Sa iKoya Sara Ga Oqori na Sala

Bisopi H. David Burton

Matabisopi Vakatulewa

E dodonu me rawati toka e dua na ivakatagedegede ena qai rawa kina na vakaitavi ena veika bibi vakayalo ni bula.

Ni sa bula. Au taleitaka meu soqoni vata kei kemuni na matabete ni Kalou, ke marautaka na veitacini ni vuravura raraba eda wasea ka maroroya. Na yalo uasivi e lako mai ena noda namaka ni da na vakasalataki ena veitikina macala vinaka sara ka talei ni kosipeli i Jisu Karisito.

Ena yakavi edaidai na noqu vosa ena vakatabakidua vei ira na cauravou ena Lotu. Oi kemuni ko ni tiko ena dua tale na ivakatagedegede ni yabaki ni bula ko ni sureti mo ni vakarorogo talega.

Ena gauna ni Siganisucu ka se qai vakanadakui ga, e a vakaitavi ko Walter Cronkite na dauvola itukutuku vata kei ira na Tabernacle Choir kei na Mata iVakatagi ena Temple Square ena nodra vakatasuasua ni Siganisucu. “E … 19 na yabaki na nona kakaburaki ena ‘iTukutuku ni CBS’ … E a kilai levu ko [Mr Cronkite] me ‘tamata vakabauti duadua e Amerika.’”¹ Ena gauna e a tarogi kina se gadreva me vakananumi vakacava, e a sauma ka vaka, “O, me vaka e dua ka kitaka na nona vinaka duadua.”² Ena nona cakacaka kilai levu, e dau vakacavara na nona itukutuku yadua ena malanivosa, “Sa ikoya sara ga oqori na sala.” Ena bogi edaidai, me da veivosakitaka sara ga oqori.

Ena dua na koniferedi walega oqo ni iteki, e a wasea vata kina kei au na peresitedi ni iteki e dua na italanoa. E a tarogi luvena se cava e a veivosakitaki ena dua na soqoni ni yasa ni buka ena yakavi ni Sigatabu se qai oti walega oqo. E a sauma na cauravou, “tosoicake na ivakatagedegede.” E a qai vakaraitaka vei tamana ni sa oca ena ulutaga oqo baleta ni ulutaga talega ni veikalasi kece kei na bose. Na imatai ni noqu vakasama sa ikoya: “E sa uasivi dina; na itukutuku ni parofita e sa veivosakitaki, rogoci, ka cakacakataki.” Na ikarua ni noqu vakasama e baleta na veika e vakila na cauravou oqo ena veika e talevi wasoma. Na veika e dau talevi wasoma e rawa ni dau vakatubu rarawa ni da saga tiko me da kitaka na noda vinaka sara.

Ena noqu gauna ni itabagone e rawarawa sara meu na kua ni rogoci tinaqu ka ni dau wasoma na nona dau tukuna tiko, “Tevita, nanuma tiko se ko cei ko iko.” Ni talevu lesu e dau yaco mai kina e so na vosa lasa mai vei ira na noqu itokani. E tubu na cudru ni dau taleva ka dusia tiko ko tamaqu na vale nei Peresitedi George Albert Smith ni keitou daulakova tiko na 13^th East e Salt Lake City ka talevi lesu vei au ni parofita bula ni Kalou ka dau lomani au e a vakaitikotiko ekea. Edaidai, au sa vakavinavinaka vakalevu ena veika e dau tukuni wasoma ko ya.

Na vosa “tosoya cake na ivakatagedegede” e dau vakayagataki wasoma ena vuravura ni qito me vakamacalataki kina na rawati ni vakatagedegede e cake ni veika e vakayacori. Na vakayagataki ni dua na vosa vakatautauvata ni qito me vakamacalataka na rawati ni ivakatagedegede e cake ni veika e vakayacori e rawa ni vukea na vakamacalataki ni cava e bibi kina na saumi ni ka e kerea vei keda ko Peresitedi Hinckley me da kitaka ena koniferedi sa oti ena nona kaya: “Au nuitaka ni koi kemuni na noda cauravou, kei na goneyalewa, ko ni na sotava na bolebole e biuta mai ko [Elder Ballard]. Me da tosoya cake na ivakatagedegede ni bula kilikili kei na nodra kila ko ira era lako yani ki vuravura me ra mata ni Turaga o Jisu Karisito.”³

