ភាពសាមញ្ញគឺជាគោលលទ្ធិនៃព្រះយេស៊ូវគ្រីស្ទ
ខ្ញុំសូមថ្លែងសាក្សីអំពីកិច្ចការដ៏ពិសិដ្ឋនៃការបង្រៀនកូនចៅរបស់ព្រះវរបិតាសួគ៌អំពីគោលលទ្ធិដ៏សាមញ្ញរបស់ព្រះយេស៊ូវគ្រីស្ទ ។
យើងទាំងអស់គ្នាមានសមាជិកគ្រួសារដែលយើងស្រឡាញ់ ដែលត្រូវបានល្បួង និងសាកល្បងដោយកម្លាំងដែលហាក់ដូចជាឥតឈប់ឈររបស់សាតាំង ដែលជាអ្នកបំផ្លាញ នឹងធ្វើឲ្យបុត្រាបុត្រីរបស់ព្រះទាំងអស់វេទនា ។ ពួកយើងជាច្រើនគេងមិនលក់ បក់មិនល្ហើយ ។ យើងបានព្យាយាមជួយបុគ្គលដែលស្ថិតក្នុងគ្រោះថ្នាក់អស់ពីលទ្ធភាពសម្រាប់ការល្អ ។ យើងបានទូលអង្វរក្នុងការអធិស្ឋានសម្រាប់ពួកគេ ។ យើងស្រឡាញ់ពួកគេ ។ យើងខិតខំធ្វើជាគំរូដ៏ប្រសើរបំផុតអស់ពីលទ្ធភាព ។
អាលម៉ាដែលជាព្យាការីដ៏ឈ្លាសវៃពីសម័យបុរាណ បានប្រឈមមុខនឹងការសាកល្បងស្រដៀងគ្នានេះ ។ ប្រជាជនដែលលោកបានដឹកនាំ និងស្រឡាញ់ត្រូវបានវាយលុកដោយមារសត្រូវដ៏កំណាចជាញឹកញាប់ ប៉ុន្តែពួកគេនៅតែព្យាយាមចិញ្ចឹមកូនៗដែលសុចរិតនៅក្នុងពិភពលោកដ៏ទុច្ចរិតនេះ ។ អាលម៉ាមានអារម្មណ៍ថាក្តីសង្ឃឹមតែមួយគត់ក្នុងការទទួលជ័យជម្នះរបស់លោកគឺជាកម្លាំងមួយដែលជួនកាលយើងអាចនឹងមើលស្រាល ហើយជាញឹកញាប់ប្រើតែបន្តិចបន្តួច ។ លោកបានទូលអង្វរសូមជំនួយរបស់ព្រះ ។
អាលម៉ាបានដឹងថា ដើម្បីឲ្យព្រះជួយ នោះមារសត្រូវនិងមនុស្សដែលលោកដឹកនាំត្រូវតែប្រែចិត្ត ។ ហេតុដូច្នោះហើយ លោកបានជ្រើសរើសវិធីសាស្រ្តផ្សេងដើម្បីប្រយុទ្ធ ។
ព្រះគម្ពីរមរមនពិពណ៌នាវាតាមបែបនេះ ៖ « ហើយឥឡូវនេះដោយការផ្សាយព្រះបន្ទូល មានបណ្តាការដ៏ធំក្នុងការដឹកនាំប្រជាជន ឲ្យធ្វើនូវអ្វីៗដែលត្រឹមត្រូវ—មែនហើយ វាមានប្រសិទ្ធភាពទៅលើគំនិតមនុស្សច្រើន ជាងផ្លែដាវ ឬ អ្វីផ្សេងៗទៀត ដែលកើតឡើងដល់គេ—ហេតុដូច្នេះហើយ អាលម៉ាបានគិតថា ជាការចាំបាច់ដែលគេត្រូវពិសោធគុណធម៌នៃព្រះបន្ទូលនៃព្រះ » ។
