Na Veiyabaki Koula
Dau raici ira na wekada qase ena veika dina e baleti ira, ka kakua ena veika ga e rawa ni ra cakava.
Ena vica vata na yabaki sa oti ena Yakavi ni bera na Siganisucu, e a takali kina na luvena tagane e dua na wekaqu ena vuku ni niumonia. Eratou soqoni wavokita na kisi ni mate na matavuvale ena masu vakamatavuvale. E davo kosova na yavana na cauravou lailai e dua na itutuvi e a cakava ga na tinana.
Ni vakarau me sogo na kisi ni mate, a kalawa yani ki liu na tinaqu, mokota na marama tina lolosi oqo, ka vukea me rau tuvia vakavinaka na cauravou lailai. Na iotioti ni gauna erau raica kina na cauravou lailai oqo na nona itubutubu, ena gauna a moce koto kina, ka tutuvi koto ena nona itutuvi taleitaki. Sa dua na gauna bibi oqo. Oqori na veika era dau cakava na bubu!
Keitou lesu tale ki na siti ko Brigham me baleta na veibulu nei tamai watiqu, o William W. Smith. E a tucake tu ena yasa ni kisi ni mate ena rarawa bibi e dua na cauravou au a kilai koya mai na kalasi ni semineri. Au a sega ni kila ni rau veikilai kei na vugoqu.
E a kaya: “Ena dua na vulaikatakata au a cakacaka vua ena vanua ni teitei. E a tukuna vei au o Baraca Smith me baleta na lako ki na kaulotu. Ena sega ni rawa ni ratou tokona e dua na daukaulotu na noqu matavuvale. E qai kaya vei au o Baraca Smith meu masulaka, ka qai kaya, ‘kevaka o nanuma mo lako, au na sauma na nomu kaulotu,’ e qai yaco vakakina.”
Erau a sega ni bau kila na watiqu vata kei tinana. Oqori e dua na ka era dau cakava na tukanigone.
E tini na luvei keirau. Ena dua na Sigatabu tavaiyaya ni se matavuvale gone sara na neitou, a tiko voli ena soqoni ni sakaramede na watiqu. Me vaka na kena ivakarau, au a lako tu ena Sigatabu o ya. Eratou vakasinaita vinaka toka e dua na iyatu idabedabe na luvequ.
E a tucake mai o Sisita Walker, e dua na kena marama ulusika taleitaki, ka susugi iratou cake e 12 na gone, e mai dabe sara ena kedra maliwa na l uvequ vakasosa. Ni sa oti na soqoni, a vakavinavinaka vua na watiqu ena nona veivuke.
E qai kaya o Sisita Walker, “sa dua na ka na levu ni nomu osooso, se vakacava?” E deguvacu ga na watiqu. E qai masia na ligana o Sisita Walker ka kaya, “Se sinai tiko na ligamu ena gauna oqo; mai muri ena qai sinai na yalomu!” Sa dua dina na vosa vakaparofisai. Oqori na veika era dau cakava na buinigone.
Keirau a liutaka na Tabana ni Kaulotu mai New England. E a vakamau e dua vei ira na neimami daukaulotu ka mani lima na luvena. E a lako me laki raica mai e dua na motoka levu ka sega ni mani lesu tale mai. E a qai kunei e muri na yagona ena yasa ni dua na vanua ka ra dau veisivi kina na motoka; e a butakoci na nona motoka.
Au a qiritaka na nona peresitedi ni iteki meu soli veivuke. Sa solia oti o koya.
E kaya na tukanigone, “Keimami kila na neimami itavi. Keimami na sega ni gadreva e dua na veivuke mai na Lotu. Keimami kila na neimami itavi.” Oqori na veika era dau cakava na tukanigone!
Sa noqu inaki meu vosa vei kemuni me baleta ka vosa vei ira na tubunigone—o ira na tutu kei na bubu—kei ira na lewenilotu qase tale e so ka sega na luvedra ia era veisosomitaki me ra tubunigone.
E tukuna vei keda na ivolanikalou: “Sa tu na vuku vei ira na qase; Kei ira na yalomatua vei ira sa vuqa na nodra siga” (Jope 12:12).
Ena dua na soqoni ni iteki au raica kina e dua na iwiliwili levu ni lewenilotu qase. E vuqa vei ira era dawai. Au tukuna vei peresitedi ni iteki na kedra taleitaki.
E sauma mai o Peresitedi, “Io, ia era sega ni bulabula tu vakalotu,” kena ibalebale ni ra sega ni veiqaravi vakailiuliu se qasenivuli. Na nona ivosavosa e kena irairai ni sa vaka me ra icolacola.