Ena dua na yabaki sa oti keimami a sotava kina e dua na Qito Levu ni Vuravura totoka ena Vulaibatabata e Salt Lake City. E vuqa na qito ena Olympics oqo me ra rawata ko ira na dauqito e dua na itagede ni rawa ka me qai rawa ni ra curu me ra qito. Na noda bula sa tautauvata ki na itagede era digitaki kina na dauqito ni Olympics, o ya ni dodonu me rawati toka e dua na ivakatagedegede ena qai rawa kina na vakaitavi ena veika bibi vakayalo ni bula. Ko ira na dauqito ni vuravura era vakaitovotaki ena kena ituvatuva ni vesiga. Era vulica vinaka na veika e vinakati ena nodra qito. O koya walega oqori ena qai rawa kina me ra vakaitavi ena qito. Ka sa ikoya sara ga oqori na sala.

Ra cauravou ke ko ni gadreva mo ni dauqito ni vuravura ka rawata mo ni vakaitavi ena veika bibi e dau yaco ena bula me vaka na vakatikori ni matabete, veivakalougatataki ni valetabu, kei na veiqaravi ni kaulotu, mo yavutaka talega e dua na ituvatuva ni bula ivakarau ni veisiga ni yalodina, bula dodonu, vuli, ka daumasu. Ka sa ikoya sara ga oqori na sala.

Ko ira na dauqito ena Qito ni Vuravura era kila na nodra qito ka matata vei ira na lawa e vauca. Ni sega ni muri na lawa e rawa ni kauta mai na itotogi bibi ka rawa sara ga ni ra sega ni vakabau. Ena Qito ni Vuravura sa oti, na kena sega ni muri na lawa kei na kena vakayagataki na waigaga ni veivakamatenitaki mai vei ira na vakaitavi e vakavuna me kautani na metali mai vei ira na dauqito. E dua na itotogi levu duadua me soli vua e dua na dauqito e soli ena qito na golf. Na kena sainitaki na kadi ni poidi ena poidi cala ka vakacurumi ena dua ga na 18 na qara sa na vakavuna na sega ni wiliki ni nomu qito. E sega ni dua na vosota. E sega ni dua na betena kevaka na cala ko ya e vakavinakataka se vakacataka na poidi; na itotogi e dua tikoga—vakasukai mai na qito.

Ni oti e 50 na yabaki, au se rawa ni rogoca tikoga na veivosa ni dua na vakailesilesi ni qito ni tukuna, “Vosoti au, na luvequ, keitou sa na vakasukai iko mai na qito ni ko sainitaka na kadi cala ni poidi.” Na noqu vakasukai e vu mai na noqu tukuna vua na vakailesilesi niu gadreva meu vakadodonutaka na noqu poidi. Ena vica na macawa au a kaya tikoga vei au: “Na cava mada au a sega ni galu tikoga kina? E sega ni dua tale e kila na cala, ka kena ikuri, e cala sega ni nakiti ena kena volai. Na kena isoqoni kece e dodonu vinaka.” Me vaka ni vinaka sara na noqu vakaitavi ka kunei au ena kedra maliwa na qaqa, au a sega ni vakaicocovi. Ia sa ikoya sara ga oqori na sala.

Oi kemuni na noqu itokani gone, e bibi dina na lawa, e rawa sara ga ni veivakaleqai. E tu talega na itotogi ena bula, e rawa ni veivakasukai, kevaka e voroki na lawa. Na noda vakaitavi ena veika bibi ni bula e rawa ni vakacacani kevaka eda sega ni muria na lawa ka tu ena ivakaro ni Tamada Vakalomalagi. Na vakaitavi ena ivalavala ca ni veimoceri, na waigaga ni veivakamatenitaki ka vakatabui tu, na talaidredre vakalawa, se veivakalolomataki e rawa ni tarovi keda ena vakaitavi ena gauna bibi. Ena vinaka me da qarauna me da raica na lawa me dua na ka ka rawa ni taqomaki keda, ka sega ni sinucodo ni veivesuki. Na talairawarawa e taracake na kaukauwa. Ka sa ikoya sara ga oqori na sala.

