Na Vakabauta ena Veigauna Dredre e Kauta Mai na Vakacegu kei na Marau

Elder Robert D. Hales

Mai na Kuoramu ni iApositolo Le Tinikarua

Ke vakacava sara tu na buto ni veika ena vuravura oqo nikua, se vakacava sara na ka eda dui sotava tiko,…. e rawa ni noda na reki.

Ni oti na nona vakavulici ira tiko na lewevuqa, sa soko yani ko Jisu vata kei ira na Nona tisaipeli ki na baravi ena tokalau ni Wasawasa o Kalili. Sa bogi na vanua ka mani laki vakacegu toka na iVakabula ena mua-i-muri, e davo ka moce koto ena dua na ilokoloko. Sa toso na gauna “A sa tubu e dua na cagi levu sara, a sa seva na waqa na biau.” Ena levu ni rere, era sa vakayadrati Koya kina na tisaipeli: “Vakavuvuli, ko sa wele beka ga ni da sa mate?”¹ E vakaraitaka na Nona isau ni taro ni sega ni bau vakayavalati: “Dou sa rere ena vuku ni cava? E vakaevei ni sa sega na nomudou vakabauta?”² “A sa tucake ko Koya ka vunauca na cagi, a sa kaya ki na wasawasa, mo cegu, mo maravu mai. A sa ruru na cagi, a sa maravu levu mai.”³

O Koya a bulia na vuravura sa vakarota tiko na veitiki ni nona ibulibuli eso.⁴ Ena kurabui levu era sa vakataroga kina na tisaipeli, “O cei beka oqo ni ra sa talairawarawa Vua na cagi kei na wasawasa?”⁵

Eda bula donuya tiko na veigauna dredre. Sa tu oqo e vuravura e dua na cava ni ivalavala ca. E vakacevaruru wavokiti keda na cagi ni caka ca; e roba tu na baba ni noda waqa na ua ni veivaluvaluti. Me vaka na ivola i Paula vei Timoci: “Ni na yaco eso na gauna ni veivakararawataki ena veisiga mai muri: ni ra na daulomani ira walega na tamata, era na dau vinakata na ilavo, era na dau bole era na viavialevu, era na dau vosavakacaca, era na talaidredre ki vei ira na nodra qase, era na sega ni vakavinavinaka, era na sega ni yalosavasava, … sa nodra ga na lotu vakarairai sa sega vei ira na kena dina.⁶

Sa dina sara ni ra sa kumukumuni wavokiti keda tu na o ni veika rerevaki, ia me vaka ga na kena a kauta mai na vakacegu vei iratou na iApositolo ena loma ni waqa na nona vosa na iVakabula, sa na kauta talega mai vakakina vei keda ena gauna oqo: “Ia ni dou sa rogoca na ivalu, kei na irogorogo ni valu, dou kakua ni kidroa; ni sa kilikili me yaco; ia sa bera ga na ivakataotioti.”⁷ “Ia kevaka dou sa vakarau vakavinaka tu dou na sega sara ni rere.”⁸

Sa kaya ko Jiova vei Ilaija, “mo curu yani ka laki tu ena dela ni ulunivanua ena mata i Jiova.” Sa talairawarawa kina o Ilaija, ia ni oti na cava, na uneune kei na bukawaqa, sa qai sikovi mai na “domo lailai e vinaka.” Vei Ilaija, ni sa laki vuni toka ena dua na qara a taroga na Turaga, “A cava ko sa tiko kina eke Ilaija?” A sa sauma ko Ilaija ka kaya, baleta “ni ra sa biuta na veiyalayalati kei kemuni ko ira na Isireli; era sa talaraka sobu na nomuni cabocabo ni soro, ka vakamatei ira na nomuni parofita ena iseleiwau; ia koi au, kau sa vo duadua ga; a ra sa segata tiko me ra vakamatei au.” Ia sa tu vua na Turaga e dua na cakacaka bibi me vakayacora o Ilaija, “a sa kaya vua ko Jiova, mo lako , mo lesu tale.”⁹ Sa mani lesu tale ko Ilaija.

