Na Veivosoti ena Veisautaka na Veicati me Veilomani
Na veivosoti e kena ibalebale me sa kakua tale ni vakatulewa tiko ena veika me baleti keda na leqa ni veigauna sa oti yani, ka sa rawa me da vakanamata ga yani ki na veigauna sa bera mai ni tu e yaloda na loloma ni Kalou.
E sega li ni veivakurabuitaki, na isolisoli ni Yalotabu e solia na Turaga vei Elder Nelson. E sega walega ni vakalougatataka na Lotu na nona taledi, ia na vuravura taucoko.
Au via vosa nikua me baleta na veivosoti.
Au a tubucake mai na dua na tauni lailai ni dauteitei ka tiki bibi ni tiko vinaka vakailavo ni itikotiko oqo sa ikoya na wai. Au nanuma na nodra dau qarauna, lomaleqataka ka masulaka na uca, na galala ni vakadrodro wai ki na vanua ni teitei, kei na veimataqali wai kecega, o ira na lewe ni neimami itikotiko. E vakavuqa na nodratou dau veiwalitaki au na luvequ; eratou kaya e se sega vakadua ni ratou bau kila e dua me vakayagataka vakalevu na nona gauna ena vakasamataka na uca. Au tukuna vei iratou ni rairai dina baleta na vanua au a tubucake mai kina e sivia cake sara na kena vakasinaiti na vakasama ena uca. E dua na ka me tomani tiko kina na bula!
Ena vuku ni leqa kei na dredre e dau basika me baleta na draki ni neimami vanua, ena vuqa na gauna sa vaka me sa seyavu yani na nodra itovo na tamata. Ena so na gauna, era dau veibataka o ira era tiko veitikivi ke dua na dauteitei e taura vakasivia na wai mai na kena ivurevure. Sa ikoya o ya na kena ivakatekivu vei rau e rua na turaga ka rau vakaitikotiko volekata na ulunivanua ka ikanakana ni neitou manumanu, kau na vakatokai rau me o Chet kei Walt. A tekivu me rau veibataka na lewe rua oqo na wai mai na ivakata ni vakadrodro wai erau vakayagataka vata tiko. E a sega soti ni dua na ka ena kena ivakatekivu, ia ni sa toso tiko na yabaki sa yaco me rau veisevaki, tarava yani na veiba—me yacova sara yani na veivakarerei.
Ena dua na mataka ni vula o Julai erau sa baci vakila na turaga e rua oqo na lailai ni wai. Erau dui lako yani ki na ikeli me laurai se cava e sa yaco tiko, erau dui vakanananu ni o koya ka dua e sa butakoca na wai. Erau yaco vata ruarua yani ena dua ga na gauna ena matamata ka dau lewai kina na vakadrodroi ni wai ki na ikeli. Sa yaco na veivosaki ni cudru; ka muria sara yani na veivacu. E turaga vakaitamera ka kaukauwa sara vakalevu o Walt. E turaga lailai, lila ka kaukauwa o Chet, ka qai waribariba. Na cudru ni veiba, e a vakayagataki kina na isivi erau a dui kauta tiko me iyaragi. E a mokuta o Walt e dua na matai Chet ena vakacalaka mai na dua na isivi, ka vakavuna na kena boko na mata i Chet.
Sa sivi yani na veivula kei na veiyabaki. Ia e sega ni rawa vei Chet me veivosoti se guilecava. E tubu tikoga e lomana na cudru e a vakila mai na kena sa boko e dua na matana, ka sa tubu cake vakalevu sara na nona yaloca. Ena dua na siga, e a lako kina o Chet ki na nona lololo ni sila, taura mai na dakai, vodo ena nona ose, ka cici sobu yani ki na matamata ni ikeli. E biuta e dua na ibono ena ikeli me vagolea tani na wai mai na iteitei nei Walt, ni kila ni sa vakarau gole mai o Walt me mai raica na cava e sa yaco. E a qai vuni ka wawa toka o Chet ena veikau. Ena nona basika mai o Walt, e qai vanai koya mate o Chet. E a qai vodoka tale na nona ose, ka lesu yani ki vale, ka qiria na turaganikoro me tukuna kina vua ni sa vanai Walt ka sa mate.
