Na iLoloma Tawatukuni Rawa

Elder Joseph B. Wirthlin

Mai na Kuoramu ni iApositolo Le Tinikarua

Kevaka [era] na dolava na yalodra ki na veiuqeti veivakasavasavataki ni isolisoli tawatukuni rawa oqo ni Yalo Tabu, ena basika mai e dua na ivakatagedegede vou vakayalo.

Sa dua na ka talei na tiko vata kei kemuni nikua. Au dau taleitaka na rogoca na vosa ni Turaga mai vei ira na noda iliuliu ni ra dusimaki mai na isolisoli vakalou ni Yalo Tabu. Nikua au na vinakata meu tukuna e vica na malanivosa me baleta na isolisoli oqo.

O sa bau vakasamataka mada ena dua na gauna na levu ni rarama kei na kaukauwa e dau vakavurea na noda matanisiga? E voleka me da sega ni vakasamataka rawa na kena levu. Ia na katakata kei na rarama eda ciqoma sa isolisoli wale mai vua na Kalou. Oqo e dua tale na ivakadinadina ni Nona vinaka na Tamada Vakalomalagi.¹

E curu basikata na maliwa lala na rarama ni matanisiga, ka serauna na noda vuravura ni ciri wavokita na matanisiga, ena katakata kei na rarama dau veivakabulai. Kevaka e sega na matanisiga, ena sega beka ni dua na bula e kunei rawa ena vuravura oqo; ena lala tu ga, batabata, ka butobuto.

Me vaka ga ni solia mai na matanisiga na bula kei na rarama ki vuravura, e dua na rarama vakayalo e dau solia na bulabula vakayalo. Eda dau vakatoka oqo me Rarama i Karisito. E vakavuvulitaka vei keda na ivolanikalou ni “sa ikoya oqo na rarama dina, sa lako mai ki vuravura ka vakararamataki ira na tamata kecega.”²

O koya gona na tamata taucoko e rawa me ra marautaka na kena veivakalougatataki. Na Rarama i Karisito sa ikoya na kaukauwa vakalou ka rawa ki na tagane vakayadua, yalewa, kei na gone me vakatakilakilataka na vinaka kei na ca. E veivakauqeti vei keda taucoko me da digitaka na dodonu, me da vakasaqara na dina tawamudu, kei na noda vulica tale na veika dina eda a kila ena noda bula mai liu ia eda sa guilecava ena bula vakavuravura.

Na Rarama i Karisito e sega ni dodonu me bosoki vata kei na Yalo Tabu, baleta ni Rarama i Karisito e sega ni tamata. Na kena veivakauqeti e itekitekivu ka veivakarautaki talega vua e dua ena nona ciqoma na Yalo Tabu. Na Rarama i Karisito ena liutaki ira na yalo dodonu “me ra vakarorogo ki na domo”³ me ra raica na kosipeli kei na Lotu dina ka ciqoma kina na Yalo Tabu.

Na Yalo Tabu e ivatuka vakatamata ena yalo, e dua na Le Tolu Vakalou.⁴ E ivakadinadina ni kaukauwa ni Kalou, na vakalou i Karisito, kei na dina ni kosipeli vakalesui mai. E lewevuqa mai na gauna ni itukutuku makawa ni Lotu ena veivanua e so era a segata vagumatua me ra veitaratara kei na lomalagi ka rawata na rarama ni dina vakosipeli. Era sa vakila na veivakauqeti ni Yalo Tabu me vakadeitaka vei ira na dina ni Kosipeli.

E vakamacalataka o Josefa Simici: “E tiko na kedrau duidui na Yalo Tabu kei na iSolisoli ni Yalo Tabu. E a ciqoma o Kolinio na Yalo Tabu ni se bera ni papitaiso, na kaukauwa ni veivakadeitaki ni Kalou vua me baleta na dina ni Kosipeli, ia ena sega ni rawa ni ciqoma na isolisoli ni Yalo Tabu me yacova ni sa papitaiso oti. Kevaka me a sega ni taura … na cakacaka vakalotu oqo, ke sa na biuti koya na Yalo Tabu ka a vakadeitaka vua na dina ni Kalou.”⁵

Na isolisoli ni Yalo Tabu sa ikoya na dodonu me ciqomi kina na Yalo Tabu me itokani tudei, ena rawati duadua ga mai na vakabauta na Karisito, veivutuni, papitaiso ena tabadromuci e wai, kei na veitabaki ni liga mai vei ira na italai ka sa tu vei ira na kena dodonu—na Matabete i Melikiseteki. Sa ikoya na isolisoli talei duadua ka ra na rawata ga o ira na lewe ni Lotu ni Turaga.

