សូមស្វាគមន៍មកកាន់សាសនាចក្រនៃអំណរ
ដោយសារតែព្រះជន្មដ៏ប្រោសលោះ និងបេសកកម្មរបស់ព្រះអង្គសង្គ្រោះរបស់យើង គឺព្រះយេស៊ូវគ្រីស្ទ នោះយើងអាច—និងគួរតែ—ជាមនុស្សរីករាយបំផុតនៅលើផែនដី !
ខ្ញុំបានជ្រមុជទឹកជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនៅថ្ងៃឆ្លងបុណ្យគ្រីស្ទម៉ាស ឆ្នាំ១៩៨៧ ជិត ៣៧ ឆ្នាំហើយ ។ នោះគឺជាថ្ងៃដ៏អស្ចារ្យពិតប្រាកដនៅក្នុងជីវិតរបស់ខ្ញុំ និងនៅក្នុងដំណើរដ៏នៅអស់កល្បជានិច្ចរបស់ខ្ញុំ ហើយខ្ញុំសូមថ្លែងអំណរគុណយ៉ាងជ្រាលជ្រៅចំពោះមិត្តភក្តិដែលបានរៀបចំផ្លូវ ហើយនាំខ្ញុំទៅកាន់ទឹកនៃការកើតជាថ្មីនោះ ។
មិនថាពិធីបុណ្យជ្រមុជទឹករបស់បងប្អូនធ្វើឡើងកាលពីម្សិលមិញ ឬជាច្រើនឆ្នាំកន្លងហើយនោះទេ មិនថាបងប្អូនជួបជុំគ្នានៅក្នុងអគារពហុវួដរបស់សាសនាចក្រ ឬនៅក្រោមរោងប្រក់ស្បូវនោះទេ មិនថាបងប្អូនទទួលទានសាក្រាម៉ង់ដោយនូវការចងចាំដល់ព្រះអង្គសង្គ្រោះជាភាសាថៃ ឬភាសាស្វាហ៊ីលីទេ ខ្ញុំចង់និយាយទៅកាន់បងប្អូនថា សូមស្វាគមន៍មកកាន់សាសនាចក្រនៃអំណរ ! សូមស្វាគមន៍មកកាន់សាសនាចក្រនៃអំណរ !
សាសនាចក្រនៃអំណរ
ដោយសារផែនការពេញដោយក្តីស្រឡាញ់របស់ព្រះវរបិតាសួគ៌របស់យើងសម្រាប់បុត្រាបុត្រីរបស់ទ្រង់ម្នាក់ៗ ហើយដោយសារព្រះជន្មដ៏ប្រោសលោះ និងបេសកកម្មរបស់ព្រះអង្គសង្គ្រោះរបស់យើង គឺព្រះយេស៊ូវគ្រីស្ទ នោះយើងអាច—និងគួរតែ—ជាមនុស្សរីករាយបំផុតនៅលើផែនដី ! ទោះបីជាព្យុះជីវិតនៅក្នុងពិភពលោកដែលមានបញ្ហាជាញឹកញាប់ បានបក់បោកមកលើយើងក្តី ក៏យើងអាចបណ្ដុះនូវអារម្មណ៍នៃអំណរ និងសេចក្តីសុខសាន្តខាងក្នុងដែលមានភាពរីកចម្រើន និងស្ថិតស្ថេរ ដោយសារក្ដីសង្ឃឹមរបស់យើងលើព្រះគ្រីស្ទ និងការយល់ដឹងរបស់យើងអំពីកន្លែងរបស់យើងនៅក្នុងផែនការនៃសុភមង្គលដ៏ស្រស់ស្អាត ។
