ព្រះអម្ចាស់ព្រះយេស៊ូវគ្រីស្ទនឹងយាងមកម្ដងទៀត

ដោយប្រធាន រ័សុល អិម ណិលសុន

ប្រធានសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ

ឥឡូវនេះគឺជាពេលវេលាសម្រាប់បងប្អូន និងខ្ញុំ ដើម្បីរៀបចំខ្លួនសម្រាប់ការយាងមកជាលើកទីពីររបស់ព្រះអម្ចាស់ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។

បងប្អូនប្រុសស្រីជាទីស្រឡាញ់ ខ្ញុំមានអំណរគុណដែលព្រះអម្ចាស់បានប្រទានពរឲ្យខ្ញុំនិយាយទៅកាន់បងប្អូន ។

ក្នុងសន្និសីទនេះ ព្រះអម្ចាស់មានព្រះបន្ទូលមកយើងតាមរយៈពួកអ្នកបម្រើទ្រង់ ។ ខ្ញុំលើកទឹកចិត្តឲ្យបងប្អូនសិក្សាសារលិខិតរបស់ពួកលោក ។ ចូរប្រើសារលិខិតទាំងនោះដើម្បីដឹងថាអ្វីពិត និងអ្វីមិនពិត អំឡុងពេលប្រាំមួយខែខាងមុខនេះ ។

ការអភិរក្ស និងការជួសជុលព្រះវិហារបរិសុទ្ធ សលត៍ លេក និងតំបន់ផ្សេងៗទៀតនៅវិសាលដ្ឋានព្រះវិហារបរិសុទ្ធ បានដំណើរការជិតប្រាំឆ្នាំមកហើយ ។ តាមការប៉ាន់ស្មានបច្ចុប្បន្នបង្ហាញថា កិច្ចការនេះនឹងបញ្ចប់នៅចុងឆ្នាំ២០២៦ ។ យើងមានអំណរគុណចំពោះអស់អ្នកដែលកំពុងធ្វើការលើគម្រោងដ៏ធំនេះ ។

អំឡុងពេលប្រាំមួយខែចុងក្រោយនេះ យើងបានឧទ្ទិសឆ្លង ឬឧទ្ទិសឆ្លងព្រះវិហារបរិសុទ្ធឡើងវិញចំនួនប្រាំបួននៅក្នុងប្រទេសចំនួនប្រាំ ។ ចន្លោះពីពេលនេះទៅដល់ចុងឆ្នាំ យើងនឹងឧទ្ទិសឆ្លងព្រះវិហារបរិសុទ្ធចំនួនប្រាំទៀត ។

ថ្ងៃនេះ យើងរីករាយដើម្បីប្រកាសនូវគម្រោងសាងសង់ព្រះវិហារបរិសុទ្ធចំនួន ១៧ បន្ថែមទៀត ។ សូមស្តាប់ដោយមានគារវភាព នៅពេលដែលខ្ញុំប្រកាសទីតាំងទាំងនោះ ។

អ៊ូឈីតាន់ ដឺ ហ្សារ៉ាហ្គូស្សា ម៉ិកស៊ិក
សាន់តា អេណា អែលសាវ៉ាឌ័រ
មែលដឺលីន កូឡុំបៀ
សាន់ត្យាហ្គោ សាធារណរដ្ឋ ដូមីនីក
ព័រតូម៉ុង ឈីលី
ឌុយប្លីន អៀរឡង់
មីឡាន អ៊ីតាលី
អាប៊ូចា នីហ្សេរីយ៉ា
កំប៉ាឡា អ៊ូហ្គង់ដា
ម៉ាពុយតូ ម៉ូសំប៊ិក
ខូអឺដាឡេន អៃដាហូ
ឃ្វីន ឃ្រីក អេរីហ្សូណា
អេលប៉ាសូ តិចសាស់
ហាន់វីល អាឡាបាម៉ា
មីលវ៉ូគី វីនស្កុនស៊ីន
សាំម៊ីត ញូវ ជើស៊ី
ប្រាយស៍ យូថាហ៍

បងប្អូនប្រុសស្រីជាទីស្រឡាញ់របស់ខ្ញុំ តើបងប្អូនមើលឃើញអ្វីដែលកំពុងកើតឡើងនៅចំពោះមុខយើងដែរឬទេ ? ខ្ញុំសូមអធិស្ឋានកុំឲ្យយើងខកខាននូវភាពដ៏អស្ចារ្យនៃគ្រានេះ ! ព្រះអម្ចាស់ពិតជាកំពុងពន្លឿនកិច្ចការទ្រង់ ។

ហេតុអ្វីយើងកំពុងសាងសង់ព្រះវិហារបរិសុទ្ធក្នុងល្បឿនដែលមិនធ្លាប់មានពីមុនមកបែបនេះ ? ហេតុអ្វី ? ព្រោះព្រះអម្ចាស់បានបញ្ជាយើងឲ្យធ្វើដូច្នោះ ។ ពរជ័យនៃព្រះវិហារបរិសុទ្ធជួយប្រមូលសាសន៍អ៊ីស្រាអែលនៅទាំងសងខាងនៃវាំងនន ។ ពរជ័យទាំងនេះក៏ជួយរៀបចំមនុស្សដែលនឹងជួយរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់ផងដែរ !

