អ្នករាល់គ្នាជាមិត្តរបស់យើង
ការប្រកាសរបស់ព្រះអង្គសង្រ្គោះថា « អ្នករាល់គ្នាជាមិត្តរបស់យើង » ជាការហៅដ៏ច្បាស់មួយដើម្បីបង្កើតទំនាក់ទំនងកាន់តែខ្ពស់ និងបរិសុទ្ធជាងមុន ក្នុងចំណោមបុត្រាបុត្រីទាំងអស់របស់ព្រះ ។
នៅក្នុងពិភពលោកដែលពោរពេញទៅដោយការឈ្លោះទាស់ទែងគ្នា និងការបែងចែក ដែលការថ្លែងបញ្ចេញយោបល់ត្រូវបានជំនួសវិញដោយការវិនិច្ឆ័យ និងការមើលងាយ ហើយចំណងមិត្តភាពត្រូវបានកំណត់ដោយ ពួកដែលមានការអនុវត្តន៍តាមទស្សនៈណាមួយ និងពួកដែលដើរតាមបុគ្គល ឬគំនិតណាមួយ ។ ខ្ញុំបានដឹងថា មានគំរូដ៏ច្បាស់លាស់ សាមញ្ញ និងដ៏ទេវភាពមួយ ដែលយើងអាចស្វែងរកបាននូវសាមគ្គីភាព សេចក្តីស្រឡាញ់ និងការមានចំណែក ។ គំរូនោះគឺជាព្រះយេស៊ូវគ្រីស្ទ ។ ខ្ញុំសូមថ្លែងទីបន្ទាល់ថា ទ្រង់គឺជាអង្គបង្រួបបង្រួមដ៏អស្ចារ្យ ។
យើងគឺជាមិត្តរបស់ទ្រង់
ក្នុងខែធ្នូ ឆ្នាំ១៨៣២ នៅពេលដែល « ការលេចឡើងនៃបញ្ហាក្នុងចំណោមជាតិសាសន៏ទូទៅទាំងពិភពលោក » ដែលត្រូវបាន « មើលឃើញកាន់តែច្បាស់ »ជាងពេលណាៗទាំងអស់ចាប់តាំងពីការរៀបចំឡើងនៃសាសនាចក្រ នោះថ្នាក់ដឹកនាំពួកបរិសុទ្ធថ្ងៃចុងក្រោយនៅទីក្រុងខឺតឡង់ រដ្ឋអូហៃអូ បានប្រមូលផ្តុំគ្នាសម្រាប់សន្និសីទមួយ ។ ពួកលោកបានអធិស្ឋាន « ដោយរៀងៗខ្លួន និងដោយសំឡេងឮៗទៅកាន់ព្រះអម្ចាស់ ឲ្យបង្ហាញពីព្រះឆន្ទៈរបស់ទ្រង់ទៅដល់ [ ពួកលោក ] »នៅក្នុងការទទួលស្គាល់ការអធិស្ឋានរបស់សមាជិកដ៏ស្មោះត្រង់ទាំងនេះក្នុងអំឡុងពេលមានឧបសគ្គលំបាកដ៏ខ្លាំងនេះ នោះព្រះអម្ចាស់បានលួងលោមដល់ពួកលោកព្រមទាំងមានបន្ទូលទៅកាន់ពួកបរិសុទ្ធបីដងជាមួយនឹងពាក្យពេចន៍ដ៏មានឥទ្ធិពលបីម៉ាត់គឺ ៖ « មិត្តរបស់យើង » ។