សាវកជាន់ខ្ពស់របស់ព្រះអម្ចាស់គឺ ប្រធាន រ័សុល អិម ណិលសុន បានមានប្រសាសន៍អំពីអំណរដែលកើតចេញពីជីវិតដែលផ្ដោតលើព្រះយេស៊ូវគ្រីស្ទ នៅស្ទើរតែគ្រប់សុន្ទរកថាដែលលោកបានថ្លែងតាំងពីធ្វើជាប្រធាននៃសាសនាចក្រនេះមក ។ លោកបានសង្ខេបវាយ៉ាងខ្លីៗថា « អំណរកើតមានឡើង ហើយដោយសារតែទ្រង់ ។ … សម្រាប់ពួកបរិសុទ្ធថ្ងៃចុងក្រោយ ព្រះយេស៊ូវគ្រីស្ទ គឺជាអំណរ ! »
យើងគឺជាសមាជិកនៃសាសនាចក្រនៃព្រះយេស៊ូវគ្រីស្ទ ។ យើងជាសមាជិកនៃសាសនាចក្រនៃអំណរ ! ហើយគ្មានកន្លែងណាដែលអំណររបស់យើង ក្នុងនាមជាមនុស្សបង្ហាញឲ្យឃើញច្បាស់ជាងពេលដែលយើងជួបជុំគ្នាក្នុងថ្ងៃឈប់សម្រាកនីមួយៗក្នុងការប្រជុំសាក្រាម៉ង់របស់យើង ដើម្បីថ្វាយបង្គំប្រភពនៃអំណរទាំងអស់នោះទេ ! នៅទីនេះ យើងជួបជុំគ្នាជាមួយក្រុមគ្រួសារវួដ និងសាខារបស់យើង ដើម្បីប្រារព្ធពិធីសាក្រាម៉ង់នៃអាហាររបស់ព្រះអម្ចាស់ដល់សាសនាចក្រ ដែលជាការជួយសង្រ្គោះយើងពីអំពើបាប និងសេចក្តីស្លាប់ និងជាព្រះគុណដ៏មានព្រះចេស្តារបស់ព្រះអង្គសង្គ្រោះ ! នៅទីនេះ យើងមកដើម្បីទទួលបទពិសោធន៍នៃអំណរ ការការពារ ការអត់ទោស ការអរព្រះគុណ និងការមានចំណែកដែលរកបានតាមរយៈព្រះយេស៊ូវគ្រីស្ទ !
តើវិញ្ញាណនៃការរីករាយជាសមូហភាពក្នុងព្រះគ្រីស្ទជាអ្វីដែលបងប្អូនរកឃើញឬ ? តើនេះជាអ្វីដែលបងប្អូននាំមកឬ ? ប្រហែលជាបងប្អូនគិតថា វាមិនជាប់ទាក់ទងជាមួយបងប្អូនច្រើនទេ ឬប្រហែលជាបងប្អូនគ្រាន់តែស៊ាំទៅនឹងរបៀបដែលអ្វីៗតែងតែត្រូវបានធ្វើឡើងប៉ុណ្ណោះ ។ ប៉ុន្តែមិនថាយើងមានអាយុប៉ុន្មាន ឬការហៅជាអ្វីនោះទេ យើងទាំងអស់គ្នាអាចរួមចំណែក ដើម្បីធ្វើឲ្យការប្រជុំសាក្រាម៉ង់របស់យើងជាម៉ោងដែលទទួលស្វាគមន៍ ផ្តោតលើព្រះគ្រីស្ទ ពោរពេញដោយអំណរ និងមានស្មារតីនៃគារវភាពដ៏រីករាយ ។
គារវភាពដ៏រីករាយ
ជាគារវភាពដ៏រីករាយមែនទេ ? បងប្អូនអាចនឹងសួរថា « តើវាជារឿងដ៏សំខាន់មែនទេ ? » រូបាទ មែនហើយ ! យើងស្រឡាញ់ ផ្ដល់កិត្តិយស និងគោរពព្រះរបស់យើងយ៉ាងខ្លាំង ហើយគារវភាពរបស់យើងកើតចេញពីព្រលឹងដែលអរសប្បាយនៅក្នុងសេចក្តីស្រឡាញ់ សេចក្តីមេត្តាករុណា និងសេចក្តីសង្គ្រោះដ៏បរិបូររបស់ព្រះគ្រីស្ទ ! គារវភាពដ៏រីករាយនេះចំពោះព្រះអម្ចាស់គួរតែកំណត់លក្ខណៈនៃការប្រជុំសាក្រាម៉ង់ដ៏ពិសិដ្ឋរបស់យើង ។
