ព្រះបន្ទូលរបស់ព្រះគ្រីស្ទ និងព្រះវិញ្ញាណបរិសុទ្ធនឹងដឹកនាំយើងទៅរកសេចក្តីពិត
ការដឹងពីផែនការដ៏អស្ចារ្យនេះនឹងជួយយើងឲ្យដឹងថា យើងជាបុត្រាបុត្រីរបស់ព្រះ ហើយយើងអាចប្រែក្លាយដូចជាទ្រង់ ។
ព្រះជាព្រះវរបិតារបស់យើងដែលគង់នៅស្ថានសួគ៌ ។ យើងជាបុត្រាបុត្រីខាងវិញ្ញាណរបស់ទ្រង់ ហើយយើងត្រូវបានបង្កើតឡើងតាមរូបអង្គទ្រង់ ។ ដូច្នេះហើយ យើងម្នាក់ៗជាបុត្ររបស់ព្រះដែលមាននូវសក្តានុពលដ៏ទេវភាពដើម្បីក្លាយដូចជាទ្រង់ ។
យើងបានរស់នៅជាមួយនឹងទ្រង់ជាវិញ្ញាណ មុនពេលយើងមកកាន់ផែនដីនេះ ។ ព្រះវរបិតាសួគ៌ ដែលជាបិតាខាងវិញ្ញាណរបស់យើង ស្រឡាញ់យើង ចង់បានអ្វីដែលល្អបំផុតសម្រាប់យើង ហើយបានរៀបចំផែនការមួយសម្រាប់យើង ដើម្បីទទួលបានពរជ័យដ៏ធំបំផុតរបស់ទ្រង់ ដែលជាអមតភាព និងជីវិតដ៏នៅអស់កល្បជានិច្ច ។ ស្រប់តាមផែនការ យើងជាបុត្រខាងវិញ្ញាណនឹងត្រូវបានផ្តល់ឲ្យនូវសិទ្ធិជ្រើសរើស ដើម្បីរើសយកផែនការរបស់ទ្រង់ ។ តាមរយៈការមកកាន់ផែនដី នោះយើងនឹងត្រូវចាកចេញពីវត្តមានរបស់ព្រះ ភ្លេចជីវិតមុនផែនដីរបស់យើង ទទួលរូបកាយសាច់ និងឆ្អឹង ទទួលបាននូវបទពិសោធន៍ផ្ទាល់ខ្លួន និងអភិវឌ្ឍសេចក្តីជំនឿ ។ ជាមួយនឹងរូបកាយសាច់ និងឆ្អឹងរបស់យើង នោះយើងនឹងចុះចាញ់នឹងការល្បួង ក្លាយជាមនុស្សមិនស្អាតស្អំ ហើយនៅឆ្ងាយពីព្រះ ហើយមិនអាចត្រឡប់ទៅទីវត្តមានដ៏បរិសុទ្ធរបស់ទ្រង់វិញបានឡើយ ។ ដោយសារតែសេចក្តីស្រឡាញ់ដ៏គ្មានព្រំដែនរបស់ព្រះវរបិតាសួគ៌ចំពោះយើង នោះទ្រង់បានបញ្ជូនព្រះរាជបុត្រាច្បងរបស់ទ្រង់ ព្រះយេស៊ូវគ្រីស្ទ ឲ្យធ្វើជាព្រះអង្គសង្រ្គោះរបស់យើង ។ តាមរយៈពលិកម្ម ដង្វាយធួនរបស់ទ្រង់ ព្រះយេស៊ូវគ្រីស្ទបានធ្វើឲ្យយើងអាចទទួលបានការប្រោសលោះពីអំពើបាបរបស់យើង ហើយបានរស់ឡើងវិញ ហើយទទួលបានជីវិតដ៏អស់កល្បជានិច្ច ។
