Na iLesilesi Bibi ni Cakacaka ni Lewenilotu Daukaulotu

Elder M. Russell Ballard

Mai na Kuoramu ni iApositolo Le Tinikarua

Sa gadrevi me da vakarautaki keda ki na nodra vukei na daukaulotu me ra kunei ira na luvena na Tamada Vakalomalagi era na ciqoma na itukutuku ni Veivakalesui Mai.

Na Siganimate sa ikoya na gauna era vakanamata ka marautaka kina na lotu va-Karisito e vuravura na nona tucaketale na noda Turaga ka iVakabula o Jisu Karisito. Mai na kena yaco na ka oqo e veisautaka vakadua na veika kece sara. Sa vakarusa vakadua na iVakabula na veilati kece sara ka vakataotaka tu na noda lesu vua na Tamada Vakalomalagi dauloloma. E sa gadreva kina o Koya me da “lako … ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu:

“Vakavulici ira me ra vakabauta na ka kece kau a vosa kina vei kemudou: ka mo dou kila, au sa tiko vata kei kemudou ena veisiga kecega ka yacova na ivakataotioti kei vuravura” (Maciu 28:19–20).

E dua tale na italanoa veitokani ni itukutuku tikoga oqo e toqai tiko ena Kosipeli i Joni. Ena baravi ni Wasawasa o Kalili e a tarogi Pita kina vakatolu o Jisu: “Ko sa lomani au?” Ena veigauna kece e dua tu ga na isau ni taro nei Pita: “Ko ni sa kila niu sa lomani kemuni.” Ka veigauna kece oqori a vakasalataki Pita kina na Turaga: “Vakani ira na noqu lami … Vakani ira na noqu lami … Vakani ira na noqu lami” (Joni 21:15–17).

Na veivakamasuti ni iVakabula me ra “vakani na [Nona] lami” e se dei tikoga edaidai. Me vakataki Pita kei iratou na nona itokani ena gauna makawa, sa tu vei ira na iApositolo ni Turaga o Jisu Karisito edaidai na lewa ni kena kau yani na kosipeli ki vuravura taucoko. Na lewa oqo e dau yali mai na noda vakasama ena so na gauna.

Ia na iVakabula e sega walega ni vosa tiko vei iratou na iApositolo. E vosa talega vei ira era sa vakalougatataki me ra rogoca na kosipeli ka lewe ni Nona Lotu. Mai na ivakatakila a vakaraitaki vua na Parofita o Josefa Simici e a vakamacalataka sara vakarawarawa na Turaga: “Sa nodra itavi na tamata yadua era sa rogoca na nomudou ivunau, me ra vunauci ira na wekadra” (V&V 88:81).

Ena koniferedi raraba sa oti keimami a solia e dua na bolebole vei ira na cauravou me ra vakarautaki ira vakavinaka sara me ra qarava na Turaga o Jisu Karisito. Keimami a kerea me ra daukaulotu bula kilikili vakataudeitaki ka kaukauwa vakayalo. Ena kena veilecayaki tu na bula e vuravura ena gauna oqo, era gadrevi me ra sa “itaba daukaulotu qaqa ena itukutuku kece ni veigauna ena Lotu.” (Raica M. Russell Ballard,” Na iTaba Daukaulotu Qaqa Duadua,” Liaona, Nov. 2002, 47.) Keimami sega ni gadrevi ira me ra vinaka sara, ia era gadrevi me ra yalomaqusa, ka lomasoli, ka me ra yacova yani e dua na ivakatagedegede vou ni bula vakayalo me ra dauveituberi ni kosipeli. E gadrevi me ra kila na itukutuku ni vakalesui mai ni kosipeli i Jisu Karisito ka vakavuvulitaka ena kaukauwa ni nodra vosa ga vakataki ira ena veivakauqeti veidusimaki ni Yalo Tabu.

Ena loma ni Lotu keimami sa cakacaka sara tiko vagumatua me ra vukei na noda daukaulotu me ra kilikili cake sara ka yalomatua vakayalo. Na sasaga oqo e roboti vuravura e sa vakatokai me “toroi cake na ivakatagedegede” se “toroi cake ni ivakarau.” Keimami sa vakavinavinaka vei kemuni na itubutubu, bisopi kei na peresitedi ni iteki ena nomuni veitokoni ki na cakacaka oqo. Keimami vakavinavinaka talega vei kemuni na itabagone ni Lotu yalodina ena nomuni saga mo ni bulataka na ivakarau ni Turaga. Me na tomana tikoga na Nona vakalougatataki kemuni ena nomuni vakavakarau mo ni qarava na Turaga ena vuravura vakaleqai oqo.