រូបភាព

ការយាងមកជាលើកទីពីររបស់ព្រះអង្គសង្គ្រោះ

ដូចជាព្យាការីអេសាយបានព្យាករ ព្រមទាំងបានរំឭកនៅក្នុងបទចម្រៀងរបស់ ហេនឌែល ដែលមានចំណងជើងថា ព្រះមែស៊ី ជាពេលដែលព្រះយេស៊ូវគ្រីស្ទត្រឡប់មកវិញ « នោះសិរីល្អនៃព្រះយេហូវ៉ានឹងបើកសម្ដែង ហើយគ្រប់មនុស្សនឹងបានឃើញព្រមគ្នា » ។

នៅថ្ងៃនោះ « ការគ្រប់គ្រងនឹងនៅលើស្មារបស់បុត្រនោះ ហើយគេនឹងហៅព្រះនាមទ្រង់ថា ព្រះដ៏ជួយគំនិតយ៉ាងអស្ចារ្យ ព្រះដ៏មានព្រះចេស្តា ព្រះវបិតាដ៏គង់នៅអស់កល្ប និងជាម្ចាស់នៃមេត្រីភាព » ។

ព្រះយេស៊ូវគ្រីស្ទនឹងគ្រប់គ្រងទាំងយេរូសាឡិមចាស់ និងយេរូសាឡិមថ្មីដែល « នឹងត្រូវបានស្ថាបនានៅលើទ្វីបអាមេរិក » ។ ចេញមកពីទីតាំងទាំងពីរនេះ ទ្រង់នឹងដឹកនាំកិច្ចការនៃសាសនាចក្ររបស់ទ្រង់ ។

នៅថ្ងៃនោះ ព្រះអម្ចាស់នឹងត្រូវគេស្គាល់ថាជា « ស្តេចលើអស់ទាំងស្តេច ជាព្រះអម្ចាស់លើអស់ទាំងព្រះអម្ចាស់ » ។ អ្នកដែលនៅជាមួយទ្រង់នឹងត្រូវបាន « ហៅ បានរើស ហើយជាអ្នកស្មោះត្រង់ទាំងអស់គ្នា » ។

បងប្អូនប្រុសស្រី ឥឡូវនេះគឺជាពេលវេលាសម្រាប់បងប្អូន និងខ្ញុំ ដើម្បីរៀបចំខ្លួនសម្រាប់ការយាងមកជាលើកទីពីររបស់ព្រះអម្ចាស់ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ ឥឡូវនេះគឺជាពេលដែលយើងដាក់អាទិភាពខ្ពស់បំផុតទៅលើភាពជាសិស្សរបស់យើង ។ នៅក្នុងពិភពលោកដែលមានពេញទៅដោយការរំខានដ៏វក់វី តើយើងអាចធ្វើវាបានយ៉ាងដូចម្តេចទៅ ?

រូបភាព

ព្រះវិហារបរិសុទ្ធ រ៉ូម អ៊ីតាលី

ការថ្វាយបង្គំជាទៀងទាត់នៅក្នុងព្រះវិហារបរិសុទ្ធនឹងជួយយើង ។ នៅក្នុងដំណាក់របស់ព្រះអម្ចាស់ យើងផ្តោតទៅលើព្រះយេស៊ូវគ្រីស្ទ ។ យើងរៀនពីទ្រង់ ។ យើងចុះសេចក្ដីសញ្ញាដើម្បីដើរតាមទ្រង់ ។ យើងមកស្គាល់ទ្រង់ ។ នៅពេលយើងរក្សាសេចក្ដីសញ្ញាព្រះវិហារបរិសុទ្ធ នោះយើងទទួលបានព្រះចេស្ដានៃព្រះអម្ចាស់ជួយពង្រឹងយើងកាន់តែខ្លាំង ។ នៅក្នុងព្រះវិហារបរិសុទ្ធ យើងទទួលបានការការពារពីការធ្វើទុក្ខនៃលោកិយ ។ យើងដកពិសោធន៍នូវសេចក្តីស្រឡាញ់ដ៏សុទ្ធសាធរបស់ព្រះយេស៊ូវគ្រីស្ទ និងព្រះវរបិតាសួគ៌របស់យើងជាបរិបូរ ! យើងទទួលអារម្មណ៍សុខសាន្ត និងការធានាខាងវិញ្ញាណ ដែលផ្ទុយស្រឡះពីភាពចលាចលនៃលោកិយ ។