Ena 1834, e a vola kina na profita o Josefa Simici, “E sega ni dua na vula meu ogaoga kina me vaka na Noveba; ia me vaka ni noqu bula e tu kina na ogaoga kei na itavi sega ni oti rawa, au a kitaka kina na lawa oqo: Ni sa vakaro na Turaga, kitaka.”⁴

Vei ira e so, e bisinisi na qito. Na duidui ni qaqa kei na druka e rawa ni dua toka na ilavo levu. Ko ira na dauqito era saumi ira na itini me ra qarava na nodra veika vakabisinisi iTini, daunivakaukauwa yago, dauveivakatavulici, kei na manidia ena vukea na dauqito me vinaka na nona vakaitavi

Na Tamada mai Lomalagi e vakarautaki ira na luvena gone taleitaki kei na dua na timi kaukauwa ni veitokoni ka vinaka cake mai na kena ka ra vakayagataka na dauqito. Era itini totoka duadua na neimami itubutubu. Era qarauni keimami. E sega walega ni ra via kila na veika e baleti keimami, ia e baleta ni ra lomani keimami, era daunivakasala totoka duadua.

Ena nona vakavulici ira na kai Kolosa e a kaya kina na iApositolo o Paula, “Oi kemudou na gone, mo dou talairawarawa vei ira na nomudou qase ena ka kecega: ni sa vinaka sara oqo Vua na Turaga” (Kolosa 3:20). Me ikuri vei ira na noda itubutubu, vakasamataka na ibinibini tamata era veitokoni ka ra soli mai me ra vakavinakataka na noda cakacaka vakayalo. Na noda bisopi era vakaitavi vakadaunivakaukauwa yago ka ra vakayagataka na nodra ki vakamatabete tabu me ra vakalougatataka na noda bula. Ko ira na qasenivuli, kei na dauniveituberi vakavuvale era vakacavara na timi ni veitokoni ka ra vakasoqona vata na Turaga me vukei keda meda vakarau kina qito levu ni bula. Ena nomu muria ka talairawarawa, na nomu vakaitavi ena vinaka mai vakamalua. Ni sa ivakaro ni Turaga, kitaka. Ia sa ikoya sara ga oqori na sala.

E dua na duidui bibi ena kedrau maliwa na vinaka kei na cecere sa ikoya na ka era vakatoka na vuniwai ni mona ni qito na “vakanananu vakadua ki na dua na ka.” Ko ira na dauqito e tu vei ira na kaukauwa me rawa ni ra biuta vakatikitiki na veika sega ni yaga ka qarava vakadua na ka e bibi ki na nodra qaqa me rawa ni ra vakavinakataka kina na nodra vakaitavi. Na rai vakatabakidua e dua na ka bibi ki na qaqa.

Au a rogoca na nodrau veivosaki e dua na dauqito golf levu ko Arnold Palmer kei na dua na kedi gone ka vakayagataka tiko ena imatai ni gauna. Na kedi gone oqo, ni solia na ititoko ni golf vei Mr. Palmer, e tukuna vei koya ni yawa ni vanua ki na kuila e 165 na iyate. Oti e a qai vakaraitaka e so na ivakamacala ka sega ni kerei vua me baleta e dua na wai drodro sega ni laurai ena imawi kei na tiki ni qele sukusukura ena imatau. Ena sala loloma ka dei, e vakadeitaka ko Mr. Palmer vua na cauravou ni ivakamacala walega e gadreva sa ikoya na balavu ni vanua ki na qara. E a kuria tale ni sega ni vinakata me yali na nona vakanananu vakadua ena nona na leqataka na cava e tiko ena imatau se imawi.

E rawarawa me da guilecava na veika bibi sara ena bula. E levu na ka me veivakataqayataki. E so era voleka ni ra luvu ena leqa ni wai ena imawi, kei ira tale na so era kunea na vanua dredre ena imatau. Na tiko vinaka kei na rawa ka e lako mai ni da vakanananu vakadua ki na veika bibi e laurai mai na noda tavia vakadodonu e loma na polo—tosocake vakamatabete, bula kilikili ni valetabu, kei na cakacaka vakaulotu. Ia sa ikoya sara ga oqori na sala.

Me vakalougatataki kemuni yadua na Tamada Vakalomalagi. Au vakadinadinataka vei kemuni taucoko ni Karisito ko Jisu. E bula tiko, kei na Nona lomani keda e sega ni vakaiyalayala. Au vakavinavinaka ki na dua na profita levu ka vukei keda me da kila ni gauna e vakaro kina na Turaga, e gadrevi me da kitaka baleta o ya na kena sala. Ena yaca ni noda iVakabula ka Dauveivueti, o Jisu Karisito, emeni.