Dou Vakasaqara, ka Dou na Kunea

Elder Craig C. Christensen

Mai na Vitusagavulu

Ena noda vakayagataka na noda vakabauta ka solia na noda igu me da toro voleka yani vei Jisu Karisito, eda sa qai tekivu kilai Koya vakalevu cake sara se o cei dina o Koya.

Kemuni na taciqu kei na ganequ, sa noqu masu me na dusimaki au na Yalo ni Turaga ena noqu wasea vata kei kemuni na noqu vakanananu kei na ivakadinadina.

E dua vei ira na veisureti veivakasaurarataki levu duadua kei na yalayala uasivi duadua e solia na iVakabula e laurai ena malanivosa “dou vakasaqara, ka dou na kunea.”¹

E dina ga ni kena cakacakataki e oka kina na masu kei na kere veivuke, ia e titobu cake sara mai na kena oqori. Na vakasaqaqara e vaka ga e dua na ilakolako ka sega ni dua ga na itavi. Au vakatautauvatataka ena dua na gade balavu, me takosovi na vanua. E dina ga ni da kila vinaka tu na itinitini ni vanua eda lakova, era na dau yaco mai ena veisiga yadudua na vutuniyau ni veika eda sotava kei na veika dina e vulici ena noda toso ki liu me da rawata na noda isausau.

Ena noda vakasaqara na veika va-Kalou, e dodonu me da vakamalumalumutaki keda vei Koya, me da nanuma tiko ni sa ikoya na Nona loloma kei na dina eda ciqoma kina, ka vakadodonutaka na noda vakanananu kei na noda masu, noda vakabauta kei na noda gagadre kevaka mada ga me igu taucoko ni lomada me rawa kina na noda ciqoma na rarama kei na kila e vakadodonu sara ga mai vua e dua na Tamada Vakalomalagi dauloloma.

Na ituvaki ni kena vakasaqarai na kena isau mai vua na Kalou e rawarawa sara na kena vakamacalataki ia e vakaitaukei na kena vakayagataki. Me tekivutaki, eda sa sureti me da vulica ena noda vakasama ka tugana e lomada na veika eda gadreva vakalevu sara mai Vua.² Na cakacaka ni vakanananu e kauta mai na vuku ni kila vakatamata kei na ivakaraitaki e yaloda. Eda na qai vakaroti me da vakaraitaka na yaloda kei na noda vakasama kei na vakanananu me vakanamata ki na masu ena yaloraramusumusu vua na Tamada Vakalomalagi, vata kei na yalayala, kevaka eda kerei Koya, ena yaca i Karisito, kevaka e dina na veika eda vakasaqara, kevaka eda “kerekere ena yalodina, na kena inaki dina, noda vakabauta na Karisito, ena tokona o Koya vei [keda]na dina ni veika oqori mai na kaukauwa ni Yalo Tabu,” ni sa ikoya “na kaukauwa ni Yalo Tabu” eda “kila kina na dina ni veika taucoko sara.”³

Ia na cava e dodonu me da vakasaqara?

E vakavulica vei keda na ivolanikalou ni dodonu me da “vakasaqara … vagumatua na [vei] isolisoli uasivi,”⁴ ni dodonu me da vakasaqara na vuku kei na kila ka da “vakarautaka vakayadua na veika e yaga.”⁵ Eda sa vakasalataki me da soli keda ena yalodina ni qaravi ira na tani⁶ ka vakasaqara na veika era “savasava, totoka, se na itukutuku vinaka, se vakcaucautaki.”⁷

Ena gauna vata ga, eda sa vaksalataki me da kakua ni vakasaqara na veika dukadukali ni vuravura.⁸ E kaya o Peresitedi Gordon B. Hinckley: “E sa levu dina na ivalavala ca, na ivalavala ca ka temaki ira na tamata e vuravura. Kemuni na taciqu kei na ganequ, ni vakayawaki kemuni mai kina. Ni levea. Sa ikoya e dua na waigaga ka sa vakarusai iko. Lako tani mai kina.”⁹ Eda wilika ena ivola i Emosi, “Dou vakasaqara na ka vinaka, ka segai na ka ca, mo dou bula: ena qai tiko vata kei kemudou ko Jiova, na Kalou ni lewevuqa.”¹⁰

Na ka eda vakasaqara taumada ni bera na veika taucoko tale e so, sa ikoya “na matanitu ni Kalou kei na Nona yalododonu.”¹¹ Eda vakasaqara me da kila “na Kalou dina duadua ga kei Jisu Karisito sa [iKoya ka a] talai mai.”¹²

Ena dua na tikina vakaitaukei dina sara ni veisureti me vakasaqarai ka laurai e kaya kina na iVakabula, “Toro voleka mai vei au kau na qai toro voleka yani vei iko; vakasaqarai au vagumatua ko na qai kunei au.”¹³

Ia na cava na kena ibalebale ni da sa kunei Koya?

