ចូរឲ្យជាស្អាតចុះ
ការប្រែចិត្តប្រចាំថ្ងៃអនុញ្ញាតឲ្យយើងស្គាល់ការណែនាំរបស់ព្រះអម្ចាស់តាមរយៈព្រះវិញ្ញាណបរិសុទ្ធ ។
កាលខ្ញុំអាយុប្រហែលប្រាំឆ្នាំ ខ្ញុំបានលេងទាត់បាល់ជាមួយមិត្តភក្តិខ្ញុំនៅខាងក្រោយព្រះវិហារក្នុងភូមិតូចរបស់ខ្ញុំនៅ Côte d’Ivoire ។ ខ្ញុំចងចាំយ៉ាងច្បាស់នូវការហៅរបស់គ្រូគង្វាលប្រាប់ទៅក្រុមជំនុំរបស់គាត់ឲ្យសម្អាតសម្លៀកបំពាក់របស់ពួកគេ ដើម្បីរៀបចំខ្លួនសម្រាប់ការមកដល់របស់ព្រះអង្គសង្គ្រោះ ។ ដោយសារខ្ញុំនៅក្មេង ខ្ញុំបានទទួលយកការហៅនេះតាមន័យត្រង់ ។ ខ្ញុំបានរត់ទៅផ្ទះយ៉ាងលឿនតាមដែលខ្ញុំអាចរត់បាន ហើយបានអង្វរម្តាយខ្ញុំឲ្យបោកសម្លៀកបំពាក់ពីរបីកំប្លេរបស់ខ្ញុំដើម្បីកុំឲ្យខ្ញុំមានស្នាមប្រឡាក់ ហើយត្រៀមខ្លួនសម្រាប់ការយាងមករបស់ព្រះអង្គសង្គ្រោះនៅថ្ងៃស្អែក ។ ទោះបីជាម្តាយខ្ញុំឆ្ងល់អំពីការត្រឡប់មកវិញរបស់ព្រះអង្គសង្គ្រោះដែលជិតមកដល់ក៏ដោយ ក៏គាត់នៅតែបោកសម្លៀកបំពាក់ដ៏ល្អបំផុតរបស់ខ្ញុំដែរ ។
នៅព្រឹកស្អែក ខ្ញុំបានស្លៀកសម្លៀកបំពាក់ដែលសើមបន្តិចៗ ហើយរង់ចាំយ៉ាងអន្ទះសាចំពោះការប្រកាសអំពីការមកដល់របស់ព្រះអង្គសង្គ្រោះ ។ ពេលថ្ងៃកន្លងផុតទៅ ហើយគ្មានអ្វីកើតឡើងសោះ ខ្ញុំក៏សម្រេចចិត្តទៅសាលាប្រជុំ ។ ខ្ញុំមានការខកចិត្តយ៉ាងខ្លាំងដែលបានឃើញថាព្រះវិហារស្ងាត់ឈឹង ហើយព្រះអង្គសង្គ្រោះមិនបានយាងមកដល់ទេ ។ បងប្អូនអាចស្រមៃពីអារម្មណ៍របស់ខ្ញុំ ពេលខ្ញុំដើរយឺតៗទៅផ្ទះវិញ ។
ជាច្រើនឆ្នាំក្រោយមក នៅពេលខ្ញុំកំពុងរៀនជាមួយអ្នកផ្សព្វផ្សាយសាសនាក្នុងការរៀបចំខ្លួនដើម្បីចូលរួមជាមួយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ខ្ញុំបានអានដូចខាងក្រោម ៖ « ហើយគ្មានអ្វីដែលពុំស្អាតណាអាចចូលទៅក្នុងនគររបស់ទ្រង់បានឡើយ ដូច្នេះគ្មានអ្នកណាអាចចូលទៅក្នុងទីសម្រាករបស់ទ្រង់បានទេ លើកលែងតែអ្នកនោះ បានលាងសម្លៀកបំពាក់របស់ខ្លួនដោយនូវលោហិតរបស់យើង ពីព្រោះមកពីសេចក្ដីជំនឿរបស់គេ និងការប្រែចិត្តពីគ្រប់ទាំងអំពើបាបរបស់គេ និងការស្មោះត្រង់របស់គេរហូតដល់ទីបំផុត » ។