ខ្ញុំមានអំណរគុណជាអតិបរិមាចំពោះសេចក្តីពិតដ៏រុងរឿងទាំងនេះ—ជាអ្វីដែលយើងហៅថា ផែនការនៃសេចក្តីសង្គ្រោះរបស់ព្រះវរបិតា ផែនការនៃសេចក្តីមេត្តាករុណារបស់ទ្រង់ ឬផែនការនៃសុភមង្គលដ៏មហិមារបស់ទ្រង់ ។ ការរៀនពីសេចក្តីពិតសំខាន់ៗទាំងនេះបានជួយខ្ញុំឱ្យស្គាល់អត្តសញ្ញាណពិតរបស់ខ្ញុំ និងពរជ័យដ៏មហិមាដែលព្រះបានរៀបចំទុកសម្រាប់យើងនូវភាពតម្កើងឡើង និងជីវិតដ៏អស់កល្បជានិច្ច ។ ព្យាការីនីហ្វៃបានបង្រៀនយើងពីរបៀប ៖ « ហេតុដូច្នោះហើយ … សូមទទួលទាននូវព្រះបន្ទូលទាំងឡាយនៃព្រះគ្រីស្ទ ដ្បិតមើលចុះ ព្រះបន្ទូលទាំងឡាយនៃព្រះគ្រីស្ទ នឹងប្រាប់ដល់អ្នកនូវគ្រប់អ្វីទាំងអស់ដែលអ្នកត្រូវធ្វើ » ។ លោកបានបន្ថែមទៀតថា « បើសិនជាអ្នករាល់គ្នានឹងចូលទៅតាមផ្លូវនោះ ហើយទទួលព្រះវិញ្ញាណបរិសុទ្ធ នោះព្រះវិញ្ញាណបរិសុទ្ធនឹងបង្ហាញដល់អ្នកនូវគ្រប់អ្វីទាំងអស់ ដែលអ្នកត្រូវធ្វើ » ។ ថ្ងៃនេះ ខ្ញុំសូមចែកចាយពីរបៀបដែលព្រះបន្ទូលនៃព្រះគ្រីស្ទ និងព្រះវិញ្ញាណបរិសុទ្ធបានជួយខ្ញុំស្វែងរកសេចក្តីពិតសំខាន់ៗ ដែលបានផ្តល់នូវសេចក្តីសុខសាន្តទាំងនេះកាលពីនៅក្នុងវ័យជំទង់របស់ខ្ញុំ ។
ព្រះបន្ទូលទាំងឡាយនៃព្រះគ្រីស្ទ នឹងប្រាប់ដល់អ្នកនូវគ្រប់អ្វីទាំងអស់ដែលអ្នកត្រូវធ្វើ
ដូចដែលនីហ្វៃបានថ្លែងនៅដើមខគម្ពីរនៃគម្ពីរនីហ្វៃទី១ ខ្ញុំ នីហ្វៃ ដោយបាន « កើតមកពីឪពុកម្ដាយល្អ » ផងដែរ ។ ខ្ញុំបានធំឡើងនៅទីក្រុងណាហ្គាណូ ប្រទេសជប៉ុន នៅក្នុងផ្ទះដែលលើកទឹកចិត្តយ៉ាងខ្លាំងឲ្យមានភាពស្មោះត្រង់ ឧស្សាហ៍ព្យាយាម និងរាបសា និងការអនុវត្តយ៉ាងតឹងរឹងក្នុងការគោរពប្រតិបត្តិតាមទំនៀមទម្លាប់ពីបុរាណ ។ ឪពុករបស់ខ្ញុំជាមនុស្សដែលគោរពសាសនាខ្លាំងណាស់ ។ គាត់បានអធិស្ឋាននៅចំពោះមុខអាសនៈព្រះស៊ីនតូ និងព្រះពុទ្ឋជារៀងរាល់ព្រឹក និងរៀងរាល់យប់ ។ ថ្វីបើខ្ញុំមិនដឹងថាគាត់កំពុងអធិស្ឋានទៅកាន់នរណា និងតើគាត់កំពុងអធិស្ឋានសម្រាប់អ្វី តែខ្ញុំជឿថា គាត់អធិស្ឋានដល់អំណាចដែលមើលមិនឃើញមួយចំនួន ឬអាចជាព្រះដែលនឹង « មានឫទ្ធានុភាពក្នុងការសង្គ្រោះ » ឬជួយយើង បើយើងអធិស្ឋានដោយស្មោះ ។
