អំណាចការផ្លាស់ប្រែចិត្តជឿនៃព្រះគម្ពីរមរមន
ដោយអែលឌើរ ខេវីន អេស ហាមីលថុន
នៃពួកចិតសិបនាក់
សេចក្ដីពិតទាំងអស់នៃដំណឹងល្អនឹងជាការណ៍ត្រឹមត្រូវ នៅពេលយើងបានដឹងថា មូលដ្ឋាននៃទីបន្ទាល់របស់យើង — ដែលជាព្រះគម្ពីរមរមននោះ — គឺពិត ។
កាលនៅក្មេង ខ្ញុំចូលចិត្តដាក់តម្រៀបដូមីណូជាជួរវែងដោយរៀបចំយ៉ាងប៉ិនប្រសប់ រួចហើយរុញបន្ទះដូមីណូដំបូងគេឲ្យរលំ ។ ប្រតិកម្មមកពីការបន្ទាក់គ្នានោះ នឹងបណ្ដាលឲ្យដូមីណូដែលតៗគ្នានិមួយៗរលំលើគ្នាតពីមួយទៅមួយរហូតដល់ចុងគេ ។ ខ្ញុំនឹងចំណាយពេលរៀបចំដូមីណូដោយយកចិត្តទុកដាក់តាមកន្លែងដើម្បីរីករាយមើលឃើញវារលំចុះ ។
ទីបន្ទាល់អំពីព្រះគម្ពីរមរមន គឺជាជំហានមួយដំបូងគេ ក្នុងការទទួលទីបន្ទាល់នៃដំណឹងល្អរបស់ព្រះយេស៊ូវគ្រីស្ទ ។ ដរាបណាដូមីណូទីមួយធ្វើឲ្យដូមីណូដទៃទៀតរលំតៗគ្នាពីដំបូងមក បើយើងបានស្គាល់ថា ព្រះគម្ពីរមរមនពិត នោះយើងក៏អាចដឹងថា ព្រះយេស៊ូវគ្រីស្ទ គឺជាព្រះអង្គសង្គ្រោះ និងជាព្រះប្រោសលោះរបស់យើងដែរ ក៏ដឹងថា យ៉ូសែប ស៊្មីធ គឺជាព្យាការីរបស់ទ្រង់ ដែលបាននាំឲ្យមានការស្ដារឡើងវិញ ហើយក៏ដឹងថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្រពិតនៃព្រះយេស៊ូវគ្រីស្ទ ដែលត្រូវបានស្ដារឡើងវិញដោយព្រះចេស្ដា និងសិទ្ធិអំណាចនៅលើផែនដីសព្វថ្ងៃនេះ ។
ព្រះគម្ពីរមរមនគឺជាចំនុចសំខាន់នៃសារលិខិតរបស់យើង
ស្ដីអំពីព្រះគម្ពីរមរមន ព្យាការី យ៉ូសែប ស្ម៊ីធ បានមានប្រសាសន៏ថា « ខ្ញុំបានប្រាប់បងប្អូនទាំងឡាយថា ព្រះគម្ពីរមរមន គឺជាគម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ ហើយជាមូលដ្ឋាននៃសាសនាចក្ររបស់យើង ហើយបុគ្គលម្នាក់ៗអាចចូលទៅជិតព្រះបាន ដោយសារការធ្វើតាមសិក្ខាបទទាំងឡាយនៃគម្ពីរដទៃទាំងអស់ » ។១
យ៉ូសែប បានបង្រៀនបន្ថែមទៀតថា វាសំខាន់ចំពោះសេចក្ដីជំនឿ ជំនឿ និងទីបន្ទាល់របស់យើង ។ លោកបានមានប្រសាសន៍សួរថា « បើដកព្រះគម្ពីរមរមន និងវិវរណៈចេញ តើសាសនារបស់យើងនៅកន្លែងណា ? » « យើងគឺគ្មានអ្វីទាល់តែសោះ » ។២
ភាពស្រស់ស្អាតនៃសារលិខិតដំណឹងល្អ គឺថាយើងម្នាក់ៗ អាចដឹងដោយខ្លួនយើងថា ព្រះគម្ពីរមរមន គឺពិត ។