ការបញ្ជាក់ដែលខ្ញុំបានទទួលនៅពេលនោះ បានជួយខ្ញុំឲ្យយល់ពីសេចក្ដីពិតដ៏សំខាន់ដែលបានបង្វែរចេញពីគំនិតវ័យក្មេងរបស់ខ្ញុំជាច្រើនឆ្នាំមុន ។ សារលិខិតរបស់គ្រូគង្វាលរូបនោះគឺផ្តោតលើសារៈសំខាន់នៃភាពបរិសុទ្ធខាងវិញ្ញាណ ។ គាត់បានជំរុញក្រុមជំនុំឲ្យស្វែងរកការប្រែចិត្ត ធ្វើការផ្លាស់ប្ដូរក្នុងជីវិតពួកគេ ហើយងាកទៅរកព្រះអង្គសង្គ្រោះសម្រាប់ការប្រោសលោះ ។
ព្រះវរបិតាសួគ៌របស់យើងយល់អំពីដំណើរជីវិតរមែងស្លាប់របស់យើង និងការគេចមិនផុតពីអំពើបាបនៅក្នុងជីវិតរបស់យើង ។ ខ្ញុំមានអំណរគុណយ៉ាងខ្លាំងដែលទ្រង់បានប្រទានព្រះអង្គសង្គ្រោះដើម្បីធួនចំពោះអំពើរំលងរបស់យើង ។ តាមរយៈពលិកម្មដ៏ប្រោសលោះរបស់ព្រះអង្គសង្គ្រោះ យើងម្នាក់ៗអាចប្រែចិត្ត ហើយស្វែងរកការអភ័យទោស ហើយក្លាយជាមនុស្សស្អាតស្អំ ។ ការប្រែចិត្ត ដែលជាគោលការណ៍គ្រឹះនៃដំណឹងល្អ គឺចាំបាច់សម្រាប់ការអភិវឌ្ឍ និងភាពធន់ខាងវិញ្ញាណរបស់យើង នៅពេលយើងទប់ទល់ជាមួយឧបសគ្គក្នុងជីវិត ។
អំឡុងសន្និសីទទូទៅខែមេសា ឆ្នាំ២០២២ ប្រធាន រ័សុល អិម ណិលសុន បានអញ្ជើញសមាជិកសាសនាចក្រគ្រប់រូបឲ្យដកពិសោធន៍នូវអំណរនៃការប្រែចិត្តប្រចាំថ្ងៃ ។ លោកបានថ្លែងថា ៖
« សូមកុំខ្លាច ឬពន្យារពេលប្រែចិត្តឡើយ ។ សាតាំងវាអរសប្បាយនឹងទុក្ខវេទនារបស់បងប្អូន ។ សូមបញ្ឈប់វា ។ សូមបណ្ដេញឥទ្ធិពលរបស់វាចេញពីជីវិតបងប្អូន ! សូមចាប់ផ្ដើមនៅថ្ងៃនេះ ដើម្បីទទួលបានអំណរនៃការសម្រាតភាពខាងសាច់ឈាមចេញ ។ ព្រះអង្គសង្គ្រោះស្រឡាញ់យើងជានិច្ច ប៉ុន្ដែ ជាពិសេសនៅពេលយើងប្រែចិត្ត ។ …
« បើបងប្អូនមានអារម្មណ៍ថា បងប្អូនបានវង្វេងចេញពីផ្លូវនៃសេចក្ដីសញ្ញាទៅឆ្ងាយ ឬយូរហើយ ហើយគ្មានផ្លូវអាចត្រឡប់មកវិញនោះវាពុំត្រឹមត្រូវទេ » ។