Sa vakakina koi keda meda lako tani mai na noda qara tudei, ni sa tu na veicakacaka me da qarava. Mai na domo lailai ni Nona Yalotabu, ena taqomaki keda, vukei keda ka vakasalataki keda kina na Turaga.

Nanuma tiko ni a vakavulica na taci Jereti ena itata ni waqa me baleta na nona matavuvale me rawa ni ra sokota kina na wasawasa levu, me ra taqomaki kina mai na cagi kei na ua, ka me kauti ira yani ki na vanua yalataki.

E matalia na itata ni waqa oqo ia era a taqomaki vinaka sara kina: “Ia ni sa nunu na nodra waqa e loma ni wasaliwa titobu, … raica sa sega na ika levu se tavuto e vakaleqai ira se vakacacani ira.”¹⁰

Ia, a sega tu na kedra cina na waqa oqo. E a lomaleqataka na taci Jereti na tikina oqo. E sega ni vinakata me ratou soko ena buobuto na nona matavuvale; a mani sega kina ni waraka me qai vakaroti mai, sa mani kauta ga na kauwai ni yalona vua na turaga. “A sa kaya na Turaga vua na taci Jereti: “A cava ko vinakata meu kitaka me rarama kina na nomudou waqa?”¹¹

Na nona sauma na taci Jereti na taro oqo sa na gadrevi kina vua me na cakacaka sara vagumatua: E kabata na ulunivanua o Selemi “a sa vakawaicalataka kina e dua na vatu levu ka bulia mai kina e tinikaono na vatu lalai.”¹² Sa qai kerea na Turaga me tara na vatu me rawa ni rarama mai.

Me vaka ni da itubutubu ka iliuliu sa dodonu me da nanuma tiko ni “sa sega ni dodonu me veivakaroti tiko na [Turaga] ena veika kecega.”¹³ Me vaka ga na taci Jereti, sa dodonu me da dau vakasamataka sara vakabibi na veika era gadreva na lewe ni noda matavuvale, tuva na veika mo rawa ni sotava kina na gagadre oqori, ka me da qai kauta vua na Turaga na noda ituvatuva ena masu. Ena gadrevi kina na noda vakabauta kei na noda sasaga, ia ena vukei keda o Koya ni da vakasaqara na Nona veivuke ka vakayacora na Lomana.

Ni oti na nona veivosaki vata kei na Turaga , a tomana na taci Jereti na nona vakavakarau vagumatua me baleta na ilakolako sa koto e matana.¹⁴ Sa dodonu vakakina vei keda me da dau muria na nodra ivakavuvuli na noda parofita. Sa dau vakasalataki keda vakawasoma na parofita ka bula tiko ena gauna oqo me da dau cokonaka na noda bula—me da vakuwai keda mai na dinau, me da maroroya na kakana kei na veika yaga tale eso, me da sauma na noda ikatini, me da rawata e dua na ivakatagedegede ni vuli veiganiti, ka me da bulataka na ivunau. Eda sa talairawarawa tiko beka ki na veivakaro yaga oqo?

Ni da raica na matadra na luveda kei ira na makubuda, eda raica na veilecayaki kei na taqaya me baleta na gauna oqo. Se na vanua cava ga era na lakova na noda ka talei oqo ena vuravura oqo, era rogoca kina na sega ni cakacaka, na bula dravudravua, na veivaluvaluti, na bula ena ivalavala vakasisila ni vuravura, kei na basulawa. Era na vakataroga, se “me ra na sotava rawa vakacava na veileqa vakaoqo?”

Ni ra vakasaqara na kena isau, era na raica tale mai na matada, ka rogoca na noda vosa. Era rogoci keda beka ni da vosa tiko ena yalodina kei na vakanuinui, e dina ga ni da sotava tiko na veika dredre ni noda gauna oqo?

E dodonu me ra raici keda ni da dau masu tikoga ka vulica na ivolanikalou, ni da dau cakava na lotu kei na veivakasalataki vakamatavuvale, me da veiqaravi ena yalodina ena noda ilesilesi, me da dau lakova e veigauna na valetabu ka talairawarawa ki na noda veiyalayalati. Ni ra raica na noda tudei tu ena kena maroroi na ivunau, ena seyavu yani na nodra rere ka tubu cake na nodra yalodei ena vuku ni Turaga.