ទោះយ៉ាងណាក៏ដោយ ចំពោះមនុស្សជាច្រើន គារវភាពមានន័យត្រឹមតែជា ៖ ការឱបដៃយ៉ាងណែនផ្អឹបទៅនឹងទ្រូងរបស់យើង ការឱនក្បាលយើងចុះ ការបិទភ្នែកយើង និងការនៅស្ងៀម—ធ្វើបែបនេះក្នុងពេលយ៉ាងយូរ ! នេះប្រហែលជាវិធីដ៏មានប្រយោជន៍មួយក្នុងការបង្រៀនក្មេងតូចៗដែលរពឹសខ្លាំង ប៉ុន្តែនៅពេលយើងធំឡើង និងរៀន ចូរយើងមើលឃើញថា គារវភាពគឺមានន័យលើសពីនេះទៅទៀត ។ តើយើងនឹងធ្វើបែបនោះដែរឬទេ បើព្រះអង្គសង្គ្រោះគង់នៅជាមួយយើង ? មិនមែនទេ ពីព្រោះ « នៅចំពោះ[ ទ្រង់ ] មានអំណរដ៏ពោរពេញ » !
មែនហើយ ចំពោះយើងភាគច្រើន ការផ្លាស់ប្តូរនេះនៅក្នុងកម្មវិធីសាក្រាម៉ង់ នឹងត្រូវការការហ្វឹកហាត់ ។
ការចូលរួមធៀបនឹងការថ្វាយបង្គំ
យើងមិនមែនជួបជុំគ្នានៅថ្ងៃឈប់សម្រាក ដើម្បីគ្រាន់តែចូលរួមការប្រជុំសាក្រាម៉ង់ ហើយចប់នោះទេ ។ យើងមករួមគ្នាថ្វាយបង្គំ ។ មានភាពខុសប្លែកគ្នាមួយយ៉ាងខ្លាំងរវាងរឿងទាំងពីរនេះ ។ ការ ចូលរួម មានន័យថា ការមានវត្តមាន ។ ប៉ុន្តែការ ថ្វាយបង្គំ គឺដើម្បីសរសើរ និងគោរពចំពោះព្រះរបស់យើងដោយចេតនាតាមរបៀបមួយដែលផ្លាស់ប្ដូរយើង !
នៅលើវេទិកា និងក្នុងក្រុមជំនុំ
ប្រសិនបើយើងកំពុងជួបជុំគ្នាដើម្បីចងចាំព្រះអង្គសង្គ្រោះ និងការប្រោសលោះដែលទ្រង់បានធ្វើ នោះទឹកមុខរបស់យើងគួរតែឆ្លុះបញ្ចាំងនូវអំណរ និងការដឹងគុណរបស់យើង ! អែលឌើរ អេហ្វ អេនហ្ស៊ីអូ បាឆ ធ្លាប់បានប្រាប់អំពីរឿងកាលលោកជាប្រធានសាខា ហើយមានក្មេងប្រុសម្នាក់ក្នុងក្រុមជំនុំមើលទៅលោកនៅឯវេទិកា ហើយសួរឮៗថា « តើបុរសដែលមានទឹកមុខមាំធ្វើអ្វីនៅលើវេទិកានោះ ? » អ្នកដែលអង្គុយលើវេទិកា—អ្នកឡើងនិយាយ ថ្នាក់ដឹកនាំ ក្រុមចម្រៀង—និងអ្នកដែលជួបជុំគ្នាក្នុងក្រុមជំនុំប្រាស្រ័យទាក់ទងគ្នាទៅវិញទៅមកដោយនូវ« ការស្វាគមន៍មកកាន់សាសនាចក្រនៃអំណរ »នេះតាមរយៈការបង្ហាញទឹកមុខរបស់ពួកគេ !
