Muria na iVakasala
Ena nomu dolava na nomu vakasama kei na yalomu mo vakila na Yalotabu, ena qai solia mai vei iko na Turaga ena Nona gauna ga kei na Nona sala ga na ivakasala ka na vakalougatataka na nomu bula.
Ena vica na yabaki sa oti ena noqu veiqaravi tiko vakavunivola ni tabanalevu, a yaco mai ki noqu matani vale na iyaya ni tabanalevu ni yabaki vou. E kauwaitaka na mataqu e dua na kateni, ka curu maliwai ira tu e dua na ibinibini kateni levu, ka volai vua na vunivola ni tabanalevu. E kabi ena kisi na pepa ka volai kina vakamatailelevu: “Ke sega ni rawa na veika tale e so—Yalovinaka! Muria na ivakasala.”
Au sega ni nanuma ni biu ena veikisi kece na ivola oqo kau kila deivaki ni dua mai na vale ni volavola liu ni Lotu e kilai au vinaka.
E dina ni a lasa ena gauna ko ya, na irairai ni tikinipepa oqo e sa vesuka sara ga vakadua na nona itukutuku ki na noqu vakasama: “Ke sega ni rawa na veika tale e so—Yalovinaka! Muria na ivakasala.”
Eda vakila tu na tamata kece sara e vuqa na bolebole ena bula vakavuravura oqo. Koi keda kece e dui tu na noda galala me da digitaka na veika e tara na noda toso. Na digidigi vinaka e kauta mai na kalougata yalataki kei na digidigi ca ena kauta mai na kena isau sega ni taleitaki.
Na bula e lomatarotarotaki tu. Na noda gauna e lekaleka. Na noda gauna e vakamareqeti. Oqo na gauna “ni vakavakarau me da sota kei na Kalou” (Alama 34:12). E sega na gauna me vakawaletaki ena kena vakayacori se da vakaitavi ena veika ka sa vakadinadinataki ni veivakaleqai ki na yagoda kei na yaloda.
E sega ni dua vei keda e vinaka vakaoti, eda gadreva kece na veivuke. Eda sega ni guilecavi tu kevaka eda dau vakavulici vakarawarawa, ena yalo sa vakila kei na daliga sa rogoca.
“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.
“Mo vakarogotaka Vua na nomu sala kecega, ia ena vakadodonutaka na nomu ilakolako ko Koya” (Vosa Vakaibalebale 3:5–6).
Eda taura vakacava na ivakasala?
Taumada, me tiko vei keda na gagadre e dina.
iKarua, e dodonu me tudei—na noda vakabauta ni kilai keda na Kalou, ni lomani keda, ka dau sauma na noda masu.
Ena nona wilika tiko na iVola Tabu ko Josefa Simici, e a wilika ena Jemesa 1:5:
“Ia kevaka sa lailai na vuku vua e dua vei kemudou, me kerea vua na Kalou, o Koya sa solia vakalevu vei ira kecega na tamata, a sa sega ni dauveivakadirideini; ka na soli ga vua.
“Ia me kerekere ena vakabauta, me kakua ni vakatitiqa.”
E muria na ivakasala ko Josefa ka taura na isau ni nona masu. Eda na taura talega na isau ni noda masu.
Ena gauna ni noqu bula taucoko, au a dauteitei ka tama ni dua na vuvale vakaitamera. E dina ni noqu masu vakataki au kei na masu vakavuvale e tiki ni neitou bula ena veisiga, ena so na gauna au dau vakila na gagadre vuabale meu lako ki na qele ni teitei ena bogi se tekiduru ena yasa ni ibinibini co madu, rai cake ki lomalagi, ka vosa icake vua na Tamaqu mai Lomalagi. Au dau vakila na Nona voleka kau kila e kea, me vaka au kila oqo, ni dau vakarogoci au ka na sauma na noqu masu ena Nona vuku, me baleta na noqu vinaka.
Vei keda kece, ena vanua cava ga ko ni tu kina—vei kemuni ka gadreva na inuinui, vei kemuni na gadreva na vakacegu, vei kemuni na rarawa, vei kemuni na gadreva na ivakasala ka gadreva me vakila e dua na inaki ni nomu bula—kemuni na noqu itokani lomani, au vakayaloqaqataki kemuni, au uqeti kemuni me cuva na ulumuni se tekiduru na durumuni! Ena nomuni vosa sara ga, vakavinavinaka vua na Tamamuni Vakalomalagi ena veisorovaki ni Luvena me baleti kemuni kei na veivakalougatataki kece e sa solia vei kemuni. Ena vakasuasuataka na matamuni na wainimata ka na curuma na lomamuni na katakata ni Yalona.
Qai vosa vua na Turaga, kerea na vakacegu, ivakasala, kei na kila ka. Ena nomu dolava na nomu vakasama kei na yalomu mo vakila na Yalotabu, ena qai solia mai vei iko na Turaga ena Nona gauna ga kei na Nona sala ga na ivakasala ka na vakalougatataka na nomu bula.
E tu talega ena ivolanikalou na nodra ivakaro na parofita e liu kei na gauna edai. “Sa ikoya na Kalou sa vakavuna na iVola Tabu kecega, a sa yaga oqo me ivakavuvuli, me vunauca na ca, me ia kina na vakadodonutaki, me ia kina na vakatavuvuli ena ka dodonu” (2 Timoci 3:16).
Ena itabagauna oqo e sa solia kina vei keda na Turaga na ivakavuvuli veivakacegui me “dou kakua ni rerevaki ira na nomudou meca, raica au sa lewa oti e lomaqu niu na vakatovolei kemudou ena ka kecega, meu kila kina ni dou sa muria se sega, io me kunei kina ni dou sa savasava, sa kaya na Turaga” (V&V 98:14).
Na muri ni ivakaro e gadrevi kina na cakacaka vakaukauwa, na yalayala, kei na vosota me yacova na ivakataotioti.
“Ia mo dou toso ki liu ka tudei vei Karisito ena nomudou vakanuinui kece sara, mo dou lomana na Kalou kei na tamata kecega. Ia kevaka dou sa toso ki liu ka tugana ki lomamudou na vosa i Karisito ka vosota me yacova na ivakataotioti, raica, sa kaya vakaoqo na Tamada: Dou na rawata na bula tawamudu” (2 Nifai 31:20).
“Io au sa kaya tale vei kemudou; kevaka dou sa muria na ka kecega au sa vakarota koi au na Turaga, ena sega ni tau vei kemudou na noqu cudru waqawaqa; io ena sega talega ni rawai kemudou na matamata kei etesi” (V&V 98:22).
“Kevaka dou sa vakarau vakavinaka tu, dou na sega sara ni rere” (V&V 38:30).
Me vaka na veigauna sa oti, eda taura na ivakaro mai vei ira na parofita bula ni Kalou. Au vakadinadinataka niu kila ni parofita dina ni Turaga edaidai ko Peresitedi Gordon B. Hinckley. E solia vei keda na ivakasala veivakauqeti ni noda gauna.
Ena koniferedi raraba ni Okotova 2001 e a kaya kina:
“Oqo, edaidai, eda sa sotava e so na leqa bibi ka taura taucoko na veika ka dredre ka da dau vakasamataka vakalevu. E dina sara eda gadreva na Kalou… .
“Na noda maroroi e vakatau ena dodonu ni noda bula. Na noda kaukauwa e vakatau ena noda bula savasava. E sa vakamatatataka na Kalou ni kevaka eda na sega ni laivi Koya, ena sega ni laivi keda ko Koya” (“Sota Tu,” Liaona, Jan. 2002, 104–5).
Ni oti na noda tauri ivakaro, e gadrevi me da talairawarawa ka vakarorogo ki na ivakasala eda taura. E gadrevi me da vakarorogo ka muri ira na noda iliuliu digitaki.
Ena dua na gauna, e raici ira na lewevuqa na iVakabula me vaka na sipi ka sega tu na kedra ivakatawa (raica Maciu 9:36). Na lewe ni Lotu kece e tiko na nodra ivakatawa. Eda vakatokai ira me ra iliuliu ni kuoramu, bisopi, kei na peresitedi ni iteki.
E vunauci keda na Turaga me da vaqara na ivolanikalou ka muria na ivakaro.
E sa yalataka ni na yaco na Nona vosa kece “ena vakayacori vakaidina na vosa kau sa tukuna, se ra tukuna na noqu tamata era sa tautauvata” (V&V 1:37–38).
E tukuna na Turaga “na ka kecega era sa tukuna ena veivakauqeti ni Yalo Tabu, sa ivunau io sa ivakaro ni Turaga, sa loma ni Turaga, sa vosa ni Turaga, ka domo ni Turaga; io sa kaukauwa ni Kalou me ia kina na veivakabulai” (V&V 68:34).
“Ke sega ni rawa na veika tale e so—Yalovinaka! Muria na ivakasala.”
Me da kitaka na veika oqo, au masulaka, ena yaca i Jisu Karisito, emeni.