Na iNuinui e Matadredredre mai vei Keda
E rawa ni o yadra cake e veisiga … me serau tu na matamu ena inuinui baleta ni dua tiko na nomu i Vakabula.
Ni vo e vica na siga me sucu na makubui keirau yalewa qase duadua, erau a lomatarotarotaka voli na nona itubutubu se na tagane beka se yalewa na gone. E valenilotu ena Sigatabu ka tarava, era a lagata na veivosa oqo, “Na inuinui e matadredredre mai vei keda” (“Keitou Vuabale,” Sere, no. 36). Ena nodrau kila vakasauri erau veiraici ga ka kaya vata, “E yalewa!” Ni sa sucu na gone erau vakayacana me o Hope (iNuinui).
Hope (iNuinui), ka veiganiti na nona vakayacani, e sa yabaki lima mai oqo. E yadra ena veisiga ka rai sara ki liu ki na veika vou. E sa kalasi dua e koronivuli, ka vuqa na ka e via kila. E serau mai matana na rarama ni inuinui.
Ena vica na macawa sa oti au sota kei na vuqa vei kemuni na goneyalewa. Au sikovi kemuni me baleta na nomuni taledi, nomuni sasaga, nomuni tadra me baleta na siga ni mataka. Ena noqu vakasama au se raica tikoga na matamuni. Au raica na mata mamarau ni goneyalewa ka sa lewe ni Lotu ena loma ni ono na vula. Au raica na mata galili ni goneyalewa ka lewe ni lotu duadua mai na nona vuvale ni wawa taudua tiko ena ikelekele ni basi. Au raica na mata tarotaro ni goneyalewa ka taroga, “Au na rawa li ni kilikili meu lako ki na valetabu?” Kau raica na wawale ni matadra na goneyalewa ka ra yadra vakamataka lailai me ra laki semineri. E so vei kemuni e taleitaka na bula ka so e leqataka na nodra bolebole kei na nodra veika ni mataka. Ena noqu veitalanoa kei kemuni, au a vakaraica tiko meu raica na serau ni inuinui ni ramase mai e matamuni.
Au vakasamataka ena so na gauna se ko ni nanuma ni ko ni luvena yalewa na Tamada Vakalomalagi ka lomani kemuni. Ena nomuni papitaiso, ko ni a muria na ivakaraitaki ni nomuni iVakabula ka ko ni curuma na sala lesu ki na nomuni vale vakalomalagi. E tukuna ko Nifai ni ko ni sa tiko oqo ena “sala dodonu ka rabailailai sa basika ki na bula tawamudu io dou sa curu mai ena matamata ni koro” (2 Nifai 31:18). Ni ko tiko rawa ena sala ko ya, mo tovolea mo tiko ga kina, ia na sala mo tikoga kina, me tiko na nomu inuinui, e matadredredre mai vei iko ka vakararamataka na nomuni sala.na inuinui
E taroga ko Moronai, “Na cava … na nomudou inuinui?” Na kena isau e tukuna vei keda e tolu na inuinui lelevu: “Sa nomudou inuinui na isoro i Karisito kei na kaukauwa ni Nona tucaketale mai na mate, mo dou rawata kina na bula tawamudu” (Moronai 7:41).
Ena nomu a papitaisotaki, ko sa yaco mo vakaitavi ena imatai ni nuinui levu, na Veisorovaki i Karisito. Ena veigauna kece o na kilikili kina mo vakayagataka na sakaramede, e nomu na galala mo tekivu tale ka vakavinakataka cake vakalailai. E tautauvata ni ko buluta e dua na tikimu makawa sega ni kilikili, ka tekivu tale ena dua na bula vou.
Au a talanoa kei na rua na goneyalewa ka rau a buluta dina na nodrau sala makawa. Erau a taukena e so na isulu ka sega ni sota na Nona ivakatagedegede na luvena na Kalou, erau mani kelia e dua na qara, biuta kece kina na nodrau isulu, ka buluta!
Ena torocake na nomu inuinui kei na vakabauta na iVakabula ni ko veivutuni ka kitaka vakataki iko e so na veisau ka tautauvata kei na nomu buluta na nomu ivalavala ca. Ko na rairai vinakata mo kerea na nodrau veivuke na nomu itubutubu kei na nomu bisopi ena nomu cakacaka mo vinaka. Ni ko veivutuni ka taura ena kilikili na sakaramede, sa na qai rawa mo “lako ena bula vou” (Roma 6:4). Ena matadredredre mai vei keda na inuinui me baleta na Veisorovaki i Karisito. Me baleta ni ko sa papitaiso oti, ka sa tiko rawa ena sala ki na bula tawamudu. Mo tikoga e loma.
Na ikarua ni inuinui levu sa ikoya na Tucaketale. E a yalataki vei keda kece ena vuku ga ni noda iVakabula o Jisu Karisito ko na tucaketale kina, ka ko sa kila ni ena gauna sa oti kina na bula oqo, e se vuqa ga na bula me bulataki.
