នេះគឺជាថ្ងៃដែលពុំអាចបំភ្លេចបានឡើយ
គ្រាខាងមុខនឹងផ្ដល់ឱកាសកាន់តែច្រើនដល់សមាជិកនៃសាសនាចក្រគ្រប់ទីកន្លែងដើម្បីចែកចាយដំណឹងល្អដ៏រីករាយនៃដំណឹងល្អរបស់ព្រះយេស៊ូវគ្រីស្ទ ។
សេចក្តីផ្ដើម
បងប្អូនប្រុសស្រីជាទីស្រឡាញ់ ប្រវត្តិសាស្រ្តរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយក្នុងគ្រាកាន់កាប់ត្រួតត្រានេះ គឺត្រចះត្រចង់ណាស់ជាមួយនឹងបទពិសោធន៍ដ៏ទេវភាពដែលបង្ហាញពីរបៀបព្រះអម្ចាស់បានដឹកនាំសាសនាចក្រទ្រង់ ។ ទោះជាយ៉ាងណា មានទសវត្សរ៍មួយក្នុងប្រវត្តិសាស្ត្ររបស់យើង ដែលឈរយ៉ាងអស្ចារ្យលើសអស់ទសវត្សរ៍ណាៗ—នោះគឺទសវត្សរ៍ឆ្នាំ១៨២០ ដល់ឆ្នាំ១៨៣០ ។ ចេញពីបទពិសោធន៍របស់ព្យាការី យ៉ូសែប ស្ម៊ីធ នៅក្នុងព្រៃពិសិដ្ឋនានិទាឃរដូវឆ្នាំ១៨២០ ជាពេលដែលលោកបានឃើញព្រះ ជាព្រះវរបិតា និងព្រះរាជបុត្រារបស់ទ្រង់ ព្រះយេស៊ូវគ្រីស្ទ ហើយបន្តរហូតដល់ថ្ងៃទី៦ ខែមេសា ឆ្នាំ១៨៣០ ទសវត្សរ៍នោះមិនដូចជាទសវត្សរ៍ណាផ្សេងឡើយ ។
សូមពិចារណាព្រឹត្តិការណ៍ដ៏អស្ចារ្យទាំងនេះ ! ព្យាការីវ័យក្មេងបានសន្ទនាជាមួយទេវតាមរ៉ូណៃ បានបកប្រែផ្ទាំងមាស និងបានបោះពុម្ពព្រះគម្ពីរមរមន ! តាមរយៈលោកដែលជាឧបករណ៏មួយរបស់ព្រះ នោះបព្វជិតភាពអើរ៉ុន និងបព្វជិតភាពម៉ិលគីស្សាដែកត្រូវបានស្ដារឡើងវិញ ហើយបន្ទាប់មក លោកបានរៀបចំសាសនាចក្រនេះ ! អូលីវើរ ខៅឌើរី បានពិពណ៌នាអំពីយុគសម័យនោះបានយ៉ាងល្អថា ៖ « នេះគឺជាថ្ងៃដែលពុំអាចបំភ្លេចបានឡើយ » ។ ព្រឹត្តិការណ៍ដ៏អព្ភូតហេតុបានបន្តមានរហូតមកដល់សព្វថ្ងៃនេះ ។
ខ្ញុំសូមផ្ដល់យោបល់ចំៗថាឆ្នាំនេះ យើងបានចាប់ផ្ដើមនូវទសវត្សរ៍មួយដែលបង្ហាញថាសំខាន់ដូចទសវត្សរ៍ផ្សេងទៀត បន្ទាប់ពីទសវត្សរ៍នៃការបង្កើតដែលគ្មានអ្វីប្រៀបនោះមកគឺជិតពីរសតវត្សមកហើយ ។
ទសវត្សរ៍របស់យើង
