Na Kaukauwa Veitokoni ni Vakabauta Ena Gauna Ni Veilecayaki kei na Veivakatovolei

Elder Richard G. Scott

Mai na Kuoramu ni iApositolo Le Tinikarua

Vakabauta na Kalou kei na Nona veidusimaki ena Yalo Tabu ena tokoni iko tikoga ena vuravura ni veibolebole e sotavi.

O cei veikeda e sega ni gadreva na veivakadeitaki ena gauna ca ka veivakatovolei? O cei e sa boletaki koya tu ka sega ni gadreva e dua na veivakadodonutaki ni bula? E dua na inaki bibi ni bula oqo o ya na tuberi cake ni tamata kei na nona icavacava. Sa dau sala muria mai na veigauna ni vakatovolei kei na veilecayaki me rawa kina na tubu cake o ya. Ena tubu vakacava e dua na gone me na bula rawati koya kevaka rau a vakatulewa kina na itubutubu? Sa vakakina vua na Tamada Vakalomalagi. Sa mai tuvanaka o Koya na ka sa navuci tu me rawati kina na bula me da sotava na bolebole e so, ka vakakina na veika dredre, ka sa gadrevi kina na vakatulewa bibi sara me da tubu, torocake, ka qaqa ena bula vakatovotovo oqo.¹ Sa vakavinavinakataki, na Nona loloma uasivi ka sa vakarautaka o Koya vei keda e dua na salatu me wali kina na ibolebole o ya ena gauna eda sa vakaqaqacotaki ka bula yalomatua. Au tukuna tiko oqo na kaukauwa veitokoni ni vakabauta ena gauna veilecayaki kei na veivakatovolei.

Sa solia vei keda na Kalou na veigauna e so me da bula ena vakabauta me da kune marau, vakacegu kei na bula vakainaki. Ia ni da laki bulataka na kena kaukauwa, sa dodonu me vakayavutaki na vakabauta ena dua na ka. Na yavu kaukauwa duadua sa ikoya na nomu vakabauta na loloma sa solegi iko kina na Tamada Vakalomalagi, ka mo vakabauta na ka sa navuca tu o Koya me rawati kina na bula ka vakabauta na gauna kei na nona lomasoli o Jisu Karisito me vakayacora kece sara na Nona yalayala.

Kivei ira e so, e sega ni kilai vakavinaka na vakabauta ka yaco sara me sega ni taucoko na kena taurivaki. E so era nanuma ni vakasama vakalotu kei na nona dusimaki e dua ena kaukauwa ni vakabauta e sega tu na kena yavu na ivakavuvuli tawamudu. E dua beka o kemuni e a saga me bula ena vakabauta ka sega ni kunea e dua na kena yaga? Kevaka e vakakina, e rairai beka ko ni a sega ni kila vakavinaka na ivakavuvuli e vakayavutaki kina na vakabauta. Au na vakaraitaka eke na ibalebale ni veika au tukuna tiko.

Ena vica na yabaki sa oti au a vakaitavi ena kena vakarautaki na gacagaca kece ni nukilia. Ea vakayagataki e dua na vakasaribariba ni nukilia me na bulia na soreni kaukauwa. O ira kece na sore oqo era muataki yani kina dua na ikovu me ra laki vakarautaki kina. O ira na sore kaukauwa oqo era sega ni laurai rawa ia e gadrevi me ra taqomaki vakavinaka me kakua ni dua e vakaleqai kina. Ena dua na siga a curu mai e dua na dauyadra e kea ena gauna keitou a vakadidike tiko kina. Ena yalo ca a kaya mai, “O ni tamata lasulasu taucoko, ni nanuma tiko ni sa ka bibi beka na veika ko ni cakava tiko oqo, ia ko ni na sega ni vakalialiai au. Au kila ni kevaka ko ni sega ni raica rawa, rogoca, tovolea, boica se tara, e sega ni ka dina.” Na nona rai oya e sa tagutuva kina na nona rawa ni kila ni vuqa sara na veika yaga cake e sega ni kilai rawa mai na lima na ikilakila. Kevaka beka me a tadolava na turaga o ya na nona vakasama me na kila vakavinaka na kena rawa ni laurai na sore ni nukilia, sa rawa ni laurai na sore ni nukilia, sa rawa ni kila o koya ni ra sa ka dina. Sa na vakakina eke, kakua ni vakatitiqataka na dina ni vakabauta. Ko na vakalougataki mai na nomu vakabauta ni ko vakamuria na kena ivakavuvuli sa tauyavutaka na Kalou me qaravi kina.

