Yalodina

Peresitedi Gordon B. Hinckley

Mo dinata na veika uasivi e tiko vei iko. Vakabauta tiko ka dinata na veiyalayalati ka veitokani vata kei na matabete ni Kalou.

E sega ni dua tale na soqoni ena vuravura taucoko me tautauvata kei na soqoni oqo. Evei ga na vanua eda tiko kina, na mataqali vosa vakacava eda vosataka, o keda kece eda tagane ka sa kotori oti na liga ena doka ni uluda me soli vei keda na kaukauwa ni bete va-Kalou. Kevaka meda gonetagane ka sa soli vei keda na bete lailai se Matabete i Eroni, se tagane sa ciqoma na matabete e cake se Matabete i Melikiseteki, e sa soli vei keda yadua e dua na ka vinaka sara ka totoka, e dua na ka me isaluwaki ni bula va-Kalou.

Au na vakaruataka, e sega ni dua tale na vanua e vuravura me laurai kina na soqoni vakaoqo. Eda mai soqoni vata ena veitokoni vakaveitacini, me vaka ni da tamata vakalougatataki vata kei na kaukauwa kei na dodonu, ka soli kina na itutu ena veidokai, ka sa noda na dodonu me da veiqaravi ena vukui koya sa Cecere sara. Ko Jiova na Kalou ni lomalagi e kila ni sa dodonu me soli vei keda e dua na ka e Nona sara ga vakatabakidua. Ena so na gauna au dau vakataroga se eda sa bula dodonu tiko li me tiko kina vei keda. Au dau vakataroga se eda dau vakavinavinakataka li. Au dau vakananuma na kena tawamudu ni kaukauwa oqo kei na kena lewa. E sa tiki tu ni bula kei na mate, matavuvale kei na Lotu, kei na cecere ni bula ni Kalou Vakaikoya kei na Nona cakacaka tawamudu.

Kemuni na taciqu, au kidavaki kemuni ena nomuni itutu vakalewe ni kuoramu ni matabete tabu. Au kidavaki kemuni vakadauveiqaravi ni Kalou bula o koya ka sa solia vei keda na itavi ka na sega ni rawa me da na dro tani mai kina.

Me salavata kei na veikidavaki o ya, au sa digitaka meu na vosa ena levu sara na igacagaca ni dua na malanivosa. Na vosa oqori na yalodina.

Au nanuma na yalodina sa ikoya na noda dina vei keda vakataki keda. Au nanuma ni tiki ni noda yalodina vakatabakidua vei ira na dui watida. Au nanuma ni tiki ni noda dina vakatabakidua ki na Lotu kei na kena veiitavi e dau qaravi. Au nanuma ni tiki ni noda dina ka sega ni lomalomarua vua na Kalou ni lomalagi, na Tamada Tawamudu, kei na Luvena Daulomani, na noda Dauveivueti, na Turaga o Jisu Karisito.

Me da dina ena noda vinaka taucoko. Eda luvena na Kalou ka sa soli vei keda na Nona lewa vakalou. Ia eda bula tiko ena dua na vuravura ni ivalavala ca. E tiko e dua na kaukauwa, ka dreti keda sobu tiko, ka dau sureti keda tiko meda vakaitavitaki keda ena so na ka e sega ni veiraurau kei na matabete tabu e sa tiko oqo vei keda. E rairai lasa toka ni o koya na vu ni ka lasu, na kalokalo ivolasiga qaseqase o koya ka a cemuri mai lomalagi, ia e dau tu ga vua na iyaragi kei na kaukauwa me veitemaki, me veisureti, me ra muri koya o ira era se bera tu ni kaukauwa se vakarau. Ena dua na gauna lekaleka sa oti e a vakasakiti kina e dua na iyaloyalo yavala me kena ka vinaka duadua. Au se bera ni raica kau nanuma niu na sega ni raica. Ia e tukuni vei au ni sinai tu kina na veidauci, kei na veivosa vakasisila e tu ena loma ni iyaloyalo taucoko.

Na iyaloyalo vakasisila sa dua na ivakaraitaki ni gauna eda sotava tiko. O ira na kena iliuliu era vakavutuniyautaki mai vei ira era dau via sarava. Ena itekivu ni ivakatakila ka a sa mai vakatokai me Vosa ni Vuku, e tukuna kina na Turaga: “Me vaka ni sinai tu na inaki ca kei na vere vuni ena yalo ni tamata ena gauna mai muri, au sa vakasalataki kemudou oqo, ena noqu solia na vosa ni vuku oqo vei kemudou ena ivakatakila” (V&V 89:4).

Sa qai toso me vakamacalataka na kakana eda dau biuta tiko ki lomada. Na vosa vata ga ka vakayagataki ena kena vakasamataki ni da vakamatautaki keda ena iyaloyalo vakasisila.