ក្នុងនាមជាប្រធានបេសកកម្មនៅប្រទេសបារាំង បែលហ្ស៊ិក និង ហូឡង់ជាច្រើនឆ្នាំកន្លងទៅ ខ្ញុំមានឯកសិទ្ធិ និងពរជ័យដើម្បីសម្ភាសបុគ្គលម្នាក់ៗអំពីភាពសក្ដិសមដើម្បីទទួលបុណ្យជ្រមុជទឹក ។ ខ្ញុំនឹងពុំភ្លេចនូវការសម្ភាសមួយដែលខ្ញុំមានជាមួយនឹងបងស្រីម្នាក់បានឡើយ ។
អំឡុងការសម្ភាសរបស់យើង ខ្ញុំបានសួរគាត់ថាតើគាត់បានដឹងថាសាសនាចក្រពិតដោយរបៀបណា ។ គាត់បានលូកដៃចូលកាបូបដៃរបស់គាត់ ហើយបានដកយកព្រះគម្ពីរមរមនចាស់មួយក្បាលចេញមក ។ គាត់បានបើកគម្ពីរទៅនីហ្វៃទី ៣ ២៧ហើយបានពន្យល់ថា នេះគឺជាជំពូកទីមួយដែលអ្នកផ្សព្វផ្សាយសាសនាបានអញ្ជើញឲ្យគាត់អាន ។ គាត់បានប្រាប់ថា នៅពេលគាត់បានចាប់ផ្ដើមអាន គាត់បានទទួលនូវអារម្មណ៍បំផុសដ៏អស្ចារ្យមកពីអ្វីដែលគាត់បានអាន ហើយគាត់បានដឹងនូវព្រះវិញ្ញាណក្នុងអារម្មណ៍ ។ គាត់បានពោរពេញដោយព្រះវិញ្ញាណអំពីព្រះគម្ពីរមរមន ដែលគាត់បានដកយកខ្មៅដៃក្រហមចេញ មក ហើយបានចាប់ផ្ដើមគូសបន្ទាត់ពីក្រោមពាក្យដែលធ្វើឲ្យគាត់ចាប់អារម្មណ៍បំផុត ។
បន្ទាប់មក គាត់បានបង្ហាញព្រះគម្ពីរមរមនមកដល់ខ្ញុំ បើកទៅនីហ្វៃទី ៣ ២៧។ ស្ទើរតែគ្រប់ពាក្យក្នុងជំពូកនោះ ត្រូវបានគូសបន្ទាត់ពណ៌ក្រហមពីក្រោម ។
គាត់បាននិយាយថា « នោះជាហេតុផល ដែលខ្ញុំជឿ » ។ « គម្ពីរនេះនិយាយមកកាន់ខ្ញុំតាមរបៀបមួយដែលពុំអាចបដិសេធបានឡើយ ។ ខ្ញុំដឹងថាវាជាការពិត ហើយខ្ញុំដឹងថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយពិត » ។
គាត់បានទទួលបុណ្យជ្រមុជទឹក ហើយបានក្លាយជាសមាជិកស្មោះត្រង់ក្នុងសាសនាចក្រ ។
បុព្វកថានៃព្រះគម្ពីរមរមន
បុព្វកថានៃព្រះគម្ពីរមរមន ផ្ដល់ដល់យើងនូវគំរូមួយ ដែលយើងអាចដឹងដោយខ្លួនយើងថា សារលិខិតដំណឹងល្អគឺពិត ។ បុព្វកថា « គឺត្រូវបានបោះពុម្ពដំបូងនៅក្នុងការកែសម្រួលនៃព្រះគម្ពីរមរមន ឆ្នាំ ១៩៨១ ។ វាណែនាំព្រះគម្ពីរមរមនទៅកាន់អ្នកអានសម័យទំនើបដោយការផ្ដល់នូវជីវប្រវត្តិព័ត៌មាន និងការពិពណ៌នាអំពីគម្ពីរ » ។៣