ព្រះបន្ទូលនៃព្រះគឺជាគោលលទ្ធិដែលព្រះយេស៊ូវគ្រីស្ទ និងពួកព្យាការីរបស់ទ្រង់បានបង្រៀន ។ អាលម៉ាបានដឹងថា ពាក្យសម្តីនៃគោលលទ្ធិមានអានុភាពយ៉ាងខ្លាំងក្លា ។
នៅក្នុង កណ្ឌទី ១៨ នៃគោលលទ្ធិ និងសេចក្តីសញ្ញា ព្រះអម្ចាស់បានបើកសម្តែងគ្រឹះនៃគោលលទ្ធិរបស់ទ្រង់ ៖
« ដ្បិតមើលចុះ យើងបញ្ជាមនុស្សលោកទាំងអស់ នៅគ្រប់ទិសទីឲ្យប្រែចិត្ត ។ …
« ដ្បិតមើលចុះ ព្រះអម្ចាស់ដ៏ជាព្រះប្រោសលោះរបស់អ្នក ទ្រង់បានរងសេចក្ដីស្លាប់នៅក្នុងសាច់ឈាម ម្ល៉ោះហើយ ទ្រង់បានរងការឈឺចាប់នៃមនុស្សលោកទាំងអស់ ដើម្បីឲ្យមនុស្សលោកទាំងអស់អាចប្រែចិត្ត ហើយមករកព្រះអង្គបាន ។
« ហើយទ្រង់បានមានព្រះជន្មរស់ពីស្លាប់ឡើងវិញ ដើម្បីឲ្យព្រះអង្គអាចនាំមនុស្សលោកទាំងអស់មករកទ្រង់ ស្របតាមលក្ខខណ្ឌនៃការប្រែចិត្ត » ។
« ហើយអ្នកនឹងដួលចុះ ហើយថ្វាយបង្គំព្រះវរបិតាដោយនូវនាមរបស់យើង ។
« … អ្នករាល់គ្នាត្រូវតែប្រែចិត្ត ហើយទទួលបុណ្យជ្រមុជទឹកដោយនូវព្រះនាមនៃព្រះយេស៊ូវគ្រីស្ទ » ។
« ចូរសូមពីព្រះវរបិតាដោយនូវនាមរបស់យើង ដោយសេចក្តីជំនឿជឿថា អ្នកនឹងបានទទួល ហើយអ្នកនឹងបានព្រះវិញ្ញាណបរិសុទ្ធ » ។
« ហើយឥឡូវនេះ បន្ទាប់ពីអ្នកបានទទួលការណ៍នេះ អ្នកត្រូវកាន់តាមព្រះបញ្ញត្តិទាំងឡាយរបស់យើងនូវគ្រប់ការណ៍ទាំងអស់ » ។
« ចូរយកព្រះនាមនៃព្រះគ្រីស្ទមកដាក់លើខ្លួន ហើយនិយាយសេចក្ដីពិត ដោយមានចិត្តម៉ឺងម៉ាត់ចុះ ។
« ហើយអស់អ្នកណាដែលប្រែចិត្ត ហើយទទួលបុណ្យជ្រមុជទឹកដោយនូវនាមយើង គឺជាព្រះយេស៊ូវគ្រីស្ទ ហើយកាន់ខ្ជាប់ដរាបដល់ចុងបំផុត អ្នកនោះហើយនឹងបានសង្គ្រោះ » ។
នៅក្នុងវគ្គបទគម្ពីរពីរបីទាំងនោះ ព្រះអង្គសង្រ្គោះបានប្រទានគំរូដ៏ឥតខ្ចោះពីរបៀបដែលយើងគួរបង្រៀនគោលលទ្ធិរបស់ទ្រង់ ។ គោលការណ៍នេះគឺថា បុត្រាបុត្រីរបស់ព្រះទាំងអស់ទទួលពរជ័យតាមរយៈសេចក្តីជំនឿនៅលើព្រះអម្ចាស់ព្រះយេស៊ូវគ្រីស្ទ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការប្រកាន់ខ្ជាប់ដល់ទីបញ្ចប់ ។