Oqo e so na ivakavuvuli o ya:

Vakararavi vua na Kalou kei na Nona loma vinaka me na veivuke ena gauna e gadrevi kina veitalia ga na roka ni bolebole e sotavi.
Muria na Nona vunau mo bula ka vakadeitaka Vua ni ko sa tamata nuitaki.
Mo dau vakamuria na veivakauqeti malua ni Yalo Tabu.
Cakacaka vakayaloqaqa mai na veivakauqeti o ya.
Mo dau vosota ka kila vakavinaka tu ni Kalou ena vakalaiva mo sasaga mo tubu kina ka yaco mai na isau e so ena kena gauna ga sa lewai kina.

Na vakauqeti ni vakabauta e yavutaki ena vakararavi vua na Turaga kei na Nona lomavinaka me sauma mai na nomu gagadre. Ni “sa vakalougatataki ira era sa vakararavi vua.”² Na bula voli ena vakabauta ena vakaqaqacotaka mo yalodei tiko kei na kaukauwa mo veiqaravi ena kaukauwa ni vakabauta.

Sa rawa mo kila na kena vakayagataki vakavinaka na vakabauta ena nomu bulataka na ivakavuvuli oqo nei Moronai: “Na vakabauta sa ikoya na vakanuinuitaki ni veika sa sega ni rairai; ia mo dou kakua ni vakatitiqataka ni dou sa sega ni raica, ka ni na vakatovolei taumada na nomudou vakabauta, dou na qai raica e muri na kena ivakadinadina.”³ O koya gona , ni veigauna kece o vakatovolea kina na nomu vakabauta, o ya, mo cakacaka ena bula kilikili ena dua na kila, ko na ciqoma na ivakadinadina ni Yalo Tabu. Na veiyalo kece oqo ena vakaqaqacotaka na nomu vakabauta. Ni ko vakayacora tikoga na veika o ya ena kaukauwa sara na nomu vakabauta. E kila na Turaga na nomu gagadre. Ena gauna o na kerea kina ena yalodina kei na lomamu taucoko, ena vakauqeti iko o Koya mo vakayacora na veika me na toroicake kina nomu kaukauwa mo cakacaka ena vakabauta. Mai na kena vakayacori tikoga ena yaco na vakabauta me dua na kaukauwa veivakayavalati, qaqa, veivakatataki ka veivakauqeti ena nomu bula. Ena nomu lakova yani na iyalayala ni nomu kila vakavinaka ki na butobuto ni veilecayaki, ni ko cakacaka ena vakabauta ko na muataki ki na iwali ni veika oqo ni ko sega ni rawata rawa mai na dua tale na ka. Au vakadinadinataka niu kila ni dina na ka oqo.

Ni kaukauwa tu mada ga na nomu vakabauta, ena sega ni dau vakalougatataki iko mai vakatotolo na Kalou ena vuku ni nomu gagadre. Ia ena vakayacora ga na Kalou mai na Nona ituvatuva tawamudu na veika e vinaka vei iko. E dina kevaka mo a kila na Nona ituvatuva taucoko, ko na sega ni kerea e dua na ka e veisaqasaqa kaya ena gauna mada ga o temaki kina mo vakayacora. Na vakabauta ena yalodina ena solia na yalo ni kila kei na kaukauwa me na ciqomi na lewa ni Tamada vakalomalagi ni na duidui mai na noda. Eda rawa ni ciqoma na Nona lewa ena yalo vakacegu kei na vakadeitaki, ka nuinui tiko ni Nona vuku tawa yalani e uasivia na noda kaukauwa me da kila taucoko na Nona ituvatuva ni tadolavi mai e dua na ka ena kena gauna.