នេះជាការសន្យារបស់ខ្ញុំចំពោះបងប្អូន ៖ អ្នកដែលស្វែងរកព្រះយេស៊ូវគ្រីស្ទដោយស្មោះត្រង់គ្រប់រូបនឹងរកឃើញទ្រង់នៅក្នុងព្រះវិហារបរិសុទ្ធ ។ បងប្អូននឹងទទួលអារម្មណ៍នៃសេចក្ដីមេត្តារបស់ទ្រង់ ។ បងប្អូននឹងរកឃើញចម្លើយចំពោះសំណួរដែលគួរឲ្យរំខានបំផុតរបស់បងប្អូន ។ បងប្អូននឹងយល់កាន់តែច្បាស់អំពីអំណរនៃដំណឹងល្អរបស់ទ្រង់ ។

ខ្ញុំបានរៀនថា សំណួរចាំបាច់បំផុត ដែលយើងម្នាក់ៗត្រូវឆ្លើយគឺ ៖ តើខ្ញុំនឹងប្រគល់ជីវិតឲ្យទៅនរណា ឬឲ្យទៅអ្វី ?

រូបភាព

ប្រធាន ណិលសុន កាលជាគ្រូពេទ្យវះកាត់

ការសម្រេចចិត្តរបស់ខ្ញុំដើម្បីដើរតាមព្រះយេស៊ូវគ្រីស្ទគឺជាការសម្រេចចិត្តដ៏សំខាន់បំផុតដែលខ្ញុំមិនធ្លាប់ធ្វើ ។ អំឡុងពេលខ្ញុំរៀននៅសាលាពេទ្យ ខ្ញុំទទួលបានទីបន្ទាល់មួយអំពីទេវភាពនៃព្រះជាព្រះវរបិតា និងព្រះរាជបុត្រាទ្រង់ គឺព្រះយេស៊ូវគ្រីស្ទ ។ ចាប់ពីពេលនោះមក ព្រះអង្គសង្គ្រោះគឺជាសិលាដែលខ្ញុំបានសង់ជីវិតនៅលើ ។ ជម្រើសនោះបានធ្វើឲ្យមានភាពខុសប្លែកទាំងស្រុង ! ការសម្រេចចិត្តនោះបានធ្វើឲ្យការសម្រេចចិត្តជាច្រើនទៀតកាន់តែមានភាពងាយស្រួល ។ ការសម្រេចចិត្តនោះបានផ្តល់គោលបំណង និងទិសដៅដល់ខ្ញុំ ។ វាក៏បានជួយខ្ញុំឲ្យឆ្លងកាត់ព្យុះជីវិតផងដែរ ។ ខ្ញុំសូមចែកចាយឧទាហរណ៍ចំនួនពីរ ៖

ទីមួយ នៅពេលភរិយាខ្ញុំ ឌេនហ្សេល បានទទួលមរណភាពដោយស្មានមិនដល់ ខ្ញុំទាក់ទងទៅកូនណាក៏មិនបានដែរ ។ ខ្ញុំបាននៅទីនោះតែម្នាក់ឯង ភ័យរន្ធត់ និងអំពាវនាវទូលសូមជំនួយ ។ អរគុណណាស់ ដែលតាមរយៈព្រះវិញ្ញាណទ្រង់ ព្រះអម្ចាស់បានបង្រៀនខ្ញុំថា ហេតុអ្វីបានជា ឌេនហ្សេល ជាទីស្រឡាញ់របស់ខ្ញុំត្រូវយកទៅផ្ទះវិញដូច្នេះ ។ ជាមួយនឹងការយល់ដឹងនោះ ខ្ញុំបានទទួលការលួងលោម ។ យូរៗទៅ ខ្ញុំអាចស៊ូទ្រាំនឹងទុក្ខព្រួយរបស់ខ្ញុំបានល្អជាងមុន ។ ក្រោយមក ខ្ញុំបានរៀបការជាមួយភរិយាជាទីស្រឡាញ់របស់ខ្ញុំ វេនឌី ។ នាងគឺជាផ្នែកដ៏សំខាន់នៃឧទាហរណ៍ទីពីររបស់ខ្ញុំ ។

