Elder Shirley D. Chritensen
Mai na Vitusagavulu

E matata vinaka tu ena nona vakanananu o Elder Shirley Dean Christensen na mataka ni i ka 18 ni Me 1980. E a kida mai me dua na mataka vinaka ka totoka ni vulaitubutubu. Ia ena sigalevu tutu, sa tekivu me vakatu loaloa na lomalagi e delai Royal City, Washington, ka sa ubia na veilomanibai kei na veiloga ni kau vuata drokadroka vinaka na dravusa. Sa kacabote na Ulunivanua na Saint Helen, rauta ni 150 na maile (240 km) ena ra kei Royal City.

Ena loma ni vica na siga ka tarava, sa sarava tu ena domobula o Elder Christensen ni sa lutu vakalevu sara na vua ni nona veivuni apolo ka sa lutuki dravusa tu. E a nanuma ni na vakacaca vakalevu sara ki na nona bisinisi na revurevu ni leqa oqo.

Ia na apolo era a qai vo tu sa bau uasivi sara ga na kena ivakatagedegede, na kena vakalailaitaki na vua ni apolo oya a vinaka sara kina na veika e rawata. “E a taqomaka dina na neitou vua ni qele na Turaga,” e kaya o koya e a yaco oqori me dua na yabaki vuavuai vinaka duadua keitou se qai bau donumaka.” E vakasotara vata na veivakalougatataki oqo ki na nodratou dau solia ena yalodina na nodratou ikatini kei na nodratou gadreva me ratou talairawarawa ki na ivakaro ni Turaga. E vakavuvulitaka talega vua na veika e sotava oqo, ni so na gauna ena dau kauta mai na veika dredre eda sota kaya na veivakalougatataki veivakurabuitaki.

E a sucu mai Preston Idaho, ka luvedrau o LeGrand kei Blanche Naef Christensen o Elder Christensen, na lewe ni iKarua ni Kuoramu ni Vitusagavulu vou ena i ka 8 ni Janueri 1939. E a tubu cake mai Idaho kei Washington ka vuli ena Brigham Young University, ka sota kina vata kei Geniel Johnson. Erau a vakamau ena i ka 23 ni June 1962 ena Valetabu e Manti, Utah. E ono na luvedrau ka ra bula kece tiko ena gauna oqo.

E a kaulotu o Elder Christensen ki Uruguay mai na 1959 ki na 1961, na vanua talega oqori a bucina cake kina e dua na ivakadinadina dei me baleta na Parofita o Josefa Simici. “Ni se bera oqori sa dau rawa vei au meu tukuna na italanoa ni iMatai ni Raivotu. Ia niu vakavuvulitaka ena yalomasumasu vei ira na tani, sa yaco me dei na noqu ivakadinadina me baleta na Parofita o Josefa Simici kei na kosipeli vakalesui mai,” e kaya. “Au kila ni veika au a vakavuvulitaka tiko e dina.”

E a peresitedi voli ni kaulotu ena Tabana ni Kaulotu na Argentina Resistencia o Elder Christensen mai na 1999 ki na 2002. Sa veiqaravi oti talega vaka liganicakacaka tabu e valetabu, peresitedi ni tabana, bisopi, ka lewe ni mataveiliutaki ni iteki.