ខ្ញុំសូមពន្យល់អំពីរឿងនេះ ។ នៅចន្លោះឆ្នាំ២០២៤ និងឆ្នាំ២០៣៤ យើងនឹងដកពិសោធន៍ព្រឹត្តិការណ៍ដ៏មានឥទ្ធិពលដែលនាំឲ្យមានឱកាសដ៏អស្ចារ្យដើម្បីបម្រើ រួបរួមជាមួយសមាជិក និងមិត្តភក្តិ និងដើម្បីណែនាំសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដល់មនុស្សកាន់តែច្រើនជាងពេលមុនៗ ។
យើងជាសាក្សីនៃគ្រាដ៏មានឥទ្ធិពលជាប្រវត្តិសាស្ត្រដ៏ពិត ពេលយើងអបអរសាទរថ្ងៃខួបកំណើតគម្រប់ ១០០ ឆ្នាំរបស់ប្រធាន រ័សុល អិម ណិលសុនជាមួយនឹងមនុស្សរាប់លាននាក់ ។
តាមរបាយការណ៍អំពីថ្ងៃខួបកំណើតរបស់ប្រធានណិលសុន សារព័ត៌មាន Newsweek បានសរសេរអត្ថបទមួយមានចំណងជើងថា « ថ្នាក់ដឹកនាំសាសនាដែលមានវ័យចំណាស់ជាងគេក្នុងពិភពលោកបានឈានចូលជន្មាយុ ១០០ឆ្នាំ » ។ រួចពួកគេបានដាក់បញ្ជីឈ្មោះថ្នាក់ដឹកនាំសាសនាវ័យចំណាស់ជាងគេទាំង ១០ រូបនៅក្នុងពិភពលោក—មានប្រធាន ណិលសុន នៅលេខរៀងទីមួយ រួមទាំងសម្ដេចប៉ូប ហ្រ្វង់ ស៊ីស និងសម្ដេចសង្ឃដាឡៃឡាម៉ាផងដែរ ។
សេចក្ដីថ្លែងការណ៍មកពីអត្ថបទសារព័ត៌មាន New York Times តំណាងឲ្យស្មារតីនៃសារព័ត៌មានអន្តរជាតិថា ៖ « នៅក្នុង[ សហរដ្ឋ ]វដ្ដនៃការបោះឆ្នោតជ្រើសរើសប្រធានាធិបតី បានបំផុសឲ្យមានការស្រាវជ្រាវអំពីអាយុ និងភាពជាអ្នកដឹកនាំដ៏សំខាន់ របស់ប្រធាន ណិលសុន បានផ្ដល់យោបល់ថា ថ្ងៃខួបកំណើត ១០០ ឆ្នាំគឺជាថ្ងៃដ៏សប្បាយរីករាយ យ៉ាងហោចណាស់នៅក្នុងសាសនាចក្ររបស់លោក ។ លោកនៅតែជាបុគ្គលដ៏ល្បីមួយរូបនៅក្នុងចំណោមសមាជិកនៃសាសនាចក្រ ដែលពួកគេមើលទៅប្រធានរបស់ពួកគេមិនគ្រាន់តែជានាយកប្រតិបត្តិប៉ុណ្ណោះទេ ប៉ុន្តែជា ‹ ព្យាការី អ្នកមើលឆុត និងអ្នកទទួលវិវរណៈ › » ។
យើងមានអំណរគុណណាស់ដែលថ្ងៃកំណើតដ៏សំខាន់របស់ប្រធាន ណិលសុន ផ្ដល់ឱកាសឲ្យយើងណែនាំទៅកាន់មនុស្សទូទាំងសកលលោកឲ្យស្គាល់ព្យាការីរបស់ព្រះ ជាការអបអរសាទរ ដែលមិនអាចបំភ្លេចបានឡើយ ។