នៅពេលយើងបង្រៀនគោលការណ៍ទាំងនេះដល់អ្នកដែលយើងស្រឡាញ់ នោះព្រះវិញ្ញាណបរិសុទ្ធនឹងជួយយើងស្គាល់សេចក្តីពិត ។ ដោយសារយើងត្រូវការការបំផុសគំនិតពីព្រះវិញ្ញាណបរិសុទ្ធ នោះយើងត្រូវតែចៀសវាងការប៉ាន់ស្មាន ឬការបកស្រាយផ្ទាល់ខ្លួន ដែលហួសពីការបង្រៀនគោលលទ្ធិពិត ។
នោះអាចនឹងពិបាកដើម្បីធ្វើ នៅពេលបងប្អូនស្រឡាញ់មនុស្សដែលបងប្អូនព្យាយាមមានឥទ្ធិពលទៅលើ ។ គាត់ ឬនាងអាចនឹងមិនយកចិត្តទុកដាក់ចំពោះគោលលទ្ធិដែលបានបង្រៀន ។ វាគឺជាការល្បួងដើម្បីសាកល្បងអ្វីដែលថ្មី ឬអស្ចារ្យ ។ ប៉ុន្តែព្រះវិញ្ញាណបរិសុទ្ធនឹងបើកសម្តែងវិញ្ញាណនៃសេចក្តីពិតតែនៅពេលដែលយើងប្រយ័ត្នប្រយែង និងយកចិត្តទុកដាក់ដោយមិនធ្វើអ្វីហួសពីការបង្រៀនគោលលទ្ធិពិតប៉ុណ្ណោះ ។ របៀបដ៏ប្រាកដបំផុតមួយដើម្បីចៀសវាងពីគោលលទ្ធិក្លែងក្លាយ សូម្បីតែការទៅក្បែរនោះក្ដី គឺត្រូវជ្រើសរើសធ្វើឲ្យការបង្រៀនរបស់យើងសាមញ្ញ ។ សុវត្ថិភាពគឺទទួលបានតាមរយៈភាពសាមញ្ញនោះ ហើយមានការបាត់បង់តិចតួច ។
ការបង្រៀនសាមញ្ញៗអនុញ្ញាតឲ្យយើងចែកចាយគោលលទ្ធិនៃសេចក្ដីសង្រ្គោះតាំងពីនៅក្មេងខ្ចី ជាពេលដែលកុមារមិនទាន់ទទួលការល្បួងរបស់អារក្ស ជាការល្បួងដែលពួកគេនឹងប្រឈមមុខនៅពេលក្រោយ មុនពេលសេចក្តីពិតដែលពួកគេត្រូវការរៀនសូត្រត្រូវបានទាញចេញដោយសំឡេងរំខាននៃប្រព័ន្ធផ្សព្វផ្សាយសង្គម មិត្តភក្តិ និងការពុះពារផ្ទាល់ខ្លួនរបស់ពួកគេ ។ យើងគួរតែចាប់យកគ្រប់ឱកាសដើម្បីចែកចាយការបង្រៀនរបស់ព្រះយេស៊ូវគ្រីស្ទជាមួយកុមារ ។ គ្រានៃការបង្រៀនទាំងនេះមានតម្លៃ និងតិចតួចណាស់បើប្រៀបធៀបទៅនឹងការខិតខំប្រឹងប្រែងឥតឈប់ឈររបស់កម្លាំងប្រឆាំងនោះ ។ ដ្បិតគ្រប់ម៉ោងដែលបានចំណាយលើការបណ្ដុះគោលលទ្ធិទៅក្នុងជីវិតរបស់កុមារ មានការប្រឆាំងរាប់មិនអស់ដែលពោរពេញជាមួយសារ និងរូបភាពដែលផ្ទុយ ឬមិនខ្វល់ខ្វាយនឹងសេចក្ដីពិតនៃសេចក្ដីសង្គ្រោះទាំងនោះ ។