E a kerei o tamaqu me dua vei ira na dauvakatulewa ena nona veilewaitaki o Chet ni laba. E a vakasuka o tamaqu baleta eratou veitokani vata kei rau na turaga ruarua oqo kei na nodrau dui matavuvale ena dua sara na gauna balavu. E a mani lewai ka beitaki ena laba o Chet, ka totogi mate.
Ni sa oti e vica vata na yabaki, e a lako mai vei tamaqu na wati Chet ka mai kerea ke rawa ni sainitaka o tamaqu e dua na kerekere vua na kovana me kerei kina na nona lomasoli vua na watina ka sa toro sobu na nona bula ena nona kaivesu tu ena vica vata na yabaki. E a sainitaka na kerekere oqo o tamaqu. Ni oti e vica na bogi, erau sa basika mai e mata ni katuba e rua na luvei Walt ka rau sa cauravou. Erau sa cudru ka yaloca vakalevu. Erau kaya ni sa lewe levu sara era sa sainitaka na kerekere baleta ni a sainitaka taumada o tamaqu. Erau kerei tamaqu me vakasuka na yacana mai na ivolakerekere. E kaya o tamaqu ni sega. E vakila ni o Chet e sa rui malumalumu ka tamata tauvimate. E a vakararawataki ena vica vata na yabaki e valeniveivesu me baleta na rerevaki ni cala e a vakayacora ena cudru. E vinakata me raica me vakayacori vakamatau na veibulu vei Chet ka me bulu talega volekati iratou na nona matavuvale.
Erau a sauma yani vakatotolo ena cudru na luvei Walt cauravou ka kaya, “Kevaka me sa vakasukai mai na valeniveivesu, keirau na raica me vakacacani o koya kei na nona matavuvale.”
E a qai sereki mai o Chet ka lako mai ki vale ka mate vata kei na nona matavuvale. E kalougata, ni sa qai mai oti vakadua na veivala ena kedrau maliwa na matavuvale. E dau vakayatuyatutaka vakawasoma o tamaqu na kena vakacaca na nodrau vakatara na veiwekani oqo, na veitau ena gauna ni gone, o Chet kei Walt, me rawai rau na nodrau cudru ka vakarusa sara vakadua na nodrau dui bula. Sa dua na ka na kena vakacaca ni vakalaivi me levu cake na cudru ka sega ni lewai rawa—ka qai laki tini me vakayali ruarua kina na nodrau dui bula—e vakatekivu ga ni rau a sega ni rawa ni veivosovosotitaka na wasei ni wai.
E kaya na iVakabula: “Kusarawa mo drau veivinakati kaya sa beitaki iko, ni drau sa lako vata kaya ena gaunisala”1 ka vakaroti keda me da dau walia taumada na noda duidui, mai na noda rere ni cudru ni gauna o ya ena yaco me veivakararawataki vakayago se vakayalo, eda sa na vesuki tu ena noda cudru.
E sega tale ni dua na vanua ena yaga vakavinaka cake kina na ivakavuvuli oqo me vaka ena loma ni noda veimatavuvale. Ena sega beka ni nomu leqa na wai, ia o keda vakayadua ena vuravura oqo, eda bula tiko ena ruku ni lomaocaoca kei na voravora ni vuravura veilecayaki ka da bula tiko kina oqo, ena tiko na vuna—na ka dina se na vakasama ga—ka na veivakararawataki. Eda na walia beka vakacava? Eda rawa beka ni ciqoma na veivakararwataki? Eda na rawa beka ni kunea na cala? Eda na laiva beka na cudru ni gauna o ya me rawai keda?