Ena noda vakayagataka na noda vakabauta ka solia na noda igu me da toro voleka yani kivei Jisu Karisito, eda sa qai tekivu kilai Koya vakalevu cake sara se o cei dina o Koya. Ena noda vakasaqarai Koya vagumatua, eda rawata e dua na ivakadinadina titobu ka tudei ni Nona loloma sega na ka e tautauvata, na taucoko ni Nona bula kei na ivakaraitaki, kei na veivakalougatataki ni Nona solibula ena veisorovaki cecere. Ena noda toro voleka vei Koya, eda sa qai tekivu kunei Koya vakaidina ka kilai Koya ni Dauniveibuli ena vuravura, na Dauveivueti ni tamata kecega, ko Koya na nona Le Duabau ga na Tamada, na nodra Tui na Tui, na Tui ni Sautu.

Na titobu ga ni noda vakasaqaqara, na levu cake ni kena tekivu me da vakavinavinakataka na Nona itavi na Turaga ko Jiova ena Veiyalayalati Makawa kei na Mesaia Yalosavasava ena Veiyalayalati Vou. E sa tekivu me da kila vakalevu cake sara na Nona itukutuku tawamudu ni veivakabulai kei na bula vakalou. Eda raica ni tomana tikoga na Nona yalovi keda tiko mo lako mai ka muri Koya, na nona ivakavuvuli e kilai vinaka tu ka vakayagataki tiko edaidai me vaka na kena ivakarau ena veitabagauna kecega. Eda sa tekivu kila, vata kei na vakavinavinaka vakaitamera, ena ka e yaco e Kecisemani kei Kalivari. E dina ga ena Nona a beitaki vakailasu ka totogitaki, e a qai solia o Koya ena lomasoli na Nona bula, ka vakayacora na Nona vosa vakaikoya ka vakaparofita, e a vakaturicaketale o Koya ena ikatolu ni siga. Na isolisoli sega ni saumi oqo e kauta mai na vakatukatuka kivei keda taucoko kei na bula tawamudu kivei ira na talairawarawa kei na yalodina.

Ena noda tekivu vakasamataka ni Nona itukutuku ena gauna ko ya kei na gauna oqo e baleti keda taucoko na tamata ena veivanua taucoko, eda ciqoma, vata kei na cecere ni mamakutu, na itukutuku vakaivolanikalou ena Nona veisiko kivei ira na lewenivanua makawa ena vanua o Amerika. Eda rekitaka na yaco mai ni iVola i Momani me ikarua ni ivakadinadina—e dina ni dua tale na veiyalayalati—ena Nona ilesilesi vaka-Mesaia me iVakabula ka Dauveivueti e vuravura. Eda marautaka ni dua na tamata e rawa me toro voleka vei Koya mai na vakadidike kei na masumasu me baleta na iVola i Momani mai na kena vulici e dua tale na ivola.¹⁴

Ena noda vakasaqaqara me da raici Koya, eda ciqoma e dua na ivakadinadina ni Nona veisiko vakaikoya, vata kei na Tamana, ki na parofita gonetagane, o Josefa Simici, veituberi tiko ena “itabagauna ni taucoko ni gauna.”¹⁵ ka waraki vakadede tu mai.

Ena noda vakasaqarai Koya, eda kila ni o Koya e sa vakalesuya tale mai na Nona Lotu e vuravura. E a vakatikora na kaukauwa kei na lewa me vakarautaka na cakacaka tabu e gadrevi ka na rawa kina vei keda me da lesu ka laki bula vata tale kei Koya.

Ena noda vakasaqarai Koya, eda raica ni tomana tikoga me dusimaka tiko na Nona Lotu mai vua na Nona parofita bula, Peresitedi Gordon B. Hinckley, kei na kena vakarautaki na Nona Lotu sa ikoya na kena tara toka ena yavu ni veiapositolo kei na veiparofita, o Karisito Vakaikoya e iliuliu ni vatunitutu.¹⁶

Ena noda vaksaqarai Koya vagumatua, eda vakila na Nona lomani keda ka kila vakamatata cake sara na isau ni noda masu. Eda tusanaka ni Nona Yalotabu, eda kunea kina na “vuku kei na iyau talei cecere ni kila ka, na iyau talei mada ga ka vunitaki tu,”¹⁷ ka rawata na gagadre cecere me da bulataka na noda bula me vaka na Nona ivakaro kei na nona veiliutaki.

Ena noda vakasaqarai Koya, eda kunea ni o Koya na rarama kei na bula kei vuravura.¹⁸ Ena noda vakasaqarai Koya, kemuni na taciqu kei na ganequ, eda na kunei Koya vakaidina ka sotava na vakacegu ni lomada. E a yalataka vei keda o Koya. Au vakadinadinataka ni vakakina, ena yaca i Jisu Karisito, emeni.