Na vugoqu ko Katie e dua na goneyalewa dau vakanuinui yabaki 20 ka vuli ena univesiti ka vuqa na nona taledi kei na navunavu me baleta na siga ni mataka. Ena va na yabaki sa oti e a mate ena dua na vakacalaka ena motoka. E dina ni keitou dau vakananumi koya vakalevu na nona matavuvale, keitou kila ni keitou na tiko vata tale kei koya ka me keitou kakua ni leqataki koya. Ena pausi nei Katie e tiko kina na nona ivolatara ni valetabu ka solia vua na nona bisopi me rawa ni papitaisotaki baleti ira na tukana. E bula kilikili o Katie. Ni sa voleka tiko na gauna ni nona mate, e a vola na veivosa oqo ko Katie: “Ke iotioti ni noqu siga e vuravura edai, oqo na itukutuku au na biuta mai. Kitaka na veisiga yadua me vakaibalebale… . Tiko voleka Vua na Turaga, rawata na kila ka kece me baleta na ivolanikalou, … ka nanumi Karisito tikoga ena Nona ivakaraitaki kei na Nona Veisorovaki ka sasagataka e veisiga mo vakataki Koya” (Katie Bangerter). E a curu ena sala ka lako ki na bula tawamudu ka tiko ga kina.
Ena vukui Karisito ga sa tiko na “inuinui e matadredredre mai vei keda” ka sega kina ni ganita mo leqataka na tauvimate, mate, dravudravua, se so tale na leqa. Ena qarauni iko na Turaga. Na nomu itavi mo muria na ivakaro, tugana ki lomamudou na vosa i Karisito,ka tikoga ena sala ki na nomu itikotiko vakalomalagi.
Ena inuinui ni Veisorovaki kei na Tucaketale, e tiko na ikatolu ni inuinui levu, na inuinui ni bula tawamudu. E tu na ibalebale kei na inaki ni nomu bula ena nomu bulataka edaidai.3 Na imatai ni vakaro e soli vei Atama kei Ivi ena Were mai Iteni e baleta na bulataki ni bula ena kena levu taucoko.4 E a tukuni vei rau me rau “vakaluveni, ka tubu me lewevuqa, ka vakatawai vuravura, ka vakamalumalumutaka: ka lewa … e dela ivuravura”. (iVakatekivu 1:28) E rawa ni ko vakalevutaki ni ko vuli ka vakasamataka. Ko na tubu ka lewevuqa ni ko vakatoroicaketaka na nomu taledi kei na kila. Ko na vakatawai vuravura ena nomu wasea ka qaravi ira na tani. Ena tu vei iko na lewa ena nomu vorata e dua na malumalumu. Ko na vakamalumalumutaka ni ko veivakacegui,5 vorata na ivakarau ca, ka qarauna na vakasama ca.
Na noqu ivakaraitaki vinaka ni tubu ka vakatawai vuravura sai tinaqu. Na nona ibole ni bula oqo sa ikoya: “Kidavaka na itavi e vakavuna mo na vinaka cake sara, ko na qai tubu.”6 Meu tukuna mada e vica na ka totoka mai na nona bula. Ena nona gauna ni goneyalewa e a bula ena veiulunivanua kilai e Uintah7 ka cakacaka tiko kina ko tamana. E a vulica na musu vunikau babalavu, siwa, ka keba e tautuba. Ena draki batabata e laki vuli ki na siti, qito ena dua na timi ni basketball, ka vulica me uvuca na biukila. E a lako ki na univesiti ka yaco me nasi. Ni vakamau oti, e a lako vata kei na watina ena kaulotu ki Brazil ka vulica kina na vosa vaka-Potukali. E sa lakova e levu na matanitu ka vakavulica na kosipeli vei ira e udolu na tamata. E vulica na ivolanikalou e veisiga ka sa vola e vuqa na ivola, e 62 na makubuna ka rawa ni vakabuta e 600 na dounati8 ena dua na mataka!
E tudei tu o tinaqu ena Nona sala na iVakabula ena vakabauti Koya sega ni yavalati rawa (raica 2 Nifai 31:19) ena veisiga kece ni nona bula ia e yadra ena veimataka ka vakanuinui ki na veika vou ena sotava. E tukuna ni bula oqo e sa rui vinaka, ka se levu ga na ka me vulica.
Baleta ni tiko na noda iVakabula, ka da vakabauta e dua na bula tawamudu ni marau ni veibuli, veiqaravi, kei na vuli. E matadredredre mai vei iko na inuinui. Ko sa tiko rawa ena sala dodonu ka rabailailai. Mo tikoga kina.
Ena vica na yabaki sa oti, au a tiko kei na buqu dokai yabaki 97. Ena nona dabe sapiloki toka ena nona idabedabe vakaqiqi, malumalumu ka voleka ni mataboko, e talanoataka toka vakamalua na nona bula. Au a tukuna, “Oqo e dua na vuravura ca. E sa rui levu na veitemaki kei na bolebole. E rawa beka me da kilikili tu ga ka lesu tale Vua na Tamada Vakalomalagi?” E a duri cake vakamalua vakadodonu ka kaya ena domo kaukauwa ni veivakaroti, “IO! E DODONU! KO YA NA VUNA KO TIKO KINA EKE!” Vinaka vakalevu, Buqu, na nomu vakavulici au me baleta na inuinui.
Me vakataki Katie, na tinaqu, kei Hope yabaki lima, e rawa ni ko yadra cake ena veimataka ka namaka na veika vou o na sotava ena ni matadredredre mai vei keda na inuinui baleta ni tiko na noda iVakabula. Ko sa papitaiso ki na Nona Lotu, Na Lotu i Jisu Karisito ni Yalododonu Edaidai. E gadrevi mo tiko kina ka toso tikoga ki liu ka tudei ena nomudou vakabauta ki na nomudou itikotiko mai lomalagi, ena yaca i Jisu Karisito, emeni.