Elder Mervyn B. Arnold
Mai na Vitusagavulu

Kevaka beka me dau daramaka na tamata na ivakatakilakila ni vanua e buli mai kina, ena daramaka ena vakacibicibi o Elder Mervyn Bennion Arnold, yabaki 54, ka qai lewena vou na iKarua ni Kuoramu ni Vitusagavulu, e dua ka tukuni toka kina, “Buli e Vale mai Granger, Utah.”

E a tubu cake ena dua na itikotiko ni teitei ena ra ni Bucabuca na Salt Lake o Elder Arnold ka a sucu ena ika 19 ni Julai, 1948, mai Salt Lake City. “E dua na udolu tu na neitou toa,” e nanuma lesu, “kei na dua na bulumakau ka keimami dau lobaka na gone na kena sucu. Keimami dau cukita talega na waka ni suka.” Erau a susugi ira cake na luvedrau e lima o John Everett Sorensen Arnold kei Jasmine Bennion Arnold ka vakavuvulitaka vei ira na bibi ni cakacaka, na dau vakavinavinakataka na veika e tu vei ira, ka me ra dau lomana na nodra matavuvale kei na kosipeli. “Au a vulica meu dau lomana na ivunau ni Lotu,” e kaya o Elder Arnold, “kau lomana talega na iVola i Momani.”

Ni tarogi me baleta na sala sa rawata kina na nona ivakadinadina, e sauma o Elder Arnold ni a “dua na cakacaka dredre. Era curuma yani na nomu bula na tamata, me tekivu sara mai na gauna o se gonelailai kina. Ka ra vukei iko me tauyavutaki sara e lomamu na ivakadinadina o ya.” E kila na yacadra na qasenivuli kei na veiliutaki vakabete era a dau vakauqeta na nona bula.

E a kaulotu o Elder Arnold ena vualiku kei Mexico. E a qai lako ki vuli ena Brigham Young University, ka rawata mai kina na diqiri ni bejila ni bisinisi kei na masita ni veiliutaki raraba. Ena 1971 e a vakamautaki Devonna Kress ena Valetabu na Idaho Falls Idaho. E a vakamacalataki koya ni dua o koya na “marama vakasakiti ka kaukauwa vinaka tu na nona ivakadinadina me baleta na kosipeli.” Erau nodra itubutubu e ono na gone ka tubudra e lewe va. Erau kaya ni nodrau matavuvale sa ikoya na “marau ni yalodrau.”

E a cakacaka taumada o Elder Arnold ena tabana ni volitaki iyauqaqa ka qai muri ena baqe. Mai na 1985 ki na 1988 a peresitedi kina ni kaulotu e Costa Rica, Panama, kei na San Blas Islands. Ena dua na gauna lekaleka sa oti a liutaka tiko kina o Elder Arnold na tabana ni veituberi vei ira na veiqaravi ena veibuturara ni kaulotu ka yawa mai na itikotiko liu ni Lotu, ena Tabacakacaka ni Kaulotu.

Ni tekivutaka na nona ilesilesi vou, a vakaraitaka o Elder Arnold na nona lomani Koya, sa vakalougatataka vakalevu duadua na nona bula: “Au kila ni bula tiko na iVakabula! Au sa rui lomani Koya vakalevu.”