E a vakatautauvatana ena dua na gauna o Peresitedi Brigham Young na veivakararawataki ki na ikati ni gata batigaga? E kaya, “e rua na ka mo cakava ena gauna o sa laukati kina mai na gata batigaga. E dua ena dela beka ni cudru, rere, se via sauma lesu, vakamuria na gata ka vakamatea. Se e rairai vakusakusa me kauta laivi na poisoni ni gata mai na nona bula.” E kaya, “Kevaka eda vakamuria na kena ikarua ni ka e yaco ena rawa me da bula, ia kevaka eda tovolea me da cakava na imatai ni ka e yaco, ia kevaka eda segata me da cakava na kena ikarua e rawa ni na sega soti ni dede na noda bula me da vakacavara kina.”2
Au via taura e dua na gauna oqo meu vakaraitaka ni sa dodonu me da qaqarauni sara vakavinaka ena noda matavuvale me da kakua ni vakavuna na ikati ni gata vakayalo se vakavakasama! E vuqa na ivakarau ka sa vakamatautaki tu ena gauna oqo, e sa vakalailaitaki kina na itovo vinaka ni veivosovosoti kei na yalololoma, ia sa vakauqeti mai na veiwali, cudru, kei na vakalelewa mosimosi. Kevaka eda sega ni qaqarauni vinaka, sa na rawa me da na tekivu vakaitovotaki keda ena mataqali ivakarau vakaoqori ena loma ni noda vuvale kei na matavuvale sa na yaco me da dau vosabeci ira na watida, o ira na luveda, o ira na isema ni noda matavuvale. Me da kakua ni dau vakararawataki ira eda dau lomana ena vakalelewa e so! Kevaka eda sega ni dau tarova na veiba lalai kei na veivosavakacacataki, ena rawa ni vagaga na veimaliwai ka rawa ni yaco sara kina na veibiu, na veivakalolomataki kei na veisere. Na kena dodonu, me vaka ga na gata batigaga, e dodonu “me da vakusakusa” me vakalailaitaka na veiba, musuka na veiwali, muduka na vakalelewa, ka kau laivi na veicati kei na cudru. E sa sega ni rawa, me tomani tikoga na vakanananu me baleta na kena vakayacori na ivakarau tawakilikili—me kua mada ga ena dua na siga.
Vakatautauvatana na kedrau italanoa vakaciriloloma o Walt kei Chet vata kei na ivakaraitaki nei Josefa mai Ijipita. Eratou sevaki Josefa ena vuvu ko iratou na tacina. Eratou bukiveretaka me ratou vakamatea, eratou a qai volitaki koya me bobula. E a qai kau o Josefa ki Ijipita ka laki sotava na bula dredre me vica vata na yabaki sa qai galala mai na veivakabobulataki. O Josefa e a rawa me vakacalai iratou na tacina ena gauna ni veibolebole e a sotava ka yalataka me na sauma lesu. E a rawa beka me vakamalumalumutaka na mosi mai na nona inakinaki me ratou duavata ena dua na siga. Ia e a sega ni vakayacora.
Sa yaco na gauna, e sa veiliutaki kina o Josefa e Ijipita raraba, sa taravi Fero duadua ga kina. Ena dua na gauna ni veivakarusai levu ni dausiga eratou a lako kina ki Ijipita na taci Josefa me vaqaqara kakana. E sega ni ratou vakasamataki Josefa, eratou a cuva sobu vua me baleta na nona itutu cecere. Ena gauna sara ga oqori e dodonu me a sauma lesu kina o Josefa ni sa tu vua na kaukauwa. E a rawa sara ga vua me balati iratou na tacina ki na valeniveivesu se me a totogitaki iratou ki na mate. E a sega ni vakakina ka vakadeitaka na nona veivosoti. E kaya: Koi au ko Josefa na tacimudou, ko koya dou a volitaka ki Ijipita. Ia oqo mo dou kakua ni rarawa, se veicudruvi vakai kemudou, ni dou a volitaki au ki ke… . A sa talai au na Kalou meu liutaki kemudou, me maroroi na nomudou kawa e vuravura … ka me vakabulai kemudou ena veivakabulai levu. Ia oqo, dou sa sega ni talai au mai ki ke, na Kalou ga.”3
Na gagadre nei Josefa me vosota me veisautaka na veicati me veilomani.