ជាយូរយារមកហើយ ព្រះយេស៊ូវគ្រីស្ទបានហៅអ្នកដើរតាមដ៏ស្មោះត្រង់របស់ទ្រង់ថា ជាមិត្តរបស់ទ្រង់ ។ នៅក្នុងគោលលទ្ធិ និងសេចក្តីសញ្ញា ព្រះអង្គសង្គ្រោះប្រើពាក្យ មិត្ត ចំនួនដប់បួនដងដើម្បីកំណត់ពីទំនាក់ទំនងដ៏ពិសិដ្ឋ និងដ៏គួរឲ្យស្រឡាញ់នេះ ។ ខ្ញុំមិនសំដៅលើពាក្យ មិត្ត ដែលពិភពលោកកំណត់ឲ្យវា—ដែលអាស្រ័យទៅលើអ្នកតាមដានប្រព័ន្ធផ្សព្វផ្សាយសង្គម ឬការចុច « ចូលចិត្ត » នោះទេ ។ ទំនាក់ទំនងដ៏ពិសិដ្ឋ និងដ៏គួរឲ្យស្រឡាញ់នេះមិនអាចរាប់តែនៅក្នុង hashtag ឬចំនួនតួលេខនៅលើប្រព័ន្ធ Instagram ឬប្រព័ន្ធ X នោះទេ ។
ជាការពិតណាស់ កាលពីនៅជាក្មេងជំទង់ ខ្ញុំចងចាំការសន្ទនាដ៏គួរឲ្យភ័យខ្លាចនៅពេលដែលខ្ញុំបានឮពាក្យឈឺចាប់ទាំងនោះ « តើយើងអាចក្លាយត្រឹមជាមិត្តបានទេ? » ឬ « សូមនៅត្រឹមតែជាមិត្តបានហើយ » ។ គ្មានកន្លែងណានៅក្នុងព្រះគម្ពីរដែលយើងឮទ្រង់មានបន្ទូលថា « អ្នកគ្រាន់តែជាមិត្តរបស់យើង » ។ លើសជាងនេះ ទ្រង់បានបង្រៀនថា « គ្មានអ្នកណាមានសេចក្តីស្រឡាញ់ធំជាងនេះ គឺដែលអ្នកណានឹងប្តូរជីវិត ជំនួសពួកសំឡាញ់របស់ខ្លួននោះទេ » ។ ហើយ « អ្នករាល់គ្នានេះហើយ ជាពួកអ្នកដែលព្រះវរបិតារបស់យើងបានប្រទានដល់យើង អ្នករាល់គ្នាជាមិត្តរបស់យើង » ។
អារម្មណ៍នេះគឺល្អត្រចង់ណាស់ថា ៖ ព្រះអង្គសង្គ្រោះស្គាល់យើងម្នាក់ៗ និងមើលថែយើងទាំងអស់គ្នា ។ ការយកចិត្តទុកដាក់មើលថែនេះមិនមែនជារឿងតិចតួច ឬមិនសំខាន់នោះទេ ។ ផ្ទុយទៅវិញ វាគឺជាការលើកតម្កើង លើកកម្ពស់ និងអស់កល្បជានិច្ច ។ ខ្ញុំមើលឃើញការប្រកាសរបស់ព្រះអង្គសង្រ្គោះ « អ្នករាល់គ្នាជាមិត្តរបស់យើង »ថាជាការហៅដ៏ច្បាស់មួយដើម្បីបង្កើតទំនាក់ទំនងកាន់តែខ្ពស់ និងបរិសុទ្ធជាងមុន ក្នុងចំណោមបុត្រាបុត្រីទាំងអស់របស់ព្រះ « ដើម្បីឲ្យយើងអាចទៅជាមួយ » ។ យើងធ្វើដូចនេះនៅពេលដែលយើងរួមគ្នាស្វែងរកទាំងឱកាសដើម្បីបង្រួបបង្រួម និងអារម្មណ៍នៃភាពមានចំណែកសម្រាប់មនុស្សទាំងអស់ ។
យើងរួមគ្នាតែមួយនៅក្នុងទ្រង់
