Vakamau Tawamudu
Kevaka o gadreva e dua na ka me yaga vakadede, me duidui na nomu qarava… . Sa yaco me taleitaki sara me vaka ni ko sa cakava vakakina.
Ena vica na yabaki sa oti keirau a lako vakaveiwatini ki na dua na soqo ni vakamau ka a vakayacori e tautuba. Ena siga oqo keirau a tiko taumada mai na valetabu ena nodrau vakamau me baleta na gauna oqo ka tawamudu e dua na veiwatini gone keirau kila. Erau a veilomani sara. Na nodrau a sota e vaka e dua na cakamana. E levu era tagi ena marau. Keirau a yatuni talega me laki lululu ena yakavi ni siga vinaka o ya. E a tu e liu vei keirau e dua na wekadrau voleka. Ni qai yaco yani vei rau na veiwatini oqo na turaga oqo, a tu vakadua ka lagata yani ena domo e rogorogo vinaka na vosa veilauti mai na iVolai i Ruci, “Niu na lako ki na vanua ko sa lako kina; ia na vanua ko tiko kina kau na tiko talega kina: ia na kai nomu era na kai noqu, na nomu Kalou talega ena noqu Kalou: Ena vanua ko mate kina kau na mate kina” (Ruci 1:16-17).
Keirau a luvuci vakabibi ka sa vakadeitaki vei keirau ni na salamuri rau na marau—oqo sa dua na tikina, au nanuma, baleta ni o keirau vakaveiwatini e vakabiri tu e neirau lalaga ni vale na vosa vata ga oqo ka sa sivia e vuqa na yabaki.
Sa dua na ka rarawa ni sa mai madra yani vakamalua na ibalebale ni vosa totoka oqo. Baleta ni vuqa sara na vakamau edaidai sa mai tini ena veisere. Sa ubia na veiyalayalati kei na yalodina na qaciqacia, ivalavala ca kei na nanumi koya vakaikoya.
Na vakamau tawamudu sa dua na ivakavuvuli ka a tauyavutaki ni se bera ni buli na vuravura ka a vakatikori taumada e vuravura oqo ni bera ni yaco mai ko mate. Erau a vakamautaki o Atama kei Ivi mai vua na Kalou ena Were ko Iteni ni se bera na lutu. E kaya na ivolanikalou: “Ena siga sa bulia kina na tamata na Kalou, sa buli koya me ucuya na Kalou; sa buli rau me dua na tagane ka dua na yalewa; a sa vosavakalougatataki rau” (iVakatekivu 5:1-2; vakaikuritaki).
Era sa dau vakavulica tikoga na parofita, ni vakamau tawamudu sa ituvatuva cecere ka ivakadei ni Kalou ena Nona yavu cecere me ra vakalougatataki kina na luvena. E a kaya ko Peresitedi Ezra Taft Benson: “Na yalodina ki na veiyalayalati ni vakamau ena kauta mai na taucoko ni marau eke kei na iyau lagilagi ena bula mai muri” (The Teachings of Ezra Taft Benson [1988], 533–34). E vakamacalataka vakaoqo na vakamau vakasilesitieli o Peresitedi Howard W. Hunter ni “sa ikoya na ulu ni cakacaka tabu vakosipeli,” ka vakamacalataka ni na taura “e dua na gauna balavu [vei ira e so], ka na taura beka na bula taucoko oqo ka sivia,” ena sega ga ni vakuwai kina e dua e yalodina. (Teachings of Howard W. Hunter, ed. Clyde J. Williams [1997], 132, 140). E vakatoka ko Peresitedi Gordon B. Hinckley na vakamau tawamudu me dua na ka totoka (raica “What God Hath Joined Together,” Ensign, Me 1991, 71) ka dua “na iloloma talei duadua.” (“The Marriage That Endures,” Ensign, Me 1974, 23).
Ia e dina ga ni cecere ka rui lagilagi na iloloma oqo, e sega ni soli wale. E ka dina, e tiko na kena veiyalayalati, ena kena soli yani, ena rawa talega me tauri lesu kevaka eda sega ni maroroya na veika sa lavaki ena veiyalayalati oqo. Sa vakamacalataka tiko vei keda na Vunau kei na Veiyalayalati Wase 131 ni “sa tolu na ivakatagedegede ni lagilagi se lomalagi ena matanitu vakasilesitiel; sa kilikili me vakayacori vua na tamata (sa okati talega kina na yalewa) na cakacaka tabu vakabete, [ko ya na veiyalayalati tawamudu ni vakamau]” (V&V 131:1–2).