នៅដើមនិទាឃរដូវនេះ មជ្ឈមណ្ឌលដែលបានជួសជុលកែលម្អនៅវិសាលដ្ឋានព្រះវិហារបរិសុទ្ធ—ត្រូវបានដាក់បង្ហាញ—ដោយមានការដាក់តាំងទង់ជាតិអន្តរជាតិដែលតំណាងឲ្យប្រទេសដែលទទួលស្គាល់សាសនាចក្រ ។ ច្រកចូលមជ្ឈមណ្ឌលនោះមានស្លាកថ្មក្រានីតដែលមានពាក្យព្យាករណ៍ទាំងនេះ ៖ « នៅជាន់ ក្រោយបង្អស់ នោះភ្នំជាទីស្អាងព្រះវិហារនៃព្រះយេហូវ៉ានឹងបានតាំងឡើងខ្ពស់លើសអស់ទាំងភ្នំធំៗ ហើយនឹងបានតម្កើងឡើងជាប្រសើរជាងអស់ទាំងភ្នំតូចៗដែរ អស់ទាំងសាសន៍នឹងចូលហូរហែទៅក្នុងទីនោះ » ។
ប្រាកដណាស់ព្រឹត្តិការណ៍ដ៏សំខាន់ដែលនឹងកើតឡើងអំឡុង ១០ ក្រោយបង្កើតជាការបើកសម្ដែងមួយដែលសម្រេចតាមការព្យាករនេះរបស់អេសាយ ។
សូមពិចារណាអំពីចំនួននៃការបើកសម្ពោធព្រះវិហារបរិសុទ្ធ និងការឧទ្ទិសឆ្លងដែលរៀបចំដើម្បីធ្វើនៅទសវត្សរ៍ក្រោយមានព្រះវិហារបរិសុទ្ធចំនួន ១៦៤ ព្រះវិហារបរិសុទ្ធ និងកំពុងរាប់ ។ សូមនឹកស្រមៃថា បងប្អូន និងមិត្តភក្ដិរាប់លាននាក់ដើរក្នុងព្រះដំណាក់នៃព្រះអម្ចាស់ ។ អគារជានិមិត្តរូបនៃព្រឹត្តិការណ៍ទាំងនេះនឹងជាការឧទ្ទិសឡើងវិញសម្រាប់ព្រះវិហារបរិសុទ្ធ សលត៍ លេក ព្រមទាំងសកម្មភាពដែលជាប់ទាក់ទង ។ ព្រឹត្តិការណ៍ទាំងនេះនឹងក្លាយជាថ្ងៃដែលពុំអាចបំភ្លេចបាន ។
ឆ្នាំ២០៣០ នឹងជាឱកាសទូទាំងពិភពលោកដើម្បីរំឭកខួបពីររយឆ្នាំនៃការបង្កើតសាសនាចក្រនេះ ។ ទោះបីជាវាលឿនពេកដើម្បីនិយាយថាសាសនាចក្រនឹងធ្វើព្រឹត្តិការណ៍នេះ តែវានឹងអនុញ្ញាតឲ្យយើងអញ្ជើញគ្រួសារ មិត្តភក្ដិ មិត្តរួមការងារ និងភ្ញៀវកិត្តិយសដើម្បី « មក ហើយមើល » និងយល់ឲ្យច្បាស់ពីឥទ្ធិពលដ៏មានអានុភាពដែលសាសនាចក្រមាននៅក្នុងជីវិតរបស់សមាជិកសាសនាចក្រ ។
នៅឆ្នាំ២០៣៤ ឥស្សរជន អ្នកទស្សនា និងអត្តពលិករាប់ម៉ឺននាក់មកពីជុំវិញពិភពលោកនឹងជួបជុំគ្នាយ៉ាងច្រើនកុះករនៅលើផ្លូវនៃទីក្រុងសលត៍ លេក ជាកន្លែងប្រកួតកីឡាអូឡាំពិករដូវរងា ។ ប្រហែលជាវាគ្មានការបង្ហាញពីសាមគ្គីភាពនៅទូទាំងពិភពលោកណាមួយដែលធំជាងការជួបគ្នានៅក្នុងកីឡាអូឡាំពិកនេះឡើយ ។ មនុស្សជុំវិញពិភពលោកនឹងផ្ដោតលើសាសនាចក្រ និងសមាជិក ដោយផ្ដល់ឱកាសដ៏ច្រើនដើម្បីស្ម័គ្រចិត្ត បម្រើ និងចែកចាយដំណឹងដ៏រីករាយតាមរយៈទង្វើល្អៗ—ជាព្រឹត្តិការណ៍មួយដែលមិនអាចបំភ្លេចបានឡើយ ។
