O Iko e Dua na Luve ni Kalou
Ni kakua ni guilecava, na noqu itokani gonelalai, ni o ni luvena dina na Kalou …, e dau lomani kemuni ka gadreva me vukei kemuni ka vakalougatataki kemuni.
Kemuni na noqu itokani itabagone, kemuni na noqu itokani gonetagane kei na goneyalewa, au vakavinavinakataka vakalevu ni rawa meu mai tiko vata kei kemuni ena marautaki ni ika 125 ni yabaki ni Lalai.
Au nanuma ni se bera ni bau dua na soqoni ni gonetagane kei na goneyalewa vakaoqo mai liu. Au vosa tiko yani vei kemuni mai na Vale ni Koniferedi levu ka tiko oqo ena siti o Salt Lake. Era sa vakasinaita tu oqo na gonelalai, nodra qasenivuli, kei ira na nodra itubutubu—e 21,000 na kedra lewe levu. Sa vakatalega kina vei ira na udolu vakaudolu ena veivale ni soqoni e veiyasai vuravura ko ni sa soqoni vata kina mo ni marautaka na gauna talei oqo. Na noqu vosa ena vakadewataki ena levu sara na veimataqali vosa. Eda bula tiko ena vevanua duidui ka da vakarokorokotaka na kena dui kuila. Ia e dua ga na ka levu e semati keda vata tiko. Eda lewena kece na Lotu i Jisu Karisito ni Yalodododnu Edaidai. Na nomuni soqoni vata mai ena veivanua duidui o ni tiko kina e sa ivakaraitaki ni totoka ni kena sa tubu na Lotu mai na gauna e a tauyavu kina
E a dau sega tu na Lalai ena Lotu. Ena imatai ni 48 na yabaki ena kena itukutuku e a sega tu na nodra isoqosoqo na gonetagane kei na goneyalewa. E dua na marama vinaka sara ka yacana o Aurelia Spencer Rogers e a nanuma me dua na nodra isoqosoqo na gonetagane me rawa ni ra “vulica kina me ra na turaga vinaka cake.”
E a qai kau cake na nona vakatutu vua na Peresitedi ni Lotu ena gauna o ya o John Taylor. E qai nanuma o koya ni kevaka me dua na isoqosoqo ena vinaka vei ira na gonetagane lalai ena vinaka talega vei ira na goneyalewa lalai. Era na vakarogovinakataka cake na irorogo ni sere. Sa qai yaco, ena 125 na yabaki sa oti, me qaravi kina na imatai ni soqoni ni Lalai ena nodra sota e 224 na gonetagane kei na goneyalewa “me ra vakavulici me ra talairawarawa, vakabauta na Kalou, masu tiko ena veigauna, ka itovo rakorako” (Encyclopedia of Mormonism, 5 na ivola [1992], 3:1146).
Mai na kena itekivu lailai o ya sa tubu sara na Lalai me yacova ni sa mai dua tu na tiki ni Lotu ena veiyasai vuravura. Nikua sa voleka sara ni dua na milioni na kemuni iwiliwili na Lalai.
Oqo e vinaka, baleta ni o ira na gonetagane kei na goneyalewa lalai e dodonu me tiko na nodra isoqosoqo me vaka ga ni tiko na nodra isoqosoqo ni veivakavulici na cauravou kei na goneyalewa, kei ira era qase cake ena Lotu.
O iratou na marama eratou sa vosa oti vei kemuni eratou vakatulewataka na qaravi ni Lalai e vuravura taucoko. E 23 taucoko na dui luvedratou, ka ratou kila vinaka sara tu ga na veika o ni na taleitaka.