បុព្វកថា ចាប់ផ្ដើមដោយប្រាប់យើងយ៉ាងលម្អិតថា ព្រះគម្ពីរមរមន គឺជា ៖ « ភាគនៃគម្ពីរពិសិដ្ឋមួយប្រៀបបានទៅនឹងព្រះគម្ពីរប៊ីប ។ ព្រះគម្ពីរនេះ គឺជាបញ្ជីប្រវត្តិអំពីការទំនាក់ទំនងនៃព្រះចំពោះប្រជាជនជំនាន់ដើមនៃទ្វីបអាមេរិក ហើយវាមាននូវភាពពោរពេញនៃដំណឹងល្អដ៏អស់កល្បជានិច្ច » ។ យើងដឹងថា វា « ត្រូវបានសរសេរដោយពួកព្យាការីបុរាណជាច្រើន ដោយវិញ្ញាណនៃការព្យាករ និងវិវរណៈ » នៅលើផ្ទាំងមាសទាំងឡាយ ហើយសង្ខេបដោយ « ព្យាការី-ប្រវត្តិសាស្ត្រម្នាក់ មាននាមថា មរមន » ។
គំនូរ យ៉ូសែប ស៊្មីធ ដោយរីឆាត ប៊ើដ ទទួលបានសិទ្ធិអនុញ្ញាតមកពីសារៈមន្ទីរប្រវត្តិសាស្ត្រសាសនាចក្រ ខាងស្ដាំ ៖ រចនាលម្អដោយ បិន សូវើតស៍
យើងក៏បានដឹងផងដែរថា « ព្រឹត្តិការណ៍ដ៏សំខាន់បំផុត ដែលមានកត់ត្រាទុកក្នុងព្រះគម្ពីរមរមន គឺជាការងារបម្រើនៃព្រះអម្ចាស់យេស៊ូវគ្រីស្ទផ្ទាល់នៅក្នុងចំណោមពួកសាសន៍នីហ្វៃ បន្ទាប់ពីទ្រង់មានព្រះជន្មរស់ឡើងវិញ ។ ព្រះគម្ពីរនេះនាំមកនូវគោលលទ្ធិទាំងឡាយនៃដំណឹងល្អ ផ្ដល់នូវចំណុចសំខាន់អំពីផែនការនៃសេចក្ដីសង្គ្រោះ ហើយប្រាប់ដល់មនុស្សទាំងឡាយអំពីអ្វីដែលគេត្រូវធ្វើដើម្បីឲ្យបានទទួលសេចក្ដីសុខសាន្ដនៅក្នុងជីវិតនេះ និងសេចក្ដីសង្គ្រោះដ៏នៅអស់កល្បជានិច្ចនៅក្នុងជីវិតខាងមុខ » ។
រឿងដ៏សំខាន់បំផុតមួយដែលយើងអាចរៀនមកពីព្រះគម្ពីរមរមន គឺថា សាសនាចក្រដែលត្រូវបានស្ដារឡើងវិញដោយព្រះយេស៊ូវគ្រីស្ទ តាមរយៈ យ៉ូសែប ស៊្មីធ គឺជាសាសនាចក្រដ៏ពិត ។
បុព្វកថា អញ្ជើញយើង «ឲ្យអានព្រះគម្ពីរមរមន ដើម្បីពិចារណានៅក្នុងដួងចិត្ត [ របស់យើង ] អំពីសារលិខិតដែលមាននៅក្នុងនោះ រួចហើយទូលសួរដល់ព្រះ ជាព្រះវរបិតាសួគ៌ នៅក្នុងព្រះនាមនៃព្រះគ្រីស្ទ បើគម្ពីរនេះពិត » ។ យើងត្រូវបានសន្យាថា « អស់អ្នកណាដែលធ្វើតាមបែបនេះ ហើយសូមសួរដោយសេចក្ដីជំនឿ នោះនឹងបានទទួលសេចក្ដីបន្ទាល់អំពីសេចក្ដីពិត និងទេវភាពរបស់គម្ពីរនេះ ដោយព្រះចេស្ដានៃព្រះវិញ្ញាណបរិសុទ្ធ ។ ( សូមមើល មរ៉ូណៃ ១០:៣–៥ ) » ។
ការសន្យាបន្ថែមទៀតនេះមានដូចខាងក្រោម ៖ « អស់អ្នកណាដែលបានទទួលទីបន្ទាល់ដ៏ប្រសើរពីព្រះវិញ្ញាណបរិសុទ្ធ ក៏នឹងបានដឹងដោយសារព្រះចេស្ដាដដែលថា ព្រះយេស៊ូវគ្រីស្ទ គឺជាព្រះអង្គសង្គ្រោះនៃពិភពលោកថា យ៉ូសែប ស៊្មីធ គឺជាអ្នកទទួលវិវរណៈ និងជាព្យាការីរបស់ទ្រង់ នៅជាន់ចុងក្រោយបង្អស់ ហើយថាសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ គឺជានគរនៃព្រះអម្ចាស់ ដែលបានសាងឡើងវិញម្ដងទៀតនៅលើផែនដី ដើម្បីរៀបចំសម្រាប់ការយាងមកជាលើកទីពីរនៃព្រះមែស៊ី » ។
