ ក្មួយៗពូកែណាស់ ហើយដូចដែលប្រធាន ណិលសុន បានមានប្រសាសន៍ថា ក្មួយៗអាច « មានឥទ្ធិពលទៅលើពិភពលោកជាងជំនាន់មុនៗ ! » ជាការពិតណាស់ នោះមិនមានន័យថា អ្នកនឹងក្លាយជាមនុស្សដ៏ពូកែនៅពេលអ្នកឈានជើងចូលក្នុងមជ្ឈមណ្ឌលបំពាក់បំប៉នអ្នកផ្សព្វផ្សាយសាសនានោះទេ ។
ផ្ទុយទៅវិញ ក្មួយអាចមានអារម្មណ៍ដូចជានីហ្វៃ ត្រូវបាន « នាំទៅដោយព្រះវិញ្ញាណ ដោយមិនដឹងជាមុនសោះឡើយថា តើ[ ក្មួយ ]នឹងត្រូវធ្វើអ្វីខ្លះ ។ ទោះយ៉ាងណាក៏ដោយ គង់តែ [ ក្មួយ ] ដើរតម្រង់ទៅមុខ » ។
ប្រហែលជាក្មួយៗមានអារម្មណ៍មិនស្រួលចិត្តដូចយេរេមា ហើយចង់និយាយថា « មើល ទូលបង្គំគ្មានវោហារអធិប្បាយទេ ៖ ត្បិតទូលបង្គំជាមនុស្សក្មេងសុទ្ធ » ។
ក្មួយៗអាចនឹងឃើញពីភាពមិនគ្រប់លក្ខណៈផ្ទាល់ខ្លួនរបស់់ក្មួយ ហើយចង់ស្រែកដូចជាម៉ូសេដែរ ៖ « ឱព្រះអម្ចាស់អើយ ទូលបង្គំជាអ្នកមិនសូវមានវោហារទេ… ដ្បិតទូលបង្គំមានមាត់រឹង ហើយអណ្តាតក៏ដំឡាន់ផង » ។
ប្រសិនបើប្អូនៗយុវជន និងយុវនារីជាទីស្រឡាញ់ និងអស្ចារ្យណាមួយកំពុងមានគំនិតដូចនេះ សូមចងចាំថា ព្រះអម្ចាស់បានឆ្លើយតបថា « កុំឲ្យថាឯងជាមនុស្សក្មេងឡើយ ៖ ដ្បិតបើអញចាត់ឯងឲ្យទៅឯអ្នកណា នោះឯងត្រូវតែទៅ » ។ ហើយលោកបានសន្យាថា « ដូច្នេះចូរឯងទៅឥឡូវចុះ អញនឹងនៅជាមួយនឹងមាត់ឯង ព្រមទាំងបង្រៀនសេចក្តីដែលឯងត្រូវនិយាយផង ។
ក្មួយៗអាចប្តូរពីមនុស្សខាងសាច់ឈាមទៅជាមនុស្សខាងវិញ្ញាណដែលនឹងកើតឡើង « មួយបន្ទាត់ម្តងៗ មួយសិក្ខាបទម្តងៗ”នៅពេលក្មួយៗខិតខំបម្រើព្រះយេស៊ូវគ្រីស្ទដោយស្មោះស្ម័គ្រនៅក្នុងតំបន់បេសកកម្ម តាមរយៈការប្រែចិត្ត សេចក្តីជំនឿ ការគោរពប្រតិបត្តិពិតប្រាកដ និងការខិតខំប្រចាំថ្ងៃដើម្បី « ស្វែងរកជានិច្ច បង្រៀនការប្រែចិត្ត និងធ្វើពិធីបុណ្យជ្រមុជទឹកដល់អ្នកប្រែចិត្តជឿ »