Kemuni na taciqu, na qase kei na gone yadua ka rawa ni rogoca na domoqu ena kila ni ka oqo e ka torosobu. Ena sega ni ganita mo raica e dua na mape ni gaunisala mo kila kina se evei na vanua ena kauti iko kina na nomu vakamatautaki iko ki na iyaloyalo vakasisila. Veidutaitaka vata kei na rairai vinaka, vakacegu, na veika vinaka e vakilai ni da bula voleka tiko vua na Turaga ka bula ulabaleta na ivakarau ni bula e salavata tiko kei na vakayagataki ni wai ni veivakamatenitaki ka sa wavokiti keda tu ena gauna oqo.

Oqo e baleti kemuni tiko na cauravou ko ni tiko ena soqoni nikua. O ni sa taketetaki sara tikoga mai vua na vuni ca. Kevaka me rawai kemuni edaidai sa rawa ni rawai kemuni ena nomuni bula taucoko. E sa vakadeitaki vei kemuni na kaukauwa kei na kila me baleta e dua na inaki vakalou. Ia kevaka ena vakatanitaki, e sa na veivakacacani ka sega ni tarai cake.

Au sa vakavinavinaka sara ga vakalevu ena kaukauwa e tiko vei ira na noda itabagone. Ia au kila talega ni so era sa mai yali ena vuku ni nodra sa mai vakaweleweletaki. Na yali vakoqo e sa vakatubu leqa sara ga. Na matanitu ni Turaga e gadrevi kemuni. Mo bula dodonu tiko kina. Mo yalodina tiko mada ga vakataki iko. Kakua ni vakatorosobutaka na nomu bula me kauta laivi mai vei iko na kaukauwa ni vakatulewa ni nomu galala.

Vei kemuni na qase au solia vei kemuni e dua na bolebole. Dro tani mai na lasa ni kena soqo ka rawa ni na rawai iko. Drovaka na veika ca ni vuravura. Mo dina vei iko vakataki iko. Mo dinata na veika uasivi e tiko vei iko. Vakabauta tiko ka dinata na veiyalayalati ka veitokani vata kei na matabete ni Kalou. Ena sega ni rawa ni o na vakacowiri voli ga ena viko ni ivalavala oqo. Sega ni rawa ni ko na lasu, sega ni rawa ni ko veidabui, sega ni rawa ni ko na vakalialia e dua kevaka e sega ni vakatanitaka na isolisoli ka soli yadua vei keda ni da luvena na Kalou. Kemuni na taciqu, au na masulaka vakaukauwa me da na vakamalumalumutaka ka me da na dina tiko vei keda vakataki keda.

Mo yalodina kina nomu veimaliwai vakamatavuvale. Au sa raica oti e so na veiwatini vinaka sara ka so e ca sara. Ena veimacawa e sa dau noqu itavi ena gauna e dau kerei mai kina meu na sereka e dua na veivauci mai valetabu. Na veisere ni vakamau e sa yaco tu ga ena veigauna ena veiyasai vuravura. Ni sega sara mada ga ni dodonu vakalawa, era sa veivakadonui ga na tagane kei yalewa ka rau sa mai bula vata tiko yani. Au marau niu tukuna ni lailai sara na veisere vei ira era vakamau ena valetabu. Ia vei ira sara mada ga oqori e se tiko ga e cake na kena iwiliwili mai na kena ka nanumi taumada.

Na tagane kei na yalewa sa qai vakawati erau sa lako mai ki na valetabu ni Turaga me rau mai tusanaka na nodrau vosa ni veilomani. Erau sa mai vosa ni veiyalayalati tawamudu vei rau vakairau ka vakakina vua na Turaga. E sa na mai vauci ena veiyalayalati tawamudu na nodrau veimaliwai. E sega ni dua e namaka me ra na toso vakavinaka kece na vakamau. Ia e namaki ni vakamau kece e yaco ena valetabu ni Turaga ena vakadeitaka tiko na vosa ni veiyalayalati kei na yalodina e dua kivua tale ka dua.

E sa balavu sara mai na noqu vakila ni veiwatini bula mamarau e yavutaki ena nodrau dui saga me tiko vinaka na kedrau i sa. Ena levu sara na gauna na yalo kocokoco e dau vakavuna na veiba, veibiu, veisere, kei na kavoro ni uto.

