Vosa ni Bula
Ena vakalougatataki keda eke kei na bula sa bera mai, na noda rawata vakavinaka na cakacakataki ni noda sala ena bula oqo, ena gauna vata o ya me da wanonova tiko na inaki dina ni bula.
Sa solegi tu o vuravura ena vosa. E levu e rorogo tu ga ka sega ni vakaibalebale, ka dau veidusi, ka ra vosa dau veivakacacani. Ia era rorogo kecega, sega soti ni matata vinaka, eda dau sega ni malele kina se da dau taura vakabibi. Sa qai dau voqa mai ena so na gauna na vosa talei e so mai na gusunivosa, me vakataka ena koniferedi oqo, o ya na vosa ni bula.
Ena koniferedi raraba ni Epereli, 1988 e a kaya kina o Peresitedi Thomas S. Monson:
“Sa iyau vei keda na vakasama veivakauqeti o ya:
“Sa tama na Kalou.
Na tamata sa tacida.
Sa ilesilesi na bula
Ni sa sega ni cakacaka.”
(Cavuti mai na vosa nei Stephen L. Richards ena “An Invitation to Exaltation,” Ensign, Me 1988, 54.)
Sa ikoya oqo na vosa ni bula.
Na Kalou e Tamada Vakalomalagi. Eda sa luvena vakayalo. Ni da kila vinaka na keda isema vua na Kalou ena vukea me da kila vakavinaka na vanua eda vu mai kina kei na ituvatuva tawamudu me baleti keda. Mai na noda kilai Koya, ena matata vinaka na sala me da veivosaki kina kei koya kei na ivakarau ni bula e taleitaka o Koya. Na noda bula oqo e vuravura sa tiki ni ka sa navuci tu me rawati kina na bula e tuvanaka o Koya, ka vakarautaki keda me da bula ena vakabauta, ka bula voli e vuravura, ka me da tamata digitaki ena vuku ni talairawarawa kei na kaukauwa ni Veisorovaki ka me da lesu ki Vua ka tawamudu.
Eda bula voli ena dua na vuravura e vakaitamera na veika duidui e tu kina: veimataqali qele, itovo, matatamata kei na duivosavosa. Ena dua na kena ivakatagedegede, o ya, me da vakabauta ni sa ikoya oqo na sala sa tuvanaka na Kalou me na yaco. Sa vakavulica vei keda na kosipeli ni dina ni sa tu na duidui oqo, ia eda sa luvena kece sara na Tamada Vakalomalagi. Na kawa tamata sa dua ga na vuvale, eda sa qai veitacini.
Ni da luvena, e dodonu me da raica ni sa lomani ira vakatautauvata na luvena na Tamada Vakalomalagi me vaka ga e dua na tama vinaka e vuravura. Sa iyaya ni veiqaravi dodonu ena loma ni vuvale na veidokai, yalovinaka, lomasoli, kei na veivosoti. Me da qai vakasamataka na nona yalorarawa e dua na Tamada uasivi ka dauloloma ni raici ira na luvena era dau veivakacacani vakaiira.
E lekaleka na bula. “Na kabukabu walega sa rairai ka sa vakadede vakalailai ga, a sa qai seavu yani” (Jemesa 4:14). Ena bula lekaleka ka talei oqo, e vuqa na ka me na vakayacori. E so vei ira na ka oqo era bibi cake mai na kena vo, ka me da vakatulewa vakavinaka kina. E so na ka e sa kilai tu ga ni cala. E so e vinaka. Ia e so na ka e bibi kevaka eda gadreva me da rawata na gagadre ni Tamada ka qaqa ena bula vakatovotovo oqo.
Na nanamaki oqo ni Tamada e cecere cake sara mai na kena tuvanaki na bula rawati koya se vakaogai keda ki na lasa kei na totoka ni vuravura oqo, dina ga ni sa vakadeitaka vei keda na Turaga: “Sa solia na ka kecega oqo na Kalou vua na tamata; ia oqori ga na ka era sa bula kina; ia me vakayagataki vakavuku” (V&V 59:20).
Ena vakalougatataki keda eke kei na bula sa bera mai, na noda rawata vakavinaka na cakacakataki ni noda sala ena bula oqo, ena gauna vata o ya me da wanonova tiko na inaki dina ni bula. Na noda talairawarawa ki na ivunau, taqomaki ni veiyalayalati tabu, ka “gumatua ena cakacaka vinaka” (V&V 58:27) ka rawa vei keda me da votai ena marau ka sa inaki ni noda bula oqo (raica 2 Nifai 2:25).