Na vakabauta e sega ni da tabaka ga na siwiji ka saumi sara mai. E a vakaraitaka na Turaga: “O ira kecega kau sa lomana, kau sa vunauca ka cudruva: mo gumatua kina, ka veivutuni.”⁴ E a vakatakila o Brigham Young,“Na Kalou e sega ni dau vakatikora vei ira na Nona tamata, se ki vua ga e dua, na veivakalougatataki cecere kevaka e sega ni vakatovolei ira me ra vakadinadinataki kina.”⁵ Ena noqu bula, e so na vakatulewa bibi au sotava kina na veika dredre ka yaco taumada mai ka qai yaco mai na kena isau sa vakataudeitaki. Ia na veika dredre o ya era veivakavukui. Sa dua na ka vakacegu me da kila ni Kalou ena sega ni vakatovolei iko vakalevu cake mai na kena ko rawa ni walia ena Nona veivuke.

Na Kalou e vakayagataka na nomu vakabauta me tuliraka na nomu itovo. Na nomu itovo sa ivakaraitaki tiko ni nomu sa veisau. Na itovo savasava qaqa e rawa mai na gumatuataki tikoga na digidigi dodonu ena gauna ni vakatovolei kei na vakatovotovo ni bula oqo. Sa rawa ni muataki iko na nomu vakabauta ki na veidigidigi dodonu oqo. Sa matata vinaka, ni veika ko na vakayacora kei na veika o veinanuyaka ena tuliraki iko ki na nomu icavacava. O koya gona ni nomu digidigi sa gadrevi me na veivakauqeti kina na Turaga. E so ena vakauqeti iko mo vakatulewa vakadodonu, ia na digidigi o ya me ra kakua ni vakatulewa mai kina. Sa gadrevi kina mo dau tugana, masu ka dau vakabauta, ka vinakata na digidigi e umani ena Nona vunau na iVakavuvuli. Na digidigi vakaoqo e dau vakayacori ni da vakararavi ki na veika e vakabauti ka cakacakataki ena qai vakataudeitaki mai. Na veidusimaki walega e vakarauta e soli me muataki iko vakadodonu ga ka me kakua ni vakamalumalumutaka na taraicake ni nomu itovo. Na veidusimaki oqo ena vakaqaqacotaka na nomu vakararavi vua na Tamada Vakalomalagi kei na iVakabula.

Na vakabauta ena tuliraka na qaqaco ni itovo ena kena gadrevi ena gauna e vinakati kina. Na itovo oqo e sega ni toroi cake ena gauna ni ibolebole cecere se veitemaki. Oqo na gauna ena vakayagataki kina. E culai vakamalua na isulu ni itovo mai na wa ni ivakavuvuli, vunau kei na talairawarawa. Ena Jemesa eda wilika kina: “Sa vakatubura na dauvosota na vakatovolei ni nomudou vakabauta. Ia me tini vinaka na cakacaka ni dauvosota, mo dou vinaka taucoko sara kina, me kakua na ka e yali”⁶ Na yavu ni itovo sa ikoya na dina. Na itovo e kilikili ena vaqaqacotaka na nomu veigauna mo talairawarawa ki na veidusimaki ni Yalo Tabu. Na itovo savasava o sa tuliraki tiko kina. E ka bibi cake sara mai na veika o taukena, na veika ko sa kila, se na inaki ko sa rawata rawa. Sa yaco mo tamata vakadinati. Na itovo dodonu e vakarautaka na yavu ni kaukauwa vakayalo. Ena rawa kina vei iko ena gauna ni vakatovolei kei na vakatovotovo mo vakayacora e so na vakatulewa dredre ka bibi sara me dodonu ena gauna mada ga e sa vaka me ra sa veirawai. Au sa vakadinadinataka ni sega ni ko Setani se dua tale na kaukauwa ena rawa me vakamalumalumutaka se vakarusa na toro cake ni nomu itovo. Sa rawa ni ko vakayacora ga mai na nomu talaidredre.

Sa rui totoka dina na ituvatuva nei Tamada. Na nomu vakabauta ena tuliraka na nomu itovo. Na itovo e vaqaqacotaki e vakarabailevutaka na bulataki ni vakabauta. O koya gona, ena vakaukauwataki na nomu nuidei ena kena rawai na veivakatovolei. Sa yaco kina me tomani tikoga na ivakarau ni veivakaukauwataki na nomu nuidei ena kena rawai na veivakatovolei. Sa yaco kina me tomani tikoga na ivakarau ni veivakaukauwataki kina na nomu vakabauta ena gauna e vakavukui kina na nomu itovo.

