Vakamalumalumutaka na Boi Ca ni iValavala Ca
Na Tamada Vakalomalagi dauloloma, … ena Nona kila ni da na ivalavala ca kece ka yaco me dukadukali, sa vakarautaka kina e dua na ivakarau ni veivakasavasavataki mai na ivalavala ca ka, … cakacaka vakaidina.
Na digidigi kece eda vakayacora, vinaka se ca, e salavata mai na kena isau.
Au a tubu cake mai ena dua na koro ka vuqa na tamata era vakatoka me vanua ni teitei sega ni lasa: Virden, New Mexico, wiliwili ni tamata 135. Ena dua na bogi ena gauna ni katakata, niu se gone, keitou a vaqara lasa voli, o iratou na tavalequ, e so na neitou itokani, kei au. E a vakatura e dua me keitou vakayacora e dua na veiwali ka na sega ni ca vua e dua na neitou lewe ni koro. E tukuna na noqu lewa e loma ni cala, ia e sega vei au na kaukauwa meu vorata na kena taleitaki mai vei iratou na noqu ilawalawa.
Ni oti na neitou vakayacora na neitou cakacaka ni vosalevu oqo, keitou veidredrevaki ka veimarautaki ena neitou ciciva yani vakatotolo na gaunisala buto me keitou dro. A tacaqe e dua vei keitou, ka kailavaka mai: Oilei, au caqeta e dua na pusi!” E voleka ni gauna vata ko ya keitou vakila e dua na kabu mamare ni vakaruguti keitou. E kauta mai e dua na iboi ca. Na ka e nanuma na noqu itau ni pusi sa ikoya e dua na sikaqe. E vanai keitou ena kena iboi vakasisila me taqomaki koya. E vica wale sara na iboi e vakasisila me vaka na ivana ni sikaqe, ka keitou sa boi ca sara ga.
Ena rarawa, keitou lako ki vale ena vakanuinui ni na lomani keitou na neitou itubutubu ka vakacegui keitou. Ni keitou curu yani ki valenikuro, e boici keitou mai ko tinaqu ka cemuri keitou ki tautuba. Keitou a muduki tani mai na neitou vale. Ni oti kece ko ya, sa qai tekivu na cakacakataki ni veivakasavasavataki. E a vakama na neitou isulu. Ni oti o ya, e a rairai qai vakayagataka na iwali kecega e tu e vale se na kena veimataqali veiwaki ena neitou itikotiko me vakayagataki ena vuku i keitou. E okati kina, na neitou vosota na veimataqali sili: ena wai ni tomata, sucu ni bulumakau, kei na sovu kaukauwa ka caka ga e vale. Ia na iboi ca e tikoga. Na waiwai ni torotoro iboi kaukauwa sara mada ga nei tamaqu e sega ni vakamalumalumutaka rawa na boi ca. Ena vica vata na siga keitou a totogitaki me keitou kana ena ruku ni dua na vunikau e tuba, moce e tautuba ena valelaca, ka keitou vakavodoki ena mua-i-muri ni lori ni usa kako.
Ni oti e vica na siga, ni keitou nanuma ni sa yali na iboi, keitou mani tovolea me keitou toso volekata ira yani e so na goneyalewa. Era sega ni vakatara mada ga me keitou voleka yani ena vica na iyate, ka voleka ni vakacacana na neitou isakisaki vakamareqeti vakaitabagone.
Ia, au via vakaraitaka ni neitou lauvana mai na sikaqe e sega ni dau isau ni valavala ca kece. E sega talega ni dau totolo se laurai levu vakaoqo na kedra isau e vuqa. Ia na ivalavala ca kece, e na dau yaco mai na kena isau.
Ena so na gauna, ena vaka me sega soti ni rairai bibi na itotogi ni ivalavala ca vei koya ka ivalavala ca. Ena rawa beka ni da tukuna, me vaka keitou a kitaka ni bera na neitou tosovi iratou na goneyalewa, ni sega ni dua e rawa ni kila ni keitou a ivalavala ca, ka ni vunitaki vinaka tu. Ia Vua na Tamada Vakalomalagi kei ira na iliuliu vakayalo ni Lotu, itubutubu, kei na itokani, na noda ivalavala ca e rawa ni laurai vakavinaka tu. Ena noqu a tiko ena dua na soqoni ni yasa ni buka nodra na itabagone, vata kei Elder Richard G. Scott, au a raica e lima na itabagone ena kedra maliwa na ivavakoso ia na kedra irairai kei na nodra iwalewale e vakaraitaka mai vakamatata sara ga ni dua tiko na leqa vakayalo ena nodra bula. Ni oti na soqo, niu tukuni iratou na itabagone e lima vei Elder Scott, e a kaya mai vakamalua: “Eratou lewe walu.”