O ni sa kalougata, na noqu itokani lalai, ni ra tiko na nomuni qasenivuli gugumatua. Era lomani kemuni vakalevu, ka ra sa dau nanamaki tu me ra na sotavi kemuni ena veimacawa me ra na tuberi kemuni ena ivakavuvuli ni Turaga
E talanoataka o Baraca Artel Ricks e dua na italanoa veivakauqeti ni dua na qasenivuli ni Lalai. Ena gauna oya e se gonetagane lailai sara kina ka rauta ni yabaki lima se ono. Ena dua na yakavi eratou a dabe wavokita na teveli ni kana na nona matavuvale ka veitalanoataka na ikatini. Eratou tukuna vua ni “ikatini e dua na ikatini ni veika kece eda saumi kina ka ra dau solia vua na Turaga o ira kece sara era lomani Koya.”
E dau lomana na Turaga o koya ka sa vinakata me solia vua na Turaga na nona ikatini. Sa qai kauta na dua na ikatini ni nona ilavo lailai ka maroroya tu. Sa qai kaya, “Au sa qai lako ki na rumu e duabulu ka vakaloka tiko—na valenisili—kau sa qai tekiduru ena yasa ni tavu ni sisili. Au sa qai taura na tolu se va na tikini siliva e ligaqu, au sa qai kerea na Turaga me ciqoma [au a sa vakadeitaka ni na basika mai me taura]. E taura toka e dua na gauna na noqu vakatakekere vua na Turaga.[e sega ni dua na ka e yaco. Na cava e sega ni mai ciqoma kina o Koya na noqu ikatini?]. Niu tucake mai ena noqu a tekiduru voli, au vakila na noqu sega ni buladodonu kau sega sara ga ni tukuna vua e dua, na ka a yaco… .
“Ena vica na siga e muri e qai tukuna kina e dua na qasenivuli ni Lalai ni vakila voli mai ni dodonu me vakavulica e dua na ka e sega ni tiko ena lesoni. Au dabe toka ena kurabui ni sa qai vakavuvulitaka na icakacaka ni saumi ikatini [vei ira na bisopi, na dauveiqaravi ni Turaga] Ia na ka au vulica e bibi cake sara mai na icakacaka ni saumi ikatini. Au vulica ni sa rogoca ka sauma na noqu masu Turaga, ni lomani au o Koya, kau sa rui ka bibi sara vei Koya. Ena veiyabaki e muri au sa qai dau mai vakavinavinakataka tu na nona a vakauqeti na qasenivuli ni Lalai me vakavulici au ena siga o ya—me veivakavulici ena veivakauqeti ni Yalo Tabu.
“Sa rui ka talei na vakanananu ni veika e a yaco ena gauna o ya ka ni sa sivi e tolusagavulu na yabaki kau se sega tiko ga ni bau wasea. Nikua sara mada ga, sa oti qo e onosagavulu na yabaki, e se dredre tikoga vei au meu wasea ka ni dau vakaturuya na wainimataqu. Na ka e vakatubu luluvu ni dua na qasenivuli yaloyalovinaka ni Lalai e a sega ni kila ni vakavuna o koya me vosa na Turaga vua e dua na gonetagane lalai” (“An Answer to Prayer,” Tambuli, Me 1988, 28).
Au a dau lako talega ki na Lalai niu a se gonetagane lailai. Ena gauna o ya keimami dau sota ena veisiga Tusiti ena yakavi siga ni dau suka mai na vuli. E dau kena irairai vei au ni keimami sa dau oca sara tu ga ka viakana ena veiyakavi siga ni sa dau suka mai na vuli. Ia o ira na neimami qasenivuli era sa rui dau lomani keimami sara ga vakavinaka. Ena veigauna era dau kauta mai eso na kuki me keimami kania, ia na kena ka bibi duadua sa ikoya na lesoni totoka era dau vakavulica vei keimami. Eke keimami dau vulica kina na veika e baleti Jisu kei na Nona loloma levu vei keda. Keimami vulica kina na veika me baleta na Kalou na Tamada Tawamudu, ka rawa ni da dau vakacacabo masu vua.