នៅពេលដែល វេនឌី និងខ្ញុំកំពុងបំពេញភារកិច្ចនៅទឹកដីឆ្ងាយមួយ ពួកចោរប្លន់ប្រដាប់អាវុធបានភ្ជង់កាំភ្លើងលើក្បាលខ្ញុំ ហើយកេះកៃកាំភ្លើង ។ ប៉ុន្តែកាំភ្លើងបាញ់មិនចេញទេ ។ ក្នុងហេតុការណ៍នោះ ជីវិតរបស់យើងទាំងពីរនាក់ត្រូវបានគំរាមកំហែង ។ ប៉ុន្តែ វេនឌី និងខ្ញុំបានទទួលអារម្មណ៍នៃភាពសុខសាន្តដែលមិនអាចប្រកែកបាន ។ វាគឺជាភាពសុខសាន្ត « ដែលហួសលើសពីអស់ទាំងគំនិត » ។

បងប្អូនប្រុសស្រី ព្រះអម្ចាស់នឹងលួងលោមបងប្អូនផងដែរ ! ទ្រង់នឹងពង្រឹងបងប្អូន ។ ទ្រង់នឹងប្រទានពរដល់បងប្អូននូវភាពសុខសាន្ត សូម្បីតែនៅកណ្តាលភាពវឹកវរក្តី ។

រូបភាព

ព្រះអម្ចាស់យេស៊ូវគ្រីស្ទ

សូមស្ដាប់ការសន្យានេះមកពីព្រះយេស៊ូវគ្រីស្ទសម្រាប់បងប្អូន ៖ « យើងនឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់យើងនឹងសណ្ឋិតនៅក្នុងដួងចិត្តអ្នក ហើយពួកទេវតារបស់យើងនៅព័ទ្ធជុំវិញអ្នក ដើម្បីទ្រអ្នកឡើង » ។

សមត្ថភាពរបស់ព្រះអង្គសង្គ្រោះក្នុងការជួយបងប្អូនពុំមានដែនកំណត់នោះទេ ។ ការរងទុក្ខដែលមិនអាចយល់បានរបស់ទ្រង់នៅគែតសេម៉ានី និងភ្នំលលាដ៏ក្បាល គឺធ្វើឡើងសម្រាប់បងប្អូន ! ដង្វាយធួនដ៏និរន្ដរ៍របស់ទ្រង់គឺសម្រាប់បងប្អូន !

ខ្ញុំសូមលើកទឹកចិត្តបងប្អូនឲ្យលះបង់ពេលវេលារាល់សប្តាហ៍—ពេញមួយជីវិតដែលបងប្អូននៅមាន—ដើម្បីចម្រើនការយល់ដឹងអំពីដង្វាយធួនរបស់ព្រះយេស៊ូវគ្រីស្ទ ។ ដួងចិត្តខ្ញុំឈឺចាប់សម្រាប់អ្នកដែលត្រូវជាប់គាំងក្នុងអំពើបាប ហើយមិនដឹងពីរបៀបចេញ ។ ខ្ញុំយំសម្រាប់អ្នកដែលតស៊ូខាងវិញ្ញាណ ឬអ្នកដែលស្ពាយបន្ទុកធ្ងន់តែម្នាក់ឯង ព្រោះពួកគេមិនយល់ពីអ្វីដែលព្រះយេស៊ូវគ្រីស្ទបានធ្វើសម្រាប់ពួកគេ ។

ព្រះយេស៊ូវគ្រីស្ទបានលើកដាក់លើអង្គទ្រង់នូវអំពើបាប របស់បងប្អូន ការឈឺចាប់ របស់បងប្អូន ការឈឺចិត្ត របស់បងប្អូន និងជំងឺ របស់បងប្អូន ។ បងប្អូនមិនចាំបាច់ទ្រាំទ្រតែម្នាក់ឯងឡើយ ! ទ្រង់នឹងអត់ទោសដល់បងប្អូន នៅពេលដែលបងប្អូនប្រែចិត្ត ។ ទ្រង់នឹងប្រទានពរដល់បងប្អូននូវអ្វីដែលបងប្អូនត្រូវការ ។ ទ្រង់នឹងព្យាបាលព្រលឹងដែលរងរបួសរបស់បងប្អូន ។ ដរាបណាបងប្អូនទទួលនឹមទ្រង់ នោះបន្ទុករបស់បងប្អូននឹងស្រាលជាងមុន ។ បើបងប្អូននឹងចុះ ហើយរក្សាសេចក្ដីសញ្ញាដើម្បីដើរតាមព្រះយេស៊ូវគ្រីស្ទ នោះបងប្អូននឹងឃើញថា គ្រាឈឺចាប់ក្នុងជីវិតបងប្អូនគឺរឿងបណ្តោះអាសន្នតែប៉ុណ្ណោះ ។ ការរងទុក្ខរបស់បងប្អូននឹងត្រូវបាន « លេបទៅក្នុងអំណរ នៃព្រះគ្រីស្ទ » ។