សូមគិតពីការណ៍នេះ ! យើងអាចដឹងដោយខ្លួនយើងដោយពិត ៖
-
ព្រះយេស៊ូវគឺជាព្រះគ្រីស្ទ ព្រះអង្គសង្គ្រោះនៃពិភពលោក និងជាព្រះប្រោសលោះនៃមនុស្សលោកទាំងអស់ ។
-
យ៉ូសែប ស៊្មីធ គឺជាព្យាការីពិត ។ លោកប្រាប់អំពីសេចក្ដីពិត ។ លោកបានឃើញនូវអ្វីៗដែលលោកបានប្រាប់ថា លោកបានឃើញ និងស្ដាប់ឮនូវពាក្យទាំងឡាយ ដែលលោកបាននិយាយថាលោកបានស្ដាប់ឮ ។
-
« ព្រះអម្ចាស់បានប្រកាសថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជា ‹ សាសនាចក្រតែមួយដែលពិត ហើយសកម្មនៅលើផ្ទៃផែនដីទាំងមូល › ( គ. និង ស. ១:៣០ ) ។ វាគឺជាសាសនាចក្រនៃព្រះគ្រីស្ទ ។ វាមានសេចក្ដីពិត អំណាច សិទ្ធិអំណាច និងពិធីបរិសុទ្ធទាំងឡាយ ។ វាត្រូវបានដឹកនាំដោយព្រះអម្ចាស់ទ្រង់ផ្ទាល់ និងព្រះអង្គសង្គ្រោះព្រះយេស៊ូវគ្រីស្ទ តាមរយៈពួកព្យាការីនៅរស់ទាំងឡាយ ។
អ្វីៗទាំងអស់នេះ យើងអាចដឹង នៅពេលយើងដឹងថា ព្រះគម្ពីរមរមនគឺពិត ។ វាមាននូវអំណាចនៃការផ្លាស់ប្រែចិត្តជឿ និងការបញ្ចុះបញ្ចូល ។
ទីបន្ទាល់របស់ខ្ញុំអំពីព្រះគម្ពីរមរមន
ក្នុងនាមជាអ្នកផ្សព្វផ្សាយសាសនាវ័យក្មេងបម្រើនៅក្នុងប្រទេសបារាំង ខ្ញុំចង់ដឹងដោយខ្លួនឯងថា ព្រះគម្ពីរមរមនពិតឬអត់ ។ ខ្ញុំបានជឿថា វាពិត ។ ខ្ញុំបានសង្ឃឹមថា វាពិត ។ ខ្ញុំបានចេញទៅបេសកកម្មដោយសេចក្ដីជំនឿថា វាពិត ។ ទោះជាយ៉ាងណាក៏ដោយ នៅពេលខ្ញុំធ្វើការពីមួយថ្ងៃទៅមួយថ្ងៃក្នុងនាមជាអ្នកផ្សព្វផ្សាយសាសនា ហើយបានប្រាប់គេឯងអស់ពីសមត្ថភាពរបស់ខ្ញុំ ដោយភាសាបារាំងទាំងលំបាកថា ខ្ញុំមានទីបន្ទាល់អំពីព្រះគម្ពីរ ក៏ខ្ញុំនៅតែមិនដឹង ច្បាស់ដោយខ្លួនខ្ញុំដែរ ។
ផ្ទះតូចរបស់យើងស្ថិតនៅភាគខាងត្បូងប្រទេសបារាំង ត្រជាក់ ហើយសើមនៅក្នុងរដូវត្រជាក់ដំបូងនោះ ។ នៅរាល់ព្រឹកនិងរាល់ល្ងាច ពីមុន និងក្រោយពីកិច្ចការនៅថ្ងៃនោះ ខ្ញុំតែងតែគ្រលំក្នុងភួយ ហើយឃ្លុំអាវរងារដើម្បីអាន និងសិក្សាព្រះគម្ពីរមរមនរបស់ខ្ញុំ ។ ខ្ញុំដឹងអំពីការសន្យារបស់មរ៉ូណៃ ថាបើខ្ញុំអាន ពិចារណា និងអធិស្ឋាន ខ្ញុំក៏អាចដឹងផងដែរ ។ ដ្បិតនៅថ្ងៃ និងសប្ដាហ៍ដែលខ្ញុំអាន គ្មានអ្វីកើតឡើងទេ ។ គ្មានឃើញពន្លឺ គ្មានទេវតា គ្មានសំឡេងអ្វីទាំងអស់ — ក្រៅពីអារម្មណ៍នៃភាពសុខសាន្ដពេលខ្ញុំអានឡើយ ។