Na veiyalayalati sa dua na yalayala e vakalou. Eda yalataka me da vakayacora, sa na qai vakayacora vakakina na Kalou na nona yalayala. Kivei ira era na maroroya na nodra veiyalayalati ni vakamau na Kalou sa yalataka vei ira na taucoko ni Nona lagilagi, bula tawamudu, vuvale tawamudu, bula vakalou ena Matanitu Silesitieli kei na taucoko ni marau. Eda sa kila tu oqo, ia ena so na gauna eda vakawalena tu ga kina na veika me da vakayacora me da ciqoma kina na kalougata oqo. Sa vakamatatataka tu vei keda na ivolanikalou ni sa okati e tolu na ivakaro ena veiyalayalati oqo.
iMatai, na vakamau tawamudu sa ka tawamudu. Na ibalebale ni tawamudu o ya na tubu tikoga kei na torocake. Sa kena ibalebale ni rau na saga na veiwatini me rau na vakavinakataki rau dina sara. Sa kena ibalebale ni bula vakawati oqo me kakua ni vakacacani wale tu ga ni dau yaco mai e dua na veileti se sotavi e dua na ka ni veivakaleqai. Sa vakatakila tiko ni na qaqaco ga mai na veilomani, ka yacova sara na bula sa bera mai. Sa kena ibalebale ni rau na vakalougatataki yadudua na veiwatini me tawamudu, ka me dau wali na leqa kei na duidui e so baleta ni ra na dau tikotikoga. Na tawamudu e vakaraitaka tiko na veivutuni, veivosovosoti, vosota vakadede, vosota, inuinui, loloma, lomasoli kei na yalomalumalumu. Era sa umani na itovo kece oqo ki na veika e tawamudu, ka sa dodonu me da kila ka vakayacora kevaka me da rawata na vakamau tawamudu.
iKarua, na vakamau tawamudu sa lesi mai vua na Kalou. Sa kena ibalebale oqo ni koi rau na veiwatini ena vuku ni veiyalayalati ni vakamau oqo erau sa sureta na Kalou ki na nodrau vakamau, erau na masu vata, muria na ivunau, ka vakatikitikitaka tiko na iyau ni gagadre e so ki na kena yalayala ka ra sa vakavulica na parofita. Sa kena ibalebale ni sa yaco na duavata, ka vinakati na dina kei na savasava e taudaku ni vale ka vakakina e loma ni vale. Sa ikoya oqo na tiki ni ibalebale ni lesi mai vua na Kalou.
iKatolu, na vakamau tawamudu sa dua na cakacaka vata kei na Kalou. Sa yalataka tu o Koya e dua na bula e vakaikuritaki kivei ira era vauci vata ena valetabu. Sa dua ga na keda ivau vua na Dauniveibuli ka vakatakilai tiko ena ivunau a soli vei Atama kei Ivi me rau vakaluveni ka vakatawa na vuravura. Sa ilesilesi me ra vakavulici na gone ena kosipeli ni ra sa luvena talega. O koya gona eda dau vakayacora kina na lotu vakavuvale kei na vuli ivolanikalou, na veiwaseitaki ni kosipeli. Kei na qaravi ni tamata. Sa tiko talega e dua na ilesilesi ni kena tokoni ka duavata ki na veikacivi kei na noda itavi yadudua. Eda na kaya rawa vakacava ni da sa duavata kei na Kalou kevaka eda na sega ni veitokoni ni sa kacivi o marama vakawati me veiqaravi ki na lalai se ko turaga ki na matabisopi.
Na veiyalayalati ni vakamau sa mai vakaraitaka tiko na veika oqo kei na veika tale e so. Au sega ni nanuma niu cala, ena noqu tukuna ni o ira era vosacataka se vakacacana vakayago na watina; se ko ira era vakayacora na itovo lolovira se lewa tawadodonu ena loma ni vakamau era sa sega tiko ni maroroya na veiyalayalati. Sa vakakina ko ira era sega ni tokoni ira na iliuliu. Era na rawa talega ni vakaleqai o ira era vakasuka na veikacivi, vakuwai ira na wekana se vakatara na itovo vakavuravura. Kevaka eda na sega ni maroroya na tiki ni noda veiyalayalati, eda na sega ni rawata na ka sa yalataki.
Au vakabauta ni sa kena e bibi o ya ni vakamau tawamudu ena sega ni vakavatukana kevaka e sega taumada kina na yalodina. E levu na ka au sa kila baleta na ka oqo au a vulica mai vua na noqu itokani. Sa voleka ni yabaki 47 na neirau vakamau. E a sa kila taumada mai o koya na mataqali vakamau e vinakata.
Keirau a tekivu vakagonevuli dravudravua, ia na nona raiyawa baleta na neirau vakamau, a tekivutaki ena dua na seti iyaya siliva. Me vaka ga na kena ivakarau ena gauna oqo ni keirau sa vakamau a laki vakaraitaka o koya ki na dua na sitoa na veika e gadrevi. E a sega ni vola o koya na kuro kei na tavuteke kei na iyaya keirau gadreva ka nuitaka tiko me keirau taura, a digitaka tale o koya na iyaya siliva. E a digitaka o koya e dua na kena mataqali tudei kei na kena iwiliwili me vakayagataki ka vola na isele, na icula kei na itaki ena ivola ni loloma ni vakamau ka sega tale ni dua na ka. E sega ni dua na tauwelu, tosita, sega na tivi—ia na isele, icula kei na itaki.