ព្រឹត្តិការណ៍នាពេលខាងមុខទាំងនេះនឹងផ្ដល់ឱកាសឲ្យសមាជិកសាសនាចក្រនៅគ្រប់ទីកន្លែងចែកចាយដំណឹងដ៏រីករាយនៃដំណឹងល្អនៃព្រះយេស៊ូវគ្រីស្ទតាមរយៈពាក្យសម្ដី និងទង្វើ វាគឺជាទសវត្សរ៍ដែលមិនអាចបំភ្លេចបានឡើយ ។
ដំណឹងដ៏រីករាយ
នៅក្នុងការប្រជុំមួយប៉ុន្មានសប្ដាហ៍មុនថ្ងៃកំណើតរបស់លោក ប្រធាន ណិលសុន បានចែកចាយហេតុផលដែលលោកចូលចិត្តឃ្លា « ដំណឹងដ៏រីករាយ » ។ លោកបានកត់ចំណាំយ៉ាងច្បាស់ថា ឃ្លានេះមានន័យថា អំណរ និងសុភមង្គល ។ ប៉ុន្តែ « ដំណឹងដ៏រីករាយ » មានន័យលើសពីនោះ ។ លោកបានពន្យល់ថា ឃ្លានេះមានដើមកំណើតពីពាក្យក្រិកថា euangelion ដែលមានន័យថា « ព័ត៌មានល្អ » ឬ « ដំណឹងល្អ » ។ សុភមង្គល និងអំណរនៅក្នុងជីវិតនេះ និងជីវិតបន្ទាប់តែងតែតភ្ជាប់នឹងដំណឹងល្អនៃព្រះយេស៊ូវគ្រីស្ទ ។ ដូច្នេះឃ្លា « ដំណឹងដ៏រីករាយ » ចាប់យកអត្ថន័យទាំងនេះតាមរបៀបដ៏អស្ចារ្យមួយ ។
« មានមនុស្សលោក[ ប្រុស និងស្រី ]ដើម្បីឲ្យគេអាចមានអំណរ » ។ ព្រះវរបិតាសួគ៌បានប្រទាននូវផែនការនៃសុភមង្គល ដើម្បីឲ្យមានអំណរតាមរយៈពរជ័យទាំងឡាយរបស់ទ្រង់ ។ ពរជ័យទាំងនេះរួមមានការរស់នៅក្នុងវត្តមានរបស់ទ្រង់ជាក្រុមគ្រួសារដ៏អស់កល្បជានិច្ច ។ ដង្វាយធួននៃព្រះយេស៊ូវគ្រីស្ទ គឺជាចំណុចយ៉ាងសំខាន់ចំពោះផែនការនៃសេចក្តីសង្គ្រោះរបស់ព្រះដើម្បីប្រោសលោះយើង ។ ដើម្បីទទួលបានជីវិតដ៏នៅអស់កល្បជានិច្ច យើងត្រូវតែមករកព្រះគ្រីស្ទ ។ នៅពេលយើងធ្វើដូច្នេះ « ហើយជួយអ្នកដទៃឲ្យធ្វើដូចគ្នានេះ នោះយើងចូលរួមក្នុងកិច្ចការនៃសេចក្តីសង្រ្គោះ និងភាពតម្កើងឡើងរបស់ព្រះ » ។
សារលិខិតនៃដំណឹងដ៏រីករាយនៃដំណឹងល្អរបស់ព្រះយេស៊ូវគ្រីស្ទគឺជាសារលិខិតដ៏សំខាន់បំផុតនៅលើផែនដី ។ ហើយនោះគឺជាកន្លែងដែលយុវវ័យ និងយុវមជ្ឈិមវ័យនៃសាសនាចក្រត្រូវចូលរួម ។