Au tokaruataka na nona vosa, “Era sega ni bulabula tu ena Lotu?” ka taroga, “Era bulabula tiko beka ena kosipeli?” Taumada e sega ni kila na kena duidui.
Me vaka ga e levu vei keda, e a kauwaitaka tikoga vakalevu na veika era cakava na tamata ka sega ni raica rawa kina se na cava o ira, e dua na ivurevure bibi ni kila ka, vuku, kei na veivakauqeti.
Eda sotava tiko e dua na bolebole vakarerevaki. Sa lutu sobu tikoga na iwiliwili ni lewe ivuravura. Sa lutu sobu tikoga na levu ni vakasucu gone ena veimatanitu ka tubucake na veika e namaki me baleta na bula. Sa lewe lalai na veimatavuvale—sa nakiti me ra yalani. Ena so na vanua, ena loma ni vica wale ga na yabaki sa na levu cake na tubunigone mai vei ira na gone. Na kena sa qase cake tikoga na iwiliwili ni lewenivanua ena levu na kena revurevu vakailavo, vakaveimaliwai, ka vakayalo. Ena tara na tubu ni Lotu.
Sa dodonu me da vakavulici ira na noda itabagone me ra voleka yani vei ira na nodra tutu kei na bubu.
Eratou sa veivakasalataki na Mataveiliutaki Taumada ena dua na gauna lekaleka sa oti vei ira na goneyalewa ka ra sa vakavakarau tiko ki na bula vakamarama me ra duavata kei ira na tina kei na bubu ena iSoqosoqo ni Veivukei (raica na ivola ni Mataveiliutaki Taumada, 19 ni Maji 2003).
E so na goneyalewa era dau vakayawaki ira mai. E vinaka cake vei ira me ra tiko ga vakaitaba vata.
Kemuni na goneyalewa: Ni kakua ni yalowai vakalevu mo ni calata na veimaliwai vata kei ira na marama qase cake. Era na kauta mai ki na nomuni bula na veika e yaga cake sara vakalevu mai na veiitavi qaravi o ni dau taleitaka vakalevu.
Kemuni na iliuliu: Ni vakavulici ira na goneyalewa me ra volekati ira na tinadra na budra kei ira na kena marama ena iSoqosoqo ni Veivukei. Era sa na lewena kina e dua na isoqosoqo ka tautauvata kei na kena era lewena na cauravou ena kuoramu ni matabete.
Ena sega ni taucoko sara na noda kauwaitaki ira tiko na noda itabagone na nodra parokaramu, kei na veika kece eda cakava vei ira, vakavo sara kevaka eda vakavulica vei ira na inaki ni Veivakalesui mai. E a vakalesui mai na ki ni matabete ka vakatakilai mai na dodonu ni veivauci ka ra tara na valetabu me vauca vata na veitabatamata. Mai na gauna makawa ena veivakatakila e koto kina na wa koula tawamudu o ya, “Ena vagoleya ko koya na lomadra na qase vei ira na gone, kei na lomadra na gone vei ira na nodra qase,” (Malakai 4:6).
Bisopi: O ni kila beka ni so na leqa o ni dau kauwaitaka me baleti ira na itabagone, kei ira tale e so, ena rawa ni wali kevaka era na volekati ira tiko na tamadra kei na tinadra ka vakakina vei ira na tubudra, o ira na nodra lewe ni matavuvale qase?
Kevaka o sa vakaogai vakalevu ena levu ni veivakasalataki mo vakayacora, era tu na tacimu qase, na bubu ena tabanalevu, ka rawa ni ra veivakauqeti vei ira na marama vakawati gone ka me ra vaka na budra. Ka vakakina na tukanigone qase me baleti ira na cauravou. Era dau tudei na qase, era dau toso vakamalua ena vuku ni veika era sa sotava mai. Vulica mo vakayagataka na ivurevure o ya.
E kaya na Parofita o Josefa Smici, “Na sala me da muria ena dua na ka bibi sai koya mo vakumuni ira vata na turaga [kei na marama] yalomatua, turaga qase kila ka [kei na marama], me ra dau dabe vata ena veivosaki ena veigauna kece e basika kina na leqa” (Teachings of The Prophet Joseph Smith, digia o Joseph Fielding Smith [1976], 299).
Eda sa dau vakasokumuni ira vata ga na itabagone ka sega ni kauwaitaka me da vakaduavatataka na veitabatamata. E levu sara tu na veika e rawa ni ra cakava na itabaqase lewenilotu. Kevaka o dau raici ira na lewenilotu qase me ra luluqa vakalotu, tarogi iko, “Era bulabula tiko beka ena kosipeli?”