Kemuni na taciqu, na Turaga e namaka vei keda e dua na ka e vinaka cake. E vinakata e dua na ka e vinaka mai na tu ga vakaoqo e vuravura. Kakua sara ni guilecava ni o kemuni ga o ni a digitaki ira na nomuni itokani. O kemuni ga o ni a vakila ni sega tale ni dua me tautauvata kei koya ena vuravura oqo. O kemuni ga o ni gadreva me ra nomuni ka tawamudu. Ia ena levu sara na gauna e sa dau mai seavu na irairai ni veika e yaco mai valetabu. E vakavuna beka na gagano. Na veivakacacani e sa sosomitaka na veivakacaucautaki. Ni da vakaraica na veika ca vua e dua, eda na raica vakaidina. Ia kevaka me da vakanamata ga ki na veika vinaka ena yaco me serau ka ivakadei ni bula.

O au e tu vei au na kila ni veika sa sotavi oti. Sa voleka sara ni yabaki 66 na neirau bula vakawati kei Sisita Hinckley. Au sega ni kila se rawa vakacava me tiko vata voli mai kei au ena gauna balavu qo. Oqo keirau sa qase cake sara mai. Ia au sa dau vakavinavinaka ga ena vukuna. Au dau gadreva meu raica ni sa vinaka na nona tiko. E dua na ka na noqu dau gadreva me nona na ka vinaka kece ga. Sa bau itokani vinaka dina o koya. Sa dua na lewenivale vinaka dina, ka sa tina, buinigone ka buinigone vakarua vinaka sara o koya.

Io, o kemuni, o ni sa rogoca na tamata ka a bulabula vinaka tu ga me yacova ni sa laki qase sara ka qai tarogi mai vei ira na dauvolaitukutuku se cava e vakavuna na nona bula balavu tiko. Sa qai tukuna o koya mai na gauna erau a vakamau kina erau a sa duavata ni gauna erau dau veiba kina, me dua vei rau me tucake ka lako i tuba. E kaya vakaoqo, “Kemuni na turaga, au bula balavu tu nikua baleta ni sa levu ga na gauna au dau cegu cagi bula voli ga yani e gaunisala.”

Kemuni na taciqu, ni yalodina vei ira na watimuni. Me vakalougatataki tiko mada ga na nomuni vakawati ena nomuni yalodina tiko. Vakasaqara na nomu marau mai vua na nomu itokani. Solia vei nomu itokani na galala me vakalevutaka na nona sasaga ni rawa ka, me vakatorocaketaka na nona taledi, me toso cake na nona sasaga, ka me na bulataka na nona rawa ka vakaikoya.

Oqo meu tukuna mada e dua na ka me baleta na yalodina ki na Lotu.

Keitou sa raica tiko na levu ni vakaduiduile. Era tiko e so ka ra kaya tiko, “Na Lotu ena sega ni mai vakarota tiko vei au meu cakava vakacava na ka oqo, na ka o ya, se dua tale na ka, se mataqali bula vakacava meu bulataka.”

Sega, na Lotu ena sega ni tukuna vua e dua se me vakasama vakacava se cava me cakava. Na Lotu ena dusimaka ga na gaunisala ka sureti ira na lewena me ra bulataka na kosipeli ka marautaka na kena veivakalougatataki. Na Lotu ena sega ni vakarota vua e dua, ia ena vakasala, veivakauqeti, veivakayarayarataki, ka na via raica na yalodina mai vei ira era okati ira ni ra lewena tiko.

Ena gauna au a se gonevuli voli kina ena univesiti, au a tukuna vakaoqo vei tamaqu ena dua na siga niu nanuma ni o ira na Vakaitutu Raraba era sa butu sivia tiko na nodra iyalayala ena nodra dau vakamacalataka e dua na ka. E tamata vinaka ka yalomatua sara ko koya. E tukuna vakaoqo, “Na Peresitedi ni Lotu e sa vakavulici keda kau tokoni koya ni parofita, daurairai, ka daunivakatakila, ka nakita meu sa na vakamuria na nona ivakasala.”

Au sa mai qaravi itavi tiko qo ena matabose raraba ni Lotu ka rauta ni 45 na yabaki. Au a veiqaravi meu iVukevuke ki na Le Tinikarua, daunivakasala ki na Mataveiliutaki Taumada, ka sa yabaki walu qo na noqu Peresitedi. Au vinakata meu mai wasea vei kemuni na noqu ivakadinadina ni dina ga niu sa tiko ena udolu na veimatabose ka bosea na lawatu ni Lotu kei na kena parokaramu, au se bera vakadua ni tiko ena dua me sega ni na vakasaqarai kina na veitokoni ni Turaga se me a gadreva e dua e tiko ena bose me vakavuna na veisei se na veimaliwai ca.

Na iVola ni Vakatakila e tukuna, “Au sa kila na nomu cakacaka, o sa sega ni batabata se katakata: au sa vinakata mo batabata se katakata.