បងប្អូនមួយចំនួនអាចនឹងងឿងឆ្ងល់ថាតើវាអាចជាការល្អជាងក្នុងការចូលទៅជិតកូនៗរបស់បងប្អូនតាមរយៈការធ្វើរឿងសប្បាយៗ ឬក៏បងប្អូនអាចសួរថាតើកូនៗអាចនឹងចាប់ផ្តើមមានអារម្មណ៍សន្ធប់ចំពោះការបង្រៀនរបស់បងប្អូនដែរឬទេ ។ ផ្ទុយទៅវិញ យើងគួរតែពិចារណាថា « ជាមួយពេលវេលា និងឱកាសបន្តិចបន្តួច តើខ្ញុំអាចចែកចាយពាក្យសម្តីនៃគោលលទ្ធិអ្វីខ្លះ ដែលនឹងជួយពង្រឹងពួកគេទាស់នឹងឧបសគ្គដែលមិនអាចចៀសរួចចំពោះសេចក្ដីជំនឿរបស់ពួកគេ ? » ពាក្យសម្តីដែលបងប្អូនចែកចាយនៅថ្ងៃនេះអាចជាអ្វីមួយដែលពួកគេនឹងចងចាំ ហើយពេលវេលានឹងកន្លងទៅយ៉ាងលឿន ។
ខ្ញុំតែងតែកោតសរសើរដល់ការពលិកម្មរបស់ជីដូនទូតរបស់ខ្ញុំ ឈ្មោះ ម៉ារី ប៉ូមមីលី ក្នុងការចែកចាយគោលលទ្ធិនៃព្រះយេស៊ូវគ្រីស្ទ ។ ក្រុមគ្រួសាររបស់គាត់បានរៀនជាមួយពួកអ្នកផ្សព្វផ្សាយសាសនានៅប្រទេសស្វីស នៅពេលគាត់មានអាយុ ២៤ ឆ្នាំ ។
បន្ទាប់ពីបានទទួលបុណ្យជ្រមុជទឹក ទួតម៉ារីបានសម្រេចចិត្តចូលរួមពួកបរិសុទ្ធនៅប្រទេសអាមេរិក ដូច្នេះគាត់បានធ្វើដំណើរពីប្រទេសស្វីសទៅកាន់ទីក្រុងប៊ែកឡាំង ហើយរកបានការងារធ្វើជាមួយស្រ្តីម្នាក់ដែលឲ្យគាត់ធ្វើការត្បាញក្រណាត់សម្រាប់សម្លៀកបំពាក់គ្រួសារ ។ ទួតម៉ារីរស់នៅក្នុងបន្ទប់អ្នកបម្រើ ហើយបានដំឡើងកីត្បាញរបស់គាត់នៅបន្ទប់ទទួលភ្ញៀវ ។
នៅពេលនោះ ការបង្រៀនគោលលទ្ធិនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺខុសច្បាប់នៅទីក្រុងប៊ែកឡាំង ។ ប៉ុន្តែទួតម៉ារីឃើញថា គាត់មិនអាចឈប់ចែកចាយអ្វីដែលគាត់បានរៀននោះទេ ។ ស្រីៗនៅក្នុងផ្ទះនោះ និងមិត្តភក្តិរបស់គាត់នឹងប្រមូលផ្ដុំគ្នានៅជុំវិញកីត្បាញដើម្បីស្ដាប់ទួតម៉ារីបង្រៀន ។ គាត់បានមានប្រសាសន៍អំពីការលេចឡើងនៃព្រះវរបិតាសួគ៌ និងព្រះយេស៊ូវគ្រីស្ទចំពោះ យ៉ូសែប ស្ម៊ីធ ការយាងមករបស់ពួកទេវតា និងព្រះគម្ពីរមរមន ។ ដោយការចងចាំពីដំណើររឿងរបស់អាលម៉ា គាត់បានបង្រៀនអំពីគោលលទ្ធិនៃការស្ដារឡើងវិញ ។ គាត់បានថ្លែងទីបន្ទាល់ថា ក្រុមគ្រួសារអាចរួមរស់ជាមួយគ្នានៅនគរសេឡេស្ទាល ។