Sa solia vei keda na Turaga na ikuri ni veivakadeitaki: “Raica sa kilikili mo dou kila; ko koya sa vakayacora tiko vakadodonu na nona itavi, ena rawata vakaidina na kena isau; io ena kune vakacegu ena bula oqo ka rawata na bula tawamudu ena bula sa bera mai” (V&V 59:23).
Sa qai sega ni rau veiwekani sara na noda ilesilesi ni bula oqo kei na noda sasaga vakavuravura. Ia sa qai veiwekani walega ki na noda vakarautaki keda ki na bula tawamudu.
Au vakadinadinataka ni noda bula vakalou ena muataki keda lesu vua na Tamada, ka solia vei keda na bula oqo ka na vakatikori keda lesu ki na bula tawamudu.
E vuqa vei ira na luve ni Kalou era bula voli me vaka ga ni sega na siga ni mataka sega na siga ni veikilai. Era vakasinaita na nodra bula ena kena vaqarai na vakacegu, iyau kei na lasa. Me kaya kina o Nifai, “E vuqa tale era na kaya: Dou kana ka gunu ka ia na marau; ni da na mate ena mataka, ia eda na vinaka ga” (2 Nifai 28:7). E vuqa na tamata era vakuria na vakasama cala oqo ena nodra kaya: “Ia mo rerevaka na Kalou—ena sega ni cudruvaka ko Koya, ke vakalailai ga na ivalavala ca, io ke vakalailai na lasu, ka rawai e dua ena vuku ni nona vosa, kelia na ikeli me lutu kina na wekamu; oqori e sega ni ca; kitaka kece oqo, ni da na mate ena mataka; ia kevaka eda sa cala kina, ena vakanakuitaki keda vakalailai ga na Kalou ka da na vakabulai ki na matanitu ni Kalou” (2 Nifai 28:8).
Ena vuku ni mataqali vakasama cala vakaoqo, sa vutucoqa tu ko vuravura ena veitemaki ca ka vakadomobula. Eda raica ni ra sa sega ni vinakata na cauravou me ra vakamau; era sa soli ira vakarawarawa na goneyalewa ena vuku ni garogaro ca; era nakita na veiwatini me ra kakua ni vakaluveni se me dua ga na “luvedrau vakamareqeti” baleta ni matavuvale ena vakataotaka na ituvatuva e so ni veilakoyaki, lasa, ka vutuniyau tikoga.
Ia e milioni na tagane kei na yalewa yalodina ena veiyasa ivuravura era saga ena veisiga me ra “muria na vosa kecega sa lako mai na gusu ni Kalou” (V&V 84:44). Era tuvanaka ka bulataka na nodra bula ena inaki sa vakatakila mai na Tamada Vakalomalagi. Era cakacaka vakaukauwa, vuli vakaukauwa, ka masu vakaukauwa. Era kila na veigauna ni nodra cakacaka kei na gauna me ra marau kina. Era vakarorogo vua na vosa ka ra talairawarawa vua na vosa. Era kila na ibalebale kei na kalougata e kauta mai na bulataki ni lawa ni sausauvi. Era dau veivukei o ira na tamata yalodina oqo ka veikauwaitaki. Era lomana ka vukei ira na gone lalai kei ira na qase sara. Era kilai ga ena nodra itovo vinaka kei na vakasama savasava ka ra vakaraitaka ena nodra vuvale, itikotiko, kei na vanua raraba. E lomani ira na Kalou ka vakalougatataki ira. Na nona vosa era sa bula voli kina, na vosa “ena yaco vakaidina na noqu vosa ka sega ni daro” (V&V 64:31).
Vosa ni bula. Era rawarawa ka matata. Era vukea na noda nanuma tiko. Era muataki keda vakadodonu. Era na liutaki keda lesu vua na Tamada Vakalomalagi kei na Nona vakacegu.
Me da nanuma tiko:
“Sa tama na Kalou.
Na tamata sa tacida
Sa ilesilesi na bula
Ni sa sega ni cakacaka.”
Ena yaca i Jisu Karisito, emeni.