Ia ena gauna eda toroya cake kina na ivakatagedegede ni nodra gugumatua na noda daukaulotu, me da vakayacora vakakina ki na nodra kaulotu o ira na noda lewenilotu. Kemuni na wekaqu, keimami gadreva na nomuni veivuke, me ra tokoni ka vukei o ira na noda daukaulotu me ra vakasaqara ka papitaisotaki e vuqa tale na luvena na Tamada Vakalomalagi. Keimami gadrevi kemuni mo ni yadrava, taqomaka, ka vakauqeti ira na daukaulotu ka talai oqo ni Turaga. Kevaka me toroicake na ivakatagedegede, sa toroi cake me baleti keda kece sara. Me da yalodina tikoga. Me qaqaco na noda bula vakayalo. Sa gadrevi me da vakarautaki keda ki na nodra vukei na daukaulotu me ra kunei ira na luvena na Tamada Vakalomalagi era na ciqoma na itukutuku Vakalesui.

Oi kemuni na wekaqu, mo ni nanuma vinaka ni da sega tiko ni veivoli. Eda sega ni volitaka tiko e dua na ka. Eda sega ni vakaraitaka tiko vua e dua na veika sa tu rawa vei keda. Sai keda na lewe ni Lotu i Jisu Karisito ka vakalesui mai e vakadonuya ka vakatikora sara ga mai na Turaga, me ra kunei, qaravi, ka ra taqomaki yani ki na Nona Lotu o ira kece era vakasaqara tiko na dina.

Ni raici mai na kena ituvatuva tawamudu na veika eda na vakayacora oqo e vaka me matata ka rawarawa tu ga, ia au kila ni kaulotu vakalewenilotu sa tiko na kena bolebole ka rawa talega ni vakavu taqaya. Au kerea meu vakaraitaka e tolu na ituvatuva rawarawa me da vukea kina na cakacaka vakalou oqo.

iMatai, me da cakacaka ena vakabauta ka masu yadudua ka vakavuvale ka kerea kina na sala ni kena wasei na kosipeli i Jisu Karisito. Kerea vua na Turaga me dolava na kena salatu. Masulaka ka digitaka vakavuvale na siga me sureti mai e dua me rau vakavulici koya na daukaulotu. Me nanumi tiko oi kemuni na wekaqu ni oqo na Lotu ni Turaga. Ena dusimaki iko o Koya mai na nomu masumasu vakawasoma. Mai na nomu masu vuni, saga mo dau veiwasei. Kakua ni vakanananutaka e dua na ka. Kakua ni galuvaka vua e dua na itukutuku vinaka. Veiwasei vei ira na tamata kecega ka vakanuinui tiko ki na kaukauwa ni Yalo Tabu me vosa ena vukumu. O ira ga me ra na vakatulewa ki na nomu veisureti. Ena gauna ni Turaga era na laurai ga mai o ira na vakasaqara tiko na dina. Sa iKoya na iVakatawa Vinaka. E kilai ira na Nona sipi ka ra sa kila na Domona ni ko na voqataka, ka ra na muri Koya (raica Joni 10).

E dua na gauna lekaleka sa oti e a kaya o Peresitedi Hinckley: “Sa na dua na siga vinaka ni ra na sega walega ni masulaki o ira na daukaulotu e vuravura taucoko, ia ena kerei talega kina na Turaga me na vukei ira talega ena nodra tokoni ira na daukaulotu era lesi ki na nodra dui tabanalevu” (“Missionary Service,” First Worldwide Leadership Training Meeting, Jan. 2003, 19).

iKarua, o ya me ra ivakaraitaki vinaka o ira na iliuliu. Ena vakamakututaki ka dusimaki iko na Yalo Tabu ena nodra vakasaqarai o ira era gadreva na noda itukutuku. Ena vakayaloqaqataki iko na nomu bula kilikili kei na nomu kaukauwa vakayalo ena vakauqeti ira na lewenilotu me ra gumatuataka na vukei ira na kaulotu.

Ena vica na yabaki sa oti, e dua na curuvou yalodina o Baraca George McLaughlin a kacivi me dabe vakatulewa ena dua na tabana lailai mai Farmingdale e Maine ka ra lewe 20 na lewena. E turaga yalomalua ka cakacaka tiko vakadraiva ni lori ni sucu. Mai na nona masumasu kei na lolo, sa vakavulici koya na Yalo Tabu ki na veika me ra vakayacora na lewe ni nona tabana me na vukea na kena tubu na Lotu ena nodra yasana. Mai na cecere ni nona ivakaraitaki vinaka, masumasu, a vakavulici ira kina na lewe ni nona tabana me ra wasea yani na kosipeli. Oqo e dua na italanoa taleitaki, ka dua vei ira na italanoa qaqa ni kaulotu ena itabagauna oqo. Ena loma ga ni dua na yabaki era a papitaisotaki e 450 na curuvou ki na tabana oqo. Ena yabaki ka tarava e a 200 tale na curuvou. Ko Peresitedi McLaughlin e a vakaraitaka: “Sa noqu itavi niu peresitedi ni tabana meu vakavulici ira …[na curuvou] me ra bula vaka-Momani. Au a vakavulici ira ena ivakarau ni vosa kei na veivakavulici ni lesoni ena lotu. Au a vakavulici ira ena ivakarau ni nodra tuberi na luvedra ena kosipeli. Erau a cicivaka na tabana oi rau na noqu daunivakasala. Au a tuberi ira na curuvou me ra lewenilotu qaqa. E rawarawa sara.