ព្រះអង្គសង្គ្រោះបានបង្ហាញការណ៍យ៉ាងល្អនេះនៅក្នុងការអញ្ជើញរបស់ទ្រង់ឲ្យ « ចូរមកតាមខ្ញុំ » ។ ទ្រង់បានជ្រើសរើសយកអំណោយ និងគុណលក្ខណៈជាបុគ្គលនៃក្រុមចម្រុះនៃអ្នកដើរតាមដើម្បីហៅឲ្យធ្វើជាសាវករបស់ទ្រង់ ។ ទ្រង់បានហៅអ្នកនេសាទ ជាអ្នកឧស្សាហ៍ បងប្អូនប្រុសដែលគេស្គាល់ថាជាអ្នកដែលមានបុគ្គលិកលក្ខណៈមុតមាំ និងសូម្បីតែអ្នកប្រមូលពន្ធ ។ ជំនឿនៅលើព្រះអង្គសង្គ្រោះ និងបំណងប្រាថ្នារបស់ពួកគេដើម្បីខិតទៅជិតនឹងទ្រង់បានបង្រួបបង្រួមពួកគេ ។ ពួកគេបានស្វែងរកការណែនាំដ៏ទេវភាពពីទ្រង់ បានទទួលឥទិ្ធពលពីព្រះតាមរយៈទ្រង់ ហើយ « ពួកគេក៏ទុកសំណាញ់ចោល ទៅតាមទ្រង់ភ្លាម » ។
ខ្ញុំក៏បានមើលឃើញពីរបៀបដែលការស្ថាបនាទំនាក់ទំនងដ៏ខ្ពស់ជាង និងដ៏បរិសុទ្ធជាងនាំឲ្យយើងមករួមគ្នាតែមួយដែរ ។ ភរិយារបស់ខ្ញុំ ជេនីហ្វឺ និងខ្ញុំមានពរជ័យក្នុងការចិញ្ចឹមកូនទាំងប្រាំរបស់យើងនៅក្នុងទីក្រុងញូវយ៉ក ។ នៅក្នុងទីក្រុងដ៏មមាញឹកនោះ យើងបានបង្កើតទំនាក់ទំនងដ៏មានតម្លៃ និងពិសិដ្ឋជាមួយអ្នកជិតខាង មិត្តភក្តិពីសាលា សហការីអាជីវកម្ម ថ្នាក់ដឹកនាំសាសនា និងមិត្តដែលជាពួកបរិសុទ្ធ ។
នៅខែឧសភា ឆ្នាំ២០២០ នៅពេលដែលពិភពលោកកំពុងជួបប្រទះនឹងការរីករាលដាលនៃជំងឺរាតត្បាតជាសកល សមាជិកនៃគណៈកម្មាធិការមេដឹកនាំសាសនានានានៅទីក្រុងញូវយ៉កបានជួបជុំគ្នាដោយភ្លាមៗតាមរយៈការប្រជុំពីចម្ងាយ ។ មិនមានរបៀបវារៈទេ ។ មិនមានភ្ញៀវពិសេសទេ ។ គ្រាន់តែជាសំណើដើម្បីមករួមគ្នា និងពិភាក្សាអំពីបញ្ហាប្រឈមមុខដែលយើងកំពុងជួបប្រទះក្នុងនាមជាថ្នាក់ដឹកនាំសាសនា ។ មជ្ឈមណ្ឌលសម្រាប់ត្រួតពិនិត្យជំងឺទើបតែបានរាយការណ៍ថា ទីក្រុងរបស់យើងគឺជាចំណុចកណ្តាលនៃជំងឺរាតត្បាត កូវីដ-១៩ នៅក្នុងសហរដ្ឋអាមេរិក ។ នេះមានន័យថាមិនមានការប្រមូលផ្តុំគ្នាទៀតទេ ។ មិនមានការមកជួបជុំគ្នាទៀតទេ ។