ដើម្បីកម្លាំងនៃយុវជន
ឥឡូវនេះ ខណៈដែលទសវត្សរ៍ក្រោយនេះអាចនឹងត្រូវបានបំពេញដោយថ្ងៃ ដែលមិនអាចបំភ្លេចបាន សម្រាប់សមាជិកសាសនាចក្រគ្រប់រូប ការណ៍នេះក៏ពិតជាពិសេសចំពោះជំនាន់កំពុងពេញវ័យ ។ ក្មួយៗនៅលើផែនដីនាពេលនេះ ពីព្រោះក្មួយៗត្រូវបានជ្រើសរើសឲ្យមកទីនេះឥឡូវនេះ ។ ក្មួយៗមានកម្លាំង មានសមត្ថភាពដើម្បីធ្វើជាពួកសិស្សរបស់ព្រះគ្រីស្ទតាររបៀបដែលពុំធ្លាប់មានពីមុន ។
ប្រធាន ចច ឃ្យូ ខានុន បានបង្រៀនថា « ព្រះបានរក្សាទុកវិញ្ញាណជាច្រើន ដែលមានសេចក្តីក្លាហាន ហើយមានការប្តេជ្ញាចិត្តសម្រាប់គ្រាកាន់កាប់ត្រួតត្រានេះ ដើម្បីប្រឈមមុខនឹងពិភពលោកនេះ និងរាល់អំណាចមេកំណាច [ ហើយដើម្បី ] … កសាងទីក្រុងស៊ីយ៉ូននៃព្រះរបស់យើងឡើងដោយឥតភ័យខ្លាច អ្វីឡើយ » ។
ដោយសារតែហេតុផលនោះ ខ្ញុំចង់និយាយទៅកាន់ក្មួយៗនៃជំនាន់កំពុងពេញវ័យ ដោយអញ្ជើញក្មួយៗឲ្យនឹកស្រមៃថាតើទសវត្សរ៍ក្រោយនេះ ដែលជាគ្រាមួយដែលមិនអាចបំភ្លេចបាន នឹងមានភាពរីករាយយ៉ាងណាខ្លះ ចំពោះក្មួយៗ ។ ខ្ញុំក៏សូមផ្ដល់ពាក្យទូន្មានមួយចំនួន និងការលើកទឹកចិត្តដ៏សាមញ្ញដែលអាចជំរុញក្មួយៗឲ្យអង់អាចនៅអំឡុងទសវត្សរ៍ក្រោយនេះផងដែរ ។
ដូចគ្នានឹងក្មួយៗភាគច្រើនដែរ ខ្ញុំមានទូរសព្ទទំនើបមួយ វាជួនកាលបានដាក់រូបភាពចូលគ្នាដោយបង្ហាញពីអ្វីដែលខ្ញុំធ្វើនៅថ្ងៃជាក់លាក់មួយទាំងខ្ញុំពុំបានដឹងមុន ។ វាតែងតែភ្ញាក់ផ្អើលពេលឃើញថាមានរឿងជាច្រើនបានផ្លាស់ប្ដូរចំពោះរូបខ្ញុំ និងគ្រួសារ ក្នុងអំឡុងពេលតែប៉ុន្មានឆ្នាំសោះ ។
សូមស្រមៃថារូបថតក្នុងទូរសព្ទ របស់ក្មួយៗ នឹងមានក្នុងរយៈពេល ១០ ឆ្នាំចាប់ពីពេលនេះទៅ ! ក្មួយៗអាចឃើញថាខ្លួនឯងបញ្ចប់ថ្នាក់វិទ្យាល័យ ឬមហាវិទ្យាល័យ ទទួលអំណោយទានពិសិដ្ឋផ្ទាល់ខ្លួន ទៅបេសកកម្ម រៀបការ និងមានកូនដំបូង ។ ព្រឹត្តិការណ៍នេះវានឹងក្លាយជាទសវត្សរ៍ ដែលមិនអាចបំភ្លេចបានឡើយ សម្រាប់ក្មួយៗ ។ ប៉ុន្តែវានឹងកើតឡើងដូច្នេះ យ៉ាងពិត បើក្មួយៗខិតខំធ្វើជាពន្លឺដល់ពិភពលោកនេះអំពីរបៀបដែលដំណឹងដ៏រីករាយនៃដំណឹងល្អនៃព្រះយេស៊ូវគ្រីស្ទមិនត្រឹមតែអាចបង្កើន និងពង្រឹងជីវិតក្មួយៗប៉ុណ្ណោះទេ ប៉ុន្តែជីវិតគ្រួសារ មិត្តភក្ដិ និងមិត្តតាមប្រព័ន្ធផ្សព្វផ្សាយសង្គមរបស់ក្មួយៗផងដែរ ។