ក្តីរំភើបរបស់ទួតម៉ារី ក្នុងការចែកចាយគោលលទ្ធិនៃដំណឹងល្អដែលបានស្ដារឡើងវិញ មិនយូរប៉ុន្មានធ្វើឲ្យមានបញ្ហា ។ ក្រោយមក ប៉ូលិសបាននាំទួតម៉ារីទៅដាក់គុក ។ នៅតាមផ្លូវ គាត់បានសួរប៉ូលិសពីឈ្មោះចៅក្រម ដែលគាត់នឹងត្រូវបង្ហាញខ្លួននៅព្រឹកស្អែក ។ គាត់ក៏បានសួរអំពីគ្រួសាររបស់ចៅក្រមនោះ ហើយថាតើគាត់ជាឪពុក និងស្វាមីល្អដែរឬទេ ។ ប៉ូលិសរូបនោះបានពិពណ៌នាចៅក្រមនោះថាជាបុរសនៃលោកិយ ។
នៅក្នុងគុក ទួតម៉ារីបានសុំខ្មៅដៃ និងក្រដាសមួយចំនួន ។ គាត់បានចំណាយពេលពេញមួយយប់សរសេរសំបុត្រទៅកាន់ចៅក្រមរូបនោះ ដោយការថ្លែងទីបន្ទាល់ពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ដូចដែលបានពិពណ៌នានៅក្នុងព្រះគម្ពីរមរមន ដោយការពិភាក្សាអំពីពិភពវិញ្ញាណ និងការពន្យល់ពីការប្រែចិត្ត ។ គាត់បានផ្ដល់យោបល់ថា ចៅក្រមរូបនោះនឹងត្រូវការពេលវេលាដើម្បីគិតពិចាណាពីជីវិតរបស់គាត់ពីមុនប្រឈមមុខនឹងការជំរុំជម្រះចុងក្រោយ ។ គាត់បានសរសេរថា គាត់ដឹងថា ចៅក្រមរូបនោះមានរឿងជាច្រើនដែលត្រូវប្រែចិត្ត ដែលនឹងធ្វើឲ្យគ្រួសាររបស់គាត់កើតទុក្ខជាខ្លាំង និងនាំឲ្យគាត់សោកសៅជាអនេក ។ លុះព្រឹកឡើង ពេលគាត់បានសរសេរចប់ គាត់ក៏បានប្រគល់ឲ្យប៉ូលិស និងសុំពួកគេឲ្យផ្ញើទៅកាន់ចៅក្រម ហើយប៉ូលិសក៏យល់ព្រម ។
ក្រោយមក ប៉ូលិសត្រូវបានចៅក្រមកោះហៅមកកាន់ការិយាល័យរបស់គាត់ ។ សំបុត្រដែលទួតម៉ារីបានសរសេរគឺជាភស្តុតាងដែលមិនអាចប្រកែកបានថា គាត់កំពុងបង្រៀនគោលលទ្ធិនៃដំណឹងល្អដែលបានស្ដារឡើងវិញ ហើយការធ្វើដូច្នេះ គឺជាការបំពានច្បាប់ ។ ទោះជាយ៉ាងណា មិនយូរប៉ុន្មាន ប៉ូលិសបានត្រឡប់ទៅបន្ទប់ឃុំឃាំងរបស់ទួតម៉ារីវិញ ។ គាត់បានប្រាប់ទួតម៉ារីថា ការចោទប្រកាន់ទាំងអស់ត្រូវបានច្រានចោល ហើយថាគាត់មានសេរីភាពអាចចាកចេញទៅបាន ។ ការបង្រៀនរបស់គាត់អំពីគោលលទ្ធិនៃដំណឹងល្អនៃព្រះយេស៊ូវគ្រីស្ទ ដែលបានស្ដារឡើងវិញបានបណ្តាលឲ្យគាត់ជាប់គុក ។ ហើយការប្រកាសពីគោលលទ្ធិនៃការប្រែចិត្តដល់ចៅក្រម បានធ្វើឲ្យគាត់រួចពីគុក ។
