Pumanig sa Panginoon

Ni Pangulong Dieter F. Uchtdorf

Pangalawang Tagapayo sa Unang Panguluhan

Mula sa “Friend to Friend,” Liahona, Abr. 1999, F2–F4.

Noong bata pa ako, nakatira ako sa Zwickau, Germany. May kaibigan ang lola ko na puti at mahaba ang buhok. Ang pangalan niya ay Sister Ewig, at inimbitahan niya ang lola ko sa simbahan. Nang magpunta ang pamilya ko roon, marami kaming nakitang bata. Hangang-hanga kaming lahat sa musika, lalo na sa kantahan. Isang awitin, ang “Isang Sinag ng Araw,” ang talagang hinangaan ko.¹ Parang napakalapit ko kay Jesus nang kantahin ko ito. Alam ko na gusto Niya akong maging isang sinag ng araw para sa Kanya. Gustung-gusto ko pa rin ang awiting iyon—at ang patotoong bigay nito sa akin tungkol sa Tagapagligtas.

Ang buong pamilya ko—maliban sa akin, dahil anim na taong gulang pa lang ako noon—ay nabinyagang miyembro ng Ang Simbahan ni Jesucristo ng mga Banal sa mga Huling Araw. Pagtuntong ko ng walong taong gulang, bininyagan ako ng tatay ko sa isang pampublikong swimming pool.

Pagtuntong ko ng 11 taong gulang, kailangang lisanin ng pamilya ko ang East Germany. Lumipat kami sa Frankfurt, West Germany. Dumalo ako sa Frankfurt Branch, na hindi kasinglaki ng nasa Zwickau. Maliit ang Frankfurt meetinghouse, at sa basement kami nagkaklase. Tinuruan kami ng mga misyonero ng mahahalagang alituntunin ng ebanghelyo.

Isang misyonero, si Elder Stringham, ang talagang hinangaan ko sa mga aralin niya sa Mahalagang Perlas, lalo na sa bahaging itinuturo kay Moises na siya ay anak ng Diyos (tingnan sa Moises 1:3–4). Itinuro din sa akin ni Elder Stringham ang banal na kasulatan na nagsasabing, “Kung ang Dios ay kakampi natin, sino ang laban sa atin?” (Mga Taga Roma 8:31). Binigyan ako nito ng kapanatagan at lakas ng loob, dahil noong panahong iyon mukhang malabo ang kinabukasan sa Germany. Ang lungsod ng Frankfurt ay puno ng mga labi ng binombang mga gusali. Nanatili sa isipan ko ang aral na iyan habambuhay. Itinuro nito sa akin na kailangan kong pumanig sa Panginoon. Hindi ko makakayang hindi pumanig sa Panginoon.

Hinahamon ko kayong mga bata na sundin ang mga salita ng mga propeta. Kapag ginawa ninyo ito, matatagpuan ninyo ang sagot sa inyong mga tanong, kayo man ay 6, 9, 11, 19, o kagaya kong 69 na taong gulang na!

Tala

1. “Isang Sinag ng Araw,” Aklat ng mga Awit Pambata, 38.

Maging Isang Sinag ng Araw para kay Jesus

Noong unang magsimba si Pangulong Uchtdorf, narinig niya ang awiting “Isang Sinag ng Araw.” Maaari kang maging isang sinag ng araw sa pamilya mo sa pamamagitan ng pagpapakita ng kabaitan at pagbibigay ng masasayang maiikling liham ng pasasalamat:

1. Bakatin ang hubog ng araw sa isang manipis na papel, at gupitin.

2. Isulat ang pangalan ng isang kapamilya sa isang panig ng araw, at saka ito kulayan ng paborito mong masasayang kulay.

3. Sa kabilang panig, sumulat ng isang maikling liham ng pasasalamat sa isang kapamilya para sa isang bagay na ginagawa niya para sa iyo.

4. Gumawa ng isang lihim na kabaitan para sa taong iyan, tulad ng pag-aayos ng higaan o pagtutupi ng mga damit, at mag-iwan ng masaya at maikling liham.

Espesyal na mga Misyonero

Tulad ni Pangulong Uchtdorf, ikaw ay miyembro ng Simbahan ngayon dahil may isang espesyal na taong nagturo sa isang miyembro ng pamilya mo tungkol sa ebanghelyo. Hilingin sa iyong ina o ama na sabihin sa iyo kung sino ang unang naging miyembro ng Simbahan sa iyong pamilya, at tingnan kung malalaman mo kung sino ang nagturo sa pinakaunang mga miyembro ng Simbahan sa iyong pamilya. Sagutan ang mga nakasulat sa ibaba hangga’t kaya mo:

Ang unang miyembro ng Simbahan sa pamilya ko:

Kailan siya sumapi sa Simbahan:

Saan siya sumapi sa Simbahan:

Paano niya nalaman ang tungkol sa Simbahan at paano siya nagkaroon ng patotoo:

Sino ang nagturo sa kanya tungkol sa ebanghelyo:

Background: paglalarawan ni Dilleen Marsh; aklat © Getty Images