ក្មួយៗអាចនឹងងឿងឆ្ងល់ថាតើធ្វើកិច្ចការនេះដូចម្ដេច ។
ពួកព្យាការីរបស់ព្រះបានបង្រៀនយើងថាកិច្ចការត្រូវធ្វើឡើងតាមរយៈសកម្មភាពសាមញ្ញបួនយ៉ាង ដែលហៅថាជាការទទួលខុសត្រូវដែលបានតែងតាំងមកពីព្រះ ៖ទីមួយ ការរស់នៅតាមដំណឹងល្អរបស់ព្រះយេស៊ូវគ្រីស្ទ ទីពីរ ការមើលថែដល់អ្នកខ្វះខាត ទីបី ការអញ្ជើញមនុស្សទាំងអស់ឲ្យទទួលយកដំណឹងល្អ និងទីបួន បង្រួបបង្រួមក្រុមគ្រួសារសម្រាប់ភាពអស់កល្បជានិច្ច ។ ដែលអស្ចារ្យគឺថា សកម្មភាពនីមួយៗអាចធ្វើឡើងតាមរបៀបសាមញ្ញធម្មតាបំផុត ។
ការទទួលខុសត្រូវដែលបានតែងតាំងមកពីព្រះ
ខ្ញុំសូមសន្យានឹងក្មួយៗថា គ្រានេះនឹងក្លាយជាទសវត្សរ៍មួយដែលមិនអាចបំភ្លេចបាន ចំពោះក្មួយៗ បើក្មួយៗឱបក្រសោបនូវការទទួលខុសត្រូវទាំងបួននោះដែលបានតែងតាំងមកពីព្រះ ។ ចូរយើងពិចារណាពីអ្វីដែលការណ៍នេះតម្រូវឲ្យមាន ។
ទីមួយ ការរស់នៅតាមដំណឹងល្អរបស់ព្រះយេស៊ូវគ្រីស្ទ ។ សូមសិក្សាប្រសាសន៍របស់ពួកព្យាការី ហើយរៀនស្រឡាញ់ព្រះវរបិតាសួគ៌ារបស់ក្មួយ ។ សូមបង្វែរចិត្តក្មួយទៅរកទ្រង់ ហើយខិតខំដើរតាមផ្លូវរបស់ទ្រង់ ។ ចូរលើកតម្កើងដោយ « ទំនុកចិត្តលើសេចក្តីសញ្ញា » ដូចដែលអែលឌើរ សូរ៉េស បានពិពណ៌នា ។ ទំនុកចិត្តនេះកើតចេញមកពីការធ្វើសេចក្ដីសញ្ញាដើម្បីដើរតាមព្រះយេស៊ូវគ្រីស្ទ ដោយដឹងថា ព្រះអង្គសង្គ្រោះនឹងពង្រឹង និងគាំទ្រក្មួយៗ ។
ចូរឲ្យមិត្តរបស់ក្មួយមើលឃើញអំណរដែលក្មួយៗមាននៅក្នុងការរស់នៅតាមដំណឹងល្អ ហើយក្មួយៗនឹងក្លាយជាសារលិខិតនៃដំណឹងល្អដ៏ល្អបំផុតដែលពួកគេពុំធ្លាប់ទទួល ។