ដូចក្មេងវ័យជំទង់ផ្សេងទៀត ខ្ញុំបានជួបប្រទះការលំបាកជាច្រើន ។ ខ្ញុំបានតស៊ូដោយគិតថាជីវិតមិនយុត្តិធម៌ទេ ហើយមានរឿងល្អនិងរឿងអាក្រក់ជាច្រើន ។ ខ្ញុំមានអារម្មណ៍ថាបានបោះបង់ ដោយមិនមានអារម្មណ៍នៃការដឹកនាំក្នុងជីវិតរបស់ខ្ញុំ ។ ជីវិតហាក់ដូចជាមិនយូរប៉ុន្មានទេ ពីព្រោះវានឹងបញ្ចប់នៅពេលដែលខ្ញុំស្លាប់ ។ ជីវិតដែលគ្មានចំណេះដឹងពីផែនការនៃសេចក្តីសង្រ្គោះ គឺច្របូកច្របល់ណាស់ ។
មិនយូរប៉ុន្មាន ខ្ញុំបានចាប់ផ្តើមរៀនភាសាអង់គ្លេសនៅអនុវិទ្យាល័យ សិស្សទាំងអស់នៅក្នុងសាលារបស់យើងទទួលបានព្រះគម្ពីរសញ្ញាថ្មីមួយច្បាប់ ។ ទោះបីជាយើងទើបតែចាប់ផ្តើមការសិក្សាភាសាអង់គ្លេសរបស់យើងក៏ដោយ គ្រូបង្រៀនរបស់យើងបានប្រាប់យើងថា យើងគួរតែសិក្សាភាសាអង់គ្លេសដោយការអានវា ។ ខ្ញុំបានបើកព្រះគម្ពីរនោះ ហើយពិនិត្យមើលមាតិការបស់វា ។ ពាក្យទាំងនោះនៅក្នុងព្រះគម្ពីរសញ្ញាថ្មី គឺពិបាកខ្លាំងណាស់សម្រាប់ខ្ញុំ ។ ពាក្យទាំងនោះជាភាសាជប៉ុន គឺពិបាកដូចគ្នា ។ ទោះជាយ៉ាងណា ខ្ញុំបានចាប់អារម្មណ៍ទៅលើបញ្ជីនៃសេចក្តីថ្លែងការណ៏ និងសំណួរនៃព្រលឹងដែលបានដាក់បញ្ចូលពីមុនអត្ថបទព្រះគម្ពីរនៅក្នុងព្រះគម្ពីរប៊ីប គីឌាន—សំណួរអំពីអារម្មណ៍ឯកោ ភាពខ្វះទំនុកចិត្ត ភាពច្របូកច្របល់ ការប្រឈមមុខនឹងការសាកល្បងក្នុងជីវិត ។ល ។ ចំណុចនីមួយៗនៅក្នុងបញ្ជីភ្ជាប់មកនូវឯកសារយោងទៅរកខគម្ពីរ និងទំព័រទាំងឡាយនៅក្នុងព្រះគម្ពីរសញ្ញាថ្មី ។ ខ្ញុំបានចាប់អារម្មណ៍ជាពិសេសទៅលើសេចក្តីថ្លែងការណ៏ដែលថា « នៅពេលដែលអ្នកអស់កម្លាំង » ។ សេចក្តីយោងនោះបាននាំខ្ញុំបើកទៅ ម៉ាថាយ ១១:២៨–៣០ ដែលព្រះយេស៊ូវបានមានបន្ទូលទៅកាន់សិស្សរបស់ទ្រង់ថា ៖
« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។
« ចូរទទួលនឹមខ្ញុំ ហើយរៀននឹងខ្ញុំចុះ ដ្បិតខ្ញុំស្លូត ហើយមានចិត្តសុភាព នោះអ្នករាល់គ្នានឹងបានសេចក្តីសម្រាកដល់ព្រលឹង ។
« ពីព្រោះនឹមខ្ញុំងាយទេ ហើយបន្ទុកខ្ញុំក៏ស្រាល » ។
នេះជាលើកដំបូងដែលខ្ញុំចាំថាបានអានព្រះបន្ទូលរបស់ព្រះយេស៊ូវគ្រីស្ទ ។ បើទោះបីជាខ្ញុំមិនយល់ពាក្យទាំងអស់ដែលទ្រង់បានមានព្រះបន្ទូលក្តី ក៏ព្រះបន្ទូលរបស់ទ្រង់បានលួងលោមខ្ញុំ លើកព្រលឹងរបស់ខ្ញុំ និងបានផ្តល់ឲ្យខ្ញុំនូវសេចក្តីសង្ឃឹមផងដែរ ។ នៅពេលខ្ញុំកាន់តែអានព្រះបន្ទូលរបស់ទ្រង់ នោះខ្ញុំកាន់តែមានអារម្មណ៍ថាខ្ញុំគួរតែពិសោធនូវគុណធម៌នៃព្រះបន្ទូលរបស់ទ្រង់ ដែលខ្ញុំពុំដែលធ្លាប់មានអារម្មណ៍ដូចថ្ងៃនោះទេ ។ ខ្ញុំមានអារម្មណ៍ថា ខ្ញុំទទួលបានសេចក្តីស្រឡាញ់ ។ ខ្ញុំមានអារម្មណ៍ថា ព្រះយេស៊ូវគ្រីស្ទគឺជាអង្គដែលខ្ញុំស្គាល់ ។
នៅពេលដែលខ្ញុំបានបន្តការសិក្សា នោះខ្ញុំហាក់ដូចជាមានអារម្មណ៍ថាទ្រង់បានមានព្រះបន្ទូលផ្ទាល់មកកាន់ខ្ញុំនៅពេលដែលទ្រង់បានមានបន្ទូលថា « មានពរហើយ អស់អ្នកដែលស្រេកឃ្លាននូវសេចក្តីសុចរិត ដ្បិតអ្នកទាំងនោះនឹងបានឆ្អែត »
ព្រះបន្ទូលរបស់ទ្រង់បានបំពេញដួងចិត្តរបស់ខ្ញុំ ទោះបីជាពេលនោះខ្ញុំមិនអាចរៀបរាប់ពីអារម្មណ៍របស់ខ្ញុំបានល្អឡើយ ។ បើទោះបីជាព្រះយេស៊ូវគ្រីស្ទបានមានព្រះជន្មជាច្រើនសតវត្សរ៏មុននៅលើទឹកដីមួយដែលខ្ញុំមិនធ្លាប់ស្គាល់ក៏ដោយ ក៏ខ្ញុំគិតថាខ្ញុំអាចទុកចិត្តលើព្រះបន្ទូលរបស់ទ្រង់ដោយអស់ពីដួងចិត្តរបស់ខ្ញុំបានផងដែរ ។ ខ្ញុំសង្ឃឹមថានៅថ្ងៃមួយនាពេលអនាគត ខ្ញុំអាចរៀនអំពីព្រះយេស៊ូវគ្រីស្ទថែមទៀត ។
ព្រះវិញ្ញាណបរិសុទ្ធនឹងបង្ហាញដល់បងប្អូន នូវគ្រប់អ្វីទាំងអស់ដែលបងប្អូនត្រូវធ្វើ