សម្រាប់ថា្នក់ដឹកនាំសាសនាទាំងនេះ ការដកចេញនូវការបម្រើផ្ទាល់ខ្លួន ការជួបប្រជុំពួកជំនុំ និងការថ្វាយបង្គំប្រចាំសប្តាហ៍គឺជាការប៉ះពាល់យ៉ាងធ្ងន់ធ្ងរមួយ ។ ក្រុមតូចរបស់យើង—ដែលរួមមានអ្នកដែលមានតំណែងខ្ពស់បំផុតក្នុងសាសនាកាតូលិក បព្វជិតសាសនាកាតូលិក អ្នកបង្រៀនច្បាប់សាសន៍យូដា អ្នកសូត្រធម៍នៅក្នុងសាសនាអ៊ីស្លាម គ្រូគង្វាល អ្នកបព្វជិតក្នុងសាសនាប្រូតេស្តង់ និងអែលឌើរ—បានមកស្តាប់ លួងលោម និងគាំទ្រគ្នាទៅវិញទៅមក ។ ជំនួសឲ្យការផ្តោតលើភាពខុសគ្នារបស់យើង នោះយើងបានយល់ដឹងពីអ្វីដែលយើងមានដូចគ្នាវិញ ។ យើងបាននិយាយអំពីលទ្ធភាព និងបន្ទាប់មកអ្វីដែលអាចនឹងកើតឡើង ។ យើងបានរួបរួមគ្នា និងឆ្លើយតបទៅនឹងសំណួរអំពីសេចក្តីជំនឿ និងអនាគត ។ ហើយក្រោយមក យើងបានអធិស្ឋាន ។ មែនហើយ ពួកយើងបានអធិស្ឋានយ៉ាងក្លៀវក្លា ។
នៅក្នុងទីក្រុងចម្រុះដ៏សម្បូរបែបមួយដែលពោរពេញទៅដោយភាពស្មុគស្មាញ និងមានវប្បធម៌មិនចុះសម្រុងគ្នា យើងបានមើលឃើញភាពខុសគ្នារបស់យើងរសាយបាត់ទៅ នៅពេលយើងរួមគ្នាជាមិត្តភក្តិដែលមានសំឡេងតែមួយ គោលបំណងតែមួយ និងការអធិស្ឋានតែមួយ ។
យើងលែងអង្គុយទល់មុខសម្លឹងដាក់គ្នាទៀតហើយ តែសម្លឹងមើលទៅឋានសួគ៌ជាមួយគ្នាវិញ ។ យើងបានចាកចេញពីការប្រជុំបន្តបន្ទាប់ដោយកាន់តែរួបរួមគ្នា ហើយត្រៀមខ្លួនជាស្រេចដើម្បី « ធ្វើ » កិច្ចការបម្រើរបស់យើង ។ លទ្ធផលនៃការសហការគ្នា និងសេវាកម្មដែលផ្តល់ដល់ប្រជាជននៅទីក្រុងញូវយ៉ករាប់ពាន់នាក់បានបង្រៀនខ្ញុំថា វាតែងតែមានអ្វីជាច្រើនដែលបង្រួបបង្រួមយើង ជាជាងការបែងចែកយើងនៅក្នុងពិភពលោកដែលតែងតែផ្តោតទៅលើការបែងចែក ការឃ្លាតឆ្ងាយ និងការផ្តាច់ចេញនោះទៅទៀត ។ ព្រះអម្ចាស់បានអង្វរថា « ចូររួមគ្នាតែមួយ ហើយបើសិនជាអ្នករាល់គ្នាមិនរួមគ្នាតែមួយទេ ឈ្មោះថាអ្នករាល់គ្នាពុំមែនជារបស់ផងយើងឡើយ » ។