Na ivakavuvuli “e soli vei iko na ka ko a sauma” e ka dina talega ki na isau vakayalo. Ko na rawata ga na isau ni talairawarawa, ena vakabauti Jisu Karisito, kei na nomu bulataka na veika dina o sa taura sa ikoya na tuliraki ni nomu itovo, kei na tubu ni kena qaravi, kei na vakacavari rawa ni nomu inaki e vuravura mo tubu mai na veivakadinati.

Veitalia ga na cava e yaco, veitalia ga na kena veimedreyaki na vuravura oqo, sa rawa ni dei tu ga vei iko na kaukauwa veitokoni ni vakabauta. Oqo ena sega ni veisau rawa. Ena sega ni veisau rawa na loloma uasivi nei Tamamu Vakalomalagi. Na Nona ituvatuva vakosipeli sa mai vakaibalebale kina na bula ka vakadeitaka rawa vei iko na marau. Na Nona ituvatuva e sega walega mo na vakadinadinataki iko ena vuravura oqo ia sa baleta talega mo na ciqoma na tubu ka vure mai ena vakatulewa dodonu ena veivakauqeti ni vakabauta, ka rawai ena nomu talairawarawa.

Na cava o lomaleqataka tiko kina na veileqa lelevu se na veilecayaki ni veisiga ni mataka ni ko sega ni tarova rawa. Na nomu bula savasava ena vakarabailevutaka na kena rawa mo na sega ni tarova rawa. Na nomu bula savasava ena vakarabailevutaka na kena rawa me na sega ni rawai iko na veika oqo. Ni dau lasika mai na ibolebole kei na vakatovolei e so, na nomu vakabauta ena vakaraitaka vei iko na kena iwali. Na vakacegu ni nomu vakasama, na isau vakadeitaki kina loma rarawa, na nomu marau dina ena vakatau kina nomu vakararavi tiko vua na Tamada Vakalomalagi kei na Luvena, o Jisu Karisito. Na dodonu ena qaqa dina ga. Ena kauta mai na kalougata ena gauna oqo, me vaka ena nomu vakabauta ko sa talairawarawa kina vunau ni Kalou. Mo nanuma tiko ni sa vakarautaki tu vei iko e dua na ivurevure ni sautu kei na vakacegu e tawamudu, sega ni yali rawa na vakacegu e tawamudu, sega ni yali rawa ka sega ni druka. Sa ka dina sara ni Tamamuni Vakalomalagi e lomani kemuni veitalia ga na kemu ituvaki, veitalia ga na cagi ni vakatovolei, veilecayaki, kei na veika rarawa e vakavolivoliti iko. Ena sega vakadua ni veisau na dina o ya. Na nomu saga mo rawata na itakele o ya ena vakatau ki na kaukauwa ni nomu vakabauti Koya kei na Nona lomasoli dina me vakalougatataki iko.

Au sa vakadinadinataka ni vakabauta na Kalou kei na Nona veidusimaki mai na Yalo Tabu ena tokoni iko tikoga ena vuravura oqo ka sa toso cake tikoga na ibolebole e sotavi. Au vakadinadinataka ni kena bulataki na ivakavuvuli eda sa raica mai oqo ena vukei iko mo na soli iko kina kaukauwa veitokoni ni vakabauta ena gauna ni veilecayaki kei na vakatovolei.

E lewe vuqa sara era tiko volivoliti kemuni era bula veilecayaki ka ra vakasaqara tiko na iwali ni leqa rarawa e so. Ena rawa mo wasea na nomu ivakadinadina ni veika dina kei na kaukauwa ni vakabauta vei ira? E rawa mo vukei ira me ra kila vakavinaka ni vakabauta na Kalou kei na Nona ivakavuvuli, ka vakalesui mai na kena taucoko kina Lotu i Jisu Karisito ni Yalododonu Edaidai, ena rawa ni vakalougatataka na nodra bula oqo? Cakava. Ena vukei iko na Turaga. Ena dusimaki iko na nomu vakabauta ka tokoni iko. Ena yaca i Jisu Karisito, emeni