ប្រសិនបើមានអ្វីមួយដែលបងប្អូនមិនទាន់បានប្រែចិត្តពេញលេញនៅឡើយ ខ្ញុំសូមលើកទឹកចិត្តបងប្អូនឲ្យធ្វើតាមការអំពាវនាវរបស់ប្រធាន ណិលសុន កុំឲ្យពន្យារពេលការប្រែចិត្តរបស់បងប្អូនឡើយ ។ វាអាចទាមទារភាពក្លាហានខ្លះដើម្បីចូលរួមក្នុងដំណើរការនេះ ទោះយ៉ាងណាក៏ដោយ ខ្ញុំអាចធានាចំពោះបងប្អូនថា អំណរដែលកើតចេញពីការប្រែចិត្តពិតប្រាកដគឺហួសពីការយល់ដឹង ។ តាមរយៈការប្រែចិត្ត បន្ទុកនៃកំហុសរបស់យើងត្រូវបានធ្វើឲ្យធូរស្រាល ហើយជំនួសមកវិញដោយអារម្មណ៍នៃសេចក្ដីសុខសាន្ត និងភាពស្ងប់ស្ងាត់ ។ នៅពេលយើងប្រែចិត្តដោយស្មោះ នោះយើងត្រូវបានញែកជាបរិសុទ្ធតាមរយៈព្រះលោហិតរបស់ព្រះអង្គសង្គ្រោះ ដោយបង្កើនការយល់ដឹងរបស់យើងចំពោះការបំផុសគំនិត និងព្រះចេស្ដានៃព្រះវិញ្ញាណបរិសុទ្ធ ។
ដៃគូដ៏អស់កល្បរបស់ខ្ញុំបានកើតមកដោយមានបញ្ហានៃការស្តាប់ ហើយជាលទ្ធផល គាត់ត្រូវពាក់ឧបករណ៍ជំនួយការស្តាប់ ។ ធូលី និងញើសអាចប៉ះពាល់ដល់ដំណើរការនៃឧបករណ៍ទាំងនេះ ដូច្នេះហើយរាល់ព្រឹកខ្ញុំសង្កេតមើលគាត់ឧស្សាហ៍សម្អាតបំពង់តភ្ជាប់មុនពេលពាក់ឧបករណ៍ជំនួយនោះ ។ ទម្លាប់សាមញ្ញ ប៉ុន្តែមានភាពជាប់លាប់នេះ បានលុបបំបាត់ភាពកខ្វក់ សំណើម ឬកំណកកំបោរ ដោយកែលម្អសមត្ថភាពក្នុងការស្តាប់ និងទំនាក់ទំនងរបស់គាត់ប្រកបដោយប្រសិទ្ធភាព ។ នៅពេលគាត់មិនបានធ្វើទម្លាប់ប្រចាំថ្ងៃនេះ សមត្ថភាពស្តាប់របស់គាត់ជួបនឹងការពិបាកពេញមួយថ្ងៃ ពាក្យពេចន៍ដែលនិយាយបានរសាយបាត់បន្តិចម្ដងៗ ហើយនៅទីបំផុតធ្វើឲ្យគាត់មិនអាចស្តាប់បាន ។ ដូចជាការសម្អាតឧបករណ៍ជំនួយការស្តាប់ប្រចាំថ្ងៃរបស់គាត់ ដែលអនុញ្ញាតឲ្យគាត់ឮច្បាស់ដែរ ការប្រែចិត្តប្រចាំថ្ងៃអនុញ្ញាតឲ្យយើងស្វែងយល់ពីការណែនាំរបស់ព្រះអម្ចាស់តាមរយៈព្រះវិញ្ញាណបរិសុទ្ធ ។
នៅជិតចុងបញ្ចប់នៃការងារបម្រើក្នុងព្រះជន្មរមែងស្លាប់របស់ព្រះអម្ចាស់ និងមុនពេលទ្រង់យាងទៅសួនច្បារគែតសេម៉ានី ទ្រង់បានរៀបចំពួកសិស្សរបស់ទ្រង់ដើម្បីប្រឈមមុខនឹងការសាកល្បងនាពេលខាងមុខ ។ ទ្រង់បានអះអាងនឹងពួកគេដោយមានបន្ទូល ៖« តែព្រះដ៏ជាជំនួយ គឺជាព្រះវិញ្ញាណបរិសុទ្ធ ដែលព្រះវរបិតានឹងចាត់មក ដោយនូវឈ្មោះខ្ញុំ ទ្រង់នឹងបង្រៀនអ្នករាល់គ្នា ពីគ្រប់សេចក្តីទាំងអស់ ក៏នឹងរំឭកពីគ្រប់ទាំងសេចក្តី ដែលខ្ញុំបានប្រាប់ដល់អ្នករាល់គ្នាដែរ » ។