ទីពីរ សូមឈោងទៅជួយដោយសេចក្ដីមេត្តាករុណាដើម្បីមើលថែដល់អ្នកខ្វះខាត ។ ជំនាន់របស់ក្មួយៗគឺខ្វល់ខ្វាយខ្លាំងចំពោះអ្នក ដែលជួបអកុសល ។ នៅពេលណាគ្រោះមហន្តរាយកើតឡើង សមាជិកសាសនាចក្រប្រញាប់ប្រញាល់ទៅជួយសម្អាតកំទេចកំទី ហើយលួងលោមចិត្តអ្នកដែលបានរងគ្រោះ ហើយមនុស្សភាគច្រើនដែលពាក់អាវយឺត « ដៃជំនួយ » គឺជាពួកយុវវ័យ និងអ្នកដែលមានអាយុម្ភៃឆ្នាំជាង ។ វាគឺជានិស្ស័យរបស់ក្មួយៗដើម្បី « ទទួលបន្ទុកគ្នាទៅវិញទៅមក » ហើយ « ទួញយំជាមួយនឹងអ្នកណាដែលទួញយំ » ។ តាមរយៈការធ្វើដូច្នេះ យើង « សម្រេចតាមក្រឹត្យវិន័យនៃព្រះគ្រីស្ទ » ។
អ៊ីវ៉ាន់ គឺជាក្មេងប្រុសម្នាក់ក្នុងអង្គការបឋមសិក្សា បានសម្រេចចិត្តចំណាយពេលវិស្សមកាលនៅរដូវក្ដៅរបស់គាត់ប្រមូលផ្ដុំគ្រឿងផ្សំដើម្បីធ្វើនំសាំងវ៉ិចធ្វើពីចាហួយ និងប៊ឺសណ្តែកដីដើម្បីបរិច្ចាគទៅកន្លែងផ្ដល់អាហារក្នុងមូលដ្ឋានរបស់គាត់ ។ គាត់បានរកឃើញគម្រោងនេះនៅលើវិបសាយJustServe ។ ក្មេងប្រុសអ៊ីវ៉ាន់ក៏បាននាំមិត្តរួមថ្នាក់គាត់ទាំងអស់ជួយប្រមូលចាហួយជាង ៧០០ ដបផងដែរ ! ចូរឲ្យមនុស្សដែលក្មួយៗបម្រើដឹងថា ការខ្វល់ខ្វាយចំពោះពួកគេបានចាក់ឫសនៅក្នុងសេចក្តីស្រឡាញ់ដែលក្មួយៗមានចំពោះព្រះ និងបំណងប្រាថ្នារបស់ក្មួយៗដើម្បីប្រព្រឹត្តចំពោះអ្នកជិតខាងដូចជាខ្លួនឯងដែរ ។
ទីបី អញ្ជើញមនុស្សទាំងអស់ឲ្យទទួលយកដំណឹងល្អ ។ ឆ្នាំនេះយើងបានបើកបេសកកម្មថ្មីចំនួន ៣៦កន្លែងនៅ ទូទាំងពិភពលោកដើម្បីផ្ទុកចំណុះអ្នកដែលមានបំណងចង់បម្រើបេសកកម្មពេញម៉ោង ។ នៅក្នុងយុគសម័យមួយដែលយុវវ័យជាច្រើនកំពុងជ្រើសរើសចូលរួមក្នុងសកម្មភាពសាសនាជាផ្លូវការ នោះគឺជាការអស្ចារ្យណាស់ ហើយវាថ្លែងអំពីទីបន្ទាល់ដ៏អស្ចារ្យរបស់ក្មួយៗ ។ មិនថាបម្រើពេញម៉ោង ឬអត់ សូមក្មួយៗដឹងអំពីសមត្ថភាពដ៏អស្ចារ្យរបស់ក្មួយៗដើម្បីជះឥទ្ធិពលដល់មិត្តក្មួយៗ នៅពេលក្មួយៗស្រឡាញ់ ចែកចាយ និងអញ្ជើញពួកគេរកដំណឹងល្អនៃព្រះយេស៊ូវគ្រីស្ទ ។