ការបង្រៀនរបស់ទួត ម៉ារី ប៉ូមមីលី មិនបានបញ្ចប់ត្រឹមគាត់ចេញពីគុកនោះទេ ។ កំណត់ត្រានៃពាក្យសម្ដីរបស់គាត់បានបន្តនូវគោលលទ្ធិពិតដល់ជំនាន់ដែលមិនទាន់កើត ។ សេចក្តីជំនឿរបស់គាត់ដែលថា សូម្បីតែអ្នកប្រែចិត្តជឿថ្មីក៏អាចបង្រៀនគោលលទ្ធិនៃព្រះយេស៊ូវគ្រីស្ទបាន ធានាថាកូនចៅរបស់គាត់នឹងត្រូវបានពង្រឹងនៅក្នុងសមរភូមិរបស់ពួកគេផ្ទាល់ ។
ទោះបីយើងប្រឹងប្រែងអស់ពីសមត្ថភាពដើម្បីបង្រៀនអ្នកដែលយើងស្រឡាញ់អំពីគោលលទ្ធិនៃព្រះយេស៊ូវគ្រីស្ទក៏ដោយ ក៏មនុស្សមួយចំនួនប្រហែលជានៅតែមិនទទួលយក ។ ការសង្ស័យអាចចូលទៅក្នុងដួងចិត្តរបស់អ្នក ។ អ្នកអាចនឹងសួរថាតើអ្នកស្គាល់គោលលទ្ធិរបស់ព្រះអង្គសង្គ្រោះគ្រប់គ្រាន់ដើម្បីបង្រៀនវាប្រកបដោយប្រសិទ្ធភាពដែរឬអត់ ។ ហើយប្រសិនបើអ្នកបានព្យាយាមបង្រៀនវារួចទៅហើយ អ្នកប្រហែលជាឆ្ងល់ថា ហេតុអ្វីបានជាយើងមើលមិនឃើញផលវិជ្ជមាននៅក្នុងជីវិតអ្នកដែលយើងបង្រៀន ។ សូមកុំចុះចាញ់នឹងការសង្ស័យទាំងនោះឡើយ ។ សូមងាកទៅរកព្រះឲ្យជួយ ។
« មែនហើយ ចូរអំពាវនាវដល់ព្រះនូវអស់ទាំងការគាំទ្រ … ចូរដាក់ចិត្តមេត្រីរបស់កូនទៅលើព្រះអម្ចាស់ដរាបតទៅ » ។
« ខ្ញុំចង់ឲ្យអ្នករាល់គ្នាបន្ទាបខ្លួន ហើយចុះចូល ហើយសុភាពទន់ភ្លន់ រហ័សធ្វើតាមការល្អ ពោរពេញទៅដោយការទ្រាំទ្រ និងការអត់ធ្មត់ សង្កត់ចិត្តក្នុងកិច្ចការគ្រប់យ៉ាង មានចិត្តព្យាយាមក្នុងការកាន់តាមព្រះបញ្ញត្តិទាំងឡាយនៃព្រះឲ្យបានគ្រប់ពេលវេលា សូមនូវអ្វីដែលអ្នកត្រូវការ ទាំងខាងឯវិញ្ញាណ និងខាងឯសាច់ឈាមដែរ ថ្លែងអំណរគុណដល់ព្រះជានិច្ច ចំពោះអ្វីដែលអ្នកបានទទួល » ។