Ni da vakaraitaka na noda vakabauta ena veigauna ni dredre, eda sa vakadeitaka tiko kina vei ira ni na sega ni rawa ni vakaleqai keda na meca. E a masu vei Tamana o Jisu ena vukuda: “Au sa sega ni masu mo ni kauti ira tani e vuravura, mo ni maroroi ira ga mai na vu-ni-ca.”¹⁵ Ena qai saumi na masu oqori ena nona gauna kei na nona draki na Tamada Vakalomalagi, me vaka na noda vakabauta.

Ena gauna mada ga oqo, e vakaibalebale ka vakainaki tu na veika dredre kece eda sotava tiko. Vakasamataka mada na Parofita o Josefa Simici: e sotava tu na veisaqasaqa ca sara ena gauna taucoko ni nona bula—na tauvimate, na vakacala ka, na dravudravua, na veilecalecavi, na veibeitaki vakailasu, kei na veivakacacani. Ena temaki beka e dua me taroga, Na cava beka e sega ni taqomaka kina na Nona parofita mai na veika dredre oqo na Turaga, me vakarautaka vua na veika kece sara e gadreva ka kakua ni yalana vua e dua na ka, tarova na gusudra na dauveibeitaki? Na kena isau, sa dodonu vei keda kece me da sotava na veika eso me rawa ni da yaco kina me vaka na iVakabula. Ena koronivuli oqo ni bula vakayago, e dau vakavuqa me kena qasenivuli na mosi kei na kune rarawa, ia na inaki ni lesoni me veivakasavasavataki ka veivaqaqacotaki, e sega ni veivakarusai. E kaya na Turaga vei Josefa yalodina:

“Ia na luvequ, me vakacegu na yalomu; raica sa lekaleka walega na gauna ni nomu rarawa kei na vutugu.”¹⁶

“Ia kevaka ko sa biu ki na ikeli, se era tauri iko na daulaba, se tau vei iko na itotogi mate; kevaka ko sa biu ki na wasaliwa titobu ka ubi iko na biau lelevu, se kevaka sa liwa na cagi kaukauwa mo leqa kina; ia kevaka sa kumukumuni vata na o loaloa ni lomalagi kei na veivu ni ka me latia na nomu sala, … mo kila sara na luvequ ni ko na kalougata vakalevu, kevaka ko sa vosota rawa na veika kece oqo.”¹⁷

E dina ni a levu sara na veika rarawa ena bula nei Parofita Josefa, e a yaco kina e vuqa sara na veika cecere me baleta na kena vakalesui mai na kosipeli ena gauna oqo. E a yaco me qai kila o Josefa ka sa vakavulica kina vei keda, ni gauna e a sotava tiko kina e dua na ka dredre, e a sega ni vakatara na iVakabula me rusa kina. Sa vakakina ni sa gauna kunekunei dredre sara me da dau kila kina na levu ni Nona kauwaitaki keda na iVakavuvuli ka gadreva me vukei keda me da vosota me yacova na ivakataotioti.

Ena noda gauna oqo, sa dau yacovi keda mai na ligana dau veitokoni na noda Turaga mai na cakacaka vakalotu ni Nona valetabu. E kaya kina na Parofita o Josefa vei ira na yalododonu e liu mai Nauvoo, “O ni na gadreva e dua na edaumeni, kemuni na wekaqu, me rawa kina ni o ni tu vakarau mo ni vorata na veika kecega.”¹⁸ Sa dina sara o koya! Na veivakalougatataki ena veiyalayalati ni valetabu kei na noda vakalougatataki ena kaukauwa sa rawa kina vei keda na Yalododonu Edaidai me da vorata na veivakatovolei ena vakabauta. Ni sa cava na nona ilakolako vakaivuvu ni lotu, e vola kina o Sarah Rich, “Kevaka beka me a sega na vakabauta kei na kila ka sa soli vei keda mai na valetabu … o ya ena vaka beka … na rika ena vanua butobuto na noda ilakolako.”¹⁹

E dau yavalati au vakalevu na levu ni veivakatovolei ka a sotava na iVakabula. E dina ga ni Nona Le Duabau ga na Tamana era a segata na tamata inaki ca me ra kauta laivi na Nona bula me tekivu sara mai na ivakatekivu. Ena gauna taucoko ni Nona cakacaka, a muri Koya voli e dua na cava ni vosa kudrukudru, na lasu, kei na veivakacacani ena veivanua kecega e lakova.