ថ្ងៃមួយនោះបានមកដល់ តែប៉ុន្មានឆ្នាំក្រោយមកប៉ុណ្ណោះ ។ ខ្ញុំបានជួបនឹងអ្នកផ្សព្វផ្សាយសាសនាពេញម៉ោងវ័យក្មេងដ៏ឧស្សាហ៍ព្យាយាម របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ហើយមិនយូរប៉ុន្មាន ខ្ញុំបានជួបពួកបរិសុទ្ធថ្ងៃចុងក្រោយមួយក្រុមតូចដែលមានចិត្តសប្បុរស និងអំណរ ក្នុងការខិតខំធ្វើតាមព្រះយេស៊ូវគ្រីស្ទ ។ បើទោះបីជាខ្ញុំត្រូវចំណាយពេលមួយរយៈដើម្បីជឿទុកចិត្តលើពួកគេយ៉ាងពេញលេញក៏ដោយ ខ្ញុំបានចាប់ផ្តើមសម្គាល់ឃើញនៅក្នុងដំណឹងល្អដែលបានស្តារឡើងវិញមាននូវអ្វីដែលខ្ញុំប៉ងចង់បាននៅពេលខ្ញុំរៀនព្រះគម្ពីរសញ្ញាថ្មី—ព្រះបន្ទូលរបស់ព្រះគ្រីស្ទ និងសេចក្តីសង្ឃឹម និងសេចក្តីសុខសាន្តដែលមកពីពួកគេ ។
បទពិសោធន៍ដ៏ពិសិដ្ឋជាពិសេសមួយ គឺនៅពេលដែលពួកអ្នកផ្សព្វផ្សាយសាសនាបង្រៀនខ្ញុំឲ្យអធិស្ឋាន ។ ខ្ញុំបានរៀនថា យើងគួរតែនិយាយទៅកាន់ព្រះដោយហៅព្រះនាមរបស់ទ្រង់ ។ នៅពេលយើងអធិស្ឋាន យើងគួរតែនិយាយចេញពីបេះដូងរបស់យើង បង្ហាញការដឹងគុណរបស់យើង និងចែកចាយសេចក្តីសង្ឃឹម និងបំណងប្រាថ្នារបស់យើង ។ នៅពេលដែលយើងបាននិយាយនូវអ្វីទាំងអស់ដែលយើងចង់និយាយ នោះយើងបញ្ចប់ការអធិស្ឋានរបស់យើងដោយនិយាយថា « នៅក្នុងព្រះនាមនៃព្រះយេស៊ូវគ្រីស្ទ អាម៉ែន » ។ យើងធ្វើដូចនេះដោយសារតែព្រះយេស៊ូវបានដាក់បញ្ញត្តិ ឲ្យយើងអធិស្ឋាននៅក្នុងព្រះនាមរបស់ទ្រង់ ។ ការអធិស្ឋានទៅកាន់ព្រះវរបិតាសួគ៌បានជួយខ្ញុំឲ្យដឹងថា ទ្រង់ជានរណា និងទំនាក់ទំនងរបស់ខ្ញុំជាមួយនឹងទ្រង់—ថាខ្ញុំជាបុត្រាខាងវិញ្ញាណជាទីស្រឡាញ់របស់ទ្រង់ ។ ខ្ញុំបានរៀនថា ដោយសារតែព្រះវរបិតាសួគ៌ស្គាល់ និងស្រឡាញ់ខ្ញុំ នោះទ្រង់នឹងមានបន្ទូលមកកាន់ខ្ញុំដោយផ្ទាល់ ពិសេស និងតាមវិធីដែលខ្ញុំយល់តាមរយៈព្រះវិញ្ញាណបរិសុទ្ធ ។