មុខងារដ៏សំខាន់មួយរបស់ព្រះវិញ្ញាណបរិសុទ្ធ គឺដាស់តឿន ដឹកនាំ និងណែនាំបុគ្គលគ្រប់រូបដែលស្តាប់សំឡេងដ៏ស្រទន់នៅក្នុងចិត្ត ។ ដូចជាបំពង់ទំនាក់ទំនងនៃឧបករណ៍ជំនួយការស្តាប់ដែលស្ទះអាចរារាំងមុខងារត្រឹមត្រូវរបស់វា នោះទំនាក់ទំនងខាងវិញ្ញាណរបស់យើងជាមួយព្រះវរបិតាសួគ៌ក៏អាចចុះខ្សោយផងដែរ ដោយនាំទៅរកការយល់ខុសដ៏គ្រោះថ្នាក់ ឬភាពបរាជ័យក្នុងការស្តាប់តាមដំបូន្មានរបស់ទ្រង់ ។ ការមកដល់នៃអ៊ីនធឺណិតបានធ្វើឲ្យការស្វែងរកព័ត៌មានកាន់តែមានលក្ខណៈងាយស្រួលច្រើនជាងពេលមុនៗ ។ ការណ៍នេះអាចនាំយើងឲ្យងាកទៅស្វែងរកការណែនាំពីពិភពលោក ជាជាងទៅស្វែងរកការណែនាំពីព្រះ ។ ប្រធាន រ័សុល អិម ណិលសុន បានបង្រៀនថា « នៅគ្រាខាងមុខ វានឹងមិនអាចរស់រានខាងវិញ្ញាណបានឡើយ បើគ្មានព្រះចេស្ដាណែនាំ ដឹកនាំ និងលួងលោមចិត្តជាប់ជានិច្ចមកពីព្រះវិញ្ញាណបរិសុទ្ធនោះ » ។
ខ្ញុំមានអំណរគុណដែលយើងម្នាក់ៗអាចទទួលបានអំណោយទាននៃព្រះវិញ្ញាណបរិសុទ្ធនៅពេលដែលយើងទទួលពិធីបញ្ជាក់ ។ ទោះជាយ៉ាងណាក៏ដោយ ប្រធាន ដាល្លិន អេក អូក បានព្រមានថា « ពរជ័យដែលមានតាមរយៈអំណោយទាននៃព្រះវិញ្ញាណបរិសុទ្ធត្រូវបានកំណត់ដោយភាពស័ក្ដិសម [ ហើយ ] ព្រះវិញ្ញាណនៃព្រះអម្ចាស់ពុំគង់នៅក្នុងព្រះវិហារណាដែលឥតបរិសុទ្ធឡើយ » ។[ ហេលេមិន ៤:២៤ ] » ។
នៅពេលយើងជ្រើសរើសធ្វើតាមការណែនាំរបស់ពួកព្យាការី និងពួកសាវកដោយមានមនសិការ នោះសមត្ថភាពរបស់យើងក្នុងការមានព្រះវិញ្ញាណបរិសុទ្ធជាដៃគូដ៏ខ្ជាប់ខ្ជួននឹងរីកចម្រើន ។ ព្រះវិញ្ញាណបរិសុទ្ធផ្តល់នូវភាពច្បាស់លាស់ក្នុងការសម្រេចចិត្ត ដោយបំផុសគំនិត និងការចាប់អារម្មណ៍ ដែលស្របតាមឆន្ទៈរបស់ព្រះវរបិតាសួគ៌ ។ ការមានព្រះវិញ្ញាណបរិសុទ្ធជាដៃគូដ៏ខ្ជាប់ខ្ជួន គឺមានសារៈសំខាន់សម្រាប់ការរីកចម្រើនខាងវិញ្ញាណរបស់យើង ។
