Elder Clate W. Mask Jr.
Mai na Vitusagavulu

E kila tu o Elder Clate Wheeler Mask Jr. ni sega ni dua na ka e dau yaco tu vakacalaka.

Ni se gonetagane lailai voli mai El Paso, Texas, a sarava tu o Elder Mask na nona lako ena iKarua ni iValu Levu na tamana o Clate Wheeler Mask Sr., ka sega ni lewenilotu. Sa dua dina na gauna dredre.

Oqori talega na gauna a vakavulica kina vua na marama tinana, o Marva Gonzalez Mask, me dau masu ena yalodina. E kaya kina o koya, “Keitou masulaka vakamatavuvale me na dua na gauna me lewena na Lotu o tamaqu, ka me lesu bula mai ki vale. Niu dau masu toka e yasai tinaqu niu se gonetagane lailai, au dau vakila ni tu e kea na Kalou.”

E dau tiko vakalevu vata kei rau na tubuna ena yasai tinana o Elder Mask. E vakananuma lesu o Elder Mask ka vaka, “Au dau dabe toka e durui buqu ni tukuna tiko vei au na italanoa mai na iVola i Momani. Ena dau tukuna o tukaqu na italanoa ni nona kaulotu ki Mexico. E tekivu vaqori na ilakolako ni noqu bula.”

E qai lewena na Lotu ka lesu bula mai na tamana. Mai na gauna o ya sa dei vakavinaka tu na ivakadinadina nei Elder Mask.

E a qai yaco na gauna me kaulotu kina ki na Wase e Loma kei Amerika, ni vakarau me lesu mai a mani lesi me vola e dua na ripote me baleti ira e so na daukaulotu. E kaya kina o Elder Mask, “E dua vei ira na goneyalewa sa vakasakiti kecega na nona ivakarau, kau sa vakila mai kina ni vakaoya na mataqali goneyalewa au na vinakata meu vakamautaka ena dua na siga.”

Ni oti na veiqaravi vakaivalu, a laki vuli o Elder Mask ki Brigham Young University, e kea e rau a laki sota tale kina kei koya na goneyalewa daukaulotu oya, o Paula Carol Garns. Erau a vakamau ena Valetabu e Los Angeles California ena 1965 ka rau susuga cake e ono na gone.

E a rawata mai o Elder Mask e dua na matanivola na bejila ena vosa vaka: Valagi kei na Spain ka sa vakacavara oti e tolusagavulu na yabaki ena nona cakacaka tiko ena iVakarau ni Vuli ena Lotu. Sa veiqaravi oti vaka: peresitedi ni kaulotu, bisopi, daunivakasala nei bisopi, peresitedi ni Wilivola ni Sigatabu ni iteki, lewe ni matabose e cake, ka peresitedi ni tabana.

E a sucu o Elder Mask yabaki 60, ena i ka 20 ni Okosita 1942. Sa kila tu ni na veisautaka sara vakalevu na nona bula me vaka ga na veika sega ni vakacalakataki sa sotava oti mai na nona ilesilesi vou oqo vaka lewe ni iKarua ni Kuoramu ni Vitusagavulu. “Na veika kece sara sa yaco sa vakarautaki koya tiko mai ki na nona ilesilesi vou,” e a kaya ko Sisita Mask.