Keimami vulica kina na veika e baleta na gonetagane o Josefa, ena nona a lako ki na veikau me laki masu ka qai saumi mai na nona masu ena nodrau basika vua na Tamada Vakalomalagi kei na Luvena o Jisu Karisito. E ke keimami vulica kina na veika me baleta na itukutuku ni Lotu, na veika me baleti ira na turaga kei na marama, cauravou kei na goneyalewa yaloqaqa ka vakabauta dina ka ra cakacaka sara vagumatua me ra vakaukauwataka. Eke talega keimami vulica kina me keimami dauveilomani ka veivukei ena veigauna kece sara. Kemami vulica na bibi ni kena dau veivuketaki na qaravi ni itavi mai vale. Keimami vulica me keimami dau vakaitovotaki keimami.
Ena gauna oqo sa dau vakayacori na lalai ena Sigatabu. E vuqa sara na vuna e vinaka kina na gauna oqo. E sega ni da oca tu ena noda vuli tiko ena siga taucoko. Sa rui dau balavu na Lalai, ia era sa dau vakarau vinaka tu na qasenivuli, ka sega walega ni dau vinaka na lesoni, ia na kena itavi qaravi talega.
Eke eda dau lagata vata kina na veisere vakasakiti ni Lalai. E dua keimami dau lagata niu se gone e va qo:
Tamaqu, na nomuni serau vakalou
Me cilavi keimami sa neimami masu.
Ni tara na matai keimami me keimami rawa ni rai;
Vakavulici keimami me keimami talairawarawa.
Na neimami lesilesi tabu sa ikoya
Me wasei yani vakayawa na nomuni itukutuku
Na iserau ni vakabauta e sa tu e loma ikeimami
Na dina, me neimami kalokalo dauveidusimaki
(“Na iSerau Vakalou,” Hymns Naba 305
A vola na qaqa ni sere totoka o ya o Matilda W. Cahoon ka dau noqu qasenivuli niu se gonetagane voli.
Sa tu ena gauna oqo vei kemuni na Nodra iVolanisere na Lalai ka sinai tu ena veimataqali sere ka volai vakatabakidua me baleti kemuni. Eso na sere oqori sa laga oti nikua. Eda se qai lagata vata oti ga na sere vakasakiti o ya ka a volai vei kemuni na gone ena Lalai, ia sa lagati tu oqo ena Lotu raraba. Sa dua dina na sere totoka. Ka tukuna tu na dina cecere ka vakasakiti me vakaoqo.
Au luve ni Kalou,
E a talai au mai,
Au sucu ka susugi mai
Ka dau karoni tu.
Meu tuberi ka liutaki tikotikoga
Meu vulica rawa tu
(“Na bula vou ko ya” Sere, naba 58)
Sa dua dina na sere vakasakiti o ya. Ka vakatavulica e dua na dina vakaitamera. E dua tiko na tamamu vakayago. Sai koya na itokani lomani nei tinamu. Au nuitaka ni o lomani koya, ka dau talairawarawa vua. Ia e dua tale tiko na tamamu. O ya na Tamamu mai lomalagi. Sai Koya na Tama ni yalomu, me vaka ni tama ni yagomu na tamamu vakavuravura. E tautauvata sara ga na kena bibi mo lomana na Tamamu mai lomalagi kei na nomu lomana na tamamu e vuravura.
Eda dau veivosaki kei na tamada vakavuravura. Sai koya na noda itokani, na noda dauveitaqomaki, o koya ka dau vakarautaka na noda isulu kei na keda kakana kei na vale me da tiko kina. Ia eda dau vosa talega vei Tamada mai lomalagi. Eda vakayacora oqo ena masu. Au nuitaka ni ena veibogi kei na veimataka o ni na dau lolou sobu e durumuni ka veivosaki kei Tamamuni mai lomalagi. Au nuitaka ni ena mataka o na vakavinavinakataka na vakacegu ka soli vei iko ena bogi, na veikawaitaki kei na logaloga vinaka ka vakakina na loloma o vakila ena loma ni nomu vale. Au nuitaka ni o na kerei Koya me vakatawai iko ka vakalougatataki iko ka dusimaki iko ena loma ni siga taucoko. Au nuitaka ni o na masulaki tamamu kei na tinamu kei na ganemu kei na tacimu, ka o na dau nanumi ira era tauvimate ka gadreva tu na veivuke. Au nuitaka ni o na dau nanumi ira na daukaulotu ena Lotu, ena nomu masu.