Ena Vunau kei na Veiyalayalati e vakatoka kina na Turaga na isolisoli ni Yalo Tabu me isolisoli tawatukuni rawa.⁶ Sa ikoya na ivurevure ni ivakadinadina kei na isolisoli vakayalo. E vakararamataka na vakasama, vakasinaita na yaloda ena marau,⁷ vakavulica vei keda na ka kecega, ka kauta lesu mai ki na noda vakanananu na kila ka ka sa guilecavi yani.⁸ Na Yalo Tabu talega “ena vakaraitaka vei kemudou ko Koya na veika kece mo dou kitaka.”⁹

E vakuria o Peresitedi James E. Faust ni isolisoli ni Yalo Tabu “sa ikoya na ivakadei cecere duadua ni vakacegu ki vu ni yaloda ka vakakina ki na noda vuravura veilecayaki.”¹⁰

E vakavuvulitaka o Peresitedi Gordon B. Hinckley, “Sa dua na veivakalougatataki cecere me tiko vata kei keda na veivakauqeti ni cakcaka ni dua vei iratou na Le Tolu Vakalou.”¹¹ Vakasamataka mada na kena ibalebale oqo, na kaukauwa kei na dodonu me da ciqoma kina na nona cakacaka e dua na Le Tolu Vakalou; me da veitaratara ena vuku tawa vakaiyalayala, kila ka tawa vakaiyalayala, kei na kaukauwa tawa vakaiyalayala!

Me vaka na veisolisoli kecega, sa dodonu me ciqomi me rawa ni qai marautaki. Ena gauna e a tabaki kina na ulumu mai na ligadra na matabete mo vakadeitaki ki na Lotu, o a rogoca na vosa e a cavuti kina “Ciqoma na Yalo Tabu.” E sega ni kena ibalebale oqori ni sa na nomu itokani sara ga kina vakadua na Yalo Tabu. E vakasalataki keda na ivolanikalou ni na “sega ni veileti tiko kei na tamata”¹² na Yalo Tabu me sega ni mudu. Ni da sa vakadeitaki, sa soli kina vei keda na dodonu ki na veitokani ni Yalo Tabu, ia na dodonu oqo eda na rawata ga mai na talairawarawa kei na bula kilikili e veigauna. Ena sega ni rawa ni da vakadeitaka me tiko vakadua vata kei keda na isolisoli oqo.

Ena dau vakasalataki keda na Yalo Tabu mai na veika rerevaki e vakarau yaco mai ka na dau vakauqeti keda me da vukei ira na vakaleqai tu. E veivakasalataki kina o Peresitedi Thomas S.Monson: “Eda vakararai. Eda wawa. Eda vakarogoca na domo, lailai ka malua. Ni vosa mai era talairawarawa kina na marama kei na turaga yalomalua. Me kakua ni dau vakadaroi na veivakauqeti ni Yalo Tabu.”¹³

Au a gade ena dua na gauna ki na dua na qara levu ka lako e ruku ni qele. Ni keimami tu ekea, a qai bokoca o koya e veikau tiko na cina me keimami vakila se vakacava sara tu mada na tu ena butobuto. Sa dua na gauna vakadomobula. Au biuta na ligaqu voleka sara ki mataqu ka sega ni rawa niu raica. E vakarerevaki toka. Sa dua na ka na vakacegu ni sa waqa tale na cina.

Ni sikabotea na butobuto na rarama ka me rairai mai kina na veika e rawa ni laurai, sa vakakina na kena sikabotea na Yalo Tabu na butobuto vakayalo e wavoliti keda tu ka me rairai mai kina na veika vakayalo e dau vunitaki tu. E vakavuvulitaka na iApositolo o Paula ni “Ia na tamata vakayago sa sega ni vakabauta na veika ni Yalo ni Kalou: ni sa ka lialia vua, a sa sega ni kila rawa ko koya, ni ra sa kilai vakayalo ga.”¹⁴

Au leqataka de so na lewe ni Lotu ni Turaga era sa bula tiko ena ruku ni dodonu ni isolisoli ni Yalo Tabu.¹⁵ E so era vagolei tani mai na veika ni vuravura ka dau vakalatia na veivakauqeti ni Yalo Tabu, ka tarova na nodra kila na veivakauqeti vakayalo. Oqo e dua na vuravura kosakosa ka osooso eda bula tiko kina. Nanuma tiko ni noda osooso e sega ni bula vakayalo. Kevaka eda sega ni qaqarauni, ena rawa ni cemuria tani na veika Vakaylo na veika ni vuravura.

E so era sa mate vakayalo ka sega ni vakila e dua na ka ena vuku ni nodra digitaka na ivalavala ca. E so era sa vakawelei ena vuku ni nodra nanuma ni ra sa tu vinaka tu vakayalo ka ra sega kina ni gadreva me ra tubu ka veitaratara ki na veika Tawayalani.

