Elder W. Douglas Shumway
Mai na Vitusagavulu

Ni o tarogi Elder Wilford Douglas Shumway se na cava e rawa ni vakamacalataki kina na nona matavuvale, e taura beka ga e dua na sekodi na nona sauma mai, na “Yalodina.” Se cakacaka ena bisinisi ni matavuvale, se o luvena yalewa ka qarava tiko na tinana ni se bera ni takali yani, se na nodratou veitaqomaki toka na walu na luvena me rawa ni veiqaravi kina vakaperesitedi ni kaulotu mai Bolivia, eratou dau yalodina vei iratou vakataki iratou ka vakakina ki na kosipeli na matavuvale nei Elder Shumway. Ni kacivi ki na iKarua ni Kuoramu ni Vitusagavulu, e sega tale ni bera na nodratou vakaraitaka na nona matavuvale na veitokoni.

“Ena sega sara beka ga ni rawa ni keirau ciqoma kei na watiqu na ilesilesi oqo kevaka me a sega na nodratou veitokoni na neirau matavuvale,” e kaya o Elder Shumway.

O Elder Shumway, ka yabaki 62, e luvedrau o Wilford Jennings Shumway kei Mabel Whiting Shumway. E a sucu ena i ka 8 ni Me 1940 ka tubu cake mai Saint Johns, Arizona, ka rau a sota kina ena imatai ni gauna kei Dixie Ann Jarvis. Eratou dau veivolekati sara na nodrau dui itubutubu, ka rau dau veigadivi na rua oqo ena gauna ni nodrau vuli torocake. Ni lesu mai na kaulotu mai Uruguay o Elder Shumway, erau a vakayaloqaqataki koya o rau na nona itubutubu, me rau gadi vata. E a vakayacora vakakina, ka rau mani vakamau ena Valetabu e Mesa Arizona ena 1963. E 8 na luvedrau ka 20 na makubudrau.

Eratou se qai toki walega mai qo mai Eagar, Arizona, ki Show Low ka toka voleka ga, na vanua sa mai tiko kina na nodratou bisinisi vakamatavuvale, e dua na otela kei na vanua ni sava motoka. E a tara na yasayasa oya eso na kama ni veikau vakarerevaki sara ena vulaikatakata sa oti. E nanuma lesu o Elder Shumway, ena loma ni tolu na bogi, sa kacivaka tiko mai kina e dua na dau kakaburaki ena televiseni ni na yacovi Show Low mai na kama ena mataka ka tarava. E a sega ni yacova rawa mai na tauni na kama, ka sa mani qai kaya ga kina na daukacikacivaki ni a cakacaka tiko e dua na kaukauwa ka cecere cake sara mai na veikaukauwa kecega sa raica oti—e sega ni rawa ni vakamacalataka.

“Kevaka me a yaco mai na kama, au sega ni vakabauta niu na tiko rawa eke nikua,” e kaya o Elder Shumway. “Ke a vakadomobula sara.”

E a bula na nona matavuvale kei na nodratou bisinisi, ka sa vakavinavinaka vakalevu ena gauna vinaka oqo me veiqaravi kina. E kaya kina, “Au nanuma ni dua na ka dokai meu vunautaka na kosipeli i Jisu Karisito.”