ខ្ញុំបានទទួលស្គាល់ព្រះបន្ទូលនៃព្រះ
ហូសេ អ៊ីវ៉ានីលដូ ម៉ាទីអាស ហ្វើណានដេស ទីក្រុងសៅ ផាឡូ ប្រទេសប្រេស៊ីល
រូបភាពលម្អដោយ អេលែន ហ្គានស៍
ខណៈដែលនៅក្នុងអាកាសយាន្ដដ្ឋានជាច្រើនឆ្នាំមុន នៅទីក្រុងសៅ ផាឡូ ប្រទេសប្រេស៊ីល ខ្ញុំបានឃើញសៀវភៅមួយក្បាលនៅក្នុងកន្លែងដាក់សៀវភៅតាំងក្នុងហាងសៀវភៅមួយ មានចំណងជើង « ព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទ » ។ ខ្ញុំបានឆ្ងល់ថានៅក្នុងពិភពលោកដែលពោរពេញដោយភាពអសីលធម៌ និងគ្មានការដឹកនាំនេះ នឹងទទួលយកសក្ខីបទមួយទៀតអំពីព្រះយេស៊ូវគ្រីស្ទឬទេ ហើយខ្ញុំបានចំណាយពេលចុងសប្ដាហ៍គិតអំពីសៀវភៅនេះ ។
ទីបំផុត ខ្ញុំពុំអាចស៊ូទ្រាំសង្ស័យទៀតបាន ខ្ញុំបានត្រឡប់ទៅហាងសៀវភៅនោះទិញវា ។ ទោះជាយ៉ាងណាក៏ដោយ ពេលខ្ញុំមកដល់ ខ្ញុំរកវាពុំឃើញទេ ។ ខ្ញុំបានពិពណ៌នាអំពីសៀវភៅនោះទៅអ្នកលក់ក្នុងហាង ប៉ុន្តែគាត់បាននិយាយថា គាត់ពុំដែលមើលឃើញវាទេ ។ គាត់ពុំអាចរកឃើញនៅក្នុងកំណត់ត្រាណាមួយសោះ ទោះជាសៀវភៅទាំងអស់ដែលដាក់តាំងនៅហាងក្នុងតាឡុកក្ដី ។
ពេលក្រោយមក នៅក្នុងឱសថស្ថានមួយកន្លែង ខ្ញុំបានកត់សម្គាល់ឃើញសៀវភៅមួយក្បាលបើកចំហរនៅលើតុមួយ ។ នៅពេលខ្ញុំចាប់ផ្ដើមអានវា ខ្ញុំបានដឹងអំពីបុរសម្នាក់ដែលឈ្មោះកូរីហូរ ដែលនៅតែនិយាយថា គាត់សង្ស័យអំពីព្រះចេស្ដារបស់ព្រះ ហើយទីបំផុតត្រូវបានក្លាយជាគ ។ នៅពេលខ្ញុំបាននឹកគិតអំពីពាក្យទាំងឡាយដែលខ្ញុំអាន ខ្ញុំបានដឹងថាគឺមកពីព្រះ ។
អំឡុងពេលនេះ ខ្ញុំកំពុងតែស្វែងរកការដឹកនាំមកពីព្រះ ។ នៅថ្ងៃមួយ ខ្ញុំបានលុតជង្គង់ ហើយបានអធិស្ឋានយ៉ាងក្លៀវក្លាទូលសូមដល់ព្រះឲ្យបង្ហាញខ្ញុំនូវផ្លូវត្រូវដែលនឹងនាំខ្ញុំទៅរកទ្រង់ ។ ប៉ុន្មានថ្ងៃក្រោយមក កូនប្រុសរបស់ខ្ញុំបានធ្លាក់ខ្លួនឈឺ ដូច្នេះខ្ញុំបានត្រឡប់ទៅហាងឱសថនោះវិញ ។ ពេលខ្ញុំហៀបនឹងចេញពីហាង នោះមានយុវជនជនជាតិអាមេរិកកាំងបីនាក់ ពាក់ស្លាកឈ្មោះដើរចូលមក ។ រំពេចនោះខ្ញុំមានអារម្មណ៍កក់ក្ដៅនៅក្នុងទ្រូង ដែលបានបំផុសគំនិតខ្ញុំឲ្យនិយាយទៅពួកគេ ។
ពួកគេបានប្រាប់ខ្ញុំថា ពួកគេនៅក្នុងប្រទេសប្រេស៊ីល ផ្សាយដំណឹងល្អអំពីព្រះយេស៊ូវគ្រីស្ទ ។ ខ្ញុំបានសួរថា តើពួកគេអាចបង្រៀនខ្ញុំបានឬទេ ហើយយើងបានដាក់កាលវិភាគណាត់ជួបគ្នាមួយ ។
នៅពេលខ្ញុំស្ដាប់ឮអំពីព្យាការី យ៉ូសែប ស៊្មីធ ជាលើកដំបូង ខ្ញុំបានដឹងថាការអធិស្ឋានរបស់ខ្ញុំត្រូវបានឆ្លើយតបហើយ ។ បន្ទាប់មកអ្នកផ្សព្វផ្សាយសាសនាបានឲ្យសៀវភៅមួយក្បាលមកខ្ញុំ ។ ជាការភ្ញាក់ផ្អើល វាគឺជាព្រះគម្ពីរមរមន — ដូចជាសៀវភៅមួយក្បាលដែលខ្ញុំបានឃើញនៅកន្លែងដាក់តាំងសៀវភៅនោះ ។ ជាថ្មីម្ដងទៀតខ្ញុំបានមានអារម្មណ៍កក់ក្ដៅដ៏ផ្អែមល្ហែម ហើយបានរីករាយជាខ្លាំង ដែលខ្ញុំពុំអាចថ្លែងបាន ។
អ្នកផ្សព្វផ្សាយសាសនា បានពន្យល់អំពីធាតុដើមនៃព្រះគម្ពីរ ហើយបានសុំឲ្យខ្ញុំអធិស្ឋាន រួចសួរដល់ព្រះ ថាតើវាជាព្រះគម្ពីរពិតដែរឬទេ ។ ខ្ញុំក៏បានដឹងយ៉ាងពិតប្រាកដអំពីទេវភាពនៃគម្ពីរនេះរួចទៅហើយ ដ្បិតព្រះអម្ចាស់បានបង្ហាញវាដល់ខ្ញុំ — ពីរដងរួចមកហើយ ។ ទោះជាយ៉ាងណាក៏ដោយ ខ្ញុំបានអានវាយ៉ាងយកចិត្តទុកដាក់បំផុត ។ ពេលអាន ជំពូក ១៧ នៅក្នុងនីហ្វៃទី ៣ ខ្ញុំបានដឹងថាវាមានរឿងដ៏ទេវភាពមួយ ដោយសារវាមាននូវព្រះបន្ទូលរបស់ព្រះយេស៊ូវគ្រីស្ទ ។
មូលដ្ឋានគ្រឹះនៃទីបន្ទាល់របស់ខ្ញុំគឺនៅត្រង់ការដឹងថា ព្រះគម្ពីរមរមនមាននូវព្រះបន្ទូលរបស់ព្រះ ។ វាបានផ្លាស់ប្ដូរខ្ញុំ ហើយបន្ដផ្លាស់ប្ដូរខ្ញុំ ។