Kakua ni dau raibaleta e dua na kaukauwa cecere ni veitokoni ena masu mai vei ira na itubutubu kei na tubunigone. Nanuma tiko na “Sa yaga vakalevu na nona masu gumatua na tamata yalododonu” (Jemesa 5:16)
O Alama lailai, e dua na dau veisaqasaqa, a mokuti koya sobu e dua na agilosi ka tukuna vua, “Raica sa rogoca na Turaga na nodra masu na nona tamata, kei na masu talega ni nona tamata ko Alama na tamamu; ni sa masulaki iko vagumatua ko koya ena vakabauta me vakatakilai vei iko na ka dina; o koya oqo, meu vakatakila vei iko na lagilagi kei na kaukauwa ni Kalou, me saumi kina na ka era sa masuta na nona tamata ena vakabauta” (Mosaia 27:14)
Keirau sa raica kei na watiqu na nodra sa biuti keirau yani na tubui keirau kei ira na neirau itubutubu. E so na ka keirau a nanuma taumada ni icolacola se leqa sa yaco ena dua na gauna makawa sara me laurai ena dua tale na kena ivakarau me sa veivakalougatataki.
E a mate na tamai watiqu ena neirau vale. E a gadreva o koya me qarauni vakavinaka. Era a vakavulici na luvei keirau mai vei ira na nasi ena ivakarau ni nona qaravi na tukadra ka sa davo tu vakadua. Na veika era a vulica e yaga sara vakalevu vei ira vata kei keirau. Sa dua na ka na neimami vakavinavinakataka na nona a mai tiko vata kei keimami.
E a saumi lesu vakavicasagavulu vei keirau na nona a mai tiko, ena veivakauqeti a dau vakayacora vei ira na luvei keirau. Oqori e dua na ka uasivi ka ra sotava na luvei keirau ena nodra bula, e tautauvata na kena kau a vulica niu se gonetagane lailai ena nona a mate ena neitou vale o Tutu Packer.
Dau raici ira na wekada qase ena veika dina e baleti ira, ka kakua ena veika ga e rawa ni ra cakava.
O sa bau vakasamataka mada ena dua na gauna na vuna e tauyavutaka kina na Mataveiliutaki Taumada kei na Kuoramu ni iApositolo Le Tinikarua na Turaga me rawa kina ni ra veiliutaki tiko ga ena veitutu lelevu ni Lotu na tamata era sa kena turaga? Na ivalavala oqo e vakabibitaki kina na yalomatua kei na kila ka mai na gone ka waribariba.
Na yabaki ivakatautauvata ni Mataveiliutaki kei na Tinikarua ena gauna oqo na 77. Keimami sega ni se waribariba sara. Keimami sa sivia beka na gauna keimami se bulabula kina. Ia, sa vakarautaka na Turaga me vakaoqo.
Ena dua se rua na koniferedi sa oti, e kaya kina o Joseph Wirthlin ni bolei ira na lewe ni Tinikarua me ra veitau cici. Au a nanuma meu ciqoma na bolebole o ya. Au qai nanuma ni vinaka cake me keirau veitaucici kei na yabaki 96 o Baraca Davidi Haight. Au qai vakasamataka tale, de na qai qilaita na yavaqu ena nona ititoko o David, kau qai bera. Au sa mani vakasuka ga kina!
Ni keimami sota vata na Mataveiliutaki kei na Tinikarua, e 1,161 na levu taucoko ni neimami yabaki ka duidui na veika keimami sotava mai. E 430 na neimami yabaki cokovata vaka-Vakaitutu Raraba ni Lotu. E voleka ni veika kecega keimami veivosakitaka, ena dua vei keimami a tiko mai kina! Sa cakava oti—ka okati kina na ivalu!
Eda bula tu oqo ena veigauna dredre. Ena itabayabaki era na yacova mai na itabagone ena dua na gauna, ena sega ni lailai sobu na leqa ia ena levu cake ga. Era sa vakaraitaka na wekada qase ni na rawa ni vosoti na veika e so.
Era sa vakawati na luvei keirau ka biuta na vale me ra vakasaqara na nodra kalougata.
Eratou biubiu e dua na matavuvale ena dua na motoka makawa kei na luvedrau lalai. Sa tonawanawa tu na matai na watiqu. Au vakalomavinakataki koya ka kaya, “Na Lotu sa tu mai na vanua eratou lako kina. Ena tu mai kina e dua na bubu me sauma na nona taro me baleta na vakasaqa se na veisusu kei na dua na tutu me vakatavulica na cakacaka ni liga e so.”