E a yaco mai na vakamau ka oti yani. Era a soli iloloma o ira na neirau itokani kei na nodrau itokani na neirau itubutubu. Keirau a laki marautaka vakalekaleka na neirau vakamau ka me keirau na qai dolavi ira na iloloma ni keirau sa lesu mai. Ni keirau mai cega, keirau a kurabui sara. E a sega sara ga ni dua na isele se icula e a lolomataki mai. Keirau a veidredrevaki ga ka tomani tale na bula ena veisiga.
E a sucu mai e rua na gone ni keirau a se vuli tiko. E sega ni dau maroroi rawa e dua na ilavo. Ia ena gauna a cakacaka kina na marama watiqu me dau turaganilewa ni veidigidigi ena so na gauna se na gauna a dau lolomataki vua e so na ilavo ena gauna ni nona siganisucu, a tekivuna sara me maroroya ka yacova me sa kumuna e levu ka dau lako yani ki tauni ka volia e dua na icula se itaki. E taura e vica vata na yabaki me keirau rawata kece sara ka tekivu vakayagataka. Ena gauna keirau sa rawata kina na kena e rauta e va na tamata keitou sa tekivu sureti ira na neitou itokani ki na vakayakavi.
Ni bera ni ra yaco mai, keitou dau veivosaki vakalailai e valenikuro. Na iyaya cava me keitou taurivaka na kena e makawa ka sa dau vakayagataki tiko se koya na iyaya siliva talei? Ena gauna makawa sa oti au dau taleitaka na iyaya boro siliva. E rawarawa cake. E rawarawa tu ga na kena biu yani ki na kena isavasava ni oti na vakayakavi ka savasava ga vakataki ira. Ia na iyaya siliva e vakalevu cakacaka. E a laki vunitaka tu o na watiqu ena ruku ni loga me kakua ni ra raica rawa o ira na daubutako. E a vakasalataka o koya meu volia e dua na isulu malumu me ra solegi kina. Na iyaya yadudua era tiko na kena taga, ka sega ni cakacaka rawarawa me ra biu tale vakavinaka. Ena gauna a vakayagataki kina na iyaya siliva, e gadrevi me ra savati e liga ka vakamamacataki me kakua kina ni suasua ka biuti ira ki na kedra taga me kakua ni ra drakusi, ka sa solegi ka vunitaki me kakua kina ni butakoci. Kevaka e kunei e dua na drakusi, au dau talai yani meu volia mai na wainimate me taliva kina ka keirau mai saga me taqusi tani na duka.
Ena veiyabaki ka tarava sa vakaikuritaki tikoga na kena iwiliwili, kau dau raici koya ena qoroqoro ena nona taqomaka vinaka na iyaya siliva oqo. Na watiqu e dua e sega ni dau cudru vakarawarawa. Ia, au nanuma sara na siga e a taura kina e dua vei iratou na gone e dua na icula siliva me laki cukicuki kina e daku ni vale. Na nona a saga oqori e a sotavi ena dua na mata cudrucudru ka me kakua ni vakasamataka tale. Kakua vakadua!
Au raica rawa ni sega ni vakayagataki na iyaya siliva oqo ena vakasaqa kakana me baleta na tabanalevu, se vuqa na caka kakana ena tabanalevu, se vuqa na caka kakana a vakayacora o koya me baleti ira na tauvimate se vakaleqai. E sega ni a vakayagataki e na dua na vakatakakana se keba. E a sega dina sara ga ni vakayagataki ena dua na vanua ka toso tiko na gauna e sega mada ga ni keitou dau vakayagataka vakalevu. E dau vakayagataki ga na kena e boro siliva.
E a qai yaco mai na gauna ni kacivi ki na kaulotu. Au a yaco yani ki vale ena dua na siga ka sa tukuni vei au meu sa na redetaka e dua na vanua ni maroroi iyau me baleta na iyaya siliva. E a sega ni vinakata o koya me keitou kauta. E a sega ni vinakata me biuta tu mai, ka sega ni vinakata o koya me yali.
Ena loma ni veiyabaki kece oqo, au nanuma ni vaka me sa vakalevutaka o koya na veika kece, ka dua na siga au qai raica rawa e dua na ka e sa kila tu mai vakabalavu o koya kau se qai tekivu meu kila rawa. Kevaka o gadreva e dua na ka me yaga vakadede, me duatani na ivakarau ni nomu qarava. Ko na taqomaka ka maroroya. Ko na sega ni vakasabusabutaka. Ko na sega ni biuta i tuba. Ko na sega ni vakaraitaka se vakawalena. Kevaka me na drakusi, ko na vakayagoyago vinakataka me taliva me vaka ga e dua na ka vou. Mo cakava me taleitaki sara ka me iyau talei tikoga ni toso tiko na gauna.
Na vakamau tawamudu sa vaka tu ko ya. Eda gadrevi me da qarava vakakina. Sa noqu masu o ya me da raica vakakina ni sa ikoya oqo e dua na iyau levu dina, ena yaca i Jisu Karisito, emeni.