E vakauqeti vakalevu na lomaqu niu vakasamataka na macawa ni bera tiko na Nona mate: e a tovolea na nodra iliuliu na bete me bolea na dodonu e tu Vua, segata me tudaitaki Koya, ka tovolea vakarua me vakamatei Koya. Mai Kecisemani, ni ratou moce tu na Nona tisaipeli, a vakararawataki kina ena vuku ni ivalavala ca ni tamata kecega ka bunotaka kina na dra. E a cakitaki, vesu, vakatarogi, warolaki, kasiviti, ka vakanakuitataki. Ni oti na nona vakatarogi mai na matabose vakatulewa, a vakalialiai mai vei Eroti ka qai kau yani vei Pailate, ka laki vakaduri e matadra e dua na ilawalawa cudrucudru. E a vakanakuitataki ka vakaisalataki ena wa vakavotona. E a vakasauarataki me kauta na nona kauveilatai ki Kolikoca. E a vakoti na ligana kei na yavana. E a vakaduri cake na yagona ena kedrau maliwa e rua na daubutako. Era vakawirimadigitaka na nona iyaya na sotia, ka soli Vua na waiwiwi me vakaotia na Nona karamaca. Ni oti e ono na auwa,²⁰ sa qai solia yani na Yalona vei Tamana, ka mate.

Ni da vakadikeva ena rai vakavuravura na iotioti ni macawa ni Nona bula na iVakabula, na imatai ni noda vakanananu ena baleta beka na veivakararawataki kei na veivakarusai. Eda na raica beka ga na tinana na iVakabula ni tagi tu ena ruku ni kauveilatai, na sotia ni ra sa rere, ni sa yavavala na vuravura, sa kakavorovoro na vatu, ka sa kasei rua na ilati ni valenisoro, ka ubia tu na vanua me tolu na auwa na butobuto. E dua na mataqali cava kei na veivakarusai vata oqori e ubia tu na Vuravura Vou. Me vakalekalekataki, eda raica na kaukauwa ni levu ni kena revurevu.

Ia raica tale mada—ena gauna oqo mo raica ena mata ni vakabauta.

Ena iotioti ni vica na macawa, mosi duadua beka o ya ena Nona bula, vakasamataka ni a veivakavulici, vakadinadina, veilaveti, veivakalougatataki, ka vaqaqacotaki ira era tu wavoliti Koya. E a vakaturi Lasarusa cake mai na mate, vakavuvulitaka na veika me baleta na Tamana, cokonaka na valetabu, wasea e vica na italanoa vakaibalebale, vakadinadinataka na nona solia na yada na nona ilavo lailai, vakaroti ira na Nona tisaipeli me baleta na iKarua ni Nona Lako Mai, sikova na vale nei Saimoni na vukavuka, vakarautaka na sakaramede, vuya na yavadratou na iApositolo, ka vakavulica vei iratou na Nona tisaipeli me ratou dau veilomani. E vakadinadinataka ni vakalou me vaka ni Luve ni Kalou ka veivakavulici me baleta na Dauveivakacegui—na Yalo Tabu. Ena Nona Masu ni Vakacacabo cecere, e masu kina vei Tamana me baleti iratou na Nona iApositolo kei ira kece era na vakabauta na nodra vosa, “me levu sara na nodra marau e vuravura.”²¹