ខ្ញុំបានបន្ដអាន និងគូសបន្ទាត់ពីក្រោមវគ្គគម្ពីរដែលមានអត្ថន័យ ហើយអធិស្ឋានដើម្បីដឹងថា ព្រះគម្ពីរមរមនគឺពិត ។ អព្ភូតហេតុបានកើតមានឡើងនៅទីបំផុត ។ ដូចជាអែលឌើរ ដាវីឌ អេ បែដណា នៃកូរ៉ុមនៃពួកសាវកដប់ពីរនាក់ បានពិពណ៌នាថា វាគឺដូចជាព្រះអាទិត្យរះឡើងសន្សឹមៗ ជាជាងដូចជាការបើកភ្លើងឆេះធ្លោឡើង ។៤ ពន្លឺបានចាប់ផ្ដើមបំភ្លឺគំនិត និងដល់ដួងចិត្តរបស់ខ្ញុំ ។ ខ្ញុំបានចាប់ផ្ដើមមើលឃើញព្រះគម្ពីរមរមនតាមរបៀបផ្សេងមួយ ។ វគ្គគម្ពីរដែលខ្ញុំបានអានពីមុន បានចាប់ផ្ដើមមានន័យអ្វីមួយថ្មី ។ វិធីល្អបំផុតដែលខ្ញុំអាចពិពណ៌នាអំពីបទពិសោធន៍ គឺថា គំនិតរបស់ខ្ញុំត្រូវបានចាប់ផ្ដើមបំភ្លឺ ។
អស់រយៈពេលជាច្រើនសប្ដាហ៍ និងច្រើនខែក្រោយមក ខ្ញុំអាចនិយាយថា ខ្ញុំបានដឹងច្រើនជាងអ្វីៗដែលខ្ញុំធ្លាប់ដឹងពីមុនថា ព្រះគម្ពីរមរមនគឺជាព្រះបន្ទូលរបស់ព្រះ ។ ខ្ញុំបានដឹងថា វាត្រូវបានសរសេរឡើង និងរក្សាទុកសម្រាប់ជំនាន់របស់យើង ហើយត្រូវបាននាំចេញមកជាសាក្សីដ៏មានអានុភាពនៃព្រះយេស៊ូវគ្រីស្ទ និងសាសនាចក្ររបស់ទ្រង់ ។ ចំណាប់អារម្មណ៍ដែលបានផុសចេញមកដល់ខ្ញុំម្ដងហើយម្ដងទៀត តាមរយៈសំឡេងនៃព្រះវិញ្ញាណគឺថា « វាពិត វាពិត វាពិតគ្រប់យ៉ាង » ។
អស់រយៈពេលសែសិបឆ្នាំក្រោយមក សាក្សីដដែលនោះបានបន្ដមាននឹងខ្ញុំ ។ ឥឡូវខ្ញុំបានអានព្រះគម្ពីរមរមនជាច្រើនដង ហើយរាល់ពេល — រាល់លើក — ខ្ញុំបានស្ដាប់ឮពាក្យថា « វាពិត » ម្ដងទៀត ។ ការណ៍នេះត្រូវបានផ្ដល់ឲ្យខ្ញុំនូវការបញ្ជាក់អះអាងថា ព្រះយេស៊ូវគ្រីស្ទ គឺជាព្រះអង្គសង្គ្រោះរបស់ខ្ញុំ ហើយថានេះគឺជាកិច្ចការនៃសេចក្ដីសង្គ្រោះដ៏អស្ចារ្យរបស់ទ្រង់ ។
ក៏ដូចជាដូមីណូ ដែលខ្ញុំចូលចិត្តលេងកាលពីនៅក្មេងដែលវា រលំចុះទាំងអស់ នៅពេលខ្ញុំរុញដូមីណូទីមួយឲ្យរលំដែរ នោះវាក៏ដូចគ្នានឹងសេចក្ដីពិតទាំងអស់នៃដំណឹងល្អ ដែលវាត្រឹមត្រូវ នៅពេលយើងបានដឹងថា មូលដ្ឋាននៃទីបន្ទាល់របស់យើង — ដែលជាព្រះគម្ពីរមរមននោះ — គឺជាការពិត ។