ប្រសិនបើបងប្អូនអធិស្ឋាន ប្រសិនបើបងប្អូនទូលទៅកាន់ព្រះ ហើយប្រសិនបើបងប្អូនទូលអង្វរសុំជំនួយពីទ្រង់សម្រាប់មនុស្សជាទីស្រឡាញ់របស់បងប្អូន ហើយប្រសិនបើបងប្អូនថ្លែងអំណគុណដល់ទ្រង់មិនត្រឹមតែសម្រាប់ជំនួយប៉ុណ្ណោះទេ ប៉ុន្តែសម្រាប់ការអត់ធ្មត់ និងភាពទន់ភ្លន់ដែលកើតចេញពីការមិនទទួលបានអ្វីៗដែលបងប្អូនចង់បានភ្លាមៗ ឬប្រហែលជាមិនធ្លាប់បាន បន្ទាប់មក ខ្ញុំសូមសន្យានឹងបងប្អូនថា បងប្អូននឹងចូលទៅជិតទ្រង់ ។ នោះបងប្អូននឹងប្រែក្លាយជាឧស្សាហ៍ព្យាយាម និងអត់ធ្មត់ ។ ហើយបន្ទាប់មកបងប្អូនអាចដឹងថា បងប្អូនបានធ្វើអស់ពីសមត្ថភាពដើម្បីជួយអ្នកដែលបងប្អូនស្រឡាញ់ និងអ្នកដែលបងប្អូនអធិស្ឋានដើម្បីតទល់នឹងការល្បួងរបស់សាតាំងដើម្បីបញ្ឈប់ពួកគេ ។
« តែអស់អ្នកណាដែលសង្ឃឹមដល់ព្រះយេហូវ៉ាវិញនោះនឹងមានកំឡាំងចម្រើនជានិច្ច គេនឹងហើរឡើងទៅលើដោយស្លាបដូចជាឥន្ទ្រី គេនឹងរត់ទៅឥតដែលហត់ ហើយនឹងដើរឥតដែលល្វើយឡើយ » ។
បងប្អូនអាចរកឃើញសេចក្ដីសង្ឃឹមនៅក្នុងកំណត់ត្រាព្រះគម្ពីរនៃគ្រួសារ ។ យើងអានអំពីអស់អ្នកដែលងាកចេញពីអ្វីដែលពួកគេត្រូវបានបង្រៀន ឬអ្នកដែលពុះពារទូលសុំការអភ័យទោសពីព្រះដូចជា អាលម៉ាជាកូន ពួកបុត្រារបស់ម៉ូសាយ និងអេណុស ។ ក្នុងគ្រាជួបវិបត្តិរបស់ពួកគេ ពួកគេបានចងចាំពាក្យសម្ដីរបស់ឪពុកម្ដាយពួកគេ ជាពាក្យសម្តីនៃគោលលទ្ធិនៃព្រះយេស៊ូវគ្រីស្ទ ។ ការចងចាំបានសង្រ្គោះពួកគេ ។ ការបង្រៀនរបស់បងប្អូនអំពីគោលលទ្ធិដ៏ពិសិដ្ឋនោះនឹងត្រូវបានចងចាំ ។
ខ្ញុំសូមធ្វើជាសាក្សីអំពីកិច្ចការដ៏ពិសិដ្ឋនៃការបង្រៀនបុត្រាបុត្រីរបស់ព្រះវរបិតាសួគ៌នូវគោលលទ្ធិដ៏សាមញ្ញរបស់ព្រះយេស៊ូវគ្រីស្ទ ដែលអនុញ្ញាតឲ្យយើងបានស្អាតខាងវិញ្ញាណ ហើយនៅទីបំផុតត្រូវបានស្វាគមន៍ទៅក្នុងវត្តមានរបស់ព្រះ ដើម្បីរស់នៅជាមួយទ្រង់ និងព្រះរាជបុត្រាទ្រង់ដោយសិរីរុងរឿងជារៀងរហូតនៅក្នុងក្រុមគ្រួសារ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