Kacivi Vou E so na Vitusagavulu; Era Vosa na iLiuliu me Baleta na iValu kei na Veisaututaki

Ena iwasewase ni soqoni ena yakavi ni Vakarauwai ni ika 173 ni Koniferedi Raraba Vakayabaki, eratou sa kacivaka kina na Mataveiliutaki Taumada e so na veisau ena Mataveiliutaki ni Vitusagavulu kei na veiliutaki raraba ni Wilivola ni Sigatabu. Ka vakatalega kina na nona sa kacivi ki na iMatai ni Kuoramu ni Vitusagavulu e dua ka a veiqaravi tiko ena Vakaitutu Raraba, e lima na Vakaitutu Raraba vovou ka 37 na Vitusagavulu ni Wasewase.

Me vaka na nona sa mai lesi me peresitedi ni Brigham Young University Provo, sa mai vagalalataki kina ena nona itutu vakalewe ni Mataveiliutaki ni Vitusagavulu o Elder Cecil O. Samuelson Jr. mai na Vitusagavulu. Sa vagalalataki talega vakakina mai na nona itutu vakaperesitedi raraba ni Wilivola ni Sigatabu.

Sa kacivi me lewe ni Mataveiliutaki ni Vitusagavulu ka peresitedi raraba talega ni Wilivola ni Sigatabu o Elder Merrill J. Bateman mai na Vitusagavulu. Erau na veiqaravi tikoga vaka imatai kei na ikarua ni daunivakasala ena mataveiliutaki raraba ni Wilivola ni Sigatabu o Elder John H. Groberg kei Elder Val R. Christensen.

Sa kacivi me lewe ni iMatai ni Kuoramu ni Vitusagavulu o Elder Bruce D. Porter, e dua ka sa lewena tu mai na iKarua ni Kuoramu ni Vitusagavulu me tekivu sara mai na 1995. O ira na Vakaitutu Raraba vovou, ka ra kacivi me ra lewena na iKarua ni Kuoramu ni Vitusagavulu, o Elder Mervyn B. Arnold, Elder Shirley D. Christensen, Elder Clate W. Mask Jr., Elder William W. Parmley, kei Elder W. Douglas Shumway.

Era a tokoni talega e 37 na Vitusagavulu ni Wasewase vovou—e 4 mai Brazil, 2 mai Mexico, 2 mai Nigeria, 12 e Amerika, ka yadua mai Argentina, Australia, Austria, Bolivia, Costa Rica, Dominican Republic, Hong Kong, Indonesia, Itali, Panama, Phillippines, Samoa, Spain, Switzerland, Taiwan, Toga, kei Venezuela (raica na yacadra ena “Nodra Tokoni na Vakaitutu ena Lotu,” ena ivola oqo, t. 23).

O Elder J. Devn Cornish, e dua na Vitusagavulu ni Wasewase ena North America Southeast Area, e a vagalalataki me laki vakatawana e dua na ilesilesi vakaperesitedi ni daukaulotu.

Ena gauna ni koniferedi raraba e a tauca o Peresitedi Gordon B. Hinckley kei ira na iliuliu ni Lotu tale e so na vosa ni veivakacegui, kei na veidusimaki, kei na veivakasalataki me baleta na veilecavi qaqa ka yaco tiko e vuravura ena gauna oqo ki vei ira kece sara ena tai ruarua.

Ena nona sauma tiko na kena tarogi se “Evei na vanua e tu kina na Lotu ena veika kece oqo?” E taleva lesu kina o Peresitedi Hinckley vei ira na lewe ni Lotu “me kilai tiko ni da sega ni veivala tiko kei ira na Musulomani se dua tale na matavakabauta. Eda sa vakadeitaka ni tamata kece sara e vuravura eda lewena vata na matavuvale va-Kalou.”

E kerei ira na lewe ni Lotu o Peresitedi Hinckley me ra talairawarawa ki na ikatinikarua ni yavu ni vakabauta ena nodra tokona na lawa ni vanua ka me ra vakarorogo ki na nodra matanitu. E qai vakuria ena ivakasala ni qaqarauni, “Me da kakua sara ni duavata ena vosa se na cakacaka cala me baleti ira na tacida kei na ganeda ena veimatanitu e so ena tai oqo se na tai o ya.”

E tinia, ena nona veivakasalataki vei ira na Yalododonu me ra masulaki ira na okati tiko ena veilecalecavi ka me ra rai vua na iVakabula: “Ni sa tukuni oti na veika oqori sa macala kina ni o keda na lewenilotu eda tamata dau veilomani. Eda dau talairawarawa vua na noda Dauveivueti na Turaga o Jisu Karisito o Koya na Tui ni Sautu.”

Ena nona vosa ena mataka ni Vakarauwai, e a ripotetaka kina o Peresitedi Hinckley na kena toso tikoga na tubu ni Lotu. E vakaraitaka ni tara tiko na Lotu e rauta ni 400 na valenilotu e veiyabaki ka tomana ena, “Eda sa tosoya tale tikoga na tara valetabu e veiyasa ivuravura.” E ripotetaka talega ni rauta ni 8,000 na cauravou kei na goneyalewa era sa vakayagataka tiko na iLavo Vure ni Vuli, era sa vuli tiko me ra vakatorocaketaka vakava veimama na nodra rawa ka ena nodra cakacaka.

E a kacivaka na Lotu ni se bera na koniferedi ni ra na sega ni vakau tale mada ki Hong Kong na daukaulotu me yacova ni sa dua tale na macala ni vakadidike me baleta na matetaka na SARS. Na nodra maroroi ka taqomaki vinaka na daukaulotu ka ra veiqaravi tiko mai Hong Kong e sa ka bibi duadua sara ena gauna oqo ka vakadikevi sara toka vakavinaka. Eratou sa dau sota e veisiga na Mataveiliutaki ni Wasewase e Esia kei na daunivakasala ni bula mai Hong Kong me matata tiko kina na veika sa yaco tiko ka me soli talega kina na veidusimaki dodonu vei ira na peresitedi ni kaulotu ka soli yani kina vei ira na daukaulotu na ivakasala ni qaqarauni e veirauti ka taudonu.