Kevaka era na dolava na yalodra ki na veiuqeti veivakasavasavataki ni isolisoli tawatukuni rawa oqo ni Yalo Tabu, ena basika mai e dua na ivakatagedegede vou vakayalo. Ena raica na matadra e dua na rai dodonu rabailevu ka sega ni vakasamataki rawa. E rawa ni ra kila vakataki ira na veika digitaki, vakamareqeti, ka rawa ni vakalevulevuya na yalo, vakarabailevutaka na vakasama, ka vakasinaita na lomada ena marau sega ni tukuni rawa ni Yalotabu.

A tukuna o Brigham e dua na ka bibi e a sota kaya, ena nona rairai mai vua ena raivotu na Parofita o Josefa Simici ka a vakamatei ena vuku ni nona vakabauta, ka kauta mai e dua tale na itukutuku me baleti ira na Yalododonu.

Oqo e dua na itukutuku era na gadreva vakalevu nikua na Yalododonu mai na veigauna kecega: “Nanuma dei tiko mo tukuna vei ira na tamata me ra maroroya na Yalo ni Turaga,” e kaya o Josefa, “ka na liutaki ira vakadodonu.” Qarauna ka kakua ni vagolea tani na domo malua ka lailai; ena vakavulici iko ena veika mo cakava kei na vanua mo lakova; ena tamusuki na vua ni matanitu. Tukuna vei ira na tagane me ra dolava tu na yalodra ka me ra tudei, ni gauna e yaco mai kina vei ira na Yalo Tabu, sa vakarau tu na yalodra me ciqoma.”¹⁶

Kemuni na taciqu kei na ganequ, me da vakatala beka na domo malua ka lailai? Me da cakava beka na ka me vakararawataka na Yalo Tabu? Me da vakatara beka yani ki na noda loma ni vale na veika me na vakatala tani mai kina na Yalo Tabu? Na mataqali veivakamarautaki eda vakatara me curu yani ki na noda veivalevale ena laki manata na kaukauwa ni Yalo Tabu. E levu na veivakamarautaki vakavuravura ena vakararawataka na Yalo Tabu. E dodonu, me da kakua ni dau sarava na iyaloyalo se televiseni ka sinai ena veivakamatematei, na vosavosa ca, kei na bula tawasavasava.

Au sureti kemuni mo ni vakasamataka vakatitobu ena vakarokoroko kei na masumasu ka qai tarogi iko, “E tiko beka ena noqu bula na Yalo Tabu? Au sa marau tiko beka? Au cakava tiko beka ki na noqu bula e dua na ka ka veisaqasaqa kei na Yalotabu ka tarova tiko na kena yaco me noqu itokani tudei?” Yaloqaqa ka veivutuni, ke gadrevi vakakina, ka marautaka tale na veitokani ni YaloTabu.

Vei kemuni na vakamau, au sureti kemuni mo ni veitarotarogi vakai kemuni ena yalo ni veilomani kei na masumasu: “Eda marautaka tiko beka na veivakauqeti ni Yalo Tabu ena noda veivuvale? E tiko beka vata kei keda na Yalotabu ena noda veiwekani? Eda vakayacora tiko beka vakamatavuvale e dua na ka ka na vakacudruya na Yalotabu? Na sala cava beka e rawa ni mana kina na noda sureta na Yalo Tabu ki na noda vuvale?”

Me dau yavutaki vakalevu vei Karisito na noda veivuvale. Me da vakayagataka e levu cake na gauna ena valetabu ka vakalailai ena kena vakasaqarai na marau. Me da vakalailaitaka na rorogo ena noda veivuvale me rawa kina ni kakua ni vakamalumalumutaka na domo malua ka rogo lailai ni Yalo Tabu na rorogo vakavuravura. E dua na noda sasaga levu duadua vakaitubutubu sa ikoya me da rekitaka na kaukauwa ni cakacaka ni Yalo Tabu ena noda veivuvale. Sa dodonu me da daumasu ka vulica na ivolanikalou. E rawa ni da lagata na sere ni veivakalesui mai me sureta mai na Yalo Tabu ki na noda vuvale. Ena veivuke talega na lotu vakavuvale e veigauna.