Au gadreva meu vakamatatataka eke me kakua ni nanumi cala na vosoti ni ivalavala ca me vorati ni ivalavala ca. Na kena dina ena vakavakadewa nei Josefa Simici e kaya kina na Turaga, “Kakua ni daulelewa, de dou lewai.”4 E kerei keda na iVakabula me da biuta tani ka valuta na ivalavala ca ena kena ituvaki kece sara, e dina ga ni dodonu me da vosoti ira na wekada era vakamavoataki keda, e dodonu me da cakacaka vakadodonu me kakua ni vakaruataki na veivakamavoataki. Na marama e vakalolomataki e sega ni dodonu me vakasaqara na kena saumi lesu, ia me kakua ni nanuma ni sega ni dodonu me vakasaqara na sala me muduki kina na kena tomani na veivakalolomataki. E dua na tamata vakabisinisi a sega ni qaravi vakadodonu na nona veika vakailavo e sega ni dodonu me cata na tamata e a vakayacora na cala, ia e rawa ni cakava e dua na ka me walia na cala. Na veivosoti e sega ni gadrevi kina vei keda me da ciqoma se vorata na ivalavala ca. E sega ni gadrevi vei keda me da vakanadakuya na cala eda raica e vuravura ka vakavolivoliti keda se ena noda dui bula. Ia ena noda valuta na ivalavala ca, e dodonu me da kakua ni laiva na veicati se cudru me lewa na noda vakanananu se veika eda cakava.
E kaya na iVakabula, “Raica au sa kaya vei kemudou, mo dou veivosoti vakai kemudou; ia ko koya sa sega ni vosota na wekana ena nona cala, ena cudruvi koya na Turaga; raica sa ivalavala ca vakalevu cake ko koya.”5
E sega ni tukuni eke ni ka rawarawa na veivosoti. Ni dua e vakararawataki keda se dua eda dau lomana, e rawa me veivakamalumalumutaki na mosi oqori. E rawa me vakilai ni sa ka bibi duadua e vuravura na rarawa se na cala oqori, ka sa sega tale ni dua na ka me da cakava ia me da sa na sauma ga. Ia o Karisito, na Tui ni Sautu, e vakavulici keda ena dua na sala vinaka cake. E rawa me ka dredre sara ni da vosota e dua ka vakararawataki keda, ia ni da sa veivosoti e sa tadola vei keda e dua na gauna sa bera mai ka vinaka cake sara. E sa na sega ni lewai keda na nona cakacaka e dua. Ena noda sa vosoti ira na tani, e sa na vagalalataki keda ena digidigi me da na bulataka vakacava na noda dui bula vakataki keda. Na ibalebale ni veivosoti sa ikoya na veileqa ni veigauna sa oti yani e sega ni vakatulewa ena noda ilesilesi, ka sa rawa vei keda me da vakanamata ki na veigauna sa bera mai vata kei na loloma ni Kalou ena dui lomada.
Me kakua ni vakalaivi na sore ni tawaveivosoti ka a dau vakarerei ira keimami tiko veivolekati me mai tiki ni noda vuvale. Me da masu vua na Tamada Vakalomalagi me vukei keda ena noda vorata na dokadoka lialia, veicudruvi, kei na veivakawaleni. Me vukei keda o Koya me da dau veivosoti ka veilomani, me rawa ni da veitokani vata kei na noda iVakabula, o ira na tani, kei keda. “Me vaka sa sega ni cudruvi kemudou na Karisito, mo dou vaka talega kina.”6 Ena yaca i Jisu Karisito, emeni.