Elder William W. Parmley
Mai na Vitusagavulu

Na vica na vula sa oti ni nona bula o Elder William Watts Parmley e vaka na ivakalekaleka ni vicasagavulu ni nona yabaki ni bula sa oti. Erau a lewa vata kei na watina, o Shanna Nielsen Parmley, me sa na vakacegu mai na nona cakacaka vakavuniwai ni uto kei na parofesa me baleta na wainimate ena Univesiti ni California e San Francisco me rawa kina ni rau kaulotu. Ni vakavakarau tiko ki na kaulotu o Elder Parmley—ka qai mani kacivi me laki lewena na iKarua ni Kuoramu ni Vitusagavulu—sa mai vakavotukana kina na ivakadinadina ni nona bula taucoko.

E kaya o Sista Parmley me baleti ira na dau veimaliwai vata kei Elder Parmley, “Era kila kece tu na nona bula dokai kei na nona dau lomana na matavuvale. E dau kilai votu na nona lomana na Kalou.”

Ena nona vakacegu mai na dua na cakacaka era sega ni dau vakacegu mai kina na tamata, sa dau levu na veigauna vivinaka me wasea kina o Elder Parmley, yabaki 67, na vuna e sa biuta kina vakatikitiki na cakacaka me baleta na wainimate. E nanuma lesu e dua na tamata erau a sota ena dua na koniferedi. E tukuna vei ira na tiko kina, na vuna e sa na sega tale ni vakaitavi kina ena cakacaka oqo. Ena siga ka tarava, sa kaya kina vua e dua e rau cakacaka vata, “Keirau sega ni rawa ni moce kei na watiqu ena neirau vakasamataka tu na veika o tukuna. Vakuria mada na nomu itukutuku me baleta na kaulotu oqo.” E a vakayacora vakakina o Elder Parmley, ka qai kaya ga mai na tamata oya, “E rawa beka ni keirau lako vata kei iko?”

Ena nona kacivi ki na Vitusagavulu, e marautaka o Elder Parmley ni rawa me veiqaravi. Na mataqali talairawarawa vaqori e dau kunei ga vei ira e sa tiki tu mai ni nodra bula na veiqaravi vakavuniwai, na tagane vakawati, tama ka tukanigone, ka vakakina me vaka ni dua na lewe ni Lotu.

E kaya kina o Eder Parmley, “Me vaka na ka e kaya na Tui o Penijamini, oqori sara ga na veika eda mai cakava eke Eda veiqaravi vakataki keda, sa ikoya talega oqori na noda qarava na Kalou.”

Erau a vakamau o Elder kei Sista Parmley ena Valetabu mai Salt Lake ena 1961. E va na luvedrau ka walu na makubudrau. E a sucu o Elder Parmley na luvedrau o Thomas Jennison Parmley kei LaVern Watts Parmley e Salt Lake City ena i ka 22 ni Janueri 1936.E a kaulotu ki na Tabana ni Kaulotu ena Northwestern States ka sa veiqaravi talega vakabisopi, peresitedi ni iteki, mata ni yasana, ka Vitusagavulu ni Wasewase.