“Ni ko sa katakata vakalailai ga, ka sega ni batabata se katakata, kau na luaraki iko mai na gusuqu” (Vakatakila 3:15–16)

Au biuta vei kemuni na noqu yalayala, kemuni na taciqu lomani, ni gauna ni noqu veiqaravi ena itavi au qarava tiko oqo au na sega ni vakadonuya e dua na lawatu, parokaramu, ivakavuvuli, na kena ga ena vinaka kina na nodra bula na lewe ni nona Lotu na Turaga.

Oqo na nona cakacaka. E a tauyavutaka. E sa vakatakila mai na nona ivakavuvuli. Sa virikotora na kena icakacaka. E a bulia na kena matanitu. Sa Nona cakacaka ka Nona matanitu, ka sa kaya, “O ira sa sega ni totaki au era sa veivala kei au” (2 Nifai 10:16).

Ena 1933, e a dua kina na yavavala e Amerika me veisautaki na lawa ni volitaki yaqona ni vavalagi. Ena gauna e mai caka kina na digidigi, o Utah e sa qai vu ni kena vakadonui.

Au a se kaulotu voli, cakacaka voli mai Lodoni, Igiladi, ena gauna au wilika kina ena niusiveva na ulutaga, “Vakamatea na Vakatatabu o Utah.”

E a Peresitedi voli kina ni Lotu, o Peresitedi Heber J. Grant, e a sa kerea vei ira na noda me ra kakua ni digia na vakatatabu. E a voroka na yalona ni lewe levu na lewe ni Lotu era sega ni muria na nona ivakasala.

Nikua au na sega ni vosa baleta na vinaka se na ca ni vakatatabu, ia na ivakaraitaki ni sega ni yalodina ki na Lotu kei ira na kena vakailesilesi.

Au sa vakavinavinaka sara ga vakalevu ena nodra vakabauta e levu na lewe ni Lotu Yalododonu, ni ra a sotava tu e dua na gauna ni digidigi dredre baleta na vanua e sa vakadeitaki koya toka kina na Lotu. Ka ra sa qai mai duavata kina. Ia au sa qai vakavinavinaka ga vakalevu sara me baleti ira na turaga kei na marama yalodina ka ra sa rawa ka tu vakalevu, gugumatua, ena vuli, ka ivakaraitaki ni kaukauwa—yalomatua ka rawati ira.

Me da sa na qarava o keda yadua—se dina na Lotu, se ka e lasutaki. E sega ni dua ena tu donu e loma. Na Lotu kei na matanitu ni Kalou, se sega ni dua na ka.

Vinaka kemuni na taciqu, kemuni na turaga gugumatua ka dina ka vakakina na dei ena vakabauta ka yalodina.

Me kena itinitini, yalodina vua na Kalou na Tamada Tawamudu kei na Luvena Daulomani, na Turaga o Jisu Karisito.

Na tagane kece ena loma ni Lotu oqo me nona ivotavota me kila, ni Kalou e Tamada Tawamudu ni Luvena Daulomani e noda Dauniveivueti. Na iVakabula e a solia na ki me da rawata kina na kila ka. E a tukuna: “Kevaka e dua na tamata sa via cakava na loma ikoya, ena kila se sa ka mai vua na Kalou na ivakavuvuli seu vosa vakai au ga”(Joni 7:17).

O Jiutasa Isikarioti e sa kilai levu tu ena itukutuku ni veigauna ni a veilalitaka na nona dina, ka ni a volitaka na nona dina ena 30 na tikinisiliva (raica Maciu 26:15).

E lewe vica ena noda gauna, ni cavuti na vosa nei Paula, “vakota … na Gone ni Kalou ka beci koya ena matanavotu” ka vosa vakacacataki koya ena vosa veibeci? (raica Iperiu 6:6).

Kemuni na cauravou, o ni kila na vosavosa ca mai rara ni koronivuli kei na gaunisala. Vagalalataki iko mai kina. Kakua ni dau cavuta. Vakaraitaka na nomu yalodina vua na Kalou ni lomalagi kei na Dauniveivueti kei vuravura ena nomu rokova na yacadrau.

Masu vua na Tamada Vakalomalagi ena yaca ni Turaga o Jisu Karisito, ka dau nanuma tiko, ena veidraki ni bula kecega, me ivakarau ni nomu bula mo yalodina ka dau loloma.

Ko cei e to kei na Turaga?

Oqo na kena gauna

Taroga ena reki:

Ko cei e to kei na Turaga

(Sere, naba 260.)

Kemuni na taciqu, me nomuni tiko kei ira na nomuni matavuvale na veivakalougatataki mai lagi. Me da sa gugumatua tu mada ga ka dina ena vakabauta, turaga ka cauravou bula dodonu ka yalodina ena veigauna kece, sa noqu masu ena yaca i Jisu Karisito, emeni.