Ni mai oti e lima na yabaki, e a mai tauyavu kina na Augusta Maine Stake . E a vuqa sara na vakailesilesi vou ki na iteki era a digitaki mai na Farmingdale Branch. Eda na vakataroga beka na rawa ka vakaoqo ena gauna o ya, ka sa kena isau beka ni sa gadrevi me maqusataki na kena vaqaqacotaki na Lotu. Meu vakadeitaka vei kemuni ni gagadre vakaoqo ena veitabana kece sara ni Lotu sa bibi vakakina edaidai me vaka ga mai liu.

Eratou sa vakamatatataka na Mataveiliutaki Taumada kei na Kuoramu ni iApositolo ni cakacaka ni kaulotu ena monataki tiko mai na tabanalevu. Sa nodra itavi na peresitedi ni iteki kei na bisopi me ra liutaka na nodra vukei na lewenilotu me ra vakasaqarai ira na yalo e savasava ka vakarautaki ira ki na papitaiso kei na bula veiqaravi ena loma ni nodra tabanalevu kei na iteki. Ko Peresitedi Hinckely e a kaya talega: “Au gadreva meu vakasalataka me ra solia na bisopi yadua ena Lotu e dua na ibole vei ira na lewenilotu o ya, ‘Me da cakacaka vata me tubu na tabanalevu’” (“Find the Lambs, Feed the Sheep,” Liaona, Julai 1999, 120).

E dua na bisopi mai na vanua o Washington a masumasu ka vakamuria na ivakasala oqo. Oqo na ka e sa vakayacora tiko. Mai na veitokoni ni iliuliu ni mataisoqosoqo kei na matabete, sa veidusimaki tiko na matabose ni tabanalevu ki na cakacaka ni kaulotu ena tabanalevu. Era na dau sureti na daukaulotu ki na soqoni ni matabose ni tabanalevu me veivosakitaki kina na nodra cakacaka. Era lesi na lewenilotu me ra tomani ira na daukaulotu vei ira na vakatataro. Era sikovi ira talega era luluqa vakalotu kei ira era sega ni lewenilotu vakavuvale. Ena yabaki sa oti e a papitaisotaki ka vakacurumi vakalotu ki na tabanalevu oqo e 46 na curuvou, ka ra maroroi sara vakavinaka. Vei ira era lewena mai na Lotu se ko ira na luluqa ka ra sa kaukauwa cake mai ena tabanalevu oqo sa mai kadre sara na nodra veikilai e baleta ni ra sa veicokonaki tiko mai kina na matabete kei na mataisoqosoqo ki na itavi ni veivakacurumi mai na veidusimaki ni bisopi ena veitokoni ni matabose ni tabanalevu (raica “Ward Council Is Secret of Centralia Ward Success,” Church News, 1 Fep., 2003, 5).

Sa itavi ni bisopi me vakaitavitaka na lewe ni tabanalevu taucoko ki na kaburaki ni kosipeli. Ko ni na raica ni na vakalougatataki kemuni na Turaga kei ira na lewenilotu ena kena na yaco mai vakalewelevu na curuvou kei ira na luluqa. Ena sega walega me na itavi tiko ni matabose ni tabanalevu na cakacaka ni kaulotu ia ena vakaitavi talega kina na kuoramu ni italatala qase, iSoqosoqo ni Veivukei, kei na kuoramu tale e so, ilawalawa kei na mataisoqosoqo. Me ra cokonaki ki na papitaisotaki kei na nodra maroroi na tama kei na tina kei ira na luvedra. O koya gona na cakacaka ni matabete kei ira na iliuliu ni mataisoqosoqo ena veicokonaki mai kina na iliuliu ni kaulotu ena tabana kei na bisopi ena veitokoni ni matabose ni tabanalevu. Ni vakayacori vakakina, era na yaco na curuvou me ra lewenilotu yalodina ena nodra tabanalevu.