Ena bogi ni o vakarau moce, au nuitaka ni o na tekiduru tale ka vakavinavinaka Vua ena vuku ni veivakalougatataki ena siga ko ya. Vakavinavinaka tale vua me baleti rau na nomu itubutubu kei ira na nomu qasenivuli. Kerea vua me vakalougatataki iko mo moce vakavinaka ka vakalougatataki ira talega na tani, vakauasivi cake o ira na tauvimate kei ira era vakaleqai tu kei ira e lailai tu na kedra kakana se sega ni dua na vanua vinaka me ra moce kina.
E sega soti ni ka levu e kerei tiko, se va beka li o ya, mo vakayagataka e vica na miniti ena mataka kei na yakavi mo veivosaki vata kei Tamamu mai lagi ni o kila ni o luvena na Kalou?
Kevaka o kila ni o luvena dina na Kalou, o na kila talega ni levu na ka ena gadreva vei iko, o Koya. Ena namaka vei iko mo muria na Nona ivakavuvuli kei na ivakavuvuli ni Luvena lomani o Jisu. E namaka vei iko mo dau yalodina ka dau yalovinaka vei ira na tani. Ena sega ni taleitaka kevaka o vosa ca se tauca eso na vosa sabalia. Ena sega ni taleitaka kevaka o sega ni dina, kevaka o butako se lawaki vakalailai mada ga. Ena marau kevaka o dau nanumi ira na tu vaka ca na nodra bula ena nomu masu Vua. Ena dau vakatawai iko ka tuberi iko ka taqomaki iko. Ena vakalougatataki iko ena nomu vuli ka vakakina ena Lalai. Ena vakalougatataki iko ena nomu vale ka na yaco mo gonetagane se goneyalewa vinaka cake, dau talairawarawa vei rau na nomu itubutubu, sega ni dau veileti vakalevu vei ira na tacimu kei na ganemu, dau veivuke e vale.
Ena yaco kina mo tubu cake me dua na cauravou se goneyalewa qaqa ena Lotu oqo. O na lewe ni nomu itikotiko vinaka cake.
Na tamata kecega e mai bula e vuravura, na Turaga sara mada ga o Jisu, a gonetagane se goneyalewa lailai vakataki iko. Era tubu me vaka na kena ivalavala era muria. Kevaka e vinaka na kena ivalavala o ya, era na yaco me turaga se marama vinaka.
Ni kakua ni guilecava, na noqu itokani gonelalai, ni o luvena dina na Kalou ka dui tu vei kemuni e dua na tiki ni Nona bula, e dau lomani kemuni ka gadreva me vukei kemuni ka vakalougatataki kemuni. Sa noqu masu me vakalougatataki kemuni na Tamada Vakalomalagi. Me matamamarau ena loloma vei kemuni. Mo ni lako ena Nona sala ka muria na Nona ivakavuvuli. Mo ni kakua ni vosataka na ivosavosa sabalia era dau taleitaka na gonetagane kei na goneyalewa e veikoronivuli. Mo ni dau masu vakalevu Vua, ka dau masu tikoga ena yaca ni Luvena Lomani, na Turaga o Jisu Karisito. Me da lewa me da dau muri Koya tikoga ena vakabauta. Me vinaka vei kemuni na bula, ni o ni luvena dina na Kalou, ka ganiti kemuni dina sara na Nona loloma kei na veivakalougatataki.
Ni kakua ni guilecava ni o ni lewena na Lotu i Jisu Karisito ni Yalododonu Edaidai. Au masulaka me vakalougatataki kemuni na Turaga kau solia vei kemuni na noqu loloma ena yaca tabu i Jisu Karisito, emeni.