E a parofisaitaka ko Aisea: “A irairai ni matadra sa beitaki ira ni ra sa ca; ia na nodra ivalavala ca era sa vakavotuya me vakataki Sotoma, era sa sega ni vunia” (2 Nifai 13:9).
Na Kalou e tukuna: “Ia ko koya sa ivalavala ca ka sega ni veivutuni, ena muduki tani” (V&V 42:28). Me vaka ga na neitou “muduki tani” ko iratou na tavalequ kei au ena neitou vuvale vakavuravura me isau ni neitou veiwali, eda na muduki tani talega vakakina mai na noda vuvale vakalomalagi me isau ni noda ivalavala ca.
“Kevaka eda ubia na noda ivalavala ca” me vaka au a via kitaka ena ivakaboi vinaka ni torotoro, “sa rarawa na Yalo ni Turaga” (V&V 127:37). E yali na noda isolisoli vakayalo. E tukuna na Turaga: “Ko koya sa sega ni veivutuni, ena kau tani na rarama sa tu vua” (V&V 1:33).
Koi keda yadua sa tu vei keda na rarama i Karisito, se na lewa e loma. E vakadreti keda e veigauna me da digitaka na vinaka. Na digidigi dodonu e kauta mai na veika vinaka. Ena yasana tale ka dua, na vakaberaberataki ni veivutuni ka vakayacora tikoga na ivalavala ca e vaka na caqeta tikoga na sikaqe. Ena qai kaukauwa cake tiko ga na iboi ca ena vei ivalavala ca kece, ka na kauti keda yawa ka vakayawa mai Vua na Kalou kei ira eda lomana. Oti ga vakalailai eda sa na vakataki Lemani kei Lemueli, ni rau tosoya tikoga na nodrau digidigi ca, sa yaco me rau “sega ni vakila e dua na ka” ka rau sa sega ni vakila rawa na domo lailai (raoca 1 Nifai 17:45).
Kevaka walega meu a muria na noqu lewa e loma ni vakasolokakanataka mai ni cala na veiwali ko ya, keu a levea rawa na iboi ca kece ko ya.
Kivei Nifai, Na iVakabula e vakavulica ni “sega na ka tawa savasava sa tiko vata kei na Kalou, ia ko na muduki tani kina ka tawamudu” (1 Nifai 10:21).Ia na Tamada Vakalomalagi dau loloma, ena Nona kila me baleta na noda malumalumu, e sa kila ni daru na ivalavala ca, ka daru na yaco me tawa savasava, e a vakarautaka e dua na sala me da vakasavasavataki kina mai na ivalavala ca—me vaka na wai ni tomata, sucu, kei na sovu caka e vale—ia e mana dina.
E tala mai e dua na iVakabula, na Luvena e Duabauga, o Jisu Karisito, me sorovaka na noda ivalavala ca (raoca Alama 22:14).
Ena Were mai Kecisemami, ena Nona vakaraitaka na talairawarawa dina, na Nona rarawa levu e vakavuna Vua, “o Koya na Kalou, sa kaukauwa sara, me sautaninini ena mosi ni veivakararawataki, a bunotaka na dra ka sa yaluma sara kina na yagoqu kei na yaloqu” (V&V 19:18). Sa qai vakatarai Vua me “laveti cake ena kauveilatai ka vakamatei ena vuku ni nodra ivalavala ca na kai vuravura” (1 Nifai 11:33).
“Sa mai colata na nodra rarawa na tamata kecega me ra veivutuni kina na tamata kecega ka lesu Vua” (V&V 18:11, 13).
Sa vakaraitaka na iVakabula na sala me kila kina “na tamata sa veivutuni vakaidina—ena tusanaka na nona ivalavala ca, ka biuta laivi sara vakadua” (V&V 58:43). Sa qai yaco mai na yalayala veivakurabuitaki, “… ke sa vaka na kulakula na nomudou ivalavala ca, sa na vulavula me vaka na uca vulavula” (Aisea 1:18).
Kevaka sa vakauqeti iko tiko na Yalo Tabu mo vakadodonutaka e dua na ka ena nomu bula, mo kila oqo—na yalomu e ka talei. E vinakata na Tamada Vakalomalagi me da lewe ni Nona vuvale tawamudu.
Au vakamamasu ena loloma “dou kakua ni lokuyarataka na gauna mo dou veivutuni kina” (Alama 34:33). Tekivu sara ga oqo. Kauta laivi na boi ca ni ivalavala ca ena wai ni mate ni veivutuni. Ena vuku ni Veisorovaki sa rawa Vua na iVakabula me savai iko mo savasava. Au vakadinadinataka oqo ena yaca i Jisu Karisito, emeni.