E rawa ni laurai ena iSoqosoqo ni Veivukei e dua na bubu vakubeci. Ka na laurai ena kuoramu ni matabete e dua na tutu. Ia e sega ni ra tu kece ena Lotu na tutu kei na bubu.
E volia e dua na vale mai na dua na yasana vakayawa sara e dua na luvei keirau tagane. E vakaraitaka vei au na simede ena dua na tutu ni yavu ni sa kavoro tiko. E a taroga se cava me cakava.
Au a sega ni kila, ia au mani taroga, “E tiko voleka beka vei iko e dua na veiwatini qase?”
“Io,” e kaya, “erau tiko ena tai ni gaunisala e yasana ka dua e dua na veiwatini ka rau sa vakacegu tu.”
“Laki kerei koya me mai raica mada na ka oqori. E kila o koya na draki e keri.”
E a vakayacori na kerekere oqori, ka rogoca mai kina na ivakasala ni dua e qase cake ka sa sotava oti na veileqa vakaoqori kei na so tale. Oqori na veika e rawa ni ra vakayacora na tutu vakubeci.
“Mo vakarokorokotaki rau na tamamu kei na tinamu; me dede kina na nomu bula ena vanua sa solia vei iko ko Jiova na nomu Kalou” (Lako Yani 20:12).
E vakavuvulitaka na iApositolo ko Paula me ra vakavulici ira na yalewa uabula ko ira na yalewa “qase” kei ira na kena “qase”, me ra vakavulici ira na cauravou, “mo sa ivakarau ena cakacaka vinaka” (raica Taito 2:1–7).
Eda sa qase. Ena dua na gauna eda sa na kacivi kina ki na ilati. Eda na sega ni vorata rawa oqori. Eda na tovolea me da vakavulica na veika vakacakacaka eda sa vulica ena veiyabaki sa oti yani vei ira era gone cake vei ira na noda matavuvale kei ira tale na so.
Sa na sega ni rawa ni da cakava na veika eda a dau cakava ena dua na gauna e liu. Na veilesoni ni bula eda sa sotava mai, e so vei ira e mosimosi toka, ena rawa kina vei keda me da veivakasalataki, veivakadodonutaki, se veivakaroti sara vei ira na noda itabagone.
Ena nomuni veiyabaki koula e levu sara tu na veika me caka, ka levu na ka me da yaco me vakakina. Kakua ni taura na gauna oqo me gauna ni vakacegu mai na bula. Oqori, vei ira e so, ena wili vakatawayaga, ena wili sara mada ga me qaciqacia. O sa na veiqaravi oti beka ena kaulotu ka sa vakacegui beka mai ka nanuma me sai koya oqori na nomu veiqaravi ena Lotu, ia o na sega sara ni vagalalataki mai na nomu bulabula tiko ena kosipeli. “Ia mo dou gadreva sara mo dou qarava na Kalou, dou qai lesi ki na nona cakacaka” (V&V 4:3).
O na qai vulica beka e muri, ni o sa qase ka malumalumu, ni cakacaka bibi duadua sa ikoya mo vaqaqacotaka na nomu matavuvale vakataki iko, kei na nodra matavuvale na tani, me vauci ira vata na veitabatamata.
Au vakavulica tiko oqo e dua na ivakavuvuli dina. Au vakavuvulitaka tiko e dua na ivunau dina, “a ka oqo sa sala vata sara ga kei na ivakavuvuli a vakaroti vei kemudou ena ka a vakatakilai vei au” (V&V 128:7).
Ena serenilotu, “Na Yavu Tudei,” ka a tabaki ena 1835 ena imatai ni volanisere ni Yalododonu Edaidai, eda raica kina na veimalanivosa oqo:
Ni dou sa na qase dou sa qai kila
Ni sega ni veisau noqu loloma
Ni sa qai sikoa na ulumudou
Vaka ga na lami, vaka ga na lami
Vaka ga na lami Ni sa qai sucu mai?
(Sere, naba 85, t. 6)
Me caudre tikoga na yameyame ni nomudou ivakadinadina ni kosipeli vakalesui mai kei na nomudou ivakadinadina ni nomudou Dauveisereki me rawa kina ni ra vakatakata na ligadra na luveda ena buka ni nomudou vakabauta. Oqori na veika me ra dau cakava na tukada kei na buda! Ena yaca i Jisu Karisito, emeni.