កុមារដែលឈររឹងមាំ
ការឈររឹងមាំនៅក្នុង ប្រទេសអេត្យូពី
អ្នកនិពន្ធរស់នៅរដ្ឋ យូថាហ៍ ស.រ.អា ។
ខ្ញុំឈ្មោះធីសន !
ខ្ញុំរស់នៅក្នុងប្រទេស អេត្យូពី ជាប្រទេសមួយនៅអាហ្វ្រិកខាងកើត ។ ខ្ញុំចូលចិត្តលេងបាល់ទាត់ និងអានសៀវភៅ ។ ខ្ញុំចង់ក្លាយជាវេជ្ជបណ្ឌិត នៅពេលខ្ញុំធំឡើង ។ ខ្ញុំព្យាយាមឈររឹងមាំ ដោយការរស់នៅតាមដំណឹងល្អជារៀងរាល់ថ្ងៃ ហើយចែកចាយវាជាមួយនឹងមិត្តភក្ដិរបស់ខ្ញុំ !
របៀបដែលខ្ញុំទទួលបានទីបន្ទាល់
ខ្ញុំបានមកព្រះវិហារលើកដំបូង ពេលដែលខ្ញុំមានអាយុប្រាំបីឆ្នាំ ។ ខ្ញុំបានអានព្រះគម្ពីរមរមន ខ្ញុំបានស្ដាប់អ្នកផ្សព្វផ្សាយសាសនា ហើយខ្ញុំបានអធិស្ឋាន ។ ព្រះវិញ្ញាណបានប្រាប់ខ្ញុំថា សាសនាចក្រពិត ហើយខ្ញុំចង់ទទួលបានបុណ្យជ្រមុជទឹក ។ ដំណឹងល្អធ្វើឲ្យខ្ញុំរីករាយ ។
ការជួយដល់គ្រួសាររបស់ខ្ញុំ
តាមធម្មតា គ្រួសាររបស់ខ្ញុំដើរទៅព្រះវិហារ ហើយត្រូវចំណាយពេលមួយម៉ោង ។ នៅពេលប្អូនប្រុសតូចរបស់ខ្ញុំហត់ បងប្រុសខ្ញុំ ឬខ្ញុំនឹងពគាត់ ។ ខ្ញុំជួយលាងចាន និងសម្អាតផ្ទះ ។
ការហៅបម្រើរបស់ខ្ញុំក្នុងព្រះវិហារ
ផ្នែកដែលខ្ញុំចូលចិត្តអំពីព្រះវិហារ គឺការប្រជុំសាក្រាម៉ង់ ។ ខ្ញុំដឹកនាំតន្ត្រី ។
ខ្ញុំចូលចិត្តរៀនដំណឹងល្អ ។ រឿងព្រះគម្ពីរដែលខ្ញុំចូលចិត្ត គឺដេវីឌ និងកូលីយ៉ាត ។ ចម្រៀងដែលខ្ញុំចូលចិត្តគឺ « រឿងនិទានព្រះគម្ពីរមរមន » ។
ការចែកចាយនូវអ្វីដែលខ្ញុំដឹង
ខ្ញុំប្រាប់មិត្តភក្ដិរបស់ខ្ញុំទាំងឡាយនៅសាលារៀនអំពីដំណឹងល្អដែលបានស្ដារឡើងវិញ ។ មិត្តម្នាក់ធ្លាប់បានសួរខ្ញុំអំពីសាសនាចក្រ — ក្រោយមកនាងក៏បានឈប់ទៅវិញមួយរំពេច ។ ខ្ញុំសួរនាងថាហេតុអ្វី ។ នាងបានប្រាប់ថា ឪពុកម្ដាយនាងមិនពេញចិត្តទេ ។ ខ្ញុំសង្ឃឹមថា ថ្ងៃណាមួយ ឪពុកម្ដាយរបស់នាង នឹងផ្លាស់ប្ដូរដួងចិត្តរបស់ពួកគាត់ ។
អត្ថន័យនៃការឈររឹងមាំចំពោះខ្ញុំ
« ការឈររឹងមាំ » មានន័យថា រស់នៅតាមដំណឹងល្អជារៀងរាល់ថ្ងៃ ។ ព្រះវរបិតាសួគ៌ និងព្រះយេស៊ូវ សព្វព្រះទ័យឲ្យខ្ញុំថ្លែងទីបន្ទាល់អំពីទ្រង់ ! ខ្ញុំចង់ឲ្យមិត្តរបស់ខ្ញុំទាំងអស់នៅជុំវិញពិភពលោក ចែកចាយដំណឹងល្អដែលបានស្ដារឡើងវិញជាមួយមិត្តរបស់ពួកគេ ។