Au Rawa ni Masu Vua na Tamada Vakalomalagi ena Dua ga na Gauna, Dua ga na Vanua

Sydney S. Reynolds

iMatai ni Daunivakasala ena Mataveiliutaki Raraba ni Lalai

Au kila ni rawa ni da masu vua na Tamada Vakalomalagi ena dua ga na gauna, dua ga na vanua sa rawa, kau vakavinavinakataka ni rawa ni da cakava oya.

Kemuni na taciqu kei na ganequ lalai, e rawa ni ko ni vakasamataka na iotioti ni gauna e saumi mai kina na nomuni masu? E a yaco li ena gauna ko ni a vakayalia kina e dua na ka? E yaco li ena gauna ko ni a rere tu kina? Ko ni a tauvimate tu kina se dua na wekamuni a tauvimate. Au a masu talega ena veigauna vakaoqori.

Ko ni a tiko evei ena iotioti ni gauna ko ni a masu kina? Au a dau masu ena levu sara na vanua. Au a dau masu e baravi, ena veiulunivanua, e valenilotu, e rara ni qito. Au a dau masu e loma ni noqu vale, ena loma ni waqavuka, kei na loma ni valenibula. Au kila niu rawa ni masu vei Tamaqu Vakalomalagi ena dua ga na gauna, ena dua ga na vanua sa rawa. Au kila ni o Koya e dau rogoci au.

Meu talanoataka mada vei kemuni e rua na gonelalai—e dua na gonetagane rauta ni yabaki ono kei na dua na goneyalewa ka se qai yabaki vitu walega. Eratou a vodo wavoki voli ena dua na siga katakata kei tamadrau ena lori makawa nei tukadrau. Sa rauta ni dua veimama na aua na nodratou vodo voli sa qai vaka me rorogo vakatani na domo ni lori. Sa mai mate sara ga ena gauna eratou donuya yani kina e dua na igunugunu ni benisini ena tauni ka tarava. “E rawa ni keitou ripeataka,” e a kaya mai na dauveiqaravi, ka tukuna vei ratou me ratou lako kosova na tauni ki na sitoa ni gacagaca ni motoka. Ni ratou curu yani ki loma ni sitoa erau mata sarasara na gone, ka rau sega ni raica ni curu o tamadrau kei manidia ki na daku ni sitoa. Na ka ga erau kila ni rau sa sega ni raici koya. Ni rau rai yani ki tuba erau raica e dua na tamata ka daramaka tiko e dua na isala ka tautauvata kei na nei tamadrau. E se qai lako sivia ga na igole ni sala ka rau cicivi koya yani ena kacikaci, “Tata! Tata!”

Na gauna erau qai kila kina ni sega ni tamadrau o ya, e rau vakila ni rau sa lako sese. Erau sa sega ni raica rawa na sitoa, erau sega ni kila na vanua erau sa tu kina, ka rau sega ni kila e dua ena tauni o ya. Na goneyalewa e vinakata me rau lako vakaoqo, ia na gonetagane e nanuma me rau lako vakakoya. Ena rawa vakacava me rau kunei tamadrau, se na lori mada ga? E kaya na goneyalewa, “Ena ganita me daru masu.” O gonetagane e a via madua na masu e matanalevu, ia ni rau masu oti ga, erau sa vakanamata sara ki na duavata ga na vanua. Erau kunea na igunugunu ni benisini, rau curu ka dabe ena loma ni lori ka mai wawa toka yani. Dede vakalailai—sa vaka ga e dua na gauna balavu vei rau—sa qai basika o tamadrau. O koya talega e a masulaka voli mai me na kunei rau vakatotolo.