Ena gauna oqo, sa yaco mai e dua na gauna talei vei ira na lewenilotu me ra wasea kina na kosipeli ena kena vakayagataki na DVD “Finding Faith in Christ” ka a lewe ni mekesini na Ensign ni Epereli 2003. Sureti ira na wekamu kei na nomu itokani me ra mai vakayakavi kei kemudou ena Siganimate oqo, ka rawa ni veivosakitaki kina na bula veiqaravi kei na nona tucaketale ena qaqa na noda Turaga o Jisu Karisito. Sa rawa talega me rau vakavulici ira na daukaulotu ena nona sa vakalesuya mai na Turaga na Nona Lotu vua na Parofita o Josefa Simici.

iKatolu, e sega ni gadrevi ki na lewenilotu daukaulotu na veiqaravi e so e veibacani se vakalawataki. E gadrevi ga kina na vakabauta—na vakabauta dina kei na vakanuinui tiko Vua na Turaga. E gadrevi talega kina na loloma dina. Na imatai ni vunau levu duadua sa ikoya mo”lomani [Jiova] na nomu Kalou ena lomamu taucoko, kei na yalomu taucoko, kei na nomu nanuma kecega … a sa tautauvata na kena ikarua, Mo lomana na kai nomu me vaka ko lomani iko” (Maciu 22:37, 39).

Ia me da vakatara na kena dusimaki keda na kaukauwa ni loloma ni da wasea na kosipeli vei ira na lewe ni noda vuvale, wekada, itokani, itokani vakacakacaka kei ira na tamata eda sota kaya ena bula oqo. E voleka ni tamata kecega era gadreva tu na vakacegu kei na bula marau. Oqo sa ivakarau ga ni gagadre ni tamata. Era dau vakasaqara na tamata na iwali ni leqa era sota kaya. Oqo e ka dina sara ena vuravura voravora eda bula tiko kina oqo.

Ena sega ni kauta mai na vakacegu kei na marau tawamudu, na kila ka vakacakacaka, tubu ni isau, vale vivinaka, se motoka vou cake se iyau ni veivakamarautaki. Na marau e vure ga mai na kilai vinaka ni Kalou ka kila tiko ni sa tiko e dua na yavu ni noda marau kei na vakacegu tawamudu. Na marau e vure mai na kila, ka lomana na iVakabula ka bula voli ena Nona ivakavuvuli. Na marau e vure mai na veimaliwai qaqa ni matavuvale kei na Lotu ka yavutaki tiko ena iyau vakosipeli.

Era kaya na lewenilotu e so: “Au rerevaka na wasea na kosipeli baleta au na rawa ni vakacudruya e dua na tamata.” E sa laurai rawa ni ra sega ni dau vakacudrui na tamata ni vakayacori na veiwasei ena veikauwaitaki kei na loloma dina. Ena rawa vakacava me dua me na cudru ena noda kaya “Au taleitaka na nona sa vukei au tiko na Lotu” ka tomana tale ena veidusimaki ni Yalo Tabu. Eda na veivakacudrui walega ena gauna eda vakayacora tu ga vakarairai na ilesilesi oqo ka sega ni loloma se veikauwaitaki dina. Mo ni kakua ni guilecava oi kemuni na wekaqu, ni da sa vakaiyautaki tu oqo ena ivakavuvuli dina ka na kauti ira mai na tamata vua na Turaga. Sa umani tu na kaukauwa ena kosipeli vakalesui mai i Jisu Karisito me yauta mai na marau titobu ka veisolegi ki na yalo ni tamata—ka me na karoni ka lomani ki na vo ni gauna sa bera mai ka tawamudu. Eda sega walega ni saga me ra lewena na Lotu o ira na tamata ; eda sa wasea sara tikoga vei ira na taucoko ni kosipeli i Jisu Karisito. Ia me vaka ga ni sa ka qaqa na noda itukutuku, ena sega ni gadrevi me vakasaurarataki se usumakivei ira na tamata. Sa rawa walega me na wasei—yalo ki na yalo, tamata ki na tamata, vakasama ki na vakasama—ena loloma vakaveiwekani, kauwai kei na veivukei. E gadrevi me da veimaroroi ka veitauri liga vata. Sa rawa ni da vakacilava ki na noda bula na veivakalougatataki ni kosipeli ni da vinaka vei ira na wekada, vakatulewa vinaka, veikauwaitaki ka vukei ira na tamata.

Me da vakamuria na ivakasala nei Parofita Josefa Simici: “Sa itinitini ni veika eda tukuna tiko oqo, o ya ni sa noda itavi cecere ka bibi na kena kaburaki na kosipeli” (History of the Church, 2:478).

Kemuni na taciqu kei na ganequ, ena rawa ka dodonu me da na vinaka sara. Au sa masuta na Turaga me na vakatikora vei keda yaduadua na vakabauta kei na yalo e qaqa me vaqaqacotaka na noda itavi ni nodra tokoni na daukaulotu ena kena wasei na kosipeli vakalesui mai, ki vuravura taucoko vei ira kece na luve ni Kalou. Ena yaca i Jisu Karisito, emeni.