មានពេលមួយ នៅពេលខ្ញុំមិនទាន់ស្គាល់ព្រះវិញ្ញាណបរិសុទ្ធច្បាស់នៅឡើយ ។ ខ្ញុំបានយល់ច្រឡំ ដោយគិតថាអ្វីដែលខ្ញុំត្រូវធ្វើ គឺត្រូវធ្វើតាមជំហាននៃការអធិស្ឋាន ហើយអ្វីមួយដែលអស្ចារ្យនឹងកើតឡើង ។ ថ្ងៃមួយ ក្នុងអំឡុងពេលរៀនជាមួយពួកអ្នកផ្សព្វផ្សាយសាសនា ខ្ញុំបានដើរចេញពីមេរៀនដើម្បីឈប់សម្រាកបន្តិច ។ ខ្ញុំនៅតែភាន់ច្រឡំអំពីអ្វីដែលខ្ញុំគួរធ្វើជាមួយជីវិតរបស់ខ្ញុំ ថាតើដំណឹងល្អដែលបានស្តារឡើងវិញរបស់ព្រះយេស៊ូវគ្រីស្ទពិតឬទេ ។
ពេលខ្ញុំហៀបនឹងត្រឡប់ទៅកាន់បន្ទប់ដែលពួកអ្នកផ្សព្វផ្សាយសាសនាកំពុងរង់ចាំ ខ្ញុំបានឮសំឡេងអ្នកផ្សព្វផ្សាយសាសនាម្នាក់។ ខ្ញុំបានឮឈ្មោះរបស់ខ្ញុំ ។ ដោយមិនបានបើកទ្វារ ខ្ញុំបានស្តាប់សំឡេងនោះតាមទ្វារពីខាងក្រៅ ។ ខ្ញុំបានស្រឡាំងកាំង ។ ពួកគេកំពុងអធិស្ឋានទៅកាន់ព្រះវរបិតាសួគ៌ ។ អ្នកផ្សព្វផ្សាយសាសនាដែលពោលការអធិស្ឋានកំពុងទូលអង្វរដល់ព្រះ ថាទ្រង់នឹងស្តាប់ឮការអធិស្ឋានរបស់ខ្ញុំ ។ ទោះបីជាភាសាជប៉ុនរបស់គាត់មិនសូវស្ទាត់ជំនាញក៏ដោយ ការស្តាប់ឮការអធិស្ឋានដោយស្មោះត្រង់របស់គាត់បានធ្វើឲ្យដួងចិត្តរបស់ខ្ញុំទន់ ។ ខ្ញុំឆ្ងល់ថា ហេតុអ្វីបានជាពួកគេយកចិត្តទុកដាក់នឹងខ្ញុំអ្វីម្ល៉េះ ។ បន្ទាប់មក ខ្ញុំបានដឹងថាការអធិស្ឋានរបស់ពួកគេឲ្យខ្ញុំ គឺជាការបង្ហាញសេចក្តីស្រឡាញ់របស់ព្រះវរបិតាសួគ៌ និងព្រះអង្គសង្គ្រោះចំពោះខ្ញុំ ។ សេចក្តីស្រឡាញ់នោះបានផ្តល់ឲ្យខ្ញុំនូវសេចក្តីសង្ឃឹម ហើយបន្ទាប់មកខ្ញុំបានទូលសួរព្រះដោយស្មោះអស់ពីចិត្ត ដោយមានសេចក្ដីជំនឿ ។ ពេលខ្ញុំបានធ្វើដូច្នោះ ខ្ញុំបានទទួលអារម្មណ៍នៃអំណរ និងភាពសុខសាន្តថា ខ្ញុំពិតជាបុត្ររបស់ព្រះ ហើយថាខ្ញុំមានសក្តានុពល និងជោគវាសនាដ៏ទេវភាព ។ ផែនការនៃសេចក្តីសង្គ្រោះបានជ្រួតជ្រាបពេញក្នុងបេះដូងរបស់ខ្ញុំ ។