ការច្រៀងទំនុកតម្កើង
ពេលយើងច្រៀង តើយើងកំពុងរួមគ្នាសរសើរតម្កើងព្រះ និងស្តេចរបស់យើងដែរឬទេ ទោះជាយើងមានសំឡេងបែបណា ឬទោះបីយើងមិនច្រៀងអ្វីសោះក៏ដោយនោះ ? បទគម្ពីរកត់ត្រាថា « បទចម្រៀងនៃពួកសុចរិត គឺជាបទអធិស្ឋានដល់[ ព្រះ ] » ដែលព្រលឹងរបស់ទ្រង់ត្រេកអរ ។ ដូច្នេះចូរយើងច្រៀង ! ហើយសរសើរតម្ដើងទ្រង់ !
សុន្ទរកថា និងទីបន្ទាល់
យើងផ្តោតលើការនិយាយ និងទីបន្ទាល់របស់យើងលើព្រះវរបិតាសួគ៌ និងព្រះយេស៊ូវគ្រីស្ទ ព្រមទាំងផលផ្លែនៃការរស់នៅដោយរាបសាតាមដំណឹងល្អរបស់ទ្រង់ទាំងទ្វេ ជាផលផ្លែ « ដែលផ្អែមជាងអ្វីៗដែលផ្អែមទាំងអស់ » ។ បន្ទាប់មក យើងពិតជា « ទទួលទាន … រហូតដល់ [ យើង ] បានឆ្អែតឆ្អន់ ដើម្បីកុំឲ្យ [ យើង ] ឃ្លាន កុំឲ្យ … ស្រេកទៀតឡើយ » ហើយបន្ទុករបស់យើងបានធ្វើឲ្យស្រាលតាមរយៈអំណររបស់ព្រះរាជបុត្រា ។
ពិធីសាក្រាម៉ង់
ចំណុចស្នូលដ៏រុងរឿងនៃកម្មវិធីរបស់យើងគឺជាការប្រសិទ្ធពរ និងការទទួលទានសាក្រាម៉ង់ នំបុ័ង និងទឹកតំណាងឲ្យអំណោយទានដ៏ធួននៃព្រះអម្ចាស់របស់យើង និងគោលបំណងទាំងមូលនៃការជួបជុំរបស់យើង ។ នេះជា« គ្រាដ៏ពិសិដ្ឋមួយដើម្បីរំឭកខាងវិញ្ញាណ » ជាពេលដែលយើងធ្វើសាក្សីជាថ្មីថាយើងស្ម័គ្រយកព្រះនាមព្រះយេស៊ូវគ្រីស្ទដាក់មកលើយើង ហើយធ្វើសេចក្ដីសញ្ញាដើម្បីចងចាំព្រះអង្គសង្គ្រោះ និងរក្សាបទបញ្ញត្តិរបស់ទ្រង់ជានិច្ចម្ដងទៀត ។
នៅក្នុងដំណាក់កាលខ្លះនៃជីវិត យើងអាចចូលរួមពិធីសាក្រាម៉ង់ដោយដួងចិត្តធុញថប់ និងបន្ទុកដ៏លើសលប់ ។ នៅពេលខ្លះទៀត យើងមកដោយគ្មានបន្ទុក និងគ្មានបញ្ហា ។ នៅពេលយើងស្ដាប់ដោយយកចិត្តទុកដាក់ចំពោះការប្រសិទ្ធពរនំប៉័ង និងទឹក ហើយទទួលទានតំណាងដ៏ពិសិដ្ឋទាំងនោះ យើងអាចនឹងជញ្ជឹងគិតអំពីពលិកម្មរបស់ព្រះអង្គសង្គ្រោះ ការឈឺចាប់របស់ទ្រង់នៅសួនគែតសេម៉ានី ការរងទុក្ខរបស់ទ្រង់នៅលើឈើឆ្កាង ព្រមទាំងទុក្ខព្រួយ និងការឈឺចាប់ដែលទ្រង់បានស៊ូទ្រាំជំនួសយើង ។ ការណ៍នោះនឹងក្លាយជាអ្វីដែលជួយឲ្យព្រលឹងយើងបានធូរស្រាល នៅពេលយើងភ្ជាប់ការរងទុក្ខរបស់យើងទៅនឹងការរងទុក្ខទ្រង់ ។ ពេលខ្លះទៀត