ទីបួន បង្រួបបង្រួមក្រុមគ្រួសារសម្រាប់ភាពអស់កល្បជានិច្ច ។ ពេលខ្ញុំទៅព្រះវិហារបរិសុទ្ធជុំវិញពិភពលោក ខ្ញុំស្ងប់ស្ងែងចំពោះក្រុមយុវវ័យដ៏ច្រើនដែលកំពុងរង់ចាំនៅឯអាងជ្រមុជទឹក និងយុវមជ្ឈិមវ័យដ៏ច្រើនកំពុងបម្រើជាអ្នកធ្វើពិធីបរិសុទ្ធ ។ ថ្មីៗនេះ យុវវ័យចំនួនជាង ៦០០ នាក់មកពីប្រទេសស្កុតលែន និងអៀរឡង់ បានធ្វើដំណើរទៅព្រះវិហារបរិសុទ្ធប្រេស្តុន អង់គ្លេស ធ្វើពិធីបរិសុទ្ធជាង ៤,០០០ ពិធី ដែលភាគច្រើនគឺធ្វើសម្រាប់បុព្វការីជនរបស់ពួកគេផ្ទាល់ ! ខ្ញុំសូមលើកទឹកចិត្តក្មួយៗឲ្យចូលរួមក្នុងពង្សប្រវត្តិ ចំណាយពេលនៅក្នុងព្រះវិហារបរិសុទ្ធ ហើយរៀបចំខ្លួនដោយប្រុងប្រយ័ត្នដើម្បីធ្វើជាបុរស ឬស្ត្រីដែលត្រៀមខ្លួនរៀបការនឹងដៃគូដែលស័ក្ដិសមដូចគ្នានៅក្នុងព្រះវិហារបរិសុទ្ធ ។ សូមបង្កើតលំនាំនៅក្នុងជីវិតរបស់ក្មួយៗ ឥឡូវនេះ ដើម្បីដាក់ព្រះវិហារបរិសុទ្ធជាផ្នែកដ៏សំខាន់ក្នុងជីវិតរបស់ក្មួយៗ ។
សេចក្ដីបញ្ចប់
បងប្អូនប្រុសស្រី និងមិត្តវ័យក្មេងជាទីស្រឡាញ់របស់ខ្ញុំអើយ នៅពេលខាងមុខវានឹងមានរឿងលំបាកៗសម្រាប់យើងម្នាក់ៗ ។ ប៉ុន្តែ នៅពេលយើងឈានចូលទសវត្សរ៍ខាងមុខជាគ្រាដែលមិនធ្លាប់មាន សូមឲ្យយើងចែកចាយដំណឹងដ៏រីករាយតាមរយៈទង្វើសាមញ្ញៗនៃការរស់នៅ ការមើលថែ ការអញ្ជើញ និងបង្រួបបង្រួម ។ នៅពេលយើងធ្វើដូច្នោះ ព្រះអម្ចាស់នឹងប្រទាននូវបទពិសោធន៍ដែលមិនអាចបំភ្លេចបានដល់បងប្អូន ។
ខ្ញុំសូមថ្លែងទីបន្ទាល់ថា អស់អ្នកដែលមករកព្រះអម្ចាស់ដោយដួងចិត្តស្មោះសរ និងអស់ពីចិត្ត និងមានព្រះនាមនៃព្រះអង្គសង្គ្រោះនៅលើបបូរមាត់របស់ពួកគេ ហើយមានព្រះវិញ្ញាណបរិសុទ្ធក្នុងព្រលឹងរបស់ពួកគេ និងដែលកំពុងចាប់ផ្តើមដំណើរដ៏អស្ចារ្យ និងរុងរឿងនេះ បងប្អូននឹងរកឃើញ ហើយដកពិសោធន៍នូវពរជ័យសេឡេស្ទាលដ៏បរិបូរ និងទទួលសាក្សីថា ព្រះស្ដាប់ឮបងប្អូន ស្គាល់បងប្អូន និងស្រឡាញ់បងប្អូន ។ បងប្អូននឹងដកពិសោធន៍នូវថ្ងៃដែលមិនអាចបំភ្លេចបាន ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។