Ena nona gauna butobuto duadua, e sega ga ni yali tani Vua na vakacegu kei na reki. E qai serau cake! Ni sa mate oti e a rairai vei Meri Makitalena. E vakacava mada na levu ni reki ena mataka o ya ni sa rogo na itukutuku: “Sa tucake tale,”²² E a lako yani vua na marama ena sala; vei Kaliopasa kei na dua na tisaipeli ni rau lako tiko ki Emeo; vei ira na iApositolo kei na tisaipeli ena rumu e cake; vei Tomasi, kei ira tale e so. Sa yaco tikoga na reki kei na mamarau ena vuku ni Veisorovaki kei na Tucaketale.²³

Ia e sega ni o koya kece oqori. Ena raivotu a raica kina na Parofita o Joseph F. Smith—na parofita, daurairai, ka daunivakatakila—na Nona veisiko ki na vuravura ni yalo na iVakabula:

“Raica era sa soqoni vata ena dua na vanua ko ira na yalododonu, ka sega ni wiliki rawa na kedra iwiliwili; io ko ira oqo era sa yalodina sara ka muria na ivakavuvuli i Jisu ena nodra bula vakayago… .

“Raica era sa mate yani; ia era sa nuitaka tu ni ra na rawata na lagilagi ni ra sa tucaketale mai na mate, …

“[ka] ra sa reki ka marau vakalevu; io era sa reki vakalevu sara ni sa voleka na siga me ra vakabulai kina.

“Raica era sa soqoni vata ka waraka tiko na siga ena yaco yani kina na Luve ni Kalou ki na vuravura ni yalo; io me sereki ira mai na ivau ni mate.”

Era sa kila tu na yalo oqori ni na vakalailai ga “ena qai vakalesui tale na yago sa moce no ena kuvu ni soso ki na kena itutu makawa; io ena veiuturi vata na sui ka ologi ena viciko; raica ena cokoti vata tale na yalo kei na yago me sega tale ni veitawasei; io me ra rawata na lagilagi sa uasivi sara.”

Ia, ni ra sa “wawa ka veivosaki tiko na lewevuqa; ia era sa reki vakalevu ni sa voleka na gauna me ra sereki kina mai na ivesu ni mate; a sa rairai mai na Luve ni Kalou me sereki ira na yalododonu era sa vesu tu.”²⁴

Kemuni na taciqu kei na ganequ, ke na vakacava sara na butobuto ni veika ena vuravura oqo nikua, se vakacava sara na cava eda dui sotava tiko, ena noda veivuvale se na matavuvale, e rawa ni noda na reki oqo. Ena so na gauna eda dau sega ni kila rawa se cava e yaco kina na mate, na tauvimate, na lokiloki ni vakasama kei na yago, na leqa ni tamata yadua, na veivaluvaluti, kei na veilecalecavi tale e so. Eso vei ira oqori era tiki yaga ni noda bula vakatovotovo oqo. E so tale, me vaka a raica o Inoke, era tiki ni vakavakarau me baleta na iKarua ni Nona Lako mai na iVakabula, na gauna ena “vakabutobutotaki mada ko lomalagi ka ubi vuravura talega na butobuto; io ena sakure na lomalagi kei na vuravura; raica ena yaco e vuqa na ka rarawa vei ira na luve ni tamata, ia,” sa kaya na Turaga, “ia au na taqomaki ira ga era sa noqu,” Ia ni sa raica ko Inoke na veika oqo, “a sa vuabale na nona marau.”²⁵

Ena mataka oqo, ena gauna a sucu kina na iVakabula kei na Nona Tucaketale, au wasea kina ena marau kei na vakamolimoli na noqu ivakadinadina ni a lako dina mai ki na vuravura oqo, vakararawataki ena vuku ni noda ivalavala ca, ka na lesu tale mai. Na noda vakabauti Koya kei na talairawarawa ki na Nona ivakaro ena kauta mai na “na vakanuinui taucoko”²⁶ ka vakaseyavutaka na butobuto kei na kataremoremo ni yaluma ena veigauna dredre oqo. O Koya e tu Vua na kaukauwa me vakamaravutaka na kaukauwa ni veika vakavuravura sa tu talega vua na kaukauwa me vakamaravutaka na yaloda ka noda idrodro ena gauna ni cava, “Mo cegu, mo maravu mai.”²⁷

Au vakadinadinataka ena yaca i Jisu Karisito, emeni.