Mai na ivolanikalou e tu kina e levu sara na italanoa ni kedra dau saumi mai na masu—o ni nanuma tiko? E a vakaraitaki vei Nifai na itata ni waqa kei na vanua me kunei kina na kakana, a masulaka o Taniela me taqomaki mai vei ira na laione, ko Inosi e masu ena siga taucoko me yacova na bogi me rawata na vakabokoci ni nona ivalavala ca, ko Ana a masulaka me rawa ni dua na luvena. Na noqu italanoa taleitaki duadua na kena italanoa e dua na gonetagane lailai ka a via kila e dua na ka. E via kila se na Lotu cava me curu kina. O ira na nona itokani kei na nona matavuvale era sa curu tiko kina veimata lotu e so. Ia e sega tiko ni kila se na matalotu cava e dina. O koya e se qai yabaki 14 walega.

Ena dua na siga e a wilika tiko na iVola Tabu o Josefa Simici ka vakaoqo na ka a wilika. “Ia kevaka sa lailai na vuku vua e dua vei kemudou, me kerea vua na Kalou.o koya sa solia vakalevu kivei ira kecega na tamata, a sa sega ni dau veivakadirideini; ka na soli ga vua.” (Jemesa 1:5) Isa, na tiki ni ivolanikalou o ya e sa bau tarai koya sara ga vakabibi! E se bera ni bau masu votu vakadua e liu, ia a gadreva dina me dua na isau ni nona vakatataro ka sa vakabauta tiko na ivolanikalou oya. Ena yalomalumalumu, e a lako ki na dua na veikau voleka ga ena nodratou vale, laki tekiduru ka tekivu masu. Oqo edua na masu bibi ka ni a voleka sara ni veivakamalumalumutaki na kaukauwa ni butobuto vua na cauravou dauteitei yaloqaqa oqo, ia e a qai tagica na veivuke ni Kalou. Ena nona vakayacora o ya, sa qai cila mai e dua na rarama ka kauta laivi na butobuto. E qai raica na cauravou oqo e rua na tamata ni rau duri tu ena rarama. E dua vei rau e qai kaya mai vua ni dusi koya na kena ikarua, “Oqo na noqu Gone ni Toko, Mo Rogoci Koya! [Josefa Simici—Ai Tukutuku 1:17] O ya na Kalou na Tamada, kei na Luvena o Jisu Karisito

Niu dau vakananuma na italanoa o ya, au dau nanumi iratou na luvequ. Eratou kaulotu taucoko ena taudaku kei Amerika. E gadrevi vei iratou me ratou vulica e dua na vosa vou. E dua na ka eratou vulica me ratou wasea ena vosa vou o ya na italanoa ni masu nei Josefa Simici. Na cava me ratou vulica kina? Baleta ni tamata eratou na vakavulica, ena ganita me ra kila ni Tamada Vakalomalagi kei Jisu erau a digitaki Josefa Simici me parofita ka me vakalesuya tale mai ki vuravura na kosipeli kei na Lotu i Jisu Karisito. Sa dodonu talega me ra kila na tamata ni a saumi vaka o ya na masu nei Josefa Simici, ena rawa ni ra na masuta na Tamada Vakalomalagi ka ciqoma talega na isau ni nodra masu. Ena rawa talega me sauma o koya na nomuni masu. Au kila ni rawa ni da na masu vua na Tamada Vakalomalagi ena dua ga na gauna, ena dua ga na vanua sa rawa, kau vakavinavinakataka ni rawa ni da cakava o ya.

Oqo na noqu ivakadinadina ena iqaqalo ni ligaqu.

Au kila ni Kalou e Tamada Vakalomalagi ka sa dau lomani keda o Koya.
Na Luvena o Jisu Karisito e noda iVakabula ka Dauveivueti.
E parofita ni Kalou o Josefa Simici. E a vakadewataka na iVola iMomani ena isolisoli kei na kaukauwa ni Kalou.
Na Lotu iJisu Karisito ni Yalododonu Edaidai e nona lotu na Turaga ena vuravura ena gauna oqo, kei na.
E parofita bula nikua o Peresitedi Gordon B. Hinckley.

Ena yaca i Jisu Karisito, Emeni.