វាមិនឆាប់ក៏មិនយឺតពេកដែរ សម្រាប់បងប្អូនដើម្បីធ្វើជាសិស្សដ៏ស្មោះរបស់ព្រះយេស៊ូវគ្រីស្ទនោះ ។ រួចបងប្អូននឹងដកពិសោធន៍យ៉ាងពេញលេញនូវពរជ័យនៃដង្វាយធួនរបស់ទ្រង់ ។ បងប្អូនក៏នឹងកាន់តែមានប្រសិទ្ធភាពក្នុងការជួយប្រមូលសាសន៍អ៊ីស្រាអែលផងដែរ ។

រូបភាព

ការយាងមកជាលើកទីពីររបស់ព្រះយេស៊ូវគ្រីស្ទ

បងប្អូនប្រុសស្រីជាទីស្រឡាញ់ នៅថ្ងៃខាងមុខ ព្រះយេស៊ូវគ្រីស្ទនឹងត្រឡប់មកផែនដីវិញជាព្រះមែស៊ីក្នុងសហស្សវត្សរ៍ ។ ដូច្នេះថ្ងៃនេះ ខ្ញុំសូមអំពាវនាវឲ្យបងប្អូនឧទ្ទិសជីវិតរបស់បងប្អូនសាជាថ្មីថ្វាយដល់ព្រះយេស៊ូវគ្រីស្ទ ។ ខ្ញុំសុំអំពាវនាវឲ្យបងប្អូនជួយប្រមូលសាសន៍អ៊ីស្រាអែលដែលខ្ចាត់ព្រាត់ និងជួយរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់ ។ ខ្ញុំសុំអំពាវនាវឲ្យបងប្អូននិយាយអំពីព្រះគ្រីស្ទ ថ្លែងទីបន្ទាល់អំពីព្រះគ្រីស្ទ មានសេចក្ដីជំនឿលើព្រះគ្រីស្ទ និងអររីករាយក្នុងព្រះគ្រីស្ទ !

ចូរមកឯព្រះគ្រីស្ទ ហើយ « ចូរថ្វាយ[ ព្រលឹង ]អ្នកទាំងមូល ។ នេះគឺជាអាថ៌កំបាំងនៃជីវិតមានអំណរដ៏រីករាយ !

បងប្អូនប្រុសស្រីជាទីស្រឡាញ់ អ្វីដែលល្អបំផុតនឹងមកដល់ក្នុងពេលខាងមុខ ព្រោះព្រះអង្គសង្គ្រោះនឹងយាងមកម្តងទៀត ! អ្វីដែលល្អបំផុតនឹងមកដល់ក្នុងពេលខាងមុខ ព្រោះព្រះអម្ចាស់កំពុងតែពន្លឿនកិច្ចការទ្រង់ ។ អ្វីដែលល្អបំផុតនឹងមកដល់ក្នុងពេលខាងមុខ ពេលយើងបង្វែរដួងចិត្ត និងជីវិតទៅរកព្រះយេស៊ូវគ្រីស្ទ ។

ខ្ញុំសូមថ្លែងជាសាក្សីយ៉ាងឧឡារិកថា ព្រះយេស៊ូវគ្រីស្ទគឺជាព្រះរាជបុត្រានៃព្រះ ។ ខ្ញុំជាសិស្សរបស់ទ្រង់ ។ ខ្ញុំមានកិត្តិយសដែលបានក្លាយជាអ្នកបម្រើរបស់ទ្រង់ ។ នៅឯការយាងមកជាលើកទីពររបស់ទ្រង់ « សិរីល្អនៃព្រះយេហូវ៉ានឹងសម្ដែងមក គ្រប់មនុស្សទាំងឡាយនឹងបានឃើញព្រមគ្នា » ។ ថ្ងៃនោះនឹងត្រូវបានបំពេញដោយអំណរដ៏រីករាយសម្រាប់មនុស្សសុចរិត !

តាមរយៈអំណាចនៃបព្វជិតភាពដ៏ពិសិដ្ឋដែលខ្ញុំកាន់ ខ្ញុំសូមប្រកាសសេចក្ដីពិតនេះដល់បងប្អូន និងពិភពលោកទាំងមូល ! នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