បងប្អូនប្រុសស្រី យើងត្រូវឈប់ស្វែងរកហេតុផលដើម្បីបែងចែក ហើយស្វែងរកឱកាសដើម្បី « រួមគ្នាតែមួយ » វិញ ។ ទ្រង់បានប្រទានពរដល់យើងជាមួយនឹងអំណោយ និងគុណលក្ខណៈពិសេសៗដែលអញ្ជើញឲ្យមានការរៀនសូត្រពីគ្នាទៅវិញទៅមក និងការរីកចម្រើនផ្ទាល់ខ្លួន ។ ខ្ញុំតែងតែប្រាប់និស្សិតនៅសាកលវិទ្យាល័យរបស់ខ្ញុំថា ប្រសិនបើខ្ញុំធ្វើអ្វីដែលប្អូនៗធ្វើ ហើយប្អូនៗធ្វើអ្វីដែលខ្ញុំធ្វើ នោះយើងលែងត្រូវការគ្នាទៀតហើយ ។ ប៉ុន្តែដោយសារតែប្អូនៗមិនធ្វើអ្វីដែលខ្ញុំធ្វើ ហើយខ្ញុំមិនធ្វើអ្វីដែលប្អូនៗធ្វើ ដូច្នោះយើងត្រូវការគ្នាទៅវិញទៅមក ។ ហើយតម្រូវការនោះនាំឲ្យយើងមករួបរួមជាមួយគ្នា ។ ការបែងចែក និងយកឈ្នះគឺជាផែនការរបស់មាសត្រូវ ដើម្បីបំផ្លាញចំណងមិត្តភាព គ្រួសារ និងសេចក្តីជំនឿ ។ មានតែព្រះអង្គសង្គ្រោះទេដែលជាអង្គបង្រួបបង្រួម ។
យើងគឺជារបស់ផងទ្រង់
ពរជ័យមួយក្នុងចំណោមពរជ័យដែលបានសន្យានៃ « ការរួមគ្នាតែមួយ » គឺជាអារម្មណ៍នៃភាពមានចំណែកដ៏មានឥទ្ធិពល ។ អែលឌើរ ឃ្វីនថិន អិល ឃុក បានបង្រៀនថា « ខ្លឹមសារនៃការចូលរួមដ៏ពិតគឺ ការរួមគ្នាតែមួយនឹងព្រះគ្រីស្ទ » ។
ក្នុងដំណើរទស្សនកិច្ចថ្មីៗមួយជាមួយគ្រួសាររបស់ខ្ញុំទៅកាន់ប្រទេសអាហ្រ្វិកខាងលិចនៃប្រទេសហ្គាណា ខ្ញុំបានចាប់អារម្មណ៍ជាមួយនឹងទំនៀមទម្លាប់ក្នុងស្រុកមួយ ។ នៅពេលមកដល់ព្រះវិហារ ឬផ្ទះ យើងត្រូវបានស្វាគមន៍ដោយពាក្យថា « សូមស្វាគមន៍អ៊ែលឌើរ បាកណឺ និងក្រុមគ្រួសារ » ។ នៅពេលដែលអាហារត្រូវបានលើកមក នោះម្ចាស់ផ្ទះនឹងប្រកាសថា « សូមអញ្ជើញអ៊ែលឌើរ បាកណឺ និងក្រុមគ្រួសារ » ។ ការស្វាគមន៍ដ៏សាមញ្ញទាំងនេះត្រូវបានធ្វើឡើងដោយមានគោលបំណង និងដោយមានចេតនា ។ សូមស្វាគមន៍អ៊ែលឌើរ បាកណឺ និងក្រុមគ្រួសារ ។ សូមអញ្ជើញអ៊ែលឌើរ បាកណឺ និងក្រុមគ្រួសារ ។
យើងដាក់សេចក្តីប្រកាសដ៏ពិសិដ្ឋស្រដៀងគ្នានេះនៅលើខ្លោងទ្វារសាលាប្រជុំរបស់យើងដូចគ្នា ។ ប៉ុន្តែស្លាកសញ្ញា សូមស្វាគមន៍ភ្ញៀវ ប៉ុណ្ណឹង គឺមិនគ្រប់គ្រាន់នោះទេ ។ តើយើងបានស្វាគមន៍យ៉ាងកក់ក្តៅទៅដល់អស់អ្នកទាំងឡាយដែលចូលមកតាមទ្វារនោះដែរឬទេ ? បងប្អូនប្រុសស្រី វាមិនគ្រប់គ្រាន់ទេដោយគ្រាន់តែអង្គុយនៅលើកៅអីក្នុងសាលាប្រជុំនោះ ។ យើងត្រូវតែធ្វើតាមការហៅរបស់ព្រះអង្គសង្គ្រោះ ដើម្បីស្ថាបនាទំនាក់ទំនងឲ្យកាន់តែខ្ពស់ជាង និងបរិសុទ្ធជាងជាមួយបុត្រាបុត្រីរបស់ព្រះទាំងអស់ ។ យើងត្រូវតែរស់នៅស្របតាមសេចក្តីជំនឿរបស់យើង ! ឪពុករបស់ខ្ញុំជាញឹកញាប់បានរំឭកខ្ញុំថាការដេកនៅក្នុងកន្លែងដាក់ឡានមិនធ្វើឲ្យអ្នកក្លាយជារថយន្តទេ ដូចគ្នាផងដែរ ការដែលគ្រាន់តែអង្គុយក្នុងព្រះវិហារនៅថ្ងៃអាទិត្យមិនធ្វើឲ្យយើងក្លាយជាគ្រិស្ទបរិស័ទល្អនោះឡើយ ។
យើងត្រូវតែរស់នៅក្នុងជីវិតរបស់យើង ដើម្បីឲ្យពិភពលោកកុំមើលឃើញយើង ប៉ុន្តែមើលឃើញទ្រង់តាមរយៈគំរូ និងសកម្មភាពរបស់យើងវិញ ។ ការណ៍នេះមិនមែនកើតឡើងតែនៅថ្ងៃអាទិត្យប៉ុណ្ណោះទេ ។ វាកើតឡើងនៅហាងលក់គ្រឿងទេស កន្លែងបញ្ចូលហ្គាស ការប្រជុំនៅសាលា ការជួបជុំគ្នាជាមួយអ្នកជិតខាង—គ្រប់ទីកន្លែងទាំងអស់ដែលសមាជិកបានទទួល និងមិនបានទទួលពិធីបុណ្យជ្រមុជទឹកនៃគ្រួសាររបស់យើងធ្វើការ និងរស់នៅ ។
ខ្ញុំថ្វាយបង្គំនៅថ្ងៃអាទិត្យជាការរំឭកមួយថា យើងត្រូវការគ្នាទៅវិញទៅមក ហើយទាំងអស់គ្នាយើងត្រូវការព្រះអង្គ ។ អំណោយ និងទេពកោសល្យដ៏ពិសេសៗរបស់យើងដែលធ្វើឲ្យយើងខុសប្លែកពីលោកិយនេះ បង្រួបបង្រួមយើងនៅក្នុងកន្លែងដ៏ពិសិដ្ឋមួយ ។ ព្រះអង្គសង្គ្រោះបានហៅឲ្យយើងយកអាសាគ្នាទៅវិញទៅមក លើកកម្ពស់គ្នាទៅវិញទៅមក និងស្អាងគ្នាទៅវិញទៅមក ។ នេះជាអ្វីដែលទ្រង់បានធ្វើនៅពេលទ្រង់បានព្យាបាលស្ត្រីម្នាក់ដែលមានជំងឺធ្លាក់ឈាមបានសម្អាតមនុស្សឃ្លង់ម្នាក់ដែលបានទូលអង្វរសុំក្តីមេត្តាពីទ្រង់បានទូន្មានដល់កម្លោះអ្នកមានម្នាក់ដែលបានទូលសួរថា តើគាត់អាចធ្វើអ្វីបន្ថែមទៀតនីកូដេមជាទីស្រឡាញ់ដែលបានដឹង ប៉ុន្តែធ្លាក់ចុះនៅក្នុងសេចក្តីជំនឿរបស់លោកនិងបានអង្គុយជាមួយស្ត្រីនៅឯអណ្តូងទឹកដែលមិនសមនឹងទំនៀមទម្លាប់នៃសម័យកាលនោះទេ ប៉ុន្តែជាអ្នកដែលព្រះអង្គបានប្រកាសប្រាប់ពីបេសកកម្មព្រះមែស៊ីរបស់ទ្រង់ ។ ការណ៍នេះសម្រាប់ខ្ញុំគឺជាសាសនាចក្រ—ជាកន្លែងនៃការប្រមូលផ្តុំ និងការស្តារឡើងវិញ កែខៃ និងផ្តោតការយកចិត្តទុកដាក់ឡើងវិញ ។ ដូចដែលប្រធាន រ័សុល អិម ណិលសុន បានបង្រៀនថា « សំណាញ់ដំណឹងល្អគឺជាសំណាញ់ដ៏ធំបំផុតនៅក្នុងពិភពលោកនេះ ។ ព្រះបានអញ្ជើញមនុស្សទាំងអស់គ្នាឲ្យមករកទ្រង់ ។… ដំណឹងល្អមានកន្លែងសម្រាប់មនុស្សគ្រប់គ្នា » ។
បងប្អូនខ្លះប្រហែលជាធ្លាប់មានបទពិសោធន៍ដែលធ្វើឲ្យបងប្អូនមានអារម្មណ៍ថា បងប្អូនមិនមានចំណែកនោះឡើយ ។ សារលិខិតរបស់ព្រះអង្គសង្រ្គោះគឺដូចគ្នាសម្រាប់ខ្ញុំ និងបងប្អូន ៖ « អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក» ។ ដំណឹងល្អរបស់ព្រះយេស៊ូវគ្រីស្ទមានអំណាចដើម្បីបង្រួបបង្រួមយើង ។ ការមកកាន់សាសនាចក្រផ្តល់ឲ្យយើងនូវសេចក្តីសង្ឃឹមសម្រាប់ថ្ងៃដ៏ល្អប្រសើរ ការសន្យាដែលថាបងប្អូនមិននៅតែម្នាក់ឯងឡើយ និងក្រុមគ្រួសារដែលត្រូវការយើងខ្លាំងដូចជាយើងត្រូវការពួកគេដែរ ។ អែលឌើរ ឌី ថត គ្រីស្តូហ្វឺសិន បានបញ្ជាក់ថា « ការមានចិត្តតែមួយនឹងព្រះវរបិតា ព្រះរាជបុត្រា និងព្រះវិញ្ញាណបរិសុទ្ធ គឺជាការគ្មានសង្ស័យចំពោះភាពមានចំណែកដ៏ខ្ពង់ខ្ពស់នេះ ។ ចំពោះអស់អ្នកទាំងឡាយណាដែលបានដើរចេញ ហើយកំពុងស្វែងរកឱកាសដើម្បីត្រឡប់មកវិញ ខ្ញុំសូមផ្តល់ជូននូវសេចក្តីពិត និងការអញ្ជើញដ៏អស់កល្បមួយ ៖ បងប្អូនមានចំណែក ។ សូមត្រឡប់មកវិញ ។ គឺដល់ពេលវលាហើយ ។
នៅក្នុងពិភពលោកដ៏ចម្រូងចម្រាស និងបែងចែកមួយនេះ ខ្ញុំសូមធ្វើទីបន្ទាល់ថា ព្រះអង្គសង្គ្រោះ ព្រះយេស៊ូវគ្រីស្ទ គឺជាអង្គបង្រួបបង្រួមដ៏អស្ចារ្យ ។ ខ្ញុំសូមអញ្ជើញយើងម្នាក់ៗឲ្យមានភាពសក្តិសមនឹងការអញ្ជើញរបស់ព្រះអង្គសង្គ្រោះដើម្បី « រួមគ្នាតែមួយ »ហើយប្រកាសយ៉ាងក្លៀវក្លាដូចដែលទ្រង់បានប្រកាសថា « អ្នករាល់គ្នាជាមិត្តរបស់យើង » ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។