យើងនឹងមានអារម្មណ៍ងឿងឆ្ងល់ដោយចិត្តរំភើបរីករាយចំពោះអំណរ « ដ៏ប្រពៃ និងដ៏ផ្អែមល្ហែម » អំពីអ្វីដែលអំណោយដ៏អស្ចារ្យរបស់ព្រះយេស៊ូវបានធ្វើឲ្យកើតមានឡើងនៅក្នុងជីវិតរបស់យើង និងនៅក្នុងភាពអស់កល្បជានិច្ចរបស់យើង ! យើងនឹងរីករាយចំពោះអ្វីដែលនឹងមកដល់—ជាការរួបរួមដោយអំណរជាមួយនឹងព្រះវរបិតាជាទីស្រឡាញ់ និងព្រះអង្គសង្គ្រោះដែលមានព្រះជន្មរស់ឡើងវិញរបស់យើង ។
យើងប្រហែលជាត្រូវបានគេធ្វើឲ្យជឿថា គោលបំណងនៃពិធីសាក្រាម៉ង់គឺដើម្បីអង្គុយនៅលើកៅអីវែង គិតតែអំពីរាល់រឿងខុសឆ្គងដែលយើងបានធ្វើក្នុងអំឡុងពេលសប្តាហ៍មុន ។ ប៉ុន្តែសូមគិតវាសាជាថ្មី ។ នៅក្នុងភាពស្ងៀមស្ងាត់ យើងអាចជញ្ជឹងគិតអំពីវិធីជាច្រើនដែលយើងបានឃើញ ព្រះអម្ចាស់ជួយយើងដោយឥតឈប់ឈរជាមួយនឹងសេចក្តីស្រឡាញ់ដ៏អស្ចារ្យរបស់ទ្រង់នៅសប្តាហ៍នោះ ! យើងអាចជញ្ជឹងគិតអំពីអត្ថន័យនៃការ « ស្វែងរក អំណរ នៃការប្រែចិត្តជារៀងរាល់ថ្ងៃ » ។ យើងអាចអរព្រះគុណចំពោះគ្រាដែលព្រះអង្គសង្គ្រោះបានយាងចូលមកក្នុងគ្រាស្មុគស្មាញ និងគ្រាជ័យជំនះរបស់យើង ព្រមទាំងគ្រាដែលយើងទទួលបាននូវព្រះគុណ ការអភ័យទោស និងព្រះចេស្ដាដែលប្រទានឲ្យយើងនូវកម្លាំងដើម្បីយកឈ្នះលើការលំបាករបស់យើង ហើយទ្រាំទ្រនឹងបន្ទុករបស់យើងដោយការអត់ធ្មត់ និងមានចិត្តរីករាយ ។
មែនហើយ យើងជញ្ជឹងគិតអំពីការរងទុក្ខវេទនា និងភាពអយុត្តិធម៌ដែលកើតមានចំពោះព្រះប្រោសលោះរបស់យើងសម្រាប់អំពើបាបរបស់យើង ហើយការណ៍នោះបណ្តាលឲ្យមានការជញ្ជឹងគិតយ៉ាងប្រុងប្រយ័ត្ន ។ ប៉ុន្តែពេលខ្លះយើងជាប់គាំងនៅទីនោះ—នៅក្នុងសួនច្បារ នៅឈើឆ្កាង នៅក្នុងផ្នូរ ។ យើងបរាជ័យក្នុងការឈានទៅរកភាពរីករាយនៃការបើកទ្វារផ្នូរឡើង ការយកឈ្នះសេចក្ដីស្លាប់ និងជ័យជម្នះរបស់ព្រះគ្រីស្ទលើអ្វីៗដែលអាចរារាំងយើងពីការទទួលបានសេចក្ដីសុខសាន្ត និងការត្រឡប់ទៅផ្ទះសួគ៌ារបស់យើងវិញ ។ មិនថាយើងស្រក់ទឹកភ្នែកនៃទុក្ខសោក ឬទឹកភ្នែកនៃការដឹងគុណក្នុងអំឡុងពិធីសាក្រាម៉ង់នោះទេ សូមឲ្យវាជាភាពងឿងឆ្ងល់ដ៏អស្ចារ្យចំពោះដំណឹងល្អនៃអំណោយទានរបស់ព្រះវរបិតាដែលជាព្រះរាជបុត្រារបស់ទ្រង់ !