ប្រធាន រ័សុល អិម ណិលសុន បានមានប្រសាសន៍ថា « របៀបដែលប្អូនគិតអំពីខ្លួនឯងថាជានរណា … អាចប៉ះពាល់ … រាល់ការសម្រេចចិត្តដែលប្អូននឹងធ្វើ » ។ រឿងនេះពិតណាស់ចំពោះខ្ញុំ ។ ការសម្រេចចិត្តធ្វើតាមព្រះអង្គសង្គ្រោះ ព្រះយេស៊ូវគ្រីស្ទ ដោយទទួលពិធីបុណ្យជ្រមុជទឹក និងទទួលអំណោយនៃព្រះវិញ្ញាណបរិសុទ្ធ បានប្រទានពរដល់ជីវិតរបស់ខ្ញុំច្រើនជាងអ្វីដែលខ្ញុំធ្លាប់គិត ។ នៅពេលដែលយើងចូលទៅក្នុងសេចក្តីសញ្ញានៃពិធីបុណ្យជ្រមុជទឹកជាមួយនឹងព្រះ នោះយើងសន្យាថាយើងនឹងព្រមលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ កាន់តាមព្រះបញ្ញត្តិទាំងឡាយរបស់ព្រះ ហើយបម្រើទ្រង់អស់មួយជីវិតរបស់យើង ។ ជាការតបស្នងមកវិញ ព្រះវរបិតាសួគ៌របស់យើងសន្យានឹងយើងថា យើងអាចបានព្រះវិញ្ញាណរបស់ទ្រង់ គង់នៅជាមួយនឹងពួកគេជាដរាប—ជាការដឹកនាំមកពីព្រះវិញ្ញាណបរិសុទ្ធដ៏ខ្ជាប់ខ្ជួន ។
ខ្ញុំសូមអញ្ជើញបងប្អូនឲ្យមានសេចក្តីជំនឿលើសារលិខិតដែលនីហ្វៃបានបង្រៀនយើងថា—ព្រះបន្ទូលទាំងឡាយរបស់ព្រះគ្រីស្ទ និងព្រះវិញ្ញាណបរិសុទ្ធ នឹងប្រាប់ដល់បងប្អូន « នូវគ្រប់អ្វីទាំងអស់ដែល[ បងប្អូន ]ត្រូវធ្វើ » ។ អ្វីៗទាំងអស់ ! នេះគឺជាអំណោយទានដ៏អស្ចារ្យពីព្រះ ។
បងប្អូនប្រុសស្រី ខ្ញុំមានអំណរគុណចំពោះផែនការនៃសេចក្តីសង្រ្គោះរបស់ព្រះវរបិតាសួគ៌របស់យើង ។ ដោយសារតែទ្រង់ស្រឡាញ់យើង នោះទ្រង់បានរៀបចំផ្លូវដើម្បីត្រឡប់ទៅកាន់ទីវត្តមានរបស់ទ្រង់វិញ តាមរយៈព្រះរាជបុត្រាបង្កើតតែមួយគត់របស់ទ្រង់ គឺព្រះយេស៊ូវគ្រីស្ទ ។ ការដឹងពីផែនការដ៏អស្ចារ្យនេះនឹងជួយយើងឲ្យដឹងថា យើងជាបុត្រាបុត្រីរបស់ព្រះ ហើយយើងអាចប្រែក្លាយដូចជាទ្រង់ ។ ខ្ញុំមានអំណរគុណចំពោះសេចក្តីពិតដ៏សំខាន់នេះ ។ ខ្ញុំសូមថ្លែងទីបន្ទាល់របស់ខ្ញុំថា ព្រះបន្ទូលរបស់ព្រះយេស៊ូវគ្រីស្ទ និងព្រះវិញ្ញាណបរិសុទ្ធ នឹងដឹកនាំយើងដើម្បីទទួលបានជីវិតដ៏អស់កល្បជានិច្ច ។ ខ្ញុំដឹងថា អ្វីៗទាំងអស់នេះជាការពិត ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។