Ena gauna dredre oqo, eda na gadreva na isolisoli tawatukuni rawa oqo ena noda bula. E taleva lesu vei keda o Peresitedi Boyd K. Packer: “Me da kakua ni bula tiko ka rerevaka tiko na veigauna sa bera mai. E dodonu me da marau tiko ka sega ni dodonu me da rarawa. Kevaka eda muria tiko na veivakauqeti ni Yalo Tabu, eda na taqomaki vinaka veitalia ga na veika e tu mai liu. Ena vakaraitaki vei keda na veika me da cakava.”¹⁷

E vakavuvulitaka na Parofita o Josefa ni na rawa vei keda na Yalododonu me da vakaduiduitaka na isolisoli ni Yalo Tabu mai na veiyalo kece tale e so, ni na “vakasolokakanataka na sautu kei na marau ki yaloda; ena kauta tani na ivakarau ca, na veicati, na veiqati, kei na veika ca kecega mai yalodra; ka na yaco na gagadre me ra caka vinaka, ka dau caka dodonu ka tara cake na matanitu ni Kalou.”¹⁸

E a tukuna vei au ena dua na gauna e dua na noqu itokani me baleta na nona kila na isolisoli ni Yalo Tabu. E a dau masu vakawasoma ka gadreva tu me kila na dina ni kosipeli. E dina ni kunea tu na vakacegu ena nona vakabauta, e sega vakadua ni bau ciqoma na kila ka ka gadreva dina tu. Sa mani nanuma kina ni o koya beka e dua vei ira ka na lakova na bula oqo ni vakararavi tu ki na nodra vakabauta na tani.

Ena dua na mataka niu vakasamataka voli vakabibi na ivolanikalou, e qai vakila e dua na ka ni curuma vakasauri na yagona me tekivu mai uluna ka yaco ki yavana. “Au luvuci ena loloma kei na marau savasava,: e vakamacalataka. “Au sega ni rawa ni vakamacalataka na kena levu ni ka au vakila ena gauna o ya ia meu kaya ga niu a kovuti ena reki makare vinaka ka sa sega kina ni dua na vanua meu vakila tale kina e dua na ka duatani.”

Ni gauna mada ga e vakila voli kina na sovaraki ni Yalo Tabu oqo, e nanuma de veika ga e vakananuma tu e yaco tiko o ya.

“Na levu ga ni noqu vakasama,” e kaya, “na kena kaukauwa cake na veika au vakila tiko oqo me yacova na gauna, ni sa ka ga au rawa ni cakava, meu kaya tagitagi ga, ‘sa rauta.’”

Niu se gonetagane, a sotava e dua na mataqali ka vakaoqo na tamaqu ena gauna a papitaiso kina. E kaya kina, “Ni vakotora na ligana na bisopi e uluqu ka kaya, ‘ciqoma na Yalo Tabu,’ au vakila e dua na ka matalia—e dua na ka au sega mada ni se bau sotava vakadua e yaloqu kau vakila kina na marau, me vakasinaiti kina na yaloqu.”

Mai na gauna o ya kei na nona bula taucoko, sa dau kila tu ga ni liutaka tiko na Nona Lotu o Jisu Karisito mai vua e dua na parofita bula.¹⁹

E lewelevu ena gauna oqo era sa dau vakila na veivakauqeti ni Yalo Tabu ena nodra vulica na iVola i Momani se ena nodra vakarorogo ki na nodra ivakadinadina na daukaulotu kei na nodra itokani. Ena vuku ni ka oqo au kaya kina, me vaka niu dua na iApositolo ni Turaga, o Jisu Karisito: sa vakalesui oti mai ki vuravura na kosipeli ena kena taucoko! O Josefa Simici e parofita dina ka a vakadewataka na ivola oqo ena isolisoli kei na kaukauwa ni Kalou. Au vakauqeti kemuni kece kina mo ni wilika na iVola i Momani ka vakayagataka na kena yalayala: “Ia ni dou sa wilika na veika oqo, mo dou kerea vua na Kalou, na Tamada Tawamudu, ena yaca i Karisito, me vakatakila vei kemudou se dina se sega; ia kevaka dou sa kerea ena yalodina ena lomamudou taucoko ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina.”²⁰

Kivei kemuni ko ni sega ni lewe ni Lotu au vakauqeti kemuni ena gagadre taucoko ni yaloqu—kakua tale ni vorata tiko na dina. Solia e dua na tikina e yalomu ki na rarama vakalomalagi oqo. Vakabauta, veivutuni, ka papitaiso ena yaca i Jisu Karisito me bokoci kina na ivalavala ca, o na ciqoma talega na isolisoli tawatukuni rawa oqo ni Yalo Tabu.

E bula tiko na Tamada Vakalomalagi! Sa i Jisu na Karisito! Sa vakalesui mai ena kena taucoko na kosipeli i Jisu Karisito mai vua na Parofita o Josefa Simici. Sai Peresitedi Gordon B. Hinckley na parofita, daurairai, ka daunivakatakila ena noda gauna oqo. Au vakadinadinataka ena yaca i Jisu Karisito, emeni.