ឪពុកម្តាយដែលមានកូននៅក្មេង ឬមានតម្រូវការពិសេស
ឥឡូវនេះ សម្រាប់ឪពុកម្តាយរបស់កុមារដែលនៅក្មេង ឬមានតម្រូវការពិសេស ជាញឹកញាប់គឺគ្មានគ្រាដែលមានភាពនៅស្ងៀម និងការជញ្ជឹងគិតដ៏ស្ងៀមស្ងាត់ក្នុងអំឡុងពិធីសាក្រាម៉ង់ឡើយ ។ ប៉ុន្តែក្នុងពេលតិចតួចខ្លះនៅក្នុងសប្តាហ៍ បងប្អូនអាចរៀនតាមរយៈគំរូអំពីសេចក្ដីស្រឡាញ់ ការដឹងគុណ និងអំណរដែលបងប្អូនមានចំពោះ និងមកពីព្រះអង្គសង្គ្រោះ នៅពេលបងប្អូនថែទាំកូនចៀមតូចៗរបស់ទ្រង់ ។ គ្មានការខិតខំណាមួយនៅក្នុងកិច្ចការនេះដែលឥតតម្លៃឡើយ ។ ព្រះទ្រង់ជ្រាបដឹងអំពីបងប្អូន ។
ក្រុមប្រឹក្សា គ្រួសារ វួដ និងសាខា
ដូចគ្នានៅផ្ទះដែរ យើងអាចចាប់ផ្តើមបង្កើនសេចក្តីសង្ឃឹម និងការរំពឹងទុករបស់យើងចំពោះពេលវេលារបស់យើងនៅព្រះវិហារ ។ នៅក្នុងក្រុមប្រឹក្សាគ្រួសារ យើងអាចពិភាក្សាអំពីរបៀបដែលបុគ្គលម្នាក់ៗអាចចូលរួមចំណែកតាមរបៀបដ៏មានអត្ថន័យ ដើម្បីស្វាគមន៍មនុស្សទាំងអស់មកកាន់សាសនាចក្រនៃអំណរ ! យើងអាចរៀបចំផែនការ ហើយរំពឹងថានឹងមានបទពិសោធន៍ដ៏រីករាយនៅព្រះវិហារ ។
ក្រុមប្រឹក្សាវួដ និងសាខាអាចស្រមៃមើល និងបង្កើតវប្បធម៌នៃគារវភាពដ៏រីករាយសម្រាប់ម៉ោងសាក្រាម៉ង់របស់យើង ដោយកំណត់ជំហានជាក់ស្តែង និងសញ្ញានានាដើម្បីជួយ ។
អំណរ
អំណរមានភាពខុសគ្នាសម្រាប់មនុស្សផ្សេងគ្នា ។ ចំពោះមនុស្សខ្លះ វាអាចជាការស្វាគមន៍ដ៏រាក់ទាក់នៅមាត់ទ្វារ ។ ចំពោះមនុស្សផ្សេងទៀត វាប្រហែលជាការជួយមនុស្សទូទៅឲ្យមានអារម្មណ៍ស្រួលចិត្តតាមរយៈស្នាមញញឹម និងការអង្គុយនៅក្បែរពួកគេដោយចិត្តសប្បុរស និងបើកចំហ ។ សម្រាប់អស់អ្នកដែលមានអារម្មណ៏ថាគេទុកចោល ឬមិនរាប់រក នោះភាពកក់ក្តៅនៃការស្វាគមន៏មានសារៈសំខាន់ណាស់ ។ នៅទីបំផុត យើងអាចសួរខ្លួនឯងថា តើព្រះអង្គសង្គ្រោះចង់ឲ្យម៉ោងសាក្រាម៉ង់របស់យើងទៅជាបែបណា ។ តើទ្រង់ចង់ឲ្យបុត្រាបុត្រីរបស់ទ្រង់ម្នាក់ៗទទួលបានការស្វាគមន៍ ការថែរក្សា ការចិញ្ចឹមបីបាច់ និងសេចក្ដីស្រឡាញ់ដោយរបៀបណា ? តើទ្រង់ចង់ឲ្យយើងមានអារម្មណ៍យ៉ាងណា ពេលយើងមករំឭកចាំតាមរយៈការថ្វាយបង្គំទ្រង់ ?