ថ្មីៗនេះ ខ្ញុំត្រូវបានចាត់តាំងឲ្យធ្វើជាអធិបតីក្នុងសន្និសីទស្តេកមួយនៅស្តេកខាងលិច សលត៍ លេក ហ្គ្រេនហ្គឺរ ក្នុងរដ្ឋយូថាហ៍ ។ ក្នុងអំឡុងព្រឹត្តិការណ៍នេះ ខ្ញុំបានជួបប្រធានស្តេកម្នាក់ ដែលបានអភិវឌ្ឍសមត្ថភាពរបស់គាត់ដោយឧស្សាហ៍ព្យាយាមដើម្បីស្វែងយល់ពីការបំផុសគំនិតនៃព្រះវិញ្ញាណបរិសុទ្ធតាមរយៈការរស់នៅដ៏សុចរិត និងការប្រែចិត្តប្រចាំថ្ងៃ ។ ជាផ្នែកមួយនៃការខិតខំប្រឹងប្រែងធ្វើការងារបម្រើរបស់យើង យើងបានចុះសួរសុខទុក្ខដល់គ្រួសារចំនួនបី ។ នៅជិតដល់ដំណើរសួរសុខទុក្ខចុងក្រោយរបស់យើង យើងបានឃើញថា យើងនៅសល់ប្រហែល ៣០ នាទី មុនពេលការណាត់ជួបបន្ទាប់ទៀតរបស់យើង ។ នៅពេលយើងធ្វើដំណើរត្រឡប់ទៅមជ្ឈមណ្ឌលស្តេក ប្រធាន ឆេសនុត បានទទួលការបំផុសគំនិតដើម្បីទៅជួបគ្រួសារមួយបន្ថែមទៀត ។ យើងទាំងពីរបានយល់ព្រមធ្វើតាមការបំផុសគំនិតនេះ ។
យើងបានទៅសួរសុខទុក្ខគ្រួសារ ចូនស៍ ហើយបានឃើញថា បងស្រី ចូនស៍ បានឈឺសម្រាកនៅលើគ្រែ ។ វាច្បាស់ណាស់ថា គាត់ត្រូវការពរជ័យបព្វជិតភាព ។ ដោយមានការអនុញ្ញាតពីគាត់ យើងបានប្រសិទ្ធពរឲ្យគាត់ ។ នៅពេលយើងរៀបចំចេញមកវិញ បងស្រី ចូនស៍ បានសួរថាតើយើងដឹងថាគាត់ត្រូវការពរជ័យបន្ទាន់ដោយរបៀបណា ។ តាមពិតគឺ យើង មិនបានដឹងទេ ។ ប៉ុន្តែ ព្រះវរបិតាសួគ៌ ដែលដឹងពីសេចក្ដីត្រូវការរបស់គាត់ បាន ជ្រាបដឹង ហើយបានបំផុសគំនិតប្រធាន ឆេសនុត ឲ្យទៅសួរសុខទុក្ខគាត់ ។ នៅពេលយើងទទួលយកការណែនាំពីសំឡេងតូចរហៀង នោះយើងកាន់តែមានភាពប្រសើរឡើងក្នុងការធ្វើការងារបម្រើកាន់តែមានប្រសិទ្ធភាពដល់អ្នកដែលត្រូវការជំនួយ ។
ខ្ញុំថ្លែងទីបន្ទាល់អំពីព្រះវរបិតាសួគ៌ដែលមានព្រះទ័យសប្បុរស និងគួរឲ្យស្រឡាញ់។ ព្រះយេស៊ូវគ្រីស្ទ គឺជាព្រះអង្គសង្គ្រោះ និងជាព្រះប្រោសលោះរបស់មនុស្សលោក ។ ខ្ញុំថ្លែងទីបន្ទាល់ថា ដង្វាយធួននៃព្រះយេស៊ូវគ្រីស្ទគឺពិត ហើយថា នៅពេលយើងរៀនធ្វើតាមការណែនាំនៃព្រះវិញ្ញាណបរិសុទ្ធ ទ្រង់នឹងដឹកនាំយើងឲ្យប្រែចិត្ត ហើយប្រើអំណាចនៃដង្វាយធួនរបស់ព្រះអង្គសង្គ្រោះនៅក្នុងជីវិតរបស់យើង ។ ប្រធាន រ័សុល អិម ណិលសុន គឺជាព្យាការីដ៏ពិត និងនៅរស់របស់ព្រះអម្ចាស់ ដែលមានកូនសោបព្វជិតភាពទាំងអស់នៅលើផែនដីសព្វថ្ងៃ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។