ថ្វីត្បិតក្មួយៗពាក់ស្លាកឈ្មោះ ជួនកាលក្មួយៗអាចនឹងមានអារម្មណ៍ថាមិនត្រូវបានគេស្គាល់ ឬត្រូវបានគេបំភ្លេច ។ ទោះជាយ៉ាងណាក៏ដោយ ក្មួយត្រូវតែដឹងថា ក្មួយមានព្រះវរបិតាសួគ៌ដ៏ឥតខ្ចោះ ដែលស្គាល់ក្មួយៗដោយផ្ទាល់ និងមានព្រះអង្គសង្រ្គោះដែលស្រឡាញ់ក្មួយ ។ ក្មួយនឹងមានថ្នាក់ដឹកនាំបេសកកម្ម ថ្វីបើពួកគាត់មិនល្អឥតខ្ចោះក្តី ពួកគាត់នឹងបម្រើក្មួយៗ ដូចជា « ខ្យល់[ ដែល ]បក់មិនឈប់ឈរ »ដើម្បីណែនាំដល់ក្មួយៗនៅក្នុងដំណើរផ្លូវនៃការប្រែចិត្តជឿផ្ទាល់របស់ក្មួយ ។
នៅក្នុង « ស្រុកដែលមានទឹកដោះ និងទឹកឃ្មុំហូរហៀរ »ក្មួយនឹងបម្រើនៅក្នុងបេសកកម្មផ្ទាល់របស់ក្មួយ ក្មួយៗនឹងកើតជាថ្មីខាងវិញ្ញាណ ហើយក្លាយទៅជាសិស្សរបស់ព្រះយេស៊ូវគ្រីស្ទពេញមួយជីវិត នៅពេលដែលក្មួយខិតទៅជិតទ្រង់ ។ ក្មួយអាចដឹងថា ក្មួយៗមិនត្រូវបានគេបំភ្លេចនោះទេ ។
ទោះបីជាអ្នកខ្លះអាចរងចាំ « ជាយូរមកហើយ »សម្រាប់ការសង្រ្គោះ ដ្បិតពួកគេ « គ្មានអ្នកណា »ដែលអាចជួយបាន ក៏ព្រះអម្ចាស់ព្រះយេស៊ូវគ្រីស្ទបានបង្រៀនយើងថា ទ្រង់មិនបានភ្លេចពួកយើងណាម្នាក់ឡើយ ។ ផ្ទុយទៅវិញ ទ្រង់ជាគំរូដ៏ល្អឥតខ្ចោះមួយក្នុងការស្វែងរកនរណាម្នាក់នៅគ្រប់ពេលនៃការងារបម្រើក្នុងព្រះជន្មរមែងស្លាប់របស់ទ្រង់ ។
យើងម្នាក់ៗ និងអ្នកដែលនៅជុំវិញយើងប្រឈមនឹងព្យុះភ្លៀង និងរលកនៃការសាកល្បងដែលពន្លិចយើងរាល់ថ្ងៃ ។ ប៉ុន្តែ « ខ្យល់[ ដែលនឹង ] បក់មិនឈប់ឈរ ដើម្បីបក់នាំយើងទៅដែនដីសន្យា … ដូច្នេះ [ យើងនឹងត្រូវ ] បាននាំទៅដោយកម្លាំងខ្យល់នោះ » ។
យើងម្នាក់ៗអាចធ្វើជាផ្នែកមួយនៃខ្យល់នេះ—ជាខ្យល់ដដែល ដែលបានប្រទានពរដល់ពួកសាសន៍យ៉ារេឌក្នុងការធ្វើដំណើររបស់ពួកគេ និងជាខ្យល់ដដែលដែលនឹងប្រទានពរដល់អ្នកដែលគេមិនស្គាល់ និងមិនចាប់អារម្មណ៍ដើម្បីទៅដល់ដែនដីសន្យារបស់ពួកគេផ្ទាល់ដោយមានជំនួយពីពួកយើង ។
ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះអង្គគាំទ្ររបស់យើងជាមួយនឹងព្រះវរបិតា ។ ទ្រង់គឺជាព្រះដ៏មានព្រះជន្មរស់ ហើយដើរតួជាខ្យល់ដ៏ខ្លាំងមួយ ដែលតែងតែដឹកនាំយើងតាមផ្លូវនៃសេចក្តីសញ្ញា ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