សេចក្ដីបញ្ចប់
នៅទីចាប់ផ្តើមក្នុងដំណើរនៃសេចក្តីជំនឿរបស់ខ្ញុំ អំណរក្នុងព្រះយេស៊ូវគ្រីស្ទគឺជាការរកឃើញដ៏ធំជាលើកដំបូងរបស់ខ្ញុំ ហើយវាបានផ្លាស់ប្តូរជីវិតរបស់ខ្ញុំ ។ ប្រសិនបើបងប្អូនមិនទាន់រកឃើញអំណរនេះទេ សូមចាប់ផ្តើមដំណើរស្វែងរកវា ។ នេះជាការអញ្ជើញឲ្យទទួលយកអំណោយទាននៃសេចក្ដីសុខសាន្ត ពន្លឺ និងអំណររបស់ព្រះអង្គសង្គ្រោះ—ដើម្បីត្រេកអរ មានភាពអស្ចារ្យ និងរីករាយនៅក្នុងរឿងនេះ រៀងរាល់ថ្ងៃឈប់សម្រាក ។
អាំម៉ូននៅក្នុងព្រះគម្ពីរមរមនបង្ហាញពីអារម្មណ៍នៃដួងចិត្តខ្ញុំ នៅពេលលោកថ្លែង ៖
« តើយើងគ្មានហេតុនឹងអររីករាយទេឬអី ? « មែនហើយ ខ្ញុំសូមប្រាប់អ្នកថា មិនដែលមាន [ មនុស្ស ] ឯណា ដែលមានហេតុដ៏ធំនឹងអររីករាយស្មើនឹងយើងនេះទេ ចាប់តាំងពីកំណើតលោកិយមកម្ល៉េះ មែនហើយ ហើយសេចក្ដីអំណររបស់ខ្ញុំត្រូវបានហួសហេតុ រហូតដល់បានអួតនៅក្នុងព្រះរបស់ខ្ញុំ ដ្បិតទ្រង់មានគ្រប់ព្រះចេស្ដា គ្រប់ទាំងប្រាជ្ញា និងគ្រប់ទាំងយោបល់ ទ្រង់ជ្រាបនូវគ្រប់ការណ៍ទាំងអស់ ហើយទ្រង់ជាតួអង្គមួយដែលប្រកបដោយសេចក្ដីមេត្តាករុណា គឺដល់សេចក្ដីសង្គ្រោះដល់អស់អ្នកណាដែលនឹងប្រែចិត្ត ហើយជឿដល់ព្រះនាមទ្រង់ ។
« ឥឡូវនេះ បើសិននេះជាការអួត ម្ល៉ោះហើយ ខ្ញុំនឹងអួត ត្បិតនេះជាជីវិតខ្ញុំ និងពន្លឺរបស់ខ្ញុំ សេចក្ដីអំណររបស់ខ្ញុំ … និងជាអំណរគុណដ៏ធំរបស់ខ្ញុំ » ។
សូមស្វាគមន៍មកកាន